Sunday, 2 July 2023

பிரியாணி இல்லாத பெருநாள்

 


        தாயுடன் ரமலானில் எடுத்த படம்

அதிகாலை 5.15 க்கு அழைப்பான் ஒலிக்கும்  முன்பே விழித்திருந்தேன்.நேற்றிரவுவும் கடிகாரம் ஒரு மணிநேரம் பின்னே சென்றுவிட்டதால். கப்பலின் கடிகராம் நான்கே கால் என  காட்டியது.அறையின் கண்ணாடி ஜன்னலின் திரைச்சீலை விலகியிருந்ததால் அறைக்குள் மென் வெளிச்சம் பரவியிருந்தது.

  எழுந்து அமர்ந்து ஜன்னல் வழியே பார்த்தேன் வெண்நுரையுடன் பொங்கியழுந்த கடலலைகள். இரவில் எப்படி தூங்கினேன் என யோசிக்கும்போதே ஸுபுஹ் தொழுகைக்கு தாமதமாகிவிட்டதோ என அவசரமாக எழுந்து கழிப்பறை சென்றுவிட்டு உளு(தொழுகைக்காக உடலை சுத்தபடுத்துதல்) செய்துவிட்டு தொழுகைய நிறைவேற்றிய பின் மீண்டும் கடலை பார்த்தேன்.

   ஞாயிறு இரவு தொடங்கிய கடல் சீற்றம் இன்னும் குறையவில்லை .திங்கள் காலையில் லேசான தலைவலியுடன் தொடங்கியது.மூன்று தினங்களாக பேரலைகளில் இருபது முதல் முப்பது டிகிரி ரோல்லிங்கில் சிக்கி தவிக்கிறோம் . 

   உணவுக்கூடம் சென்று மைக்ரோஓவனில் பாலை சூடாக்கி கருப்பட்டியுடன்,நெஸ்காபியை நன்றாக கலந்து சூடான பாலை ஊற்றி(நடனமாடும் கப்பலில் கீழே சிந்தாமல் பாலை கப்பில் ஊற்றி) கலக்கி காபி கப்பை கையில் எடுத்தபோது மூக்கின் வழியாக மூளைக்குள் புகுந்தது காபியின் மணம்.  

   பிரிட்ஜில் சென்றேன் மதியத்திற்கு மேல் ரோல்லிங் குறையும் என்றார்கள் கைப்பிடியை பிடித்துகொண்டு கால்களை அகலமாக விரித்துவைத்துகொண்டு நின்ற கமலும் ஓம் காரும். அறைக்கு வந்து போனை பார்த்தபோது தியாக திருநாள் வாழ்த்துக்களால் நிரம்பியிருந்தது.

 இப்ராஹீம் நபிக்கு எழுபது வயதாகியும் குழந்தையில்லை.அவர் குழந்தை வேண்டி இறைவனிடம் பிரார்த்தனை செய்தார். அதன் பின் தனது துணைவியார் ஹாஜிரா மூலம் அழகான ஆண் குழந்தை பிறந்தது. இஸ்மாயில் என பெயரிட்டு மகிழ்ந்தனர்.

  தாலாட்டி சீராட்டி குழந்தை வளர்ந்து சிறுவனான பின் இப்ராகிம் நபிக்கு ஒரு கனவு வரும்,இறைவனுக்காக இஸ்மாயிலை பலியிடவேண்டும் என. தாங்காத துயரத்துடன் இப்ராகிம் நபி மகனிடம் சொல்வார்.மகன் இஸ்மாயில் இறவைனின் கட்டளையை நிறைவேற்றுமாறு தந்தையிடம் சொல்லி தயாராகிவிடுவார்.

 மகனை தந்தையே படுக்க வைத்து கழுத்தில் கத்தியை வைத்து பலியிட தயாராகும்போது வானவர் ஜிப்ரயீல் வந்து தடுத்து இறைவன் உம்மை சோதித்து பார்த்தான்.உமது தியாகத்தை கண்டு இறைவன் மகிழ்ந்தான் எனவே ஒருஆட்டை அறுத்து அனைவருக்கும் பகிர்ந்தளித்து உண்ணுமாறு இறைவனின் குரலாய் ஒலித்தார்.(குர்பானி)ஆடு,மாடு,ஒட்டகம் போன்ற விலங்குகளை குர்பானி கொடுக்கலாம்.

  எதன் மீதும் கடும் பற்று வைக்காதீர்கள் என்பதை தான் தியாக திருநாள் மறைமுகமாக சொல்கிறது.

  துல்ஹஜ் மாதம் பத்தாம் தேதி பக்ரீத் பண்டிகையாகும்.இஸ்லாமியர்களின் ஐந்து கடமைகளில் ஒன்றாகிய ஹஜ் செய்வது இப்போதுதான்.துல்ஹஜ் மாத ஒன்பதாவது நாள் இரவில் அரபா மைதானத்தில் ஹாஜிகள் தங்கிவிட்டு பத்தாம் நாள் மெக்கா சென்று தவாபும் செய்து தொழுகையை நிறைவேற்றிய பின் குர்பானியும் கொடுப்பர்.

இதுதான் தியாக திருநாளின் வரலாறு.

   சுனிதாவை அழைத்தேன் மகன்கள் பெருநாள் தொழுகைக்கு பள்ளிவாசல் சென்றிருப்பதாக சொன்னாள். சவூதி,ஐக்கிய அமீரகம் இன்னும் சில அரபுநாடுகள் நேற்றே பெருநாள் கொண்டாடிவிட்டனர்.அதை பின்பற்றும் கேரளாவும்,குமரியின் சில ஜமாத்துகளுக்கும் நேற்று பக்ரீத் ஆக இருந்தது.

  சுனிதா ஜும்மா தொழுகைக்கு செல்லும் பள்ளிவாசலிலும்  நேற்று பெருநாளாக இருந்தது. அங்கு சென்று நேற்றே பெருநாள் தொழுகையை  நிறைவேற்றியிருந்தாள் சுனிதா.

   காலையில் “ஈத் முபாரக்” என  வாழ்த்து சொல்லும்போது “பெருநா தொழுகை உண்டா”எனக்கேட்டாள்.

கடந்த முறை நான் இருந்த சிங்கப்பூர் எனெர்ஜி கப்பலில் இந்தோனேசியா,மலேசியாவை சார்ந்த பத்துக்கும் மேற்பட்ட இஸ்லாமியர்கள் இருந்தனர். காப்டனே இமாமாக நின்று பெருநாள் குத்பாவும்,தொழுகையையும் நிறைவேற்றினார்.பதினேழு வருட கப்பல் வாழ்வில் முதல் முறையாக பெருநாள் குத்பா,தொழுகை நடந்தது கடந்த ஆண்டு மட்டுமே.

 சுனிதாவிடம் சொன்னேன் “போன ட்ரிப் கப்பல்ல நிறைய பேரு முஸ்லீமில்லா,இப்ப வாய்ப்பே கிடையாது,நல்ல சாப்பாடே கிடைக்காது,நேத்தே சீப் குக் தல சுத்தி,வேலக்கி வராம படுத்துட்டான்”. என்றேன்.

  “ட்ரெஸ் என்னமும் கொண்டு போனியளா”

“நீதான் எனக்கு இப்ப சட்டை ஒண்ணும் வாங்கி தாரதில்லியே” என்றேன். “அந்த பருவாடியே இனி கிடையாது” என்றாள்.

விடுமுறையில் வீட்டுக்கு வந்த பதினைந்து நாட்களுக்குள்  விஷ்ணுபுரம் விழா வரும்.சுனிதா எனக்காக வாங்கி வைத்திருக்கும் தனக்கு பிடித்த புதிய உடைகளை நான் விஷ்ணுபுர விழாவில் உடுத்துவது அவளுக்கு கோபம்.அதனால் இப்போது எனக்காக உடைகள் அவள் வாங்குவதில்லை நானும்.

 “புது ட்ரெஸ் எடுத்து வெச்சா அத எனட்ட போட்டு காட்டாம,கோயம்புத்தூர்ல போய் போட்டு லாத்த்கிட்டு வருவாரு”என 2021 விழா முடிந்து சென்றபோது சொன்னாள். அதன் பின்பு தான் எனக்காக உடை எடுப்பதை நிறுத்திவிட்டாள்.

  காலை குளித்து இருந்ததில் ஒரு நல்ல சட்டையும், துவைத்து,தேய்த்து வைத்திருத்த கைநெசவு நூற்பு வேட்டி ஒன்றும் உடுத்து அத்தர் பூசி இரண்டு ரக்காத் சுன்னத் தொழுதபின் தொப்பியுடன் உணவு கூடம் சென்றேன். சமையற்காரர் இன்று வந்திருந்தார். பக்ரீத் வாழ்த்துக்கள் சொன்னபின் இரண்டு முட்டையும், சீரியல்சும் சாப்பிட்டேன்.காப்டன் வந்து கட்டியணைத்து வாழ்த்து சொன்னார்.கலீலும்,யாதவும் சக பணியாளர்களும் வாழ்த்து சொன்னார்கள்.

  காலையில் சரக்கு தொட்டிகளின் அழுத்தம் கூடியிருந்தது.முதன்மை அதிகாரி கடும் கடல் சீற்றத்தையும் பொருட்படுத்தாது டெக்கில் சென்று வாழ்வுகளை அட்ஜஸ்ட் செய்து வந்தார்,காலை கூட்டதிற்குபின் நானும்,காஸ் இஞ்சினியரும் காஸ் பிளாண்டிற்கு சென்றோம்.மீண்டும் வால்வுகளை அட்ஜஸ்ட் செய்தோம்.

