இருபது ஆண்டு நிறைவு 19 - கசல் நாட்கள்

2nd engineer olaski 

கசல் – பகுதி மூன்று

முதன்மை இன்ஜினியர் ஷெட்டியின் வலி முகத்தில் தெரிந்தது. எமர்ஜென்சி ஜெனரேட்டரின் ரேடியட்டர் விசிறியில் தவறுதலாக கையை விட்டுவிட்டார்.

காப்டன் “சாட்டர்டே நான் உக்காந்து நீ தந்த மலையாள படத்த பாத்துட்டு இருந்தேன். பேசாம இருக்காமே, கைய கொண்டு உள்ள உட்டுட்டாரு”

“நேத்து வர டெய்லி போர்ட் இருந்துது, இனி ஒரு வாரம் ஆகுமே அடுத்த போர்ட் போக” எனக் கேட்டேன்.

“கம்பனிக்கும், சார்ட்டர்க்கும்* மெசேஜ் அனுப்பியிருக்கேன். போர்ட் ஆப் ஸ்பெயினில் இவர இறக்கிவிடுவோம்” என்றார். அறையை விட்டு வெளியே வர முடியாமல் மருந்துகளுடன் இருந்தவரை மூன்று நாளும் மாலை வேளைகளில் சந்தித்து அரைமணி நேரம் பேசிக்கொண்டிருந்தேன். முன்பு போஸ் தயாரித்து வலுக்கட்டாயமாக என்னிடம் கையெழுத்து வாங்கிய ரிப்போர்ட்டை என்னிடம் தந்தார். சிரித்துக்கொண்டே மடித்து பையில் வைத்தேன். “அத கிளிச்சி இப்பவே இந்த குப்ப தொட்டில போடு! வெக்காத, இந்த செகண்ட் இஞ்சினியர் கூட உனக்கு பிரச்சன ஒண்ணும் இல்லையே” என்றார்.

கப்பலில் நடந்த மாதாந்திர கூட்டத்தில், காஸ்மிக் எனெர்ஜி பற்றியும், தியானம் பற்றியும் சுருக்கமாக என்னிடம் சில நிமிடங்கள் பேச சொல்லியிருந்தார். அதை பற்றிய விரிவான விளக்கத்தை முன்பே கேட்டறிந்தவர் அவர். “உங்களுக்கு தவறான முன்னுதாரணமாக இருந்துவிட்டேன்” என வருந்தினார். இருபத்தி ஆறு ஆண்டுகள் முதன்மை இஞ்சினியராக இருந்து பணி ஓய்வு பெறும் நேரத்தில் விபத்தில் சிக்கிய குற்றஉணர்வுடன் இருந்தார்.

சார்ட்டர் ஒப்புதல் அளித்தபின் கப்பல் பயண பாதையை கொஞ்சம் திருப்பி டிரினிநாட் அண்ட் டோபாங்கோ தீவின் போர்ட் ஆப் ஸ்பெயினில் நங்கூரமிட்டு நிறுத்தி முதன்மை இஞ்சினியர் ஷெட்டி காங்க்வே வழியாக இறங்கி சென்றார். முகவர் அவரை மருத்துவ மனைக்கு அழைத்து செல்வார். மாலை ஆறு மணிவரை அங்கே காத்திருந்தோம். ஜெர்நைல் சிங் வந்துசேர்ந்ததும் கப்பல் புறப்பட்டது. நாற்பதாயிரம் டாலர்கள் வரை செலவாகியதாக சொன்னார் காப்டன்.

உடைந்துபோன ஜெனரேட்டரை சரி செய்யும் உபகரணங்கள், உதிரிபாகங்கள் மற்றும் இரும்பு பிளேட்கள் வந்திறங்கியது பிரேசிலில். சிங்கப்பூர் நிறுவனத்தை சார்ந்த பிலிப்பினோ இஞ்சினியர் தலைமையில் ஐவர் குழு அர்ஜெண்டினாவில் வந்திறங்கியது. காப்டன் எனது 6 G வெல்டிங் சான்றிதழை கேட்டார். அது கையில் இல்லை என்றேன. “நீ இல்லேன்னு சொல்லிட்டா, நான் கம்பனிக்கு சொல்ல முடியாது, வீட்டுக்கு போன் பண்ணி கப்பல் மெயில் ஐடிக்கு ஸ்கேன் பண்ணி அனுப்பச்சொல்லு” என்றார்.

