Friday, 17 April 2020

பக்கரு -சிறுகதை

பக்கரு –சிறுகதை

  அதிகாலை வடசேரி பள்ளியில் *ஸுபஹ் தொழுகைக்கான பாங்கு காற்றில் மிதந்து வந்தது அல்லாஹ் அக்பர்,அல்லாஹ் அக்பர்.பக்கரின் வீட்டுக்காரி வியாத்தகண்ணு பக்கருடைய  கழுத்து, ,நெற்றியில்  கை வைத்து  பார்த்துவிட்டு  “தீ போல கொதிக்குது நீங்கோ இன்னைக்கு கடைக்கி போவாண்டாம்”என்றாள் பக்கரிடம்.

  “ராத்திரியே நல்ல காய்ச்சலாத்தான் இருந்துது.கடையிலயிருந்து வரும்போது ஒரு அஞ்சால் அலுப்பு மருந்த கட்டன் சாயால கலந்து குடிச்சிட்டுத்தான் வந்து படுத்தேன்.காலத்த செரி ஆவுண்ணும் நினேச்சன்.நீ போய் தண்ணி போட்டு கொண்டுவா” என வியாத்தகண்ணுவிடம் சொல்லிவிட்டு இடப்புறமாக சரிந்து கையை ஊன்றி மெதுவாக எழுந்து பாயில் அமர்ந்தார் பக்கர்.வியாத்தகண்ணு சுக்கும்,மிளகும்,கொத்தமல்லியும்,ஜீரகமும் சேர்த்து இடித்து சுக்குகாப்பிக்கு பாத்திரத்தில் தண்ணீரை ஊற்றி ,துண்டு கருப்பட்டியை போட்டு அடுப்பை பத்தவைத்தாள்.
    
  
    உம்மா,வாப்பா வைத்த பெயர்  அபூபக்கரா இருந்தாலும்,அவரை அனைவரும் அழைப்பது பக்கரு என்றுதான் .ரேஷன்கார்டுக்கு பேரு எழுதும்போதுதான் தன் பெயர் அபூபக்கர் என அவருக்கே நினைவுக்கு வரும் .
  
   பக்கரு பதினெட்டு வருடமாக வேலை செய்வது நாகர்கோயிலில்   மணிக்கூண்டு அருகில் உள்ள அசன் மொதலாளி நடத்தும் அம்ஸா சைவ,அசைவ ஹோட்டலில் .அம்ஸா ஹோட்டல் என்று சொன்னால் மாவட்டத்திலும் ,அருகில் உள்ள கேரளாவிலும்  தெரியாதவர்கள் கிடையாது . "நல்ல பேரு கேட்ட ஹோட்டலாக்கும் நாக்குக்கு ருசியான கோழி பிரியாணி,ஆட்டிறைச்சி பிரியாணி இல்லானக்க நல்ல புரோட்டாவும்,மாட்டிறைச்சியும்,எறச்சி சால்னா ஊத்தி,முட்டையும் போட்டு கொத்துன கொத்துப்புரோட்டா தின்னனும்னாக்க அம்ஸா ஹோட்டலுக்குதான் போனும்னு" சுவை அறிந்தவர்கள் சொல்வதுண்டு.
  

    பக்கரு பிறந்தஊர் நெல்லை மாவட்டம் வள்ளியூர் அருகிலுள்ள துலுக்கப்பட்டி. தனது திருமணத்திற்கு பிறகு வருமானம் போதாமால் இவ்வூருக்கு வந்தார் .வடசேரி ஓட்டு பெரைத்தெருவில் வசித்தபோது பக்கத்துவீட்டு பாத்திமுத்துவின் வீட்டுகாரர் தனது செல்வாக்கை பயன்படுத்தி பக்கரை அம்ஸா ஹோட்டலில் வேலைக்கு சேர்த்துவிட்டார்.
 பக்கர் எண்பத்தைந்தில் அம்ஸா ஹோட்டலில் பணிக்கு சேரும்போது தின சம்பளம் பனிரெண்டு ரூபாய், வெளியூர் ஆட்கள் சாப்பிட வந்தால் ஐம்பது பைசா,ஒரு ரூபாய் என  கைமடக்கு கிடைத்தால்  ஒரு ஐஞ்சு முதல்  ஏழு ரூபாய் கிடைக்கும்.ஒன்னும் கிடைக்காத  நாட்களும் நிறைய  உண்டு. அப்போது  பெரிய முதலாளி அன்வர் கடையில்  இருந்தார் அவர் மாத சம்பளம் தரும்போது கணக்கு பாக்காமல் புள்ள,குட்டிகாரன்னு ஐஞ்சி ரூபாய் கூட அதிகமாக தருவார்
  
