இருபது ஆண்டு நிறைவு 29 - கரிபியன் தீவுகளில்...

 

ஹீரோயிக் ஏஸ் பகுதி நான்கு

அமெரிக்காவில் முதன்மை இஞ்சினியர் விடுமுறைக்கு செல்ல ஆந்திராவின் கொச்ச புத்ல சுதீஷ்வர் ராவ் பணியில் இணைந்தார். அறுபத்தியைந்து வயது நல்ல அனுபவம். காலை உணவுக் கூடத்தில் இருக்கும்போதே “ஷாகுல் எக்ஸ்சாஸ்ட் வால்வ் எத்தன ரெடியா இருக்கு மூணு வால்வ் டியூ ஒண்ணா வருது” என அப்போதே வேலையை துவங்கிவிடுவார்.

கப்பலில் பாஸ்நெட் சொல்லும் முன்பே வேலையை முடிக்கும் முனைப்பு. அனைத்து இயந்திரங்களையும் ஒரு முறையாவது கழற்றிவிட வேண்டும் என்பது அவரது டார்கெட். போர்ட் ஆப் ஸ்பெயின் அருகில் கப்பலை பங்கர் நிறைக்கும்பொருட்டு நிறுத்தினோம். அதிகாலை இரண்டு மணிக்கு துவங்கி காலை எட்டுமணி வரை பங்கர் நிறைக்கையில் பணியிலிருந்தபோது மலையின் பின்னிருந்து எழும் செவ்வொளியும், சிவந்த வானமும், குங்கும நிறத்தில் மேலெழுந்த காட்சி. சிறு வயது முதல் சூரியன் எழுவதையும், மறைவதையும் காண்கிறேன். ஆனால் பொறுமையாக ஒவ்வொரு வினாடியும் ரசித்தது இப்போதுதான். காரணம் எழுத்தாளர் ஜெயமோகனின் தளத்தை வாசிக்க துவங்கியதால் என்ற உண்மை புரிந்தது.

அமெரிக்காவில் ஏற்றிய கார்களை கரீபியன் மற்றும் மேற்கிந்திய தீவுகளான ஜமைக்காவின் ஆண்டிகுவா, பார்பாடோஸ், கிங்ஸ்டன், திரிநாட் டோபாங்கோவின் போர்ட் ஆப் ஸ்பெயின். இன்னும் வரைபடத்திலேயே காணமுடியாத சிறு தீவுகளான ரோசாவ், st. லூசியாவில் உள்ள துறைமுகங்களுக்கும் சென்றோம்.

 

Barbados

2008ஆம் ஆண்டு ஐஜின் கப்பலில் இருந்தபோது கரீபியன் தீவுகளுக்கு கப்பல் வந்தபோதும் மிக குறைவான நேரமே துறைமுகத்தில் நின்றதால் வெளியில் செல்லும் வாய்ப்பு கிடைக்கவில்லை. பார்படோசில் பகல் முழுவதும் முழுநாளும் கப்பல் நின்றதால் வெளியில் சென்று வந்தோம். மோட்டர்மேன் விஜித் கரீபியன் நாட்டு பிரஜை போலவே உடை அணிந்து வந்திருந்தான். இங்கு கடற்கரையில் விளையாடி, ரப்பர் படகில் பனானா ரைட் போய் வந்தோம். அதுதான் நான் எழுதிய கன்னி கட்டுரை.

வளமான மண் மற்றும் இயற்கை அழகு மிகுந்த தீவு கூட்டங்கள். இங்குள்ள பல தீவுகளையும் கொலம்பஸ் தான் கண்டுபிடித்துள்ளதாக தரவுகள் சொல்கின்றன. பிரான்ஸ், ஸ்பெயின், போர்ச்சுகீஸ், பிரிட்டன் காலனிகளாக இருந்து சுதந்திரம் அடைந்த தனி நாடுகளாக இருக்கின்றன. வட அட்லான்டிக் கடலில் ரோசாவ் துறைமுகம் கரிபியன்கடலை சுற்றியுள்ள உள்ள ஒரு மலை அதுதான் டொமினிகா(DOMINICA) என்னும் தீவு நாட்டின் முக்கிய நகரம் மற்றும் துறைமுகம். ஒரு மலை நாடாக இருக்கும் விந்தை.