 பதினோரு மணிக்கு மீண்டும் முதன்மை அதிகாரியுடன் சென்று வால்வுகளை மூடவும் திறக்கவும் செய்தோம். மதியம் ஜீரக சாதமும்,பருப்பும்,கறுப்பு கொண்டை கடலையும்,பட்டாணியும் என்னவென்றே தெரியாத ஒரு காயும் சேர்த்து ஒரு கூட்டு செய்திருந்தார்.

  மதியத்திற்கு மேல் பணியே இல்லை எனக்கு டெக்கில் வேலையிருந்தது கடல் சீற்றம் காரணமாக வெளியே செல்ல அனுமதியில்லை.நான்கரை மணிக்கு அறைக்கு வந்தேன். வாட்ஸ் அப்பில் வாழ்த்து சொன்ன அனைவருக்கும் பதிலளித்தேன். நீராடி ஆறு மணிக்கு இரவுணவுக்கு சென்றபோது மட்டன் கறியும்,சப்பாத்தியும்,கீரும் செய்திருந்தார்.

இரவில் கடல் சந்தமாகியிருந்தது .எட்டரை மணிக்கு மேல் காஸ் பிளாண்டிற்கு தனியே சென்று வந்தேன்.

நண்பர் சமையல்காரர் டேவிசை நினைத்து கொண்டேன் இன்று.பிரியாணி இல்லாமல் ஒரு பெருநாள் கடந்து சென்றது.

29 june 2023.

sunitashahul@gmail.com


ஜப்பானுக்கு வந்தேன் தொடர்ச்சி

 என் எஸ் பிரண்டியர் நாட்குறிப்புகள் 6

   

 

   ஹிட்டாச்சியில் எட்டாம் தேதி மதியம் சரக்கு கொடுப்பது நிறைவடைந்தது.ஆய்வாளர் ஏழாம்தேதி மதியம் வந்துவிட்டு இரவு புறப்பட்டு சென்றார். எட்டாம் தேதி மாலை ஐந்துமணிக்கு கப்பல் ஹிட்டாச்சியிலிருந்து புறப்பட்டு மறுநாள் அதிகாலை ஐந்துமணிக்கு நெகுஷி(NEGESHI) சென்றடைந்தோம். 



 எட்டரை மணிக்கு பைலட் வரும்போது பேய் காற்றுடன் கடும்மழை பெய்துகொண்டிருந்தது.மழை சட்டைகளை அணிந்துகொண்டு பார்வர்ட் மற்றும் ஆப்டில் பணியாளர்கள் சென்றனர். ஹிட்டாச்சியில் புதிய காப்டனும்,காஸ் இஞ்சினியரும் வந்திருந்தனர்.

  கப்பல் கரையை நெருங்கும்போது காற்றும் மழையும் ஓய்ந்திருந்தது. கப்பலின் நடுப்பகுதியில் குழாய் பொருத்தப்படும் இடத்தில் அடையாள கொடியை கட்டிவைத்திருந்தோம்.சரக்கு குழாய் பொருந்தும் இடம் டெர்மினலின் குழாய்க்கு நேராக வந்ததை சச்சின் உறுதி செய்ததும்.முன்பும் பின்பும் எட்டு கயிறுகள் வீதம் கட்டப்பட்டு கப்பல் நிறுத்தபட்டபின் பைலட்இறங்கி சென்றார்.

   ஜப்பானிய கார்கோ மாஸ்டர் கப்பலின் ESD ( EMERGENCGY SHUTDOWN )சிஸ்டத்தை  சோதித்து,வால்வுகள் மூடும் நேரம் 22 to 26 வினாடிகளுக்குள் இருப்பதை உறுதி செய்தபின் டெர்மினலின் குழாய் கப்பலின் குழாயுடன் ஜப்பானிய பணியாளர்களால் பொருத்தப்பட்டது.

   எளிதில் தீ பிடித்துகொள்ளும் திரவ வாயு என்பதால் உச்சகட்ட  பாதுகாப்பு முறைமைகள் பின்பற்றபடுகிறது.அதையும் மீறி தீ பிடித்தால் ESD இயக்கப்ட்டு திரவாயு கப்பலிலிருந்து டெர்மினலுக்கு செல்லும் சரக்கு குழாய்களில் உள்ள வால்வுகள் மூடப்பட்டு.டெர்மினலின் குழாய் கப்பலின் குழாயிலிருந்து தானியங்கி முறையில் விடுவிக்கப்படும். கப்பலின் முன்,பின் பகுதியில் (fire wire) கடலிலிருந்து ஒரு மீட்டர் மேலே இறக்கப்பட்டு தயார் நிலையிலுள்ள இரும்பு வயர் மூலம் கப்பலை கடலுக்குள் இழுத்து செல்லும் அதிக விசையுடன் கூடிய படகு ஒன்றும் கப்பலுக்கருகில் தயாராக நின்றுகொண்டிருக்கும்.


ஜப்பான் நெகுஷி டெர்மினல்


என் எஸ் யுனைடெட் நிறுவனத்திலிருந்து நேற்று கப்பலுக்கு வந்த இருவருடன் மேலும் ஒருவர் இன்றும் வந்தார்.புதிதாக மூன்று ஜப்பானிய பணியாளர்களும் பயிற்சிக்காக பணியில் இணைந்தனர். 

  இங்கு மீதமிருந்த இருபத்தி ஆறாயிரம் டன் ப்ரோப்பேன் குழாய்கள் வழியாக சென்று கொண்டிருந்தது.புதிதாக வந்த காஸ் இஞ்சினியர் கிறிஸ்டோபர் ஸ்ரீரங்கத்தை சார்ந்தவர் அவரும் காலையில் பணிக்கு வந்திருந்தார். “ஸ்ரீரங்கம் கோயிலுக்கு போயிருக்கியளா தம்பி” எனக்கேட்டேன். “ஆம்” என்றார்.

 26ஆண்டுகளுக்கு முன்பு பெல் நிறுவனத்தில் பயிற்சியில் இருந்ததை சொல்லி அதனாலேயே  திருச்சிகாரங்க  எனக்கு நெருக்கமானவங்க ஆகி விடுகிறார்கள் என்றேன்.

   இங்கிருந்து அடுத்து செல்லும் துறைமுகம் இன்னும் உறுதியாகவில்லை.நாங்கள் மீண்டும் பனாமா வழியாக அமெரிக்கா செல்வதையே விரும்பினோம். ஒரு மாதம் நீண்ட பயணம்,பயண பாதையில் மெல்லிய குளிரே இருக்கும்,இம்முறை அமெரிக்கா சென்றால் ஆய்வுகள் எதுவும் இருக்க வாய்ப்பில்லாததால் கப்பல் காரர்களின் மனம் அதை விரும்ப காரணமாக இருந்தது.

 சவுதி அரேபியாவின் ரஸ்தநூரா மற்றும் யான்பு துறைமுகங்களுக்கு பயண நாட்கள் மற்றும் செலவாகும் எண்ணெய் எவ்வளவு என கேட்டு சரக்கை கையாளும் நிறுவனம் மின்னஞ்சல் அனுப்பியது.

யான்பு செல்வதாக இருந்தால் சோமாலிய கொள்ளையர்கள் நடமாடும் அதிக ஆபத்துள்ள பாதையில் பயணிக்க வேண்டியிருப்பதோடு,வளைகுடாவில் கோடையின் உச்சம் இப்போது ஆளை கொல்லும் வெயில் அங்கே.2020 டிசம்பரில் யான்புவுக்கு செல்லும்போது எங்கள் கப்பலை தாக்கி கடல் கொள்ளையர்கள் ஏற முயற்சித்ததும்,2016 ஜூலையில் கத்தாரில்   அடித்த 49 டிகிரி வெப்பத்தில் இயந்திர 65 டிகிரிக்கு உயர்ந்து மயங்கிவிழுந்த சாங்கும் என் நினைவில் எழுந்ததால்.நானும் கப்பல் மீண்டும் அமெரிக்கா செல்ல வேண்டுமென்றே விரும்பினேன்.

 பத்தாம் தேதி மாலை சரக்கு தொட்டிகள் முழுவதும் காலியான பின் ஆவணங்கள் பரிமாறப்பட்டபின் ஜப்பானியர்கள் கப்பலுக்குள் வந்து குழாய்களை கழற்றி பாதுகாப்பாக டெர்மினலுக்குள் கொண்டு சென்றனர்.

 ஊருக்கு செல்லும் காப்டன்,காஸ் இஞ்சினியர்,முதன்மை இஞ்சினியர் கப்பல் முகவருடன் விடைபெற்றனர்.புதிதாய் வந்த முதன்மை இஞ்சினியரை இரவுணவின்போது சந்தித்தபோது “வணக்கம்”என்றேன் .

“நீங்களுமா”? 

 “ஆமா கன்னியாமரி ஸார் எனக்கு, உங்க ஊருக்கு நிறைய நேரம் வந்திருக்கேன்,அரபிந்தோ ஆசிரமம்,ஆரோவில் மற்றும் பாண்டிசேரி மாரிடைம் அகடமில கோர்ஸ் க்கு” என்றேன்.

 “பர்ஸ்ட் டைம் காஸ் பிட்டரா” 

“ஆமா”

 “கம்பனிக்கு புதுசா” எனக்கேட்டார்.