 

முதன்மை இஞ்சினியர் ஜெர்நைல் சிங் “வெசல் மனேஜர் பிட்டர் வெல்டிங்கில் எப்படி, என்ன சர்டிபிகேட் இருக்கு என கேட்கிறார். ஓவர் ஹெட் வெல்டிங் மஸ்ட் பி குட், ஜெனரேட்டரின் ப்ளாக் ஆறு டன் உனக்க வெல்டிங் தான் நிக்கணும்” என்றார். ஜெர்நைல் சிங் போன்ற இஞ்சினியர் கூடவே இருந்தால் கப்பல் மறிஞ்சா கூட தூக்கி நிறுத்த முடியும். மிக நேர்மறை எண்ணங்களுடன் பகல் முழுக்க இயந்திர அறையில் யாருடனாவது, ஏதாவது வேலையை செய்துகொண்டே இருப்பவர். ஒலாஸ்கியுடன் விவாதித்து “லோ ஹைட்ரஜன் வெல்டிங் ராட்ல லிப்டிங் ஐயை வெல்டிங் அடித்தால் ஸ்ட்ராங் ஆக இருக்கும்” என முடிவுசெய்தோம். அதற்காக சில நாட்கள் பிராக்டிஸ் செய்யவும் செய்தேன்.

Training session by chief engineer Jernail Singh

பிலிப்பினோ இஞ்சினியர் சொன்னபடி இருபத்தியைந்து மில்லிமீட்டர் தடிமனான இரும்பு பிளேட்டில் லிப்ட்டிங் செயின் ப்ளாக்கை பொருத்த வேண்டிய ஐ மற்றும் வேறு பாகங்கள் காஸ் கட்டிங் முறையில் வெட்டி தயார் செய்தபின் ஓவர் ஹெட் வெல்டிங் அடிக்கும் வேலை.

போசன் ரொனால்டோ மற்றும் டெக் பணியாளர்கள் வந்து பலகையால் ஆன ஸ்டேஜ் ஒன்றை கட்டி தந்தனர். அதன் மேல் நின்றுகொண்டு உயரம் சரியாக இருப்பதை உறுதி செய்தார்.

சீப் இஞ்சினியர் “டேக் ஆல் செப்டி ப்ரிக்காசான்ஸ், மேல போய் ஒரு ரன் மட்டும் அடிச்சிட்டு என்ன கூப்பிடு” என்றார். பத்து மீட்டர் உயரத்திற்கு மேலுள்ள தளத்தின் இரும்பு பிளேட்டின் அடிப்பாகத்தில் தடிமனான ஐயை பொருத்தி வெல்டிங் அடித்தபின் சீப் இஞ்சினியரை அழைத்தேன். ஏணியில் ஏறி மேலே வந்தபின் “வெரி குட் கண்டினியு” என இறங்கினார். இரு தினங்கள் பலகைகளின் மேலமர்ந்து காலை ஆறு மணி முதல் மாலை ஆறு வரை வெல்டிங் வேலை. உடன் உதவிக்கு மோட்டர்மேன் டான், கீழே பயர் வாட்ச் செய்ய டெக்கிலிருந்து ஓஎஸ் சன்னி ஆகியோர் நின்றுகொண்டிருந்தனர்.

ஜெனரேட்டரின் ப்ளாக்கை தூக்கி கிராங் சாப்டை பொருத்தும் நாளன்று பத்தி சாப் “உனக்க வெல்டிங்க்கு இன்னைக்குதான் சர்டிபிகேட் கிடைக்கும்” என்றார்.

இருபது நாட்களுக்கு மேல் ஜெனரேட்டர் குழு பணியை முடித்து இயக்கியது. ஜெனரேட்டரின் உடைந்த பாகத்தை சரி செய்ய பிரேசிலின் மெட்டலோக் நிறுவனத்தை சார்ந்த ஒரு பணியாளர் மூன்று தினங்கள் எங்களுடன் பயணித்தார். கப்பலின் மேனேஜர் குலாலம்பூரிலிருந்து வந்து இரு தினங்கள் கப்பலில் தங்கியிருந்து பார்வையிட்டார். ஜெனரேட்டர் விபத்துக்கான காரணம் அறிய விசாரணையும், விவாதங்களும் நடந்துகொண்டிருந்தன.

