இருபது ஆண்டு நிறைவு 30

 

  

  ஹீரோயிக் ஏஸ் பகுதி ஐந்து.

      பூமத்தியரேகையை ஒட்டிய பயணங்களில் வெப்பம் சாதாரணமாக 34 டிகிரி சென்டிகிரேட் முதல்  37 டிகிரி சென்டிகிரேட் வரையும் அதாவது இந்திய பெருங்கடல்,அரபிக்கடல்.மலேசியா,சிங்கப்பூர்,இந்தோனேசியா பகுதிகள் மற்றும்  பனமா மெக்சிகோவை ஒட்டிய பயணங்களில் இயந்திர அறை நாற்பது முதல் நாற்பத்தியைந்து சென்டிகிரேட் என்பது கப்பல்காரன் தாக்குபிடித்து பழகிய வெப்பம். செங்கடல் மற்றும் அரபு வளைகுடா  நாடுகளில் கோடைகாலத்தில் (ஜூலை,ஆகஸ்ட்) செல்லும்போது 49 சென்டிகிரேட் முதல்   52 வரை கடும் வெப்பமாக  இருக்கும். இயந்திர அறை பணியாளர்களை பொசுக்கிவிடும் அது. அதாவது இயந்திர அறையின் வெப்பம்  அறுபதை தாண்டி அறுபத்தியைந்து வரை செல்லும்.

  உடல் வியர்வையால் நனைந்து சொட்டும் ஆடைகளை நாளில் நான்கு முறை மாற்றியே ஆக வேண்டும். (இரண்டு மணிநேரத்திற்கு ஒருமுறை பாய்லர்சூட் எனும் நாங்கள் பணியின் போதுஉடுத்தும்  ஆடை, உள்ளாடை,காலுறை வரை) தண்ணீர் குடித்து,குடித்து களைத்து பசியே இருக்காது. கடும் சூடு காரணமாக உடலில் ஒரு எரிச்சல் எப்போதும் இருந்துகொண்டே இருக்கும்.அது மனதிலும் வெளிப்பட்டு அமைதியின்மையை ஏற்படுத்தும். இந்த கடும் வெப்பம் மனிதனை விரைவில் களைப்படைய வைத்துவிடும்.

  ஐரோப்பிய துறைமுகங்களுக்கு கப்பல் வந்து சேர்ந்தது. ஐரோப்பாவில் குளிர் நாட்களே அதிகம் ஆகஸ்ட்,செப்டம்பரில் வெயில் வரும். வெயிலுக்காக எங்கும் மக்கள் கடற்கரைகளில் ஆடைகளை அவிழ்த்து வெற்றுடலாய் சூரியனை பார்த்து கிடப்பது அதனால்தான் என நான் புரிந்துகொண்டது இங்கு வந்தபின்தான். கப்பல் பயணத்திலும் மேக மூட்டமும்,குளிருமாக சூரியனை காணாமல் இருபது நாட்கள் ஆகும்போது மனம் ஏங்கும் வெளிச்சத்தை,வெப்பத்தை காண.முகில்களை கிழித்து கதிரொளி வெளிவரும் நாளில் உடலை காட்டி வெப்பத்தை ஈர்க்கும்போது அடையும் இன்பமும் அது தரும் பேரமைதியும் மனதை உற்சாகம் கொள்ள செய்யும்.

  இங்கே கால்பந்து விளையாடுபவர்களும் நாள் முழுவதும் களைப்பின்றி,உற்சாகமாய் இருப்பது இங்குள்ள குளிரினால்  உடலின் சக்தி அதிகம் வீணாவதில்லை என்பதால்தான். குளிர்தான்  ஐரோப்பாவின் அழகு  குளிர்பிரதேசத்துக்கான அழகு,அமைதி,சுத்தம் எங்கும் காணக்கிடைக்கும் .     உலெகெங்கும்,நாகரிகத்தையும்,சுத்தத்தையும் கற்றுகொடுத்தவர்கள் இவர்கள்தான் என உறுதியாக சொல்வேன்.