“2006 ல் கம்பெனில சேந்தேன் 2016 முதல் காஸ் கப்பலில் இருக்கேன்” என்றேன்.

“ஓ ரொம்ப வருசமா இருக்கீங்க,உங்க பேரே பாத்ததே இல்ல”என சிரித்து கைகுலுக்கினார் பாண்டியின் மஞ்சுநாதன்.

  இரவு எட்டு மணிக்கு பைலட் வந்தார்.போர்ட்சைடின் முன்பும் பின்பும் வந்த இரு விசைமிகுந்த படகுகள் (tug boats)தந்த கயிறுகளை கப்பலில் இணைத்தபின் கரையிலிருந்த கயிறுகள் விடுவிக்கப்பட்டபின் டக் போட்டுகள் கப்பலை இழுத்து திருப்பி கடலை நோக்கி உந்தி தள்ளியபின் தன்னை விடுவித்துகொண்டு சென்றது.

 மூன்று மைல்கல் விலகி பாதுகாப்பாக நங்கூரம் பாய்ச்சியபின் பைலட் ஏணி வழியாக இறங்கி படகில் ஏறிசென்றார்.

   அடுத்து செல்லும் துறைமுகம் உறுதியாகததால் இரவில் கப்பலை இங்கு நிறுத்த சொல்லியிருந்தார்கள்.காலை எட்டு மணிக்கு கப்பலுக்கு எண்ணெய் நிரப்புங்கள் பின்னர் சொல்கிறோம் எனும் தகவல் வந்தது.

  அமெரிக்கா போக வேண்டும் எனும் எண்ணத்திலேயே தூங்கி விழித்தபோது எண்ணெய் நிரப்பிக்கொண்டு சிங்கப்பூரை நோக்கி செல்லுங்கள் எனும் உத்தரவு கிடைத்தது. அறுநூற்றி நாற்பது மெட்ரிக் டன் எரி எண்ணையும் அத்தியாவசிய உணவு பொருட்களும்,கொஞ்சம் உதிரி பாகங்களும் ஏற்றி விட்டு ஜப்பானின் நெகுஷியிலிருந்து  ஞாயிறு பின் மதியம் புறப்பட்டோம்.

  இரு துறைமுகங்கள் மற்றும் ஞாயிறும் அனைவருக்கும் கடும் பணியாக இருந்ததால் திங்கள்கிழமையை ஞாயிறாக கருதி ஓய்வு எடுத்துகொள்ள காப்டன் சொன்னார்.

   போசன் யாதவ் சொன்னார் “ஷாகுல் ஜி சிங்கப்பூர் போகுதுன்னா கல்ப் போறது பக்கா,இடையில் சென் குப்தா “பேன் சூத் கர்மி போகுத் மிலேகா நஹி ஜானா சாஹியே” என்றார். (கெட்டவார்த்தைய சொல்லிப்பின் ரொம்ப சூடு இப்ப,அங்க போகாம இருக்கணும்)

சிங்கப்பூருக்கான பயண பாதையில் தென்சீன கடலை தொட்டபின் முதல் நாள் கடுமையான கடல் சீற்றம் இருந்ததால் கப்பல் ரோல்லிங்கில் ஆடிக்கொண்டே சென்றது.அன்றிரவே கடலம்மா தணிந்தாலும் அவ்வப்போது பேய் மழையும்,இருள் சூழ்ந்து,மேக கூட்டங்கள் கப்பலை சுற்றிக்கொண்டதால் நாங்கள் வந்து கொண்டிருக்கறோம் வழிவிடு,வழிவிடு என ஒலியை காற்று ஒலிப்பானால் ஒலிஎழுப்பிக்கொண்டே பயணித்தோம்.

  பெருமழை சில நாட்கள் தொடர்ந்தது.

நாஞ்சில் ஹமீது.

14 june 2023

sunitashahul@gmail.com

ஜப்பானுக்கு வந்தேன்

 என் எஸ் பிரண்டியர் நாட்குறிப்புகள் 5

.

       கப்பல் ஜப்பானின் ஹிட்டாச்சி மற்றும் நெகுஷி துறைமுகங்களில் சரக்குகளை கொடுக்கவேண்டிய செய்தி உறுதியானபின். ஹிட்டாசியில் ஆய்வாளர் ஒருவரும் கப்பல் முதலாளியின் சார்பாக ஒருவரும்  கப்பலுக்கு  வரும் செய்தி வந்ததால் கப்பலை  ஆய்வுக்கு தயார் செய்யும் பொருட்டு தினமும் ஒரு மணிநேரம் அதிகமாக பணி செய்ய வேண்டினார் கப்பலின் காப்டன் டேராடூனை சார்ந்த ஆசிஸ் குய்யார்.

     பனமாவிலிருந்து புறப்பட்டது முதல் கப்பலின் கடிகாரம் இரு தினங்களுக்கு ஒரு முறை என பின்னால் சென்றுகொண்டே இருக்கிறது இதுவரை ஒன்பது மணி நேரம் பின்னால் சென்றுவிட்டது. இன்னும் ஒரு மணிநேரம் மட்டுமே பின்னால் செல்லவேண்டும்.

     ஜப்பானை சென்றடையும்போது ஜப்பானிய நேரம் மற்றும் தேதியில் இருக்கவேண்டும்.எனவே கடந்த மாதம் 31 ஆம் தேதி புதன்கிழமை இரவு தூங்கி விழிக்கையில் ஜூன் 2ஆம் தேதி வெள்ளிக்கிழமையாக  விடிந்தது.அதாவது ஜூன் ஒன்றாம் தேதி வியாழக்கிழமை காணமல் போய்விட்டது. இது குறித்து மிக காணாமல்போன செவ்வாய்க்கிழமை என சன்னி ஜாய் நாட்குறிப்பில்விரிவாக எழுதியிருக்கிறேன்.

  கப்பலின் கடிகாரம் பின்னோக்கி சென்ற நாட்களில் நாளுக்கு இருபத்தியைந்து மணிநேரம் வீதம் கிடைத்தை பிரக்ஞையின்றி துயிலிலேயே ஒரு நாளை கடந்து முன்னால் சென்று விட்டோம்.

  இவ்வாண்டு சந்தித்து போன் நம்பரை பகிர்ந்து கொண்ட உறவு பெண் ஒருத்தி “என்ன மச்சான் சொல்லுதியோ இப்படி எல்லாமா நடக்கும் அதிசயமா இருக்கு” என்றாள். 

   நான் கப்பலுக்கு வந்த மறுநாளே பணியில் இருந்த காஸ் பிட்டர் மராத்தி பேசும் ஹர்ஷல் கோபால்  ஊருக்கு புறப்பட்டு சென்றார். மும்பை அலுவலகம் முதன் முறையாக நான் காஸ் பிட்டராக வருவதால் மூன்று வாரங்களுக்கு அவர் என்னுடன் இருந்து அனைத்தையும் சொல்லி தந்துவிட்டு செல்வார் என சொல்லியிருந்தார்கள். ஆனால் காப்டன் கோலாலம்பூர் அலுவலகத்திலிருந்து எந்த செய்தியும் வரவில்லை என்றார்.

   காஸ் இஞ்சினியர் சச்சினுக்கு இது இரண்டாவது கப்பல் இந்த கப்பலில் ஆறு மாதங்கள் ஆகிவிட்டாதல் காஸ் பிளாண்ட் இயக்கம் பற்றி தெரிந்து வைத்திருப்பது மட்டுமல்லாமல் பிறருக்கு சொல்லி தரவும் தெரிகிறது.இருபத்தியைந்து ஆண்டு அனுபவம் உள்ள நன்றாக பணி தெரிந்த சீனியர்களால் பிறருக்கு கற்று கொடுக்க முடியாததை கண்டிருக்கிறேன். தான் கற்றதை பிறருக்கு கற்று கொடுப்பது ஒரு கலை அது அனைவருக்கும் கைகூடுவதில்லை.

     பனாமாவில் இருந்து புறப்பட்ட சில நாட்களிலேயே வெப்பம் கீழே சென்றுவிட்டது.டெக்கிலும் இயந்திர அறையிலும் பணி செய்ய உகந்ததாக இருந்தது.கடல் நீரின் வெப்பம் இருபது முதல் இருபத்தி நான்கு டிகிரியிலும் இயந்திரஅறை முப்பத்தியைந்து டிகிரியிலும் இருந்தது.அறையின் குளிரூட்டியை பெரும்பாலும் அணைத்தே வைத்திருந்தேன்.

       பணியில் இணைந்த முதல் சனிக்கிழமையன்று  கப்பலில் காப்டன் பார்ட்டி வைத்தார். கல்கத்தாவின்  மாலுமி (AB) சென் குப்தாவிற்கு  மே பதினெட்டாம் தேதியும் எனது சான்றிதழ் பிறந்தநாள் இருபதாம் தேதியும் வந்ததால் ஒரே கேக்கை சென் குப்தாவும்,நானும் வெட்டி சனி மாலையை உற்சாகமாக கொண்டாடினோம். 

    சமையல்காரர் என்னருகில் கையில் பீர் டின்னுடன் அமர்ந்தபின் கேட்டார் “உனக்க பீர் எங்க”

“குடிப்பதில்லை”என்றேன்.

“ஸ்மோக்?”

“அறவே கிடையாது”

“போர்ன் வீடியோ?”

“பாக்க மாட்டேன்”

“கேர்ள்ஸ்”

கல்யாணம் ஆகி ஒரு மனைவியும் இரண்டு மகன்களும் உண்டு என அவரது கேள்விகளுக்கு பதிலளித்தேன்.