 

St. Lucia

கடலுக்குள் இருக்கும் மலையில் தான் வீடுகளும் உள்ளன. கடலில் தோன்றி கடலில் மறையும் சூரிய உதயமும், அஸ்தமனமும் ஒரே இடத்தில் காணும் பாக்கியம் பெற்றவர்கள். வாழைப்பழம் உற்பத்தியும் ஏற்றுமதியும் முக்கிய தொழில் இங்கே. Roseau துறைமுகத்தில் கப்பல் அதிக நேரம் நிற்கவில்லை. எனவே வெளியே செல்ல முடியவில்லை. துறைமுகத்தில் கப்பல் கட்டியிருந்த இடத்திலேயே பவள பாறைகள் உருவாகிகொண்டிருப்பதை காண முடிந்தது. மழைக்காடுகளை அழிக்காமல் விவசாயம் செய்கிறார்கள். நன்னீர் அருவிதான் குடிநீர் ஆதாரம். மிகச்சிறிய அழகான கடற்கரைகள் ஐந்து இங்கே இருப்பதால் உல்லாச கப்பல்கள் நிறைய இங்கு வருகின்றன. எழுநூற்றி ஐம்பது சதுர மைல்களை கொண்டது டொமினிகா. ஆப்ரிக்காவிலிருந்து தோட்டவேலைக்கு காலனி நாடுகள் கொண்டு வந்த மக்கள்தான் இப்போது இந்நாட்டு பிரஜைகள். இப்போது ஒரு லட்சம் மக்கள் தொகை இருக்கலாம்.

சில மணிநேரங்களிலேயே அங்கிருந்து கப்பல் புறப்பட்டு அருகிலுள்ள இன்னொரு மலையை பார்த்த வண்ணம் நங்கூரம் பாய்ச்சி நிறுத்தினோம். இரண்டாம் அதிகாரி “இன்னா தெரியுது பாரு அதுதான் அடுத்த போர்ட், காலத்த எட்டு மணிக்கு மேலதான் பைலட், சார்ட் கூட மாத்தல இங்க தாம் நிக்கோம் ஆனா இது வேற நாடு” என்றார். செயின்ட் லூசியா st. Lucia அடுத்த மலை, அடுத்த நாடு, அடுத்த துறைமுகம். வரலாறு ரோசாவ் போலவே தான். விவசாயம், வாழைப்பழம் முக்கிய உற்பத்தி. 616 சதுர மைல்கள் மட்டுமே இந்த சிறு தீவு அதன் அழகை பேண ரொம்பவே மெனக்கெடுகிறார்கள் என்பது கடல் நீரின் சுத்தத்தை கண்டபோது தெரிந்தது.

பயணிகள் கப்பல்கள் வரும் துறையில்தான் எங்கள் கப்பலும் கட்டப்பட்டு நூறு கார்கள் இறக்கப்பட்டன. தொண்ணூறு சதம் கத்தோலிக்க கிறிஸ்தவர்களுடன் ஒரு சதம் இந்து மதத்தை பின்பற்றுபவர்க்ளும் வாழும் நாடு. 1992ஆம் ஆண்டு Derek Walcott எனும் கவிஞர் இலக்கியத்துக்கான நோபல் பரிசு பெற்றிருக்கிறார். செயின்ட் லூசியாவில் அந்திக்கடைக்கு போய் மரச்சீனி கிழங்கு வாங்கி வந்தோம்.

