இருபது ஆண்டு நிறைவு - 8 - லூயிஸ்

மெக்ஸிகோவில் 

ஐஜின் - பகுதி மூன்று – லூயிஸ்.

 தினமும் துறைமுகங்கள் ஆனதால் இங்கே ஸ்பானிஸ் பேசும் மக்களே அதிகமிருந்ததால், போர்ட் காப்டன் ஒருவர் - டேவிட் - வந்தார். கார்களை ஏற்றும், இறக்கும் கார்கோ சம்பந்தப்பட்ட விசயங்களை கவனித்துக் கொள்ள பத்து தினங்களுக்கு மேல் அவர் கப்பலிலேயே தங்கியிருப்பார் என கார்கோ நிறுவனம் மின்னஞ்சல் அனுப்பியது.

கப்பலில் லைஃப் போட் முழுக்கொள்ளளவு இருந்ததால் ஒருவரை அதிகமாக கப்பலில் ஏற்ற இயலாது. டெக் காடட் அப்ராஸ் கானின் பணி ஒப்பந்தம் முடிந்திருந்ததால் அவனை ஊருக்கு அனுப்புவது முடிவானது. கப்பலில் கார்களை கட்டி வைத்திருப்போம். எவ்வளவு பெரிய ரோல்லிங்கிலும் கார்கள் அசையாது. துறைமுகம் சென்றபின் அவற்றை அவிழ்க்கவும், கார்களை ஓட்டிச் செல்ல ட்ரைவர்கள் என நிறைய பேர்கள் கப்பலுக்குள் வருவார்கள். கார்களை ஏற்றிவைக்கும் கார் டெக்குகளில் உள்ள தீயணைப்பு குழாயிலுள்ள விலையுர்ந்த பித்தளை நாசில்களை திருடிச் செல்வது வாடிக்கை. ஒவ்வொரு கார் டெக்கிலும் அவர்களை கண்காணிக்க இருவர் பணியில் அமர்த்தப்பட்டோம். இருந்தும் மூன்று நாசில்கள் திருடு போயிருந்தது. ஆப்ரிக்கா, இந்தியா, கரீபியன் தீவுகளில் இவற்றை தடுக்க இயலவில்லை. ‘திருடனாய் பார்த்து திருந்தாவிட்டால் திருட்டை ஒழிக்க முடியாது’ பாடல் சரியே என் தோன்றியது.

டெக்கில் கார்கள் 

தினமும் துறைமுகம் இருந்ததால் முதன்மை அதிகாரிக்கு கடும் பணிகள். கால்களில் வலியாலும் உடல் நலமில்லாததாலும் படுத்துவிட்டார். மனோஜுடன் அவரது அறைக்கு சென்று பார்த்தோம். என்னிடம் இருந்த காயத்திருமேனி தைலத்தை ஒருமுறை அவரது காலில் போட்டுவிட்டு, இரவில் தூங்கும்முன் ஒருமுறை போடச் சொல்லிவிட்டு வந்தேன். மறுநாள் காலை எட்டு மணிக்கு கையில் என் தைலகுப்பியுடன் நடந்துவந்தார். “ஷாகுல் இட்ஸ் மேஜிக் ஆயில், ஐ ஆம் ஆல்ரைட்” என்றார்.

தென்னமெரிக்க நாடுகளில் சனிக்கிழமை மாலையானால் உற்சாகம் புரண்டோடும். சாலையோர உணவகங்களில் ஆண்களும், பெண்களும் ஜோடியாக அமர்ந்து அளவான மதுவருந்தியபின் வெட்டவெளியில் நடனமாடுவது மிக இயல்பாக இங்கே நடக்கிறது. எழுபது வயது தாத்தா, பாட்டியும் கைகளை கோர்த்து இசைக்கு ஏற்ப ஆடுவதை கண்டபோது, மிக தேர்ந்த நாட்டியக்காரர்கள் என்பது தெரிந்தது. குறிப்பாக மெக்ஸிகோவின் தட்பவெப்ப நிலை அவர்களது மாலைப் பொழுதை மிக உற்சாகமாக்குகிறது. இங்கு குளிர்காலமே இல்லை. பூமத்தியரேகையை ஒட்டி இருப்பதால் அஸ்தமனம் எப்போதும் எட்டு மணி வாக்கில் தான்.

 

துறைமுகத்தை ஓட்டிய நகரம் 

துறைமுத்தில் இருந்த நாட்களில் வாய்ப்பு கிடைத்தபோதெல்லாம் வெளியே சென்றோம். கப்பலை விட்டு இறங்கினால் சாலை. சிறு தடுப்புவேலியை மட்டும் தாண்டினால் போதும், ஊருக்குள் இறங்கி விடலாம். டாக்ஸியில் செல்ல வேண்டிய தேவையேயில்லை. 