“நீ பக்கீர் ஆ? ஒரு என்ஜாய்மென்ட்டும் இல்ல”என சொல்லிவிட்டு தலை முதல் பாதம்வரை நன்றாக பார்த்தார்.

  சிரிப்பையே பதிலாக கொடுத்தேன்.

 மறுநாள் ஞாயிறு காலை டெக்கில் கிரிக்கெட் விளையாடியபின் மதியம் பிரியாணி சாப்பிட்டுவிட்டு ஓய்வாக அமர்ந்திருந்த போது தங்களது அன்றைய கோட்டா இரண்டு டின் பீர்களுடன் மூன்றாம் இஞ்சினியர் பிரம்பலி,இஞ்சின் பிட்டர் ஜெயேஷ் தண்டேல்,சச்சின் உணவு கூடத்திற்கு வந்தனர். ஜெயேஷ் தண்டேல் என்னிடம் “நீ முஸ்லிம் குடிக்கமாட்டா இல்லா,இங்க இர்பான்,கலீலும் குடிப்பதில்லை”என சொன்னார். 

என்னருகில் இருந்த  குஜராத்தின் கமல் “நெத்தியில தொழுகை அடையாளம் இருக்கு,வந்த முதல் நாளே நான் பாத்துட்டேன் அஞ்சு நேரம் தொழ ஆளுக்குதான் இப்புடி அடையாளம் இருக்கும்,இந்த கேள்விய அவருட்ட கேக்க பிடாது” என்றான்.

     இயந்திர அறையிலும் கப்பலை ஆய்வுக்கு தயார் செய்யும்பொருட்டு சாயம் பூசுதல்,சுத்த படுத்துதல் மற்றும் பராமரிப்பு பணிகள் தொடர்ந்தன.காஸ் பிளாண்டின் வெப்பம் மற்றும் சரக்கு அழுத்தம் முறையே மைனஸ் 40 டிகிரியிலும்,எட்டு கே பியிலும் வேண்டும் என சொன்னார்கள் எனவே காஸ் பிளாண்டின் நான்கு கம்ப்ரசர்களும் ஓடிக்கொண்டிருந்தன.

   துறைமுகம் செல்லும் முதல் நாள் கப்பல் முழுவதையும் நன்னீரை பீய்ச்சியடித்து கமலும்,இர்பானும் கழுக தொடங்கினர்.மோட்டார் ரூம்,மற்றும் கம்ப்ரசர் ரூமை சுத்தபடுத்தும் பணி என்னுடையது.மோட்டார் அறையின் சுவர் பகுதியில் இருந்த அழுக்குகளை இர்பான் உயர்அழுத்த நன்னீரை பீய்ச்சியடித்து சுத்தபடுத்தி உதவினார்.

   மாலை ஃப்ரீ அரைவல் மீட்டிங்கில் முதல்  துறைமுகத்தில்  முன்பும் பின்பும் கப்பலை கட்டும் கயிறுகளை எவ்வாறு கொடுக்கவேண்டும்,முதல் துறை முகத்தில் இருபதாயிரம் மெட்ரிக் டன் ப்ரோப்பேன் இறக்க வேண்டும்.மணிக்கு ஆயிரம் முதல் ஆயிரத்தி முந்நூறு டன் வேகத்தில் கொடுத்தால் பத்தொன்பது மணி நேரத்தில் முடிந்து அன்று மாலையே புறப்பட்டு அடுத்த துறைமுகம் நோக்கி செல்வோம் என காப்டன் எங்களுக்கு தெரிவித்தார்.

  ஆய்வாளர் முதல் துறைமுகத்திலேயே வருகிறார்.ஊருக்கு செல்பவர்களின் பதிலாக பணிக்கு வரும் இருவர் இங்கே வருவர். முதன்மை இஞ்சினியரும் பயிற்சிக்காக மூன்று ஜப்பானியகள் (ஒரு முதன்மை அதிகாரி,இரு நான்காம் இஞ்சினியர்கள்) இரண்டாவது துறைமுகத்தில் வருவார்கள் என சொல்லப்பட்டது.

 ஆறாம் தேதி நள்ளிரவு கப்பல் ஜப்பானின் ஹிட்டாச்சி துறை முகப்பிலிருந்து பதிமூன்று மைல் தொலைவில் நிறுத்தப்பட்டது. காலை எட்டுமணிக்கு கப்பல் இயக்கப்பட்டு முன்னால் சென்றதும் பைலட் கப்பலில் ஏணி வழியாக வந்தார் பத்துமணிக்கு துறைமுக பைலட் வந்தார்.

 பார்வர்ட் மற்றும் ஆப்டில் ஒரு கயிறுகள் வீதம் கரைக்கு கொடுத்து மிட் ஷிப்பில் உள்ள குழாய் டெர்மினல் குழாய்க்கு நேராக வந்ததை உறுதி செய்ததும் காப்டன் மீதமுள்ள கயிறுகளை கொடுக்க சொன்னார்.பார்வார்டில் எட்டு கயிறுகளும்,ஆப்டில் எட்டு கயிறுகளும் கரைக்கு கொடுத்தோம்,டெர்மினலிலிருந்து இரு கயிறுகள் வீதம் கப்பலுக்கு தரப்பட்டு ஹிட்டாச்சி எல்பிஜி டெர்மினலில் கப்பல் இறுக்கமாக கட்டி நிறுத்தப்பட்டது.

 மொத்தமுள்ள நான்கு சரக்குதொட்டிகள் உள்ளன.இரண்டு தொட்டிகளிளிருந்து புரோப்பேன் குழாய்கள் வழியாக டெர்மினலுக்கு கொடுத்து கொண்டிருந்தோம்.அவர்களின் தொட்டியிலிருந்து அதிகப்படியான வாயு எங்கள் கப்பலுக்கு திருப்பி தரப்பட்டது.அதை கம்ப்ரசர் மூலம் திரவமாக்கி சரக்கு தொட்டிக்குள் செலுத்திகொண்டிருந்தோம்.



   துறைமுகத்தில் காலை ஆறுமுதல் பன்னிரண்டு பின்னர் மாலை ஆறு முதல் பன்னிரண்டு மணிவரை என  எனக்கும் இஞ்சினியர் சச்சினுக்கு பன்னிரண்டுமுதல் ஆறு பின்னர் பகலில் பன்னிரண்டு முதல் என ஒரு நாளில் எங்களுக்கு பன்னிரண்டு மணிநேரம் பணி.

  ஜப்பானுக்கு 2006 ஆம் ஆண்டு முதல் முதலாக வந்தேன்.ரயில் நிலையத்தில் இருந்த பொது தொலைபேசி மூலம் வீட்டிற்கு பேசியபின்.கவனித்தேன் பயணசீட்டு இல்லாமல் ரயில் நிலையத்தில் நுழையவே முடியாது. மும்பையில் ஓடும் ரயிலில் சாடி ஏறும்போதும்,இறங்கும்போதும் தவறி விழுந்து இறப்பவர்கள் ஏராளம்.டிக்கெட் பரிசோதகர் என ஒருவர் இங்கு தேவையே இல்லை என நினைத்தேன்.

  பின்னர் தொடர்ந்து ஜப்பானுக்கு வந்து கொண்டே இருக்கிறேன்.ஜப்பானியர்களின் நேரம் தவறாமை மிக ஆச்சரியம்.பத்து மணி என்றால் ஒன்பதே முக்காலுக்கு ஆஜர் ஆகி இருப்பார்கள்.இங்குள்ள தொழில் நுட்பத்தை பார்த்து வியந்து இந்தியாவும் இதுபோல் ஆக வேண்டும் என எண்ணத்தை விதைத்தேன்.

2010 இல் தில்லி மெட்ரோவை கண்டபோதும்.மால்களில் ஹைட்ராலிக் கார்களை உயரே ஏற்றி குறைந்த இடத்தில் அதிக எண்ணிக்கையில் கார் நிறுத்தும் வசதிகள் நாகர்கோவிலிலும் வந்துவிட்டதை எண்ணி மகிழ்ந்தேன்.

  விஷ்ணுபுரம் நண்பர் டோக்யோ செந்தில் இங்குதான் இருக்கிறார்.போனில் அழைத்தேன். “ஷாகுல் மிக அருகில் வந்துவிட்டு சந்திக்காமலேயே செல்கிறாய்,உனக்கு எப்படியோ தெரியவில்லை எங்களுக்கு கஷ்டமாக இருக்கிறது”என்றார்.

   வாய்ப்பு கிடைக்கும்போது சந்திக்கிறேன் என்றேன்.இம்முறை சரக்கு இறக்கும் துறைமுகத்தில் வெளியே செல்ல அனுமதியில்லை.நான் செல்லும் இரண்டாம் துறைமுகமான நெகுஷியில் இருந்து டோக்யோ முப்பது நிமிட ரயில் பயணம் என்றாள் கப்பலுக்கு வந்த முகவர்.

 07 june 2023

நாஞ்சில் ஹமீது .

sunitashahul@gmail.com



Sunday, 11 June 2023

கப்பலின் விபரம்

 என் எஸ் பிரண்டியர் நாட்குறிப்புகள் 4



  

என் எஸ் யுனிடெட் எனும்   ஜப்பானிய நிறுவனத்துக்கு சொந்தமான இந்த கப்பல் பனாமாவில் பதிவு செய்யப்பட்டு நான் பணிபுரியும் நிறுவனத்தில் மலேசிய கிளை அலுவலகத்தின் கீழ்  இயக்கபடுகிறது.