துறைமுகத்தின் பெயர் பித்ரோ என்றிருந்தது. ராம்பில் பணியிலிருந்த ABயும் (Able Bodied seaman), பீட்டரா இருக்கும் பிரெஞ்சில் அப்படி சொல்வார்களாக இருக்கும் என பேசிக்கொண்டோம். பிரிட்டனும் சில காலம் இந்த தீவுக்கூட்டங்களை ஆண்டதால் இங்குள்ள மக்களுக்கு ஸ்பானிஷ் மற்றும் ஆங்கிலமும் பேசத் தெரிகிறது.

ஜமைக்காவில் கப்பலில் இருந்து இறங்கி நின்றுகொண்டிருந்தபோது அங்குள்ள மைதானத்தில் இந்தியா – மேற்கிந்திய தீவு கிரிக்கெட் போட்டி நடப்பதாக சொன்னார்கள். இங்கே மொத்தம் நூற்றிபதிமூன்று கார்களை மட்டுமே இறக்கியதால் அடுத்த தீவு நாட்டிற்கு நகர்ந்தோம்.

போர்ட் ஆப்  ஸ்பெயின்

ட்ரினிடாட் அண்ட் டோபாங்கோவின் துறைமுகமான போர்ட் ஆப் ஸ்பெயினிலும் வாய்ப்பு கிடைத்தது. நடந்தே சுற்றிவரும் தூரத்தில் தான் கடை வீதிகளும், பூங்காக்களும் இருக்கின்றன. பெரும்பாலும் இந்திய சாயலில் இருந்த முகங்கள். இந்திய மொழியை யாரும் பேசவில்லை. எங்களையும் அந்நாட்டு பிரஜைகள் என்றே நினைத்திருப்பார்களோ என எண்ணினேன்.

காய்கறிகடை நடத்தும் பெண் அச்சு அசலாக இந்திய முகம். கடையின் அருகில் சென்று இந்தியாவில் இருந்து வருகிறோம் என்றதும் எல்லையில்லா மகிழ்ச்சியில் முகம் மலர இரண்டு வாழைப்பழங்களை பிய்த்து கையில் தந்தாள். தாத்தா இங்கே தோட்டத்தில் வேலைசெய்ய வந்ததாகவும் தனது வேர் வட இந்தியாவில் இருப்பதாக மட்டும் தெரியும் என்றும் ஒரு முறையாவது இந்தியாவிற்கு சென்றுவர வேண்டும் எனவும் ஆசைப்படுவதாகவும் சொன்னாள். எந்த இந்திய மொழியும் பேச தெரியாது. மூன்றாம் இஞ்சினியர் “இவ்ளோ கேள்விக்கி பதில் சொல்லியிருக்கா உனக்க அக்கா, அவளுக்கு ஒரு யாவாரம் குடு பாய்” என்றார். ரெண்டு கிலோ சீனி கிழங்கு வாங்கி புகைப்படம் எடுத்துகொண்டேன்.

 

வெட்ட வெளியாக இருக்கும் கடல் சிறு திறப்பு வழியாக உள்ளே செல்வது போல் இயற்கையான அமைப்பு பல நாடுகளில் அமைந்துள்ளது. மூன்று புறமும் மலை சூழ நீச்சல்குளம் போல இருப்பதால் துறைமுகம் அமைக்க இயற்கை தந்த வரம் ஜப்பானிலும், இந்தோனேசியா, மலேசியா, ஆப்ரிக்கா போன்ற மலைகள் நிறைந்த நாடுகள் இந்த அமைப்பை பெற்றவை.

நடுகடலில் உள்ள தீவுக்கூட்டங்களில் பாதம் பதிக்க வாய்ப்பு கிடைத்ததை பாக்கியமாக எண்ணினேன். திருச்சி பெல் நிறுவனத்தில் பயிற்சியை முடித்துவிட்டு மும்பைக்கு வேலைதேடி ரயிலேறுகையில் வெளிநாடுகளுக்கு செல்ல வேண்டும் என எண்ணமிருந்தது. கப்பல் பணியில் இணைந்ததால் உலகை சுற்றும் வாய்ப்பு கிடைத்தது.