ஒலாஸ்கி கப்பலுக்கு வந்த நாள் முதல் சனிக்கிழமை மூன்று மணிவரை வேலை, ஞாயிறுகளில் காலை பத்துமணிக்குமேல் ஓய்வு என முதன்மை இஞ்சினியரிடம் சொல்லிவிட்டார். எக்ஸ்சாஸ்ட் வால்வ் ஓவராலிங் தெரியுமா எனகேட்டபின் அதற்கான ஓரிங்குகள் இருக்கும் இடத்தை சொல்லி “டிராயிங் கையில் வைத்துகொள், சந்தேகம் இருந்தால் மட்டும் என்னை கூப்பிடு, ஐ ட்ரஸ்ட் யு” என்றார். லியோ லீடரில் இரண்டாம் இஞ்சினியர் ஷமீர் எக்ஸ்சாஸ்ட் வால்வ் வேலையை சொல்லி தந்தவர். “ஷாகுல் செய்ய வேலய எழுதி வெச்சிக்கோ” என சொன்னது நினைவில் வந்தது.

பிரேசில், மெக்ஸிகோ, கொலம்பிய துறைமுகங்களில் ஒலாஸ்கியுடன் வெளியே சென்று சுற்றிவிட்டு வருவோம். மெக்ஸிகோவின் வெராகுருஸ் வந்தபோது இஞ்சினில் எக்ஸ்சாஸ்ட் வால்வ் மாற்றவேண்டிய பணி இருந்தது. மதியம் இரண்டு மணிக்கு கப்பல் கரையணைந்தால் நான்கு மணிநேர வேலை வெளியே செல்வதாக திட்டம். கரையணைவதில் தாமதமாகி ஒன்பது மணிக்குமேல் எக்ஸ்சாஸ்ட் வால்வ் மாற்றும் பணியை துவங்கி இரண்டரை மணிநேரத்தில் முடித்தோம்.

நள்ளிரவு பன்னிரெண்டு மணியாகிவிட்டது. ஒலாஸ்கி “இனி வெளிய போவ முடியுமா”

 

இரவு உலகிற்கு தயாராகும் வெரா குரூஸ் 

“செகண்ட் உங்க இரவு உலகம் இங்க ராத்திரி பத்துமணிக்கு மேல தானே தொடங்குது, நான் இங்க போன வருசம் நிறைய ட்ரிப் வந்திருக்கேன், கிளம்புங்க போலாம்” என்றேன்.

“நூறு டாலர் கடன் வேணும்” என்றார்.

உலகின் மிக பாதுகாப்பான இடங்களில் ஒன்று வெராகுருஸ், சில இடங்களில் பகலிலேயே நடமாட முடியாது, மாலை ஐந்துமணிக்கு மேல் வீட்டிற்குள் முடங்கிவிடும் இடங்கள் இந்தியாவிலும் உண்டு. இங்கே தன்னந்தனியாக நள்ளிரவில் பெண்களும் நடமாட இயலும்.

அனைத்துவகை கேளிக்கைகளும் இங்கு உண்டு. இரவில் மட்டும் வாழும் இரவு விரும்பிகளுக்கான உணவகங்கள் இருட்டியபின் திறந்து அதிகாலை நான்கு மணிவரை வியாபாரம் நடக்கிறது. கேசினோ, மது, மாது மிக தாராளமாக இங்கே கிடைக்கும். இருள் சூழ்ந்தபின் கடலில் இறங்க மட்டும் அனுமதியில்லை. பகலில் பூங்காகளில் ஓருடலாய் படுத்தும், அமர்ந்தும் இருக்கும் காட்சிகள் இங்கே சாதாரணம்.

வாய்ப்பு கிடைக்கும் போதெல்லாம் காப்டன் கப்பலில் பார்ட்டிகள் நடத்தினார். சனிக்கிழமை மாலையில் அமர்ந்து சினிமா பார்க்கும்போது தமாதமாக வந்த இணைந்த காப்டன் “என்ன ஷாகுல் உற்சாகமே இல்ல க்ரூ சைடுல சப்தமே இல்ல” பிலிப்பினோக்கள் சனி மாலையில் கரோக்கே பாடி மகிழ்ந்திருக்கும் வேளை.

“காப்டன் சாப் சனிக்கிழம மாதிரியே தெரியல்ல”

“என்னடே வேணும் உனக்கு, ஜெப்ரிய கூப்பிடு ரெண்டு கேஸ் பீர், பார்காரன், சிப்ஸ் வெக்க சொல்லு” என்றபின் ஒலிபெருக்கியில் அறிவித்தார் “ஆல் ப்ரோசீட் டு க்ரூ மெஸ் ரூம் வி வில் ப்ளே ஹார்ஸ் ரேஸ்”.