  2016ஆம் ஆண்டு   நவம்பர் 30 ஆம்தேதி ஜப்பானின் கவாசாகி கப்பல் கட்டும் தளத்திலிருந்து கடலில் தள்ளிவிடப்பட்டது. 230 மீநீளமும்  37மீஅகலமும்  27மீ உயரமும் கொண்ட இக்கப்பல் திரவ வாயுவை(எல்பி.ஜி) உலகம் முழுவதும் எடுத்துச்செல்லும் வகையில் வடிவமைக்கப்பட்டுள்ளது. நான்கு சரக்கு தொட்டிகள் உள்ளன இதில் நாற்பத்தி ஆறாயிரம் மெட்ரிக் டன்கள் வரை சரக்கு நிரப்ப முடியும், பீயுட்டேன்C4H2(4)O+2=C4H10, ப்ரோப்பேனCH2(3)+2=C3H8 வகையை மட்டுமே கையாள முடியும்.

  KAWASAKI MAN B&W 7S60ME இஞ்சின் பொருத்தப்பட்டுள்ள இதன் குதிரை திறன் 17567 BHP கொண்டது. 46867 டன் மொத்த எடைகொண்ட  இக்கப்பலை எண்பத்தியாறு RPM வேகத்தில் புறப்பல்லர் சுழன்று தண்ணீரை உந்தி தள்ளினால் 15.6 நாட்டிகல்மைல்களை ஒரு மணி நேரத்தில் கடக்கும்.

  குடியிருப்பில்  மொத்தம் முப்பது அறைகள் உள்ளன. தற்போது இருபத்தி நான்கு பேர் மட்டுமே பணிபுரிகிறோம்.ஒரு மருத்துவமனை அறையும் ,துவைக்க இரு அறைகளும்,ஒரு ஜிம்னாசியம், ஒரு அடுமனை,அதிகாரிகள்,பணியாளர்களுக்கு உணவுக்கூடம்,தொலைக்காட்சி பெட்டியுடன் கூடிய மனமகிழ் மன்றம் தனித்தனியாக உள்ளது.

டெக்கில் ஒரு அதிகாரியும்,இரண்டாம் இஞ்சினியரும் உக்ரைன் நாட்டவர்,பயிற்சி இஞ்சினியரும்,மூன்றாம் அதிகாரியும் பிலிப்பைன்ஸ்,மேலுமொரு மூன்றாம் அதிகாரி டாக்காவை சார்ந்தவர்,இஞ்சினில் மோட்டார் மேன்,பத்திசாப் மற்றும் முதன்மை அதிகாரி ராவணன் சீதையை கடத்தி கொண்டுபோன தீவிலிருந்து.மூன்று பேருக்கும் தமிழ் தெரியாது.

   மற்ற அனைவரும் இந்தியாவின் உத்திரபிரேதசம்,ஆந்திரா,மகாராஷ்டிரா,மேற்குவங்கம்,குஜராத்,கோவாவை சார்ந்தவர்கள்.மல்லு யாரும் இல்லை.ஒவ்வொரு மாநிலத்தவரும் பேசும் மொழிகள்,உணவு கலாசாரம் வேறுவேறாக இருப்பதால் வேற்று நாட்டவரை போன்ற எண்ணமே எனக்குண்டு. சமையல்காரர் மம்தா பானர்ஜியின் சொந்தகாரர் எனவே எங்களுக்கு இந்திய உணவு கிடைப்பதில் சிரமமேதும் இல்லை.ஞாயிறு பிரியாணி மட்டும் அவரின் கைக்கு வசப்படவில்லை.

 பனாமாவில் இருந்து புறப்பட்டபின்  மொத்த பயண தூரத்தில் பெரும்குதியை கடந்து விட்டோம் நேற்று மாலை பயணஇலக்கை எட்ட எண்ணூறு மைல்கள் இருந்தது.நேற்று காலை முதல் கடலம்மா சீற தொடங்கிவிட்டாள்.காலை எட்டுமணிக்கு டெக்கில் செல்லும்போது நல்ல காற்றும்,ஒரு மீட்டர் அளவுக்கு அலையும் இருந்தது.கப்பலின் முன் பகுதிக்கு சென்றபோது கடலலையை காற்று வேகமாக டெக்கில் கொண்டுவந்து மென் மழைபோல் பீய்ச்சியடித்தது.

மதியத்திற்கு மேல் கப்பல் நன்றாக ஆட தொடங்கி கப்பலின் வேகம் குறைந்தது.நாங்கள் செல்லும் தீவு நாட்டில் பேய் மழை பெய்து மின்சாரம் துண்டிக்கப்பட்டதாக செய்திகள் சொல்கிறது.

நேற்றே காடட் அஞ்சுமன் சொன்னான் “நாளை பேட் வெதர் இருக்கிறது வெகுதூரத்தில் இருப்பதால் நமக்கு கிடைக்காது”என. ஆனால் இரவில் கப்பல் ஆடத்தொடங்கியது.பின்னர் ஆட்டம் குறைந்து சீரானது.

ஏழாம் தேதி காலை ஒன்பதுமணிக்கு தான் நாங்கள் செல்லும் ஹிட்டாச்சி பைலட்.கப்பல் சற்று முன்னதாவே செல்வதால்  வேகம் குறைக்கப்பட்டு 13 knot வேகத்தில் செல்ல தொடங்கியது.



 பனாமாவிலிருந்து புறப்பட்ட மறுநாள் முதலே (22 seagull) கடல் பறவைகள் எங்களுக்கு வழிகாட்டியாக பறக்கதொடங்கின.விமானம் போல் சிறகசைக்காமல் கால்கள் வெளித்தெரியாமல் மடக்கி வைத்துகொண்டு கப்பலுடன் தொடர்ந்து வரும். தலை மட்டும் நூற்று எண்பது டிகிரிக்கு மேல் அரை வட்ட வடிவில் திருப்பி தண்ணீருக்குள் பார்த்துக்கொண்டே வரும். அதன் கண்ணுக்கு மீன் தெரிந்தால் சிறகை மடித்து அந்தரத்திலிருந்து தொப்பேனே தண்ணீரில் மூழ்கி அலகில் மீனுடன் மேலே வரும் பின்னர் சிறகசைத்து பறந்து டெக்கில் அமர்ந்து உண்டபின் மீண்டும் கப்பலுக்கு பைலட்டாக முன்னால் பறந்துகொண்டே இருக்கும்.

இரவானதும் பார்வர்ட் மாஸ்டில் அமர்ந்துகொள்ளும்.கப்பலின் முன் பகுதி முழுவதும் வெள்ளை நிறமாகி போனது. போசன் “இதுக போவமட்டேங்கு கப்பல் புள்ளா தூறிஅழிச்சி போட்டுருக்கு,பெயின்றுக்க கலர் மாறி வெள்ளையாகிட்டு அது போகவே செய்யாது” என்றார். பயிற்சி காப்டன் திலிப் காடட் அஞ்சுமனிடம் “பிளக் இருந்தா அதுக்க பின்னான அடிச்சிவுடு கப்பல நாசம் ஆக்கிட்டு” என்றார்.

  போசன் தினமும் காலை முதல் மாலை வரை பயர் பம்ப் மூலம் கடல் நீரை டெக்கில் பீய்ச்சியடித்துகொண்டே இருந்தார். ஜப்பானை நெருங்கும்போது  இரு பறவைகள் மட்டுமே இருந்தது.மூன்றாம் அதிகாரி எஞ்சேல் மீண்டும் பனமா செல்லும் கப்பலில் அவை தாவியிருக்கும் என்றார்.

    டெக்கில் எனக்கு எளிய பராமரிப்பு பணிகள் மட்டுமே.இஞ்சினைபோல் கடுமையான உடலுழைப்பு இல்லை. நான்கு சரக்குதொட்டிகளிலும் நாற்பத்தியாறாயிரம் மெட்ரிக் டன் ப்ரோப்பேன் அமெரிக்கவின் ஹூஸ்டன் துறைமுகத்தில் நிரப்பப்பட்டது. இந்த திரவம் தொட்டிகளில் மைனஸ் நாற்பது டிகிரியில் இருக்கும்.

  திரவத்தின் வெப்பம் உயரும்போது திரவம் வாயுவாக மாறும். இந்த திரவம் வாயுவாக மாறும்போது ஒரு துள்ளி திரவம் நூற்றி எழுபத்தியாறு மடங்கு பெருகி வாயுவாகும்.அப்போது சரக்கு தொட்டியின் அழுத்தம் அதிகரிக்கும். அந்த வாயுவை சரக்கு தொட்டியிலிருந்து குழாய் மூலம் வெளியேற்றி இங்கிருக்கும் கம்ப்ரசர் மூலம் அழுத்தப்பட்டு குளிர்விப்பானில் குளிரவைத்து திரவமாக மாற்றி மீண்டும் சரக்கு தொட்டிக்குள் அனுப்புவோம்.

  இதற்கு ஒரு நான்கு கம்ப்ரசர்கள் கொண்ட ஒரு அறை உள்ளது.தொட்டியின் அழுத்தம் அதிகரிக்கும்போது கம்ப்ரசர்களை இயக்குவோம். தொட்டிகளிளிருந்து வெளியேறும் வாயு குழாய்கள்,திரவமாக மாறியபின் தொட்டிக்கு செல்லும் திரவகுழாய்களின் சரியான வால்வுகளை திறப்பதும் மூடுவதும்,கம்ப்ரசரை இயக்குவது நிறுத்துவது போன்றவரை என்னுடன் இருக்கும் மும்பையை சார்ந்த சச்சின் சொல்லி தந்தார்.கற்றுக்கொண்டிருக்கிறேன்.