கப்பல் செல்வதற்காக சாலையில் போக்குவரத்து நிறுத்தம்

 இங்கே இரு கடல்களுக்கிடையில் நிலத்தில் உள்ள  பொது சாலையில் பெரிய ஓடை போல இணைத்திருப்பார்கள். கப்பல் வரும்போது ஓடையில் உள்ள பாலத்தை உயர்த்தி இருபக்கமும் செல்லும் வாகன போக்குவரத்தை சில நிமிடங்கள் நிறுத்திவைப்பார்கள். அருகில் ட்ராம் வண்டியும்,வேறு வாகனங்களும் செல்வதை காணும் போது கப்பல் ரோட்டில் பயணிப்பது போல இருக்கும்.கப்பலை சாலையில் செல்ல அனுமதிக்கும் அவர்களின் ஒழுங்குதான் அவர்களின் உயர்பண்பு.

     நீண்ட அகலமான சாலைகள்,தெருக்கள் கூம்பு வடிவ வீடுகள். வாகனம் ஓட்டும் ஒழுங்கு,சாலையில் தேவையின்றி ஒலி எழுப்பாமல்,பாதசாரிகளை பயமுறுத்தாமல் செல்வார்கள் வாகன ஓட்டிகள் 

   நீண்ட பயணத்தில் நேரமின்மையால் எக்ஸ்சாஸ்ட் வால்வை மாற்ற முடியவில்லை. மொத்தம் நான்கு எக்ஸ்சாஸ்ட் வால்வ்கள் மாற்ற வேண்டிய நேரம் நெருங்கியதால் பிரிட்டனின் சவுத்ஆம்டன் துறைமுகத்தில் ஒரே நாளில் இரு எக்ஸ்சாஸ்ட் வால்வ்களை செய்யலாமா என விவாதித்தார் முதன்மை இஞ்சினியர். இரண்டு மாற்றியபின்பும் ஒன்று தயாராக இருப்பதால் அந்த பணியை செய்தோம். டூட்டி இஞ்சினியர் மற்றும் ஒரு மோட்டர்மேன்,பத்திசாபை காலையில் கரைக்கு போக சொன்னார்.

 ஒரு எக்ஸ்சாஸ்ட் வால்வை மாற்ற நான்கு மணிநேரம் என்பது கணக்கு. முதல் எக்ஸ்சாஸ்ட் வால்வை காலை எட்டு மணிக்கு துவங்கி பதினொன்றரைக்கு முடித்தோம். இயந்திர அறை இருபத்தி மூன்று டிகிரியில் இருந்தது.மதிய உணவுக்குப்பின் ஒரு மணிக்கு துவங்கி மாலை நான்கு மணிக்கு இரண்டாவது எக்ஸ்சாஸ்ட் வால்வை முடித்தோம். ஒரே நாளில் இரண்டு எக்ஸ்சாஸ்ட் வால்வ்கள் எப்போதுமே செய்ததில்லை.அதிக உடல் உழைப்பை கோரும் பணி அது. குளிர் காரணமாக களைப்பே இல்லை. மாலை ஐந்தரை மணிக்கு ஸீ மேன் கிளப் வாகனம் வந்தது. நான்,சீப் இஞ்சினியர்,நான்காம் இஞ்சினியர்,மோட்டர் மேன் விஜித் வெளியில் சென்று வந்தோம். இங்கிலாந்து,ஐரோப்பிய நாடுகள் ,அமெரிக்கா மற்றும் ஆஸ்திரேலியாவில் இருக்கும் ஸீமேன்(seeman club) கப்ப்ல்காரர்களுக்கு சேவை செய்வார்கள்.

