இருபது ஆண்டு நிறைவு 12 - விபத்திலிருந்து மீண்ட கப்பல்

லியோ லீடர் பகுதி நான்கு

 

Costa cruise ship 

கப்பலின் பிரிட்ஜில் காப்டன், பைலட், முதன்மை அதிகாரி, மூன்றாம் அதிகாரி, கப்பலை ஓட்டும் ஸீ மேன், பாதுகாப்புக்காக கப்பலின் முன்னால் ஒரு டக் போட் என இத்தனை இருந்தும் மிஷிஷிமா மலையில் கப்பல் மோதி சிக்கிக் கொண்டது.

காப்டனின் அலறல் கேட்டு மஸ்டர் ஸ்டேஷன் வந்தபோது கப்பல் மலையில் நிற்பதை கண்டு ஒன்றுமே புரியவில்லை. தொடர் அலாரங்கள் அடித்துக்கொண்டே இருந்தது. இயந்திர அறைக்கு ஓடினேன். இரண்டாம் இஞ்சினியருடன் சேர்ந்து இயந்திர அறையிலுள்ள எல்லா தொட்டிகளையும் சவுண்டிங்* எடுக்க சொன்னார்கள்.

இயந்திர அறை தொட்டிகளின் எண்ணெய் மற்றும் நீரின் அளவில் எந்த மாற்றமும் இல்லை. முதன்மை அதிகாரி கப்பலின் முன்பகுதியில் உள்ள ஒரு அறையில் கடல்நீர் உள்ளே வந்துகொண்டிருக்கிறது என்றார். கப்பல் கடலில் மூழ்கும் அபாயம். மோட்டார்மேன் அலெக்ஸ் லைப் ஜாக்கெட்டை அணிந்து கடலில் குதித்து தப்பிக்க முயன்றதை, காப்டனின் உத்தரவு இன்றி யாரும் எதுவும் செய்யாதே என போசன் ரொனால்டோ கடிந்துகொண்டபின் அலெக்ஸ் எண்ணத்தை மாற்றி திரும்பி வந்தான்.

Bow thruster* அறைக்குள் வரத்தொடங்கிய கடல்நீர் கடலில் உள்ள நீரின் மட்டத்திற்கு மேல் உள்புகாததால் கப்பல் மூழ்கும் அபாயம் இல்லை. “டோன்ட் பேனிக்” என முதன்மை அதிகாரி விளக்கினார். மலையில் மோதி கப்பல் சிக்கிக்கொண்டபோது லோ டைட் எனும் குறைந்த நீர்மட்டமாக இருந்தது. கடலின் நீர் மட்டம் உயர்ந்தபோது (high tide) கப்பல் மிதந்து மலையிலிருந்து கடலுக்கு வந்தது. 

 

Bow thruster

இரவு முழுவதும் கப்பலின் போன் ஒலித்துக்கொண்டேயிருந்தது. ஜப்பானிய அதிகாரிகள் விசாரணைக்கு வந்தார்கள். நாள் முழுவதும் அங்கேயே நங்கூரம் பாய்ச்சி நின்ற கப்பல் மறுநாள்,  முந்தைய நாள் புறப்பட்ட மிஷுஷிமா துறைமுகம் நோக்கி திரும்பி பயணித்தது. அங்கே ஜெட்டியில் போசன் பறக்கவிட்ட புறா இறந்து கிடந்தது. டைவர்ஸ் (Divers) வந்து கடலில் மூழ்கி கப்பலில் அடியில் சென்று ஆய்வு செய்து படங்களை அனுப்பினர். கப்பலின் பல்போஸ் எனப்படும் மூக்குபகுதியில் ஏற்பட்ட பலத்த சேதத்தினால் ஓட்டை விழுந்து கப்பலுக்குள் தண்ணீர் வந்தது. கடல் நீர் உள்புகுந்த அறையின் கடல்நீரின் உயரத்திற்கு மேல் நீர் நிரம்பவில்லை. அதனுடன் தொடர்புடைய மற்ற அனைத்து அறைகளும் வாட்டர் டைட் கதவுகளால் இறுக்கமாக மூடியிருப்பதால் அந்த அறையை தவிர வேறங்கும் தண்ணீர் புகமுடியாத பாதுகாப்பு அம்சம் இருந்ததால் கப்பல் கடலில் மூழ்கும் அபாயத்திலிருந்து தப்பியது.

மிஷிஷிமா துறைமுகத்தில் ஏற்றிய இரண்டாயிரம் கார்களும் அங்கேயே இறக்கப்பட்டன. காலியான கப்பலை சற்று தள்ளி நங்கூரம் பாய்ச்சி நின்றோம். ஜப்பானிய கடலோர பாதுகாப்பு படை, எங்கள் நிறுவனம், கப்பலின் முதலாளியின் பிரநிதிகள் வந்து விசாரணை தொடர்ந்தது. காப்டன் ஜப்பானிலேயே வீட்டுக்கு அனுப்பப்பட்டார். காப்டன் அமர் சுக்லா வந்தார். காப்டன் சுரேந்திர மேத்தாவுக்கு ஜப்பான் நீதிமன்றத்தில் விசாரணைக்குப்பின் மனைவியுடன் வீடு போய் சேர்ந்தார். சில ஆண்டுகளுக்கு முன்பும் ஒருமுறை கப்பலை தரைதட்டி நிறுத்தியது விவாதத்திற்குள்ளானது.