 

Playing horse race

பிரேசிலின் பரணகுவாவில் கப்பல் நின்றிருந்தபோது காப்டன் “வெளிய போவல்லியா, போன வாரம்தான் கார்னிவல் பெஸ்டிவல் முடிச்சிருக்கு ஜஸ்ட் மிஸ், ரெடியாவு வெளிய பெயிற்று வரலாம் லோக்கல் புட் சாப்பிடணும்” என்றார்.

“செகண்ட் இஞ்சினியர் கொஞ்சம் வேலையா இருக்கார். முடிஞ்ச பொறவு போலாம்”

மூவருமாக காலாற நடந்துவிட்டு கடல் உணவுகளுக்கான கடைகள் எனக்கு நன்கு தெரிந்திருந்ததால் அங்கு அழைத்து சென்று இறால் மற்றும் மீன் சாப்பிட்டு வந்தோம்.

வேலைகள் இருந்தன நாட்கள் மிக எளிதாக, வேகமாக ஓடிக்கொண்டிருந்தது. மெக்ஸிகோ, கொலம்பியாவில் போதைபோருட்கள் கடத்தல் அதிகம். துறைமுகத்தில் நிற்கும் கப்பலில் யாரும் அறியாமலே தண்ணீருக்கு அடியில் சென்று போதை பொருள் பெட்டியை வெல்டிங் செய்துவிடுவார்கள். அடுத்த துறைமுகம் செல்லும்போது போதை கும்பல் எடுத்துகொள்ளும். இதை கப்பல்காரனோ, துறைமுகமோ, கப்பல் கம்பனிகளோ அறியாமல் நடக்கும். நிழல் உலகில் நடக்கும் வேலைகளை சாமானியர்கள் அறிவதே இல்லை.

வெனிசுலாவில் கப்பல் சென்றபின் அடுத்த ஐந்து துறைமுகம் செல்வதற்குள் அமெரிக்க செல்வதாக இருந்தால், முறையாக அமெரிக்க கடலோர காவல்படைக்கு தகவல் சொல்லி அமெரிக்க கடலில் நுழையும் முன் நங்கூரமிட்டு நிற்கவேண்டும். கடலோர பாதுகாப்பு படையினர் கப்பலுக்குள் வந்து சோதனை செய்வர். குறிப்பாக போதை பொருட்கள், சில நேரம் மோப்ப நாய்களும் உண்டு. பணியாளர்களிடம் தனித்தனியாக கேள்விகள் கேட்டு துளைப்பார்கள்.

பிறந்த தேதி, ஊர், வெனிசுலாவில் வெளிய சென்றுபோது யாரை சந்தித்தாய் என்பன போன்ற கேள்விகள். அதனாலேயே வெனிசுலாவில் கப்பல் பணியாளர்களை வெனிசுலாவின் போர்டோ கெபல்லோவில் வெளியில் செல்ல வேண்டாம் என அறிவுறுத்துவர்.

ஆறு மாதங்கள் நெருங்கும்போது விடுமுறை விண்ணப்பம் கொடுத்தேன். பத்தி சாப் “இப்ப ஏன் வீட்டுக்கு போறா, குட் டைம் ஆன்போர்ட் நவ், உனக்கும், செக்கண்டுக்கும் நல்லா ஒத்துபோவுது” என்றார்.

ஒரு வாரத்தில் காப்டன் விடுமுறை உறுதியான தகவலை சொல்லிவிட்டு “கரீனா கபூருக்கு கல்யாணத்துக்கு போக வேண்டிதான் ஷாகுல் ஊருக்கு போறான்” என்றார். சினிமா பார்க்கும் நேரங்களில் சர்தார் ஜோக்குகளை சர்தார்ஜிகளான பத்தி மற்றும் சீப் இஞ்சினியரிடம் சொல்வார். கப்பலின் காப்டனாக இருந்தாலும் சீனியரான ஜெர்நைல் சிங்கிடம் சில நேரங்களில் ஆலோசனையும் கேட்பார். நான் கப்பலில் இருந்து இறங்கும்முன் பணிந்து விடைபெற்ற மனிதர் சீப் இன்ஜியர் ஜெர்நைல் சிங்.

 

காப்டன் சீஃப் எஞ்சினியர்

ஆறுமாத முடிவில் 2012 அக்டோபர் மூன்றாம் தேதி அமெரிக்காவின் கால்வெஸ்டன் துறைமுகத்தில் இறங்கி ஹூஸ்டன் – தோகா – திருவனந்தபுரத்தில் இறங்கி வீடு போய் சேர்ந்தேன்.

நாஞ்சில் ஹமீது,

31 MAY 2025.

sunitashahul@gmail.com

சார்ட்டர்க்கும்* - சரக்கை கையாளும் நிறுவனம்.