 

அங்குள்ள கார்களை ஓட்டிவந்து எங்களை வெளியில் அழைத்து சென்றுவிட்டு மீண்டும் கப்பலுக்கு கொண்டுவந்து விடுவார்கள். ஸீ மேன் கிளப் கட்டிடத்திலும் தொலைபேசி,இலவச இணையம் ,இசை கருவிகள்,பில்லியாட்ஸ் மற்றும் மேஜை பந்து விளையாட்டு போன்றவை இருக்கும். ஸீ கிளப் வாகனத்தை ஓட்டி வருபவர் ஆணாகவோ,வயதான பெண்களாக கூட இருப்பார்கள். வாரத்தில் ஒரு நாள் ஐந்து மணிநேரம் சேவையாக அதை செய்வார்கள். சிலர் விடுமுறை நாட்களில் சிலமணி நேரம் கார் ஓட்ட  வருகிறர்கள்.அமெரிக்காவின் பால்டிமோர் துறைமுகத்தில் எங்களை வெளியே அழைத்து சென்றவர்  அறுபத்தியைந்து வயதை தாண்டிய பெண்மணி.

 

  

 ஜெர்மனியின் ப்ரேம்மன்ஹெவன்,எம்டன் துறைமுகங்களில் கார்களை ஏற்றினோம். ப்ரேம்மன்ஹெவனில் புலம்பெயர்ந்த தமிழர் ஒருவரை சந்தித்தேன். “தினக்கும் மூந்நூறு கொல பண்ணுறேன்” என்றார். கோழிக்கடையில் வேலை பார்ப்பதாக சொன்னார். ப்ரம்மன்ஹெவனில் லக்கி ஸ்ட்ரீட் பாதுகக்கபட்ட சிவப்புவிளக்கு பகுதி. வெப்பக்காற்று பரவிய கண்ணாடி பெட்டிகளுக்குள் நின்று வாடிக்கையாளர்களை கவர முயலும் அனைத்து கண்டங்களை சார்ந்த மங்கைகளையும் காணலாம். முப்பது யூரோக்கு படியும் ஆண்மகனை கண்ணாடி கதவை திறந்து உள்ளே அழைத்துகொண்டு திரை சீலையால் மறைத்து கொள்வாள் சாலைக்கும் அந்த அறைக்கும் இடையில் மறைப்பாக ஒரு மெல்லிய திரைச்சீலை மட்டுமே.

   சீப் இஞ்சினியர் கொச்ச புத்ல சுதீஷ்வர் ராவ் பத்தி சாபிடம்  “எல்லாம் டெஸ்ட் பண்ணி லைசன்ஸ் வாங்குன பொறவுதான் கவர்மென்ட் இங்க அலோ பண்ணும்” என்றார்.அங்கெ செக்ஸ் ஷாப்கள் மிக பிரபலம் சிடிக்கள்,புத்தகங்கள்,பொம்மைகள் மற்றும் தேவையான செயற்கை உறுப்புகளும் தாராளமாக விற்பனைக்கு உண்டு.

capt and chief engineer 

New year celebaration

   காப்டன் எட்கார்டோ மூன்று மாதத்தில் ஊருக்கு செல்ல மீண்டும் இலங்கையின் பெர்னாண்டோ வந்தார்.கிறிஸ்மஸ் மற்றும் புத்தாண்டுக்கு செய்ய வேண்டிய உணவுவகைகளை காப்டன் பட்டியலிட்டு சமையற்காரர் கார்டோசொவிடம் கொடுத்தார். நான் எதிர்பார்க்கவேயில்லை மிக சிறப்பாக செய்து அசத்தினார்.காப்டனிடம் சொன்னேன் “ஸார் இவ்வளும் தெரிஞ்சும் ஒண்ணுமே செய்யல்ல” என. 

   புத்தாண்டை ஒட்டி கப்பலில் பேன்சி டிரஸ் போட்டி நடத்தி கலந்து கொண்ட அனைவருக்கும் பத்து டாலர் வீதம் பரிசாக கொடுத்தார் முதன்மை அதிகாரி. குப்பை அள்ளும் மனிதனாக தலையில் ஒரு துண்டு,இடையை மறைக்கும் கோவணத்துடன்,கையில் ஒரு வாளி,துடைப்பானுடன் சென்றேன் சீப் இஞ்சினியர் அரை மணிநேரம் நின்றும்,அமர்ந்தும்,உருண்டு,புரண்டு சிரித்தும் அவரால் சிரிப்பை அடக்கமுடியவில்லை.