மூன்றாம் இஞ்சினியர் ராஜுவின் குடும்பம் விமான நிலையத்திலிருந்து வீட்டுக்கு திரும்பி சென்றதாக சொன்னார். ஏழு நாட்களுக்குப்பின் கப்பல் மிக மெதுவான வேகத்தில் நகர்ந்து ஒரு நாள் பயணத்திற்குப்பின் சஷேபோ ட்ரை டாக் போய் சேர்ந்தோம்.

லியோ லீடர் கப்பல் ஷின்குருஷிமா எனும் கப்பல் கட்டும் தளத்தில் கட்டப்பட்டது. அங்கே இந்த கப்பலை பழுது பார்க்க சிலாட் கிடைக்கவில்லை. எனவே இடம் கிடைத்த சஷேபோவுக்கு வந்தோம். பல்போஸ் கப்பலின் மிக முக்கிய பகுதி மனித மூக்கின் வளைவை போல இருக்கும். கெட்டியான இரும்பால் ஆன அப்பகுதிதான் கடல் நீரை வெட்டி கிழித்து கப்பலை முன்னால் நகர்த்தும் முனை.

சஷேபோ, லியோ லீடர் கப்பலினுடைய பல்போசின் வரைபடத்தை ஷின்குருஷிமாவிடம் கேட்டது. ஷின்குருஷிமா கப்பல் கட்டும் தளத்தின் மேலதிகாரிகள் மட்டத்தில் விவாதித்து தங்களுடைய வரைபடத்தை வேறுயாருடனும் பகிர்ந்துகொள்வதில்லை என்ற பதிலை ஒரு நாள் கழிந்து அனுப்பினர்.

சஷேபோ கப்பல் கட்டுமான முதன்மை ஆர்க்கிடெக் இருபது நாட்களுக்கு மேல் அமர்ந்து சிக்கலான வளைவுகள், அளவு கொண்ட பல்போசின் படத்தை வரைந்து முடித்தார். கப்பல் யார்டில் தூக்கி நிறுத்தப்பட்டிருந்தது. இயந்திர அறையில் செய்ய வேண்டிய பராமரிப்பு பணிகள் அனைத்தும் செய்தோம். அதிக பளுவோ, கடினமோ இல்லை. கப்பலின் பணி முடியும் நாள் எங்கோ தூரத்தில் இருந்தது. வாரத்தில் இருமுறை நகருக்கு சென்று வருவோம். பணி முடிந்து மாலை ஐந்துமணிக்கு ரயில் நிலையத்தை ஒட்டிய திறந்தவெளி மைதானத்தின் கான்க்ரீட் நாற்காலியில் அமர்ந்துகொள்வேன். வாய்நோக்கல் தான் வேறொன்றும் இல்லை. 

 

Bulbous

வரைபடம் தயாரான மறுநாளே ஜப்பானிய பணியாளர்கள் சேதமடைந்த பல்போசை வெட்ட துவங்கினர். புதிய இரும்பு பிளேட்டுகள் பொருத்தி வெல்டிங் மூலம் இணைத்து பத்துநாளில் கப்பலை தண்ணீரில் இறக்கினர். ஒரு நாள் சோதனை ஓட்டத்திற்கு பின் கப்பல் கடலில் பயணிக்க தயாரானது. கடல் நீரின் பன்னிரெண்டு நாட்கள் மூழ்கியிருந்த Bow thruster மோட்டார் சர்வீஸுக்கு போனதில் நல்ல நிலையில் இருப்பது உறுதியானதும் முதலாளியின் பிரநிதி டக்காட்டா சான் மகிழ்ச்சியுடன் ஒரு லட்சத்து எழுபத்தி ஒன்பதாயிரம் டாலர்கள் மிச்சமானதாக சொன்னார்.

இந்த விபத்தால் கப்பலுக்கு கிடைக்கவேண்டிய நாற்பத்தியைந்து நாட்கள் வாடகை இல்லாமல் ஆனது. பழுதுபார்க்கும் செலவும் ஆனாலும் அவர்களுக்கு கைநட்டம் ஏதும் வராது. காப்பீடுகள் மற்றும் கப்பல் தொழில் மில்லியன் டாலர்களில் லாபம் வரும் தொழில்.

ஜப்பானிலேயே சரக்கு ஏற்றப்பட்டது. மூன்றாம் இஞ்சினியர் ராஜுவின் மனைவி ஹைமா, பத்து வயதான மகள் ஜோஷிகா, புதிய காப்டன் பங்களாதேசின் ரஹீம் உல்லா மற்றும் சில பணியாளர்கள் வந்தனர். அடுத்த பயணம் ஆஸ்திரேலியாவின் மெல்போர்ன், பிரிஸ்பேன், போர்ட் கெம்லாவுக்கு உறுதியானது.