   கம்ப்ரசர் இயக்கம் பற்றி விரிவாக கப்பல் காரன் டைரியில் எழுதியது ஒரு பதிவு எழுதுகிறேன்.

05 june 2023,

நாஞ்சில் ஹமீது.




Friday, 9 June 2023

சான்றிதழ் பிறந்தநாள்

  

           விடுமுறையில் ஊரில் இருந்தபோது டிசம்பர் மாதம் பன்னிரெண்டாம் தேதி துவங்கும் நள்ளிரவில் தூங்கி கொண்டிருந்த என்னை இளைய மகன் சல்மான் எழுப்பினான் அருகில் மூத்தவன் ஸாலிமும்,சுனிதாவும் நின்றுகொண்டிருந்தனர்.

  சல்மானின் கையில் எரியும் மெழுகுவர்த்தியை நடுவில் குத்திய கேக் இருந்தது. ஹாப்பி பிர்த்டே என சொல்லி கேக்கை வெட்ட சொன்னார்கள். 2012 ஆண்டு வீட்டுக்கு வந்திருந்த நண்பன் ஜெகநாத நாகராஜா “ஷாகுல் 12-12-12 மீண்டும் வராது கொண்டாடுவோம் என பிறந்தாநாள் கேக் வாங்கி வந்து ஊட்டியும் விட்டார்.

  சின்ன வயதில் பிறந்தநாள் எப்போது என்றே எனக்கு தெரியாது.கேக் வெட்டியதாக நினைவேயில்லை.நான் பிறந்த மாலை வேளையை எனது தாய் பீமா கூற கேட்டிருக்கிறேன்.

 உம்மா அப்போது காந்தாரிவிளை ஓடை செய்யது அவர்களின் வீட்டில் வாடகைக்கு குடியிருந்தாள்.நிறை மாத கர்ப்பிணியான எனது தாயை பார்த்த்துவிட்டு மருத்துவச்சி ராமலெட்சுமி பாட்டி, “மக்களே மூஞ்சிய பாத்தா நீ இன்னைக்கு பெறுவா” என சொல்லிவிட்டு ராமலெட்சுமி பாட்டி திண்ணையிலேயே அமர்ந்திருக்கிறாள். 

  எனது உம்மாவிற்கு ராமலெட்சுமி கிழவியிடம் பிரசவம் பார்க்க விருப்பமில்லை. மருத்துவச்சியும் நகர்வதாக இல்லை.தான் இன்று குழந்தையை பெற்றெடுப்பேன் என உணர்ந்த வேளையில். ராமலெட்சுமி கிழவி “பீமா நான் போய்ட்டு வாறன் நொம்பலம் வந்த சொல்லிவுடு” என கூறிவிட்டு சென்றதும்.

   என் தாய் சந்திரி நர்ஸை அழைத்துவர ஆள் அனுப்பியிருக்கிறாள். அன்று மாலை ஆறரை மணிக்கு நான் பிறந்தேன். “ரொம்ப கஷ்டபடுத்தமா நீ பொறந்தா”என தாய் சொல்வாள். அதே ஆண்டு மிக அருகிலேயே வீடு கட்டி குடியேறியதாக என் வாப்பா சொல்வர். 

  என் மகனுடன் காந்தாரிவிளைக்கு சென்றபோது இதுதான் நான் பிறந்த வீடு என அந்த வீட்டை காட்டிகொடுத்தேன். “அப்போ நீங்கோ ஆசுபத்திரியில பொறக்கலியா என” கேட்டான்.

   நான்கரை வயதானபோது மணவாளக்குறிச்சி அரசு தொடக்கப்பள்ளியில் என்னை சேர்ப்பதற்காக பக்கத்து வீட்டு உதவி அப்பா (நாடக உதவி இயக்குனர்) பள்ளிக்கு அழைத்து சென்றார். அப்போது ஐந்து வயது பூர்த்தியானதால் ஒன்றாம் வகுப்பில் சேர்த்து கொள்வார்கள் கையை தலைக்கு மேலே சுற்றி காதை தொடசொல்லி சோதனை செய்வார்கள்.

  அப்படி நான்கரை வயதான என்னை உதவியும்,தலைமையாசிரியர் வறுவேல் சாரும் சேர்ந்து மே இருபதாம் தேதி என புதிய பிறந்த நாளை உருவாக்கி பள்ளியில் சேர்த்தனர்.

  அப்படி பள்ளி சான்றிதழ்கள் வழியாக பாஸ்போர்ட் மற்றும் அனைத்து ஆவணங்களிலும் பிறந்தநாள் மே இருபதாம் தேதியாகிவிட்டது. 2019இல் முதல் முறையாக கப்பலில் எனது சான்றிதழ் பிறந்தநாளை கேக் வெட்டி கொண்டாடினார்கள்.



    இப்போது இருக்கும் இந்த கப்பலில் சென் சாம்ராஜ் என்பவருக்கு பதினெட்டாம் தேதி பிறந்தநாளாக இருந்தது.கப்பலில் காப்டன் ஆசிஸ் நய்யார்,சமையல்காரர் சிரஞ்சீவியிடம் இருவரின் பிறந்தநாளையும் ஒன்றாக கொண்டாடுவோம் என சொல்லி கேக் தயார் செய்ய சொல்லியுள்ளார்.





   இருபதாம் தேதி மாலை கப்பலில் கேக் வெட்டி,பார்டியுடன் பாட்டும் ஆட்டமும் உண்டு.வங்கி,எனது கப்பல் நிறுவனம்,நான் படித்த மரைன் கல்லூரிகள் பிறந்தநாள் வாழ்த்து சொல்லி அனுப்பிய மின்னஞ்சல்களால் மெயில் பாக்ஸ் நிரம்பிவிட்டது. முன்பு என்னுடன் புணிபுரிந்த எர்ணாகுளம் கோப குமார் சொல்வார்  “சாஹுலே அது ஒரு செட்டபானு ஈ திவசத்தில மெயில் தன்னே வருந்நது” என்பார்.

   மனைவி சுனிதாவிற்கும் இன்று சான்றிதழ் பிறந்தநாள். முன்னாள் பாரத பிரதமர் சர்தார் வல்லபாய் பட்டேலுக்கு நான்கு வருடங்களுக்கு (பிப்ரவரி  29) ஒரு முறைதான் பிறந்தநாள் வரும். யாருக்கு கிடைக்கும் இரட்டை பிறந்தநாள். 

Shahul hameed ,

20 05 2023.

பணியில் இணைதல்

 என் எஸ் பிரன்டியர் நாட்குறிப்புகள் 3

  பணியில் இணைதல்.

        ஞாயிற்றுக்கிழமை(14may2023) மாலை ஆறு மணிக்கு “டிரைவர் வருகிறார் தயாராகுங்கள்” என வரவேற்பறையிலிருந்து  அழைத்து சொன்னார்கள்.

விடுதியறையிலிருந்து பனாமாவின் சாலை

விடுதி வரேவேற்பறையிலிருந்த ெபெண் சிலை


        

விடுதியறை நாட்கள் பற்றி தனியாக எழுதவேண்டும்.முதல் மூன்று நாள் தனிமை படுத்தலுக்குப்பின் கொரோனா சோதனைக்கு சாம்பிள் எடுத்து சென்றார்கள்.(09-may -2023)செவ்வாய்க்கிழமை இரவு விடுதியறைக்குள் நுழைந்தேன்.கப்பல் பனாமா வருவது தாமதமானதால் மேலும் இரு தினங்கள் இருக்கவேண்டும் என்றபோது சற்று கடினமாகிவிட்டது.  

  (12may2023)வெள்ளிக்கிழமை காலை கொரோனா சோதனைக்காக விடுதியின் வரவேற்பறைக்கு வந்தபோதுதான் தெரிந்தது இலங்கையை சேர்ந்த பத்தி சாப் ஹிராத் (எலெக்ரிகல் ஆபிசர்) பங்களாதேசை சார்ந்த ரஹீம் உல்லா மூன்றாம் அதிகாரி இருவரும் எங்களுடன் கப்பலுக்கு வருகிறார்கள் என. 

எங்களது பாஸ்போர்ட்டுடன் இமிகிரேசன் பெண் அதிகாரி ஒருவரும்,ரஹீம் உல்லாவின் பாஸ்போர்ட்டை வைத்திருந்த அதிகாரி ஒருவரும் என பயண பைகளுடன் ஏழுபேர் காரில் ஏறிக்கொண்டோம்.இலங்கையை சார்ந்தவர்கள் பனாமாவில் வெளியே செல்ல தடையில்லை.

 பனாமா மிக சிறிய நகரம்தான் நட்சத்திர விடுதிகளும்,மால்களும்,ஹோட்டல்களும்  என வானத்தை முட்டும் கட்டிடங்கள் நிறைந்த இந்த நகரை விட்டு ஐந்து முதல் பத்து நிமிடத்திற்குள் வெளியேறி விட்டோம். பின்பு இந்தியாவின் கொங்கன் பகுதியை நினைவுபடுத்தும் சமதளமற்ற பச்சை சூழ்ந்த காடு தான்.சாலையின் இருபுறமும் வீடுகளோ,கடைகளோ கிளை சாலைகளோ எதுவும் இல்லை கண்ணுக்கு எட்டிய தூரம் வரை பச்சையே காட்யளித்தது அந்தியணைந்து இருள் கவ்வுவது வரை பச்சைவெளியை அமைதியாக தியானம் போல பார்த்துக்கொண்டிருந்தேன்.