    அன்வர் முதலாளி எண்பத்தேழில் மரித்தபின்   அவருடைய  மச்சினன் அசன் முதலாளி தான் கடையை நடத்துகிறார்.இவுரு கொஞ்சம் முசுடு ,எல்லாவற்றுக்கும்  கணக்கு பார்ப்பார் .வாயில் வந்தது போல பணியாளர்களை திட்டுவதால், யாரும் இங்கே அதிக நாட்கள் பணியில் தாக்கு பிடிப்பதில்லை .பக்கரும் இன்னும் சிலரும் மட்டும் குடும்ப சூழல் கருதி எதையும் காதில் வாங்குவதில்லை.

    அம்ஸா ஹோட்டலின் அசைவ பிரிவில் தற்போது பக்கர் கவனிக்கும் நான்கு மேசைகளும் அவர் பணிக்கு சேர்ந்தபுதிதில் இப்ராகிம் தான் இருந்தார். 'இப்ராகிம் கஸ்டமர்ட்ட  ரெண்டு சிக்கன் பிரை,ஒரு பிளேட் மட்டன  குடுத்துட்டு  ஒரு முட்டைகறிக்கு மட்டும் பில் போட்டு கைமடக்கு வாங்கத்துல ரஹீம் பிடிச்சு போட்டாரு,அதனால முதலாளி இப்ராகிம நிருத்திடாரூ"  என ராமச்சந்திரன் சொன்னார். பொறவு அங்க நின்னது ஐயப்பன் ,அவன் கோயிலு கொடைக்கு முதலாளிட்ட ஆயிரம் ரூவா வாங்கிட்டு போனவன் திரும்பி வரல .அப்போதுதான் அசன் முதலாளி பக்கரை அழைத்து  “நீ அந்த பேமிலி முறிக்க கிட்ட உள்ள மேசைல நில்லுடே”என்றார்.
  
     அன்று பக்கர்,மனைவி வியாத்தகண்ணுவிடம் “இன்னேலேருந்து எனக்க டேபிளு மாத்தமாக்கும் என்னமும் சில்லற படியறும் அதுல”என முகத்தை கோணலாக்கி சிரித்தார்.பக்கர் இருப்பாதாலேயே அம்ஸா ஹோட்டலுக்கு பல நிரந்தர வாடிக்கையாளர்கள் உண்டு.அம்ஸா ஹோட்டல் பரபரப்பாக இயங்கும் மதிய வேளைகளில் பக்கர் மூன்று ப்ளேட் பிரியாணி,இரண்டு சிறிய ப்ளேட் சிக்கனை வலது கையிலும்,இடக்கையில் ஒரு பிளேட்டுமாக கொண்டு செல்வதை வாடிக்கையாளர்கள் கண்கள் விரிய பார்ப்பதுண்டு.
   
        நெய்யூர் ஆஸ்பத்திரி டாக்டர் கீயுபட் நாகர்கோயிலுக்கு வந்தால் அம்ஸாவில்  ஒரு பிரியாணி தின்னுட்டுத்தான் செல்வார்  .அன்று சனிக்கிழமை டாக்டர் கீயுபட் வந்திருந்தார் .
“என்ன பக்கரே சொகமா இருக்கீரா”
“டாக்டர் வரணும் நல்லா இருக்கேன் ,நீங்கோ சொகந்தானா? ஒருவாரமா கை முட்டுல லேசா வலி”என்றார் பக்கர் 
 “அடி என்னமும் பட்டுதா ஓய்” என சட்டைபைலிருந்து கண் கண்ணாடியை எடுத்து போட்டுவிட்டு பக்கரின் கையில் அழுத்தி பார்த்தார் டாக்டர் கியூபட் .
 “ ரெத்தகெட்டு இருக்குவோய்,இதுக்கெல்லாம்  இங்க்லீஷ் மருந்து வேண்டாம்,கோபால் ஆசான்ட்ட சொல்லி ஆலம் பால் தைலம் வாங்கி ஒருவாரம் போடும் அடுத்த வாரம் நான் வரத்துல பாக்குலாம்” என்றார்.
   