மெக்ஸிகோ பீச்சில்...

ஒருமுறை நானும், நான்காம் இஞ்சினியரும் மெக்ஸிகோ துறைமுகத்தில் மதியம் ஒருமணிக்கு வெளியே சென்றோம். நான்கு மணிக்குள் கப்பலுக்குள் திரும்பி வரவேண்டும். ஷோர் லீவ் எக்ஸ்பைர் நேரம் கப்பலின் வாயிலில் எழுதப்பட்டிருக்கும். டிபார்ட்மெண்ட் ஹச் ஒ டியிடம் அனுமதி பெற்று தான் கப்பலை விட்டு செல்லவேண்டும்.o நான் முதன்மை அதிகாரி அஸ்லின் மிஸ்கிட்டாவிடமும், நான்காம் இஞ்சினியர் இரண்டாம் இஞ்சினியரிடம் சொல்லிவிட்டு சென்றோம். கப்பலின் வாயிலில் எங்களது பெயர், நேரம் எழுதிய பின் டுட்டி வாட்ச்மேன் ரேடியோவில், பிட்டர் அண்ட் போர்த் இஞ்சினியர் கோயிங் ஷோர் என சொல்லிவிடுவார்.

நாங்கள் வெளியே சென்று பேருந்தில் ஏறி சற்று தூரமாக சென்று சுற்றிவிட்டு, மால்களில் கறங்கிங்கிய பின் மூன்றே முக்காலுக்கு துறைமுகத்தில் நுழைந்து கப்பல் நிற்கும் ஜெட்டியை நெருங்கும்போது கப்பலின் ராம்ப் மூடப்பட்டு புறப்பட்டுகொண்டிருந்தது. பைலட் கப்பலில் இருந்து கயிறுகளை அவிழ்க்க உத்தரவு கொடுக்க துவங்கிவிட்டார். போசன் தாந்தே கையசைப்பது மங்கலாக தெரிய கப்பலை நோக்கி விரைந்து ஓடினோம். கரையிலிருந்த பணியாளர்கள் கயிறுகளை அவிழ்ப்பதை நிறுத்திவிட்டு எங்களை நோக்கி திரும்பினர். விரைந்து கப்பலின் அருகில் சென்றபோது காங்க்வேயில் முகவர் எங்கள் பாஸ்போர்ட், சிடிசியுடன் நின்றுகொண்டிருந்தார்.

கரைக்கு சென்ற இருவர் மெக்ஸிகோவில் தங்கிவிட்டனர் என தகவல் உறுதிசெய்யபட்டு எங்களது ஆவணங்கள் குடியுரிமை அதிகாரிகளிடம் ஒப்படைக்க சொல்லி முகவர் பெற்றுகொண்டு கப்பலை விட்டு இறங்கும் கடைசி வினாடியில் ஓடிச்சென்று கப்பலில் ஏறிக்கொண்டோம்.

கப்பல் நகர்ந்தபின் காப்டன், முதன்மை இஞ்சினியர் தலைமையில் அதிகாரப்பூர்வமாக விசாரணை நடந்தது. திரும்பி வர தமாதமானதற்கு காரணம் என்ன? என. ஷோர் லீவ் எக்ஸ்பைர் நான்கு மணிக்கு நாங்கள் சரியாக வந்தோம்.

“ஷோர் லீவ் எக்ஸ்பைர் இரண்டு மணிக்கு, நீங்கள் ஒரு மணிக்கு வெளியே சென்றீர்கள்”.

“நாங்கள் நான்கு மணி என நினைத்துதான் சென்றோம்”. விசாரணை முடிவில் இருவரின் பெயரும் ஷோர் லீவ் சட்டத்தை மீறியதாக லாக் புக்கில் எழுதப்பட்டு கம்பனிக்கு அனுப்பட்டது. தண்டனையாக அடுத்த மூன்று துறைமுகங்களில் வெளியே செல்ல எங்களுக்கு அனுமதி ரத்தானது.

பின்னர் காப்டன் “நான் பதறிவிட்டேன் வெளியில் சென்ற உங்களுக்கு என்ன ஆயிற்று என, நான் கப்பலை கொண்டு போயிருக்க மாட்டேன். கொஞ்சம் தள்ளி நங்கூரம் பாய்ச்சி நின்றிருப்பேன். இங்க பொம்பளைங்க ரொம்ப அழகா இருப்பாங்க, அத பாத்துட்டு சீக்கிரம் வரவேண்டியது தானே, நெக்ஸ்ட் டைம் பி ஹியர்  ஆன் டைம்” என்றார்.