மெல்போர்னில்...

மைக்கேல் மும்பையை சார்ந்த காடட். முதன்முறை இக்குவாடர் கோட்டை தாண்டுவதால் மண்டையை மழித்து நடத்தப்படும் சடங்கு சிறப்பாக நடத்தி சான்றிதழ் வழங்கினார் காப்டன். 

 

 

 

ஆஸ்திரேலியாவின் இரு துறைமுகங்களில் எனக்கு வெளியே செல்ல அனுமதி தந்தார் இரண்டாம் இஞ்சினியர் ஷமீர். மெல்போர்ன் கிரிக்கெட் மைதானம், அங்குள்ள ஸீ அக்கோரியம் பார்த்தோம். சிட்னி அருகிலுள்ள கெம்ப்லாவில் வெள்ளிக்கிழமை ஜும்மா தொழுகை கிடைத்தது. அங்கு கடல் முடிவில் உள்ள மலைகளின் பாலத்தில் நீண்ட கார் பயணதிற்கு நூறு டாலர்கள் செலவுசெய்து சென்றேன்.

கப்பலில் சமையல்காரர் பிரபீஸ் கிருஷ்ணா மூன்று ஆண்டு கேட்டரிங் படிப்புக்குப்பின் சென்னையில் பணிசெய்த அனுவபம் உள்ளவர். நன்றாக சமைத்து தந்தார். ராஜுவின் மனைவி “நீங்க எப்டி கப்பல்ல இந்த சாப்பாட தின்னு உயிர் வாழுறீங்க என தெரியல, ஊறுகாய் பாட்டில் மட்டும் இல்லேன்னா நான் பட்டினிதான்” என்றார்.

கப்பல் சிங்கப்பூர் வந்தபோது என் பணிநிறைவுபெற்றது. பத்திசாப், பிரபிஸ் கிருஷ்ணா, ராஜு, ஹைமா மகள் ஜோஷிகா ஆகியோர் இறங்கினோம். மறுநாள் விமானம். 

ஜோஷிகா

சிங்கப்பூரில் விடுதியறைக்கு இரவு பத்துமணிக்கு நண்பர் மணி வந்தார். பிரபீஸ் கிருஷ்ணாவுடன் அவரது காரில் லிட்டில் இந்தியாவின் முஸ்தபா வணிக வளாகம் சென்று ஷாப்பிங் செய்தோம். பிரபிஸ் கிருஷ்ணா அங்கிருந்து விடுதிக்கு செல்ல மணி அவரது இல்லம் அழைத்துசென்றார். அதிகாலை இரண்டுமணிக்கு சகோதரி மலர் இன்முகத்துடன் காபி கலந்துகொடுத்தார். “ஒரு வீட்டுக்கு வர நேராம இது” என நான் சொன்னபோது. “ரொம்ப வருசம் கழிச்சி வாறீங்க, நீங்க வீட்டுக்கு வந்தது சந்தோசம்” என்றார்.

2009 ஆம் ஆண்டு டிசம்பர் 22இல் பணியில் இணைந்து 16 ஜூலை 2010 இல் சிங்கபூரிலிருந்து இறங்கி சென்னை வழியாக திருவனந்தபுரம் விமானத்தில் சென்று வீடு போய் சேர்ந்தேன். ஞானத்தின் பிரம்மாணடம் நூலில் வாசித்த இமயமலை கற்பனையில் விரிந்துகொண்டே இருந்தது.

ராஜு அதன்பின் கப்பலை வேலையை விட்டுவிட்டு வியாபாரம் செய்யதொடங்கினார். மகள் ஜோஷிக்கா கலிபோர்னியாவில் மருத்துவ படிப்பை முடித்தார். இந்த கட்டுரை எழுதும்போது ஹைமாவை அழைத்து லியோ லீடர் படங்களை பிரசுரிக்க அனுமதி கேட்டேன்.

கேரளாவின் நண்பர் ஒருவர் இப்போது லியோ லீடரில் இருப்பதாக சொன்னார். பதினைந்து ஆண்டு நினைவுகளில் சென்று மீண்டேன். ஏதாவது ஒரு போட்டோ அனுப்புமாறு வேண்டினேன்.

 

சவுண்டிங் = தண்ணீர், எண்ணெய் தொட்டிகளில் உள்ள அளவை கணக்கிடுவது,
Bow thruster = புரோப்பல்லர் நீரை உந்தி தள்ளி கப்பலை முன்னால் அல்லது பின்னால் நகர்த்தும். Bow thruster கப்பலை இடம் அல்லது வலமாக பக்கவாட்டில் நகர்த்தும் சிறு புரோப்பல்லர். கப்பலை கரையில் கட்டும்போது இது இயக்கப்படும்.



நாஞ்சில் ஹமீது,

24–May-2025.

sunitashahul@gmil.com