  நூற்றியிருபது கிலோமீட்டர் வேகத்தில் பறந்த கார் ஒரு மணிநேரத்தில் கிறிஸ்டோபல் நகரை எட்டியது.இமிகிரேசன் அதிகாரிகள் எங்களது பாஸ்போர்ட்டை ஏஜென்டிடம்  ஒப்படைத்துவிட்டு சென்றனர். (ஐஞ்சு நாளா வெளிய எங்கயும் உடாம பிடிச்சி வெச்சி பத்திரமா கொண்டு வந்து சேத்துருக்கேன் தண்ணியில உட வேண்டியது உன் பொறுப்பு என சொல்லியிருப்பார்களோ என எண்ணிக்கொண்டேன்).

   முகவர்  துறைமுக அதிகாரிகளிடம்அனைத்து முறைமைகளையும் முடித்து கப்பல் ஏற ஒப்புதல் பெற்று கடவு சீட்டுகளை எங்களிடம் தந்தார்.டிப்பாச்சர்(DEPARTURE)என  முத்திரை குத்தப்பட்டிருந்ததை கண்டேன்.

  தூரத்தில் நங்கூரம் பாய்ச்சி நின்றுகொண்டிருக்கும் கப்பல்களுக்கு தேவையான உணவு பொருட்கள்,உதிரி பாகங்களை ஏற்றிய லாரிகளை இங்கே வாயிலில் சோதனை செய்து அனுப்புகிறார்கள். இங்கு ஸ்கானர் ஒரு பெரிய கறுத்த லாப்ரர்டோ நாய்.சுங்க அதிகாரி லாரியின் கதவை திறந்து  சற்று பின்னோக்கி சென்று நாயை ஓட விட்டு நான்கடி உயரமுள்ள லாரியில் ஏற்றி விடுகிறார். நாய் ஒவ்வொரு பெட்டியாக முகர்ந்து பார்க்கிறது குரைக்கவேயில்லை. 

  லாரியின் சோதனை முடிந்து சுங்க அதிகாரியும்,ஸ்கானரும் கீழே இறங்கினர்.பின்னர் சரக்குகளுடன் லாரி வாயிலை கடந்து உள்ளே சென்றது.2008 ஆம் ஆண்டு பனாமா விமான நிலையத்தின் வாயிலில் நுழைந்ததும் ஒரு புஷ்டியான நாய் தான் எங்கள் பயணபை களை சோதித்து நீ உள்ளே போலாம் என அனுப்பி வைத்தது.

 மெக்சிகோவிலும்,இஸ்ரேலிலும் கப்பல் சென்றபோது போதை பொருட்கள் சோதனைக்காக அதிகாரிகள் நாய்களையே கப்பலுக்குள் கொண்டு வந்தது நினைவில் மின்னி சென்றது.

   எங்கள் பயண பைகளை இங்கே சோதிக்கவில்லை கடவுசீட்டை கையில் தந்துவிட்டு முகவர் எங்களை படகு துறைக்கு அழைத்து சென்றார். நீண்ட வரிசையில் கப்பல்களுக்கு சரக்குகளை கொண்டு செல்லும் படகுகள் நின்றுகொண்டிருந்தது. படகில் பைகளை படகில் வைத்ததும் முகவர் “வேறொரு கப்பலுக்கு செல்லும் மாலுமி ஒருவர் வருகிறார் அவர் வந்ததும் நீங்கள் கிளம்பலாம் இருபது நிமிடங்கள் ஆகும்”என சொல்லிவிட்டு. “ஹாவ் எ சேப் வாயேஜ்” என கை குலுக்கி விடைபெற்று சென்றார்.

படகில் 


 ஆறடி உயரத்தில் நல்ல திடகாத்திரமான உடல் வாகும் கொண்ட வெள்ளைகார மாலுமி மிக குறைந்த உடமைகளுடன் படகுக்கு வந்தார். நீண்ட பயணத்தின் களைப்பால் முகம் சுருங்கி போய் இருந்தது.

   கிரிஸ்டோபலில்  கரையிலிருந்து கடலுக்குள் படகு நுழைந்தது.துறை முகப்பில் கரையணைவதற்காக  சரக்கு பெட்டகங்கள் ஏற்றிய பெரிய கப்பல் ஒன்று ஒரு தீவு போல மெதுவாக நகர்ந்துகொண்டிருந்தது.அதில் ஒளிர்ந்த விளக்குகள் ஒரு சிறு நகரை போலிருந்தது.

   வெள்ளைக்கார மாலுமி பதினைந்து நிமிட பயணத்திற்குப்பின் அவரது கப்பலுக்கு சென்றார்.எங்கள் படகுக்காரர் அவரது பைகளை கப்பல் பணியாளரின் கையிலேயே கொடுத்தார்.குள்ளமான பெரிய மீசையுடன் அரைகால் சட்டையணிந்த வெள்ளைக்காரர் ஒருவர் அவரை வரவேற்று கப்பலுக்குள் அழைத்துசென்றார். கப்பல் காப்டனாக இருக்கும் என எண்ணிக்கொண்டேன்.

 படகுக்காரர் தனது மொபைலை எங்களிடம் காட்டி கப்பல் வந்துகொண்டிருக்கிறது  இன்னும் பதினைந்து நிமிடங்கள் ஆகும் என சொல்லியபின் காத்திருந்தோம்.படகு நின்றதும் பயங்கரமாக ஆடத்தொடங்கியது. மீண்டும் படகை இயக்கி அலையின் போக்குக்கு தகுந்தமாதிரி திருப்பி பின் நிறுத்தினார் படகோட்டி.  பனாமா அதிகமான மழை பொழிவுள்ள இடம் மேற்கூரை இல்லாத படகில் பயணபைகளுடன் ஒருமணி நேரம் இருந்தபோது மழை இல்லாமல் காத்த இயற்கைக்கு  நன்றி சொன்னேன்.

    என் எஸ் பிரண்டியர் அருகில் வந்ததும் கப்பலின் முன் பகுதிக்கு சென்று பயண பைகளை அடுக்கிய ராட்சத பையை கப்பலிலிருந்து இறங்கிய கிரேனின் கொக்கியில் இணைத்தோம்.ஆவணங்கள்,மடி கணினி இருந்த பைகளுடன் மெதுவாக ஓடிக்கொண்டிருந்த கப்பலின் ஏணியில் தாவி ஏறி கப்பலின் மேல் தளத்துக்கு சென்றோம். எங்கள் பைகளை பத்திரமாக கப்பலுக்குள் கிரேன் மூலம் இறக்கி வைத்திருந்தார் லக்னோவின் போசன் யாதவ் (கிருஷ்ணனின் உறவு காரராக இருப்பாரோ) ஐடியா மணி இருந்திருந்தால் கோனாரே என கட்டியணைத்திருப்பார்.

  ரத்னகிரியின் ஓ எஸ் இர்பான் எங்களிடம் கையொப்பம் பெற்றபின் “வெல்கம் ஆன் போர்ட்”உள்ளே போக சொன்னார்.எங்களுடன் வந்த பயிற்சி காப்டனும்,மூன்றாம் இன்ஜியரும், ஏழு மாதங்களுக்குபின் மீண்டும் இங்கே வருகிறார்கள்.இலங்கையின் முதன்மை அதிகாரி டான் ............................அலெக்ஸ்  பயிற்சி காப்டனை கட்டித்தழுவி வரவேற்றார்.கப்பல் பனமா கால்வாயை நோக்கி நகர்ந்தது.

  எங்களுக்கான அறைகளை காட்டித்தந்தார் காடட் மும்பையின் அஞ்சுமன். உணவுகூடம் சென்றோம். ஹாட் டாக் இருந்தது. ஆளுக்கொன்று சாப்பிட்டோம்.

  அறைக்கு வந்து பத்திசாபிடம் இணையம் கடன் வாங்கி சுனிதாவிற்கு அழைத்து சொன்னேன் “வந்து விட்டேன் கப்பலுக்கு” என.

  நீராடி கடமையான தொழுகைக்குப்பின் நீண்ட பயணத்திற்குப்பின் கப்பலுக்கு பத்திரமாக வந்து சேர்ந்தமைக்கு நன்றி சொல்லும் பொருட்டு இரண்டு ரக்காத் நபில் தொழுதபின்  அறைக்கு வெளியே வந்தேன்.மழை சட்டைகளை அணிந்துகொண்டு கப்பல் பணியாளர்கள் கயிறுகளை பனமா கால்வாயின் ஓரங்களில் வீசி எறிந்தனர்.கால்வாய் பணியாளர்கள் அதை இழுத்து பெரிய கயிற்றின் கண் வடிவ கண்ணியை பொலர்ட்டில் பொருத்தினர்.




பனாமா கால்வாய்


 கப்பல் கால்வாயின் முதல் கேட்டுக்குள் நிறுத்தப்பட்டபின் தண்ணீரை நிரப்பதொடங்கினர் கப்பல் மேலே உயர தொடங்கியது.

மேலும் .

நாஞ்சில் ஹமீது.

 கப்பல் காரன் டைரி இனி தொடர்ந்து வரும். இணையம் கிடைக்கும்போது எனது தளத்தில் வலையேற்றுவேன்.