அதாவது shore leave expire 1400 hrs என போர்டில் எழுதியிருந்ததை மாலை நான்கு மணி என நாங்கள் தவறாக புரிந்துகொண்டு வெளியில் சென்றுவிட்டோம்.

அடுத்த துறைமுகத்தில் வெளியே சென்று வந்த லூயிஸ் கடுமையான உளவியல் சிக்கலுக்கு ஆளாகி தூக்கத்தை இழந்தார். தினமும் காலையில் சந்திக்கும்போது இரவுகள் தூக்கமின்றி கழிவதாக சொன்னார். தூக்கத்திற்கான டிப்ஸ்களை சொல்லி கொடுத்தேன். தூக்கமில்லாததால் பகலில் அவரால் வேலை செய்ய முடியவில்லை. உணவும், தூக்கமும் இல்லாமல் ஆகிவிட்டார். அவருடன் அறையில் அமர்ந்து தனிமையில் பேசினேன். குற்ற உணர்ச்சிதான் காரணம் என புரிந்தது. காப்டனிடம் சொல்லி வீட்டுக்கு போக போகிறேன் என்றார். ஏழுமாத பணிஒப்பந்தத்தில் வந்தவர் மாதத்தில் மூன்று மாதத்தில் செல்வதாக இருந்தால் விமான சீட்டு தொகையை அளிக்க வேண்டும். தென்னமெரிக்காவிலிருந்து இரண்டாயிரம் டாலருக்கு மேல் ஆகும். அவரது ஒன்றரை மாத சம்பளம் அது. அவரை என் அறையில் மாலை மக்ரிப் தொழுகைக்குப்பின் அழைத்து ஹீலிங் கொடுத்தேன். தொடர்ந்து லூயிசிடம் பேசிக்கொண்டிருந்தேன். பத்து தினங்களில் மீண்டுவிட்டார். இரவில் தூங்கி இயல்பாக வேலை செய்யும் நிலைக்கு வந்துவிட்டார்.

Party time

 

துறைமுகம் இல்லாத நாட்களில் கப்பலில் பொழுதுபோக்கு சினிமா பார்ப்பதுதான். பிலிப்பினோ பணியாளர்கள் அவர்களது பொழுதுபோக்கு அறையில் கரோக்கே பாடி, சீட்டு விளையாடி, இசைக்கருவிகளை இசைத்து மகிழ்ந்திருப்பர். எனக்கும் இஞ்சின் பிட்டர் மனோஜிக்கும் மட்டுமே பகல் பணி. முதன்மை இஞ்சினியரை தவிர மற்றவர்களுக்கு காலை எட்டு முதல் ஐந்து மணி வரை. இன்ஜினியர்கள், மோட்டார்மேன்களுக்கு நான்கு மணிநேரம் என இருமுறை எட்டு மணி நேர வாட்ச் கீப்பிங்கும் இரண்டு மணிநேர ஓவர் டைம் இருப்பதால், பணியும் ஓய்வும் சரியாக இருக்கும. நானும் மனோஜும் தினமும் இரவுணவுக்குபின் ஒரு ஹிந்தி சினிமா பார்ப்போம். ஞாயிறு மதிய பிரியாணிக்குப்பின் ஓய்வாக இருந்தால் பின் மாலை மூன்று மணிக்கும் ஒரு படம் பார்ப்போம்.

மெக்ஸிகோவின் அக்கபுல்கோ சுற்றுலா மையம், பயணிகளை ஏற்றிய உல்லாச கப்பல்கள் நிறைய இங்கே வரும். சரக்கு ஏற்ற இங்கு வந்த போது பயணிகள் கப்பல் ஒன்று ஜெட்டியில் நின்றுகொண்டிருந்ததால் நாங்கள் சற்று தள்ளி நங்கூரம் பாய்ச்சி நின்றிருந்தோம். பகல் மூன்றுமணிக்கு கப்பலின் அவரசகால மணியோசை எழுப்பி காப்டன் ரேடியோவில் “எமெர்ஜென்சி ஆல் மஸ்டர் இன் மஸ்டர் ஸ்டேஷன்” என்றார்.