எம்டன் seeman club

பிராயகை கணினியில் 

    ஹீரோயிக் ஏஸில் இணையம் இல்லை  அமெரிக்காவில் வெளியில் சென்றபோது வெண்முரசின் நீலம் நாவலை சேமித்துக்கொண்டேன். அது முடிந்து பிரயாகை எனும் நாவல் அறுபது நாட்களை தாண்டியிருந்தது. ஜெர்மனியின் எம்டனில் மூன்று மணிநேரமே எனக்கு வெளியே செல்ல அனுமதி கிடைத்தது. வழி தெரியாமல் வெகுதூரம் நடந்து சென்று துறைமுக வாயிலில் இருந்த ஸீ மேன் கட்டிடத்தில் கிடைத்த இலவச இணையத்தில் பிராயாகையின் அறுபத்தி எட்டு அத்தியாங்களை எனது மடி கணினியில் திறந்து அப்படியே கப்பலுக்கு கொண்டுவந்து சேமித்து கொண்டேன். நாளுக்கு இரண்டு அத்தியாயங்கள் அதிக பட்சமாக ஐந்து அத்தியாங்கள் வாசித்த நாட்கள் உண்டு.

  காப்டன் இரவுணவு முடிந்து படம் போடும்போது நான்கைந்துபேர் அவருடன் இருக்க வேண்டும். இன்னைக்கு புது படம் வாருங்கள் என அனைவரையும் தினமும் அழைப்பார். மூன்று தினங்களாக நான் காப்டனை பார்க்கவேயில்லை. காலை உணவுக்கு அவர் வருவதேயில்லை மதிய உணவு நேரத்தில் மேஜையில் பார்க்கலாம் வேலை காரணமாக தாமதமாக வரும்நாட்களில் இப்படி சிலர் சிலரை பார்க்காத நாட்கள் உண்டு.குறிப்பாக பன்னிரெண்டு முதல் நான்கு மணிவரை பணியில் இருக்கும் இரண்டாம் அதிகாரியை ட்ரில்ல்ஸ் மற்றும் பார்ட்டி நாட்களில் மட்டுமே காண முடியும்.

party time 

காப்டனை காணாததால் மூன்றாம் அதிகாரி விருதுநகர் கோபியிடம் கேட்டேன்.  “விஷயம் தெரியாதா,தலைவரு புறோட்டா தின்னு வயித்து வலியில சுருண்டு கிடக்காரு” என்றான்.காப்டனை அறையில் சென்று சந்தித்தேன் சிரித்தார் “டேஸ்ட்டா இருந்தது ஆறு புறோட்டா தின்னேன்,பிரச்சன என்னனு தெரிஞ்சதாலா உன்ன கூப்பிடல்ல”என மீண்டும் சிரித்தார். “ரெடிமேட் புறோட்டாவ தின்னவே கூடாது,அது எப்ப  செய்து பிரீசர்ல வெச்சானோ” என்றேன்.

ஆயத்த பரோட்டா

பிலிப்பினோ முதன்மை அதிகாரிக்கு கையை தலைக்குமேல் தூக்க இயல முடியாமல் வலியுடன் இருந்துள்ளார். காப்டன் “மீட் ஷாகுல்” என்றிருக்கிறார்.என்னிடம் வந்தவருக்கு தைலம் போட்டு தடவி எட்டு நாட்கள் இரவு வாட்ச் முடித்து இரவு எட்டு மணிக்குமேல் எட்டு தினங்கள் வரச்சொன்னேன். கைகளுக்கு சில பயிற்சிகளை கற்றுகொடுத்து கட்டயாமாக தினசரி செய்யச்சொல்லி வற்புறுத்தினேன்.

  கைகளை தலைக்குமேல் தூக்க முடிந்த அவருக்கு லேசாக வலி இருப்பாதாக சொன்னார். விடுறையில் ஊருக்கு செல்லும்போது நன்றி கூறி விடைபெற்றார்.பிலிப்பைன்ஸின் சிபு மாகாணத்தில் குடியிருப்பவர் அவர்.

நாஞ்சில் ஹமீது,

19 june 2025.

sunitashahul@gmail

தொடர்புடைய பதிவுகள்

 ஆயத்த பரோட்டா