   

  


Monday, 29 May 2023

நடுக்கடலில்

                                நடுக்கடலில் 





   பனாமாவிலிருந்து ஆசியாவின் தீவு நாடு ஒன்றுக்கு புறப்பட்டு நான்காயிரத்தி எண்ணூறு மைல்களை தாண்டிவிட்டோம் மொத்த தூரம் எட்டாயிரம் நாட்டிகல் மைல் (1 nautical mile=1.85km).


 இம்மாத நடுவில்  பனாமா கால்வாயை கடப்பதற்காக வந்துகொண்டிருந்த கப்பலில் இரவு நேரத்தில் கிறிஸ்டோபலில் ஏறிக்கொண்டோம்.

   கப்பலின் வேகத்தை குறைத்தபோது நாங்கள் வந்த படகு கப்பலுடன் அருகணைந்து அதன் வேகத்துக்கு இணையாக சென்றுகொண்டிருக்கும்போது  ஸ்டார்ட்போர்ட் சைடில் தொங்கிகொண்டிருந்த ஏணியில் (Gangway) தேர்ந்த சர்க்கஸ்காரனைப்போல தாவி ஏறி கப்பலுக்குள் பத்திரமாக பாதம் பதித்தோம்.

  இரவே அட்லாண்டிக் கடலிலிருந்து பனாமா கால்வாய்க்குள் நுழைந்து காட்டில் ஓடும் ஆற்றிற்குள் சென்று பாதுகாப்பான இடத்தில் நங்கூரம் பாய்ச்சி நின்றிருந்தோம். மறுநாள் மதியம் நங்கூரம் உருவப்பட்டு மறு எல்லையை அடைந்து (பல்போவா)பசுபிக் கடலில் நுழையும்போது இரவாகியிருந்தது.

    இரண்டாயிரத்தி ஒன்பதாம் ஆண்டுமுதல் இஞ்சின் பிட்டராக இருந்தேன்.அதில் எனது பணி பெரும்பாலும் தெரிந்திருந்ததால் அதிலேயே எளிதாக ஒன்றிபோய்விட்டேன்.

   எல்.பி.ஜி கப்பல்களில் காஸ் பிட்டராக வாய்ப்பு உள்ளது என நண்பர்கள் சொன்னபோது எல்.பி.ஜி.கப்பலில் வாய்ப்பு கேட்டு என் நிறுவனத்திடம் கோரிக்கை வைத்தேன் 2014ஆம் ஆண்டு. முன் அனுபவம் இல்லாமல் எல்.பி.ஜி கப்பலில் அனுப்ப முடியாது என கை விரித்தார் என அப்போதைய மேலாளர் அனிதா.

  2016 ஜூன் மாதம் அனிதா என்னை அழைத்து எல்.பி,ஜி கப்பலில் வாய்ப்பு தருகிறோம் அதற்கான (course) வகுப்பில் கலந்து சான்றிதழ் பெறச்சொன்னார்.பணியில் இணையும்போது டெக் வேலைகளை கற்றுக்கொள் என்றார்.

  ஆனால் இப்போதுதான் டெக்கில் காஸ் பிட்டராக இணையும் வாய்ப்பு கிடைத்தது.எல்.பி.ஜி கப்பல்களின் இயந்திர அறையில் கடுமையான வெப்பம் இருக்கும். அதிகம் உடல் உழைப்பு சார்ந்த பணி ஆதலால் இரவில் சீக்கிரமே நல்லுறக்கம் எப்போதும்.

    இப்பொது இங்கே காஸ் பிட்டராக பணிக்கு வந்தேன்.ஆறு வருடம் ஆன புதிய கப்பல்.காலையில் கணினி திரையை பார்த்து எல்.பி.ஜி திரவம் நிரப்பபட்டுள்ள நான்கு தொட்டிகளின் வெப்பம்,அழுத்தம் ஆகியவற்றை பதிவு செய்ய வேண்டும்.பின்னர் காஸ் பிளாண்டில் ஓடிக்கொண்டிருக்கும் இயந்திரத்தின் வெப்பம்,அழுத்தம் போன்றவற்றை குறித்துகொண்டு புத்தகத்தில் பதிவு செய்ய வேண்டும்.

   மதியமும்,இரவும் அதுபோல் எழுதவேண்டும். இரவு ஒன்பது மணிக்கு மீண்டும் ஒருமுறை காஸ் பிளாண்டில் சென்று இயந்திரங்களை பார்த்து அளவுகளை குறித்து பதிவு செய்ய வேண்டும்.மீதமுள்ள பகல் பொழுதில் சில பராமரிப்பு பணிகள். புதிய கப்பலாக இருப்பதால் எளிய பணிகள் மட்டுமே எனக்கு.இத்தனை வருடங்கள் கடும் உடல்உழைப்பு சார்ந்த பணியில் இருந்ததால் இப்போது இது எனக்கு மிக எளிதாக இருக்கிறது.

   பனாமாவில் இருந்து புறப்பட்டது முதல் இதுவரை இருதினங்களுக்கு ஒரு மணிநேரம் என ஆறு மணிநேரம் கப்பலின் கடிகாரம் பின்னே சென்றுவிட்டது.இந்த வாரத்தில் ஒரு  நாளை முன்னே நகர்த்தி(https://kappalkaran.wordpress.com/2021/06/05/563/ காணாமல் போன செவ்வாய் கிழமைகப்பல்காரன் டைரியில்) மேலும் நான்கு மணிநேரம் பின்னே சென்று  ஆசியாவின் தீவு நாட்டை அடையும்போது  இரவு பகலாகியிருக்கும்.

  பனாமாவில் இருந்து புறப்பட்ட மறுநாளே அறையின் வெப்பம் அதிகரித்து 27 டிகிரியை எட்டியது கடல் நீர் முப்பத்தி நான்கு டிகிரியிலும்.கப்பலின் குளிரூட்டி மிக சிறியதாக இருந்ததால் குடியிருப்பின் அறைகளை குளிர்விக்க இயலவில்லை. எல்லா அறைகளிலும் மின்விசிறி இருந்தது.படுக்கைக்கு அருகில் நாற்காலியை போட்டு மின்விசிறியை அதில் கட்டிவைத்தபின் சுழல வைத்து சட்டையில்லாமல் படுத்துக்கொண்டேன்.

 


  வெப்ப பகுதிகளில் செல்லும்போது கொஞ்சம் கஷ்டம் தான் என்றார்கள். இங்கிருந்த இஞ்சினியர்கள். படிப்படியாக வெப்பம் குறைந்து ஐந்தாவது நாளே அறையின் வெப்பம் 21 டிகிரியில் சென்றதால் குளிரூட்டியை அணைத்து வைத்தேன்.பகலில் கொஞ்சமாக திறந்தாலும் பத்தொன்பது பாகைக்கு சென்றதால் நேற்று வரை அணைத்தே வைத்திருந்தேன்.

   பதினைந்து நாட்டிகல் மைல் வேகத்தில் செல்லும் கப்பல் உத்தேசமாக ஒரு நாளில் முன்னூற்றி முப்பது மைல்களுக்கு மேல் கடப்பதால் மொத்த தொலைவில்  இன்று வரை பாதிக்குமேல் கடந்துவிட்டோம். பசுபிக் கடலில் பயணிக்க தொடங்கியபின் அருகில் எங்கும் நிலமே இல்லை வட பசுபிக் கடலில்   ஆசியாவுக்கும் அமெரிக்காவுக்கும் கடலின் நடுவில் இருக்கிறது ஹவாய் தீவு இதை எழுதிகொண்டிருக்கும் போது ஹாவாயின் கோணலுலு(honlulu)    தீவிலிருந்து 370 மைல் தொலைவில் கப்பல் சென்றுகொண்டிருக்கிறது.

   நண்பர்கள் சிலர் கேட்டார்கள் இப்போது எங்கே இருக்கிறாய் என நடுக்கடலில் என்றேன்.



  கப்பலுக்கு வந்தபின் தினமும் ஒருமணிநேரம் எழுதுவது ஒருமணி நேரம் வாசிப்பது என வகுத்துகொண்டேன்.ஆனால் எண்ணியது போல் நடக்கவில்லை.சிறுகதை ஒன்று எழுதினேன்.கட்டுரை எழுதவதை போல் அது எளிதல்ல என்பதை எழுதியபின் உணர்ந்தேன். கடந்த வாரத்தின் முழு ஞாயிறையும் மற்ற நாட்களின் ஓய்வு நேரத்தின் பெரும்பகுதியையும் அது எடுத்துகொண்டது பயிற்சியின்மையே காரணம் என உணர்ந்தேன்.இனி அடிக்கடி கதை எழுத வேண்டும்.

 கப்பலின் கடிகாரம் பின்னோக்கி செல்வதால் இரவில் சீக்கிரமே தூக்கம் அழுத்துகிறது .அதிகாலை நான்கு மணிக்கே விழித்தாலும் நான் நினைத்தது போல் எழுதவோ படிக்கவோ முடியவில்லை.

இனி வரும் நாட்களில் நாட்குறிப்புகள் எழுதியும்,வாசிக்கவும் செய்ய வேண்டும்.

புதிய பணியில் கற்றுகொண்டே இருக்கிறேன்.ஒருமுறை சரக்கை இறக்கி பின்னர் சரக்கை ஏற்றும்போது போது முழுமையாக எனது பணிகளை தெரிந்துகொள்வேன்.

                ட்்

  இனி மேல் எனது  கட்டுரைகள் நாஞ்சில் ஹமீது எனவும் புனைவுகள் கப்பல்காரன் எனவும் வரும்.

  நாஞ்சில் ஹமீது.