சுற்றுலா வந்த ஜோடி ஒன்று நீரில் செல்லும் மோட்டார் பைக்கில் கடலுக்குள் வந்தபோது மோட்டார்பைக் மூழ்கி விட்டது. அவர்கள் இருவரும் லைப் ஜாக்கெட் அணிந்திருந்ததால் மிதந்துகொண்டிருந்தனர். காப்டனின் உத்தரவுப்படி போசன் தலைமையில் கயிற்றை வீசி எறிந்து, பத்திரமாக மீட்டு கப்பலுக்குள் கொண்டு வந்து, கரையோர பாதுகாப்பு துறைக்கு தகவல் சொல்லி, படகு ஒன்று வந்து அவர்களை அழைத்து சென்றது. இது குறித்து ஒரு பதிவு எழுதியிருக்கிறேன்.

இக்குவாடார் நாட்டின் துறைமுகம் கரையணையும் போது கப்பலை சற்று முன்னரே திருப்ப உத்தரவிட்டார் பைலட். கப்பலின் வயிற்றுக்கு மேல்பகுதி ஜெட்டியில் பலமாக மோதியது. கப்பலில் நான் பார்த்த முதல் விபத்து. பிளேட் பலமாக மோதியதில் உள்பக்கமாக வளைந்து மூன்று பீம்கள் வளைந்து, தரை பகுதி இரும்பு பிளேட் (floor plate) மேலெழும்பி விட்டது. அதை அதை தற்காலிகமாக சரி செய்யும் பணி மனோஜ் தலைமையில் ஒப்படைக்கப்பட்டது. மிகுந்த அனுபவம் உள்ள மனோஜூடன் இணைந்து காலை ஆறு முதல் மாலை வரை பத்து நாட்களுக்கு மேல் செய்து முடித்தோம். அதனால் மகிழ்ச்சியடைந்த காப்டன் ஜாவித் அஹ்மத் தனது பணத்திலிருந்து ஆளுக்கு ஐம்பது டாலர்கள் வீதம் தந்தார்.

எனக்கு ஐந்தரை மாதங்கள் இருக்கும்போது ஊருக்கு செல்லும் ஆறுபேர் குழுவின் விடுமுறை உறுதியானபோனது நானும் விண்ணப்பித்தேன். எனக்கு ஆறு மாத பணி ஒப்பந்தத்தில் பிளஸ் மைனஸ் ஒரு மாதம். என்னையும் பனாமாவில் விடுவிப்பதாக சொன்னார்கள். மூன்றாம் இஞ்சினியர், மனோஜ், நான் மற்றும் நான்கு பிலிப்பினோ பணியாளர்கள் தயாராயினோம்.

லூயிஸ் வீட்டுக்கு செல்லும் முந்தைய நாள் என்னை சந்த்திதார் என்ன வேண்டும் கேள் என்றார். சிரித்தேன். “ஷாகுல் நீ யாருன்னு எனக்கு தெரியாது, உறக்கம் இல்லாம, டீப் டிப்பிரசன்ல, இனிமே என்னால வேலையே செய்ய முடியாதுன்னு நினச்சி, கடலல்ல குதிச்சி செத்துரலாம்னு இருந்தேன் அண்ணைக்கு காலத்ததான் நீ என் ரூமுக்கு வந்து எனட்ட பேசி பிரேயர் பண்ணேன்னு சொல்லி சாயங்காலம் ரூமுக்கு கூப்பிட்டா, ரெண்டு நாள் சாயங்காலம் உன் ரூமுக்கு வந்தேன். அதுக்கு பொறவு தான் எனக்கு மூணு வயசு மகள், மனைவி இருப்பதே தெரிந்தது. உன்ன மறக்கமாட்டேன்” எனச் சொல்லி கட்டியணைத்து கொண்டான்.

பனாமாவில் இருந்து எங்களுக்கு பயணம் உறுதியானது. நான்கு மாதங்களில் பலமுறை பனாமாவில் பல்போவா துறைமுகம் வந்திருந்தேன். பனாமா கால்வாயை தாண்டி மறுபுறம் அட்லாண்டிக் கடலில் செல்லும் வாய்ப்பு மட்டும் கிடைக்கவில்லை.

இப்போது பனாமா பழகிய ஊர் போல் இருந்தது.

ஐம்பது மணிநேர பயணத்திற்கு பின் திருவனந்தபுரம் வந்திறங்கி வீட்டுக்கு சென்றேன்.


நாஞ்சில் ஹீமீது,

18 May 2025.

sunitashahul@gmail.com

தொடர்புடைய பதிவுகள்:

1. இருவரை காப்பாற்றிய பதிவு.

2. பனாமாவிலிருந்து இந்தியாவுக்கு பயணம்.