 

Port Elizabeth

கரீபியனை விட்டபின் பதினைந்துநாட்கள் பயணத்திற்குபின் தென்னாப்பிரிக்காவின் டர்பன் மற்றும் போர்ட் எலிசபத்தில் கப்பல் கார்களை ஏற்றியது. BMW போன்ற உயர்வகை கார் தொழிற்சாலைகளை இங்கே நிறுவியுள்ளார்கள். குறைந்த சம்பளத்தில் வேலைக்கு ஆட்கள் கிடைப்பதால். ஜப்பானின் டோயோட்டோ நிறுவனமும் இந்தோனேசியா மற்றும் தாய்லாந்தில் கார் தொழிற்சாலைகளை நிறுவியுள்ளது. மூத்த இஞ்சினியர் மட்டும் ஜப்பனியர் சிலர் இருப்பார்கள். அங்கிருந்து டோயோட்டோவின் இன்னோவா கார்களை உலகெங்கும் அனுப்புகிறார்கள்.

main engine prepared for de-carbonation

டர்பனில் மெயின் இன்ஜினின் யூனிட் ஒன்று டி கார்ப் செய்ய வேண்டியிருந்தது. அங்கேய பங்கரும் நிறைக்க வேண்டும். உறுதியாக சொன்னேன் “ஸார் பங்கர் எடுக்கும்போது இஞ்சின் வேலை வேண்டாம் என”. “ரெண்டு யூனிட் ஒண்ணா வந்துட்டு, ஒண்ணையாவது செய்தே ஆக வேண்டும்” என அடம் பிடித்தார். மெயின் இஞ்சின் வேலை தொடங்கிய ஒரு மணிநேரத்தில் பங்கர் தரும் பார்ஜ் வந்ததால் அதை முதலில் முடித்தோம். பின்னர் மெயின் இன்ஜினின் வேலையை செய்து முடிக்கும்போது தொடர்ச்சியாக எனக்கு இருபத்தி ஆறு மணிநேரங்கள் கடந்திருந்தது.

 

கப்பல் நின்ற ஜெட்டியில் வியாபாரம் செய்ய வந்திருந்த பொருட்களை பார்த்துக்கொண்டிருந்தபோது, காப்டன் “இன்னும் தூங்கலையா. கோ அண்ட் ஸ்லீப் ஷாகுல்” என்றார். 

போர்ட் எலிசபெத்தில் பாதுகாப்பு உள்ளதால் வெளியே செல்லலாம் என காப்டன் சொன்னார். டர்பனில் வெளியே சென்று அனைத்தையும் வழிப்பறி திருடர்களிடம் கொடுத்துவிட்டு ஜட்டியுடன் கப்பலுக்கு திரும்பி வந்ததை சொல்லியிருக்கிறார்கள். முதன்மை இஞ்சினியர் கொச்ச புத்லா கப்பல் நிற்கையில் எதையெல்லாம் திறக்க முடியுமோ அதையெல்லாம் இரண்டு கைகளை கடன்வாங்கியாவது திறந்துவிடுவார். இருந்தும் ஓய்வில் இருந்த ஒரு குழு காலையில் வெளியில் சென்றுவர, பகலில் பணிகளை செய்து ஓய்ந்து களைத்து வெளியில் செல்வதை நினைக்கும்போது கப்பல்காரனுக்கு களைப்பு மறந்து புது உற்சாகம் பிறக்கும். மாலையில் நான்காம் இஞ்சினியர், பத்திசாப், காடேட், நீலேஷ், இரண்டாம் அதிகாரி என ஐவர் குழு போய் வந்தோம். இங்கேயே முழு பங்கர் நிறைத்துவிட்டு ஐரோப்பாவை நோக்கி பயணத்தை தொடங்கியது.

நாஞ்சில் ஹமீது, 

18-June-2025.

sunitashahul@gmail.com

தொடர்புடைய பதிவுகள் பர்போடாஸ் கடல் அனுபவம்

port Elizebeth