        "இன்னைக்கி பிரியாணி மாஸ்டர் மாத்தமாக்கும் சுலைமான் பாய் மொவளுக்கு கல்யாணம்ன்னு கடையநல்லூருக்கு போயிட்டாரு, சுபைராக்கும் இன்னைக்கி மாஸ்டரு , நெய்சோறும் கறியும் சாப்புடுங்கோ நல்லா இருக்கும் ,இல்லன்னா உங்களுக்கு பிடிச்ச பொரிச்ச நெய்மீன் இருக்கு,காலத்த சூசை கன்னியாமரியிலருந்து கொண்டு வரத்துல துடிச்சிட்டு இருந்தது”.என்றார் பக்கர். “சரி நீரு சொன்ன பொறவு நான் பிரியாணி தின்னபுடாது,பொரிச்ச மீனும் நெச்சோறும் தாரும்” என்றார் டாக்டர் .  நிரந்தர வாடிக்கையாளர்களின் நாவின் ருசி அறிந்தவர் பக்கர் .

   வியாத்தகண்ணு தந்த ஆவி பறக்கும் சுக்குகாப்பிய கையில வாங்கி ஒரு மடக்கு ஊறிஞ்சி குடிச்ச  பக்கரு மூணு  வருசத்துக்கு முந்தைய நினைவில் மூழ்கினார்.  ஒருநாள் சாயங்ககாலம்  “மொலாளி பயல இஞ்சினியரிங் காலேஜில சேக்கணும் ஒரு முப்பதாயிரம் ரூவா கடனா வேணும் காலேஜி பீசடைக்க” எனக்கேட்டார் அபூபக்கர் . “பக்கரே உனக்க தகுதிக்கு போல ஆசைப்படு ,இஞ்சினியருக்கு படிக்க வைக்க உனக்கு முடியுமா டே,வேற என்னத்தையாவது சின்னதா படிக்க வை”என்றார் அசன் முதலாளி பக்கரிடம்.
  
மகனுக்கு பிளஸ்டூவில் நல்ல மதிப்பெண் அவன் இஞ்ஜினியர்தான் படிப்பேன்னு சொன்னான்.முதலாளி ரூவா இல்லைன்னு சொன்னதால வியாத்தக்கண்ணுக்க ஒரு மாலையையும்,கையில கிடந்த இரண்டு சின்ன காப்பையும் வித்து வெச்சிருந்தேன்.மொவன் அவனுக்கு பிரண்டுக்க கூட இராமநாதபுரம் செய்யது அம்மாள் காலேஜில் இடம் இருக்குன்னு போயிட்டு மறுநாள் போண் பண்ணினான்.  உச்ச* நேரம் போன் வந்தத அசன் முதலாளி மூணு மாணிக்க மேலதான் பக்கரிடம் சொன்னாரு “ஒய் பக்கரு மொவன் போன் பண்ணினான் நாளைக்கு காலைல காலேஜில பீஸ் கெட்டினால் இடம் கிடைக்குமாம்,இல்லேன்னா அந்த இடத்த வேறு யாருக்காவது கொடுத்துரு வாங்களாம்” என சொல்லி நிரறுத்திகொண்டார் .
    
        அசன் மொதலாளி பைசா தரமாட்டுருன்னு தெரியும் .அப்பத்தான் வில்லுக்குறி விஜயா பைனான்ஸ்,ஓறும* வந்தது. அப்போது மணி ஐந்தாகி இருந்தது. சின்ன பயல கூப்பிட்டு “மக்களே ஒனக்கு பிரண்டு பிரான்சிஸ்க்க ஸ்கூட்டர் வாங்கிட்டு வா,வாப்பா கேட்டுதுன்னுசொல்லு” என ,கையில் முப்பது ரூபாயை  பெட்ரோல் போட கொடுத்து அனுப்பினார் .வில்லுக்குறி விஜயா பைனான்ஸ்க்கு போய் சேரும்போது மணி ஆறாகி விட்டது.விஜயன் வெளியே நின்றுகொண்டு இருந்தார் .பணிப்பெண் கதவை பூட்டிக்கொண்டு இருந்தாள்.பக்கரை கண்டதும் “ஓய் பக்கர் சாயிப் வாரும் ,என்ன விஷயம்” என கேட்டார் விஜயன் .பக்கர் அவரது காதில் ரகசியம்  பேசுவது போல “ஒரு அர்ஜெண்டு முப்பதாயிரம் ரூவா வேணும் ,பயல காலேஜில சேக்கணும்” என்றார் பக்கர்.இரியும் என அங்கிருந்த மர பெஞ்சை காட்டிவிட்டு,பணிப்பெண்னிடம் அலுவலக கதவை திறக்க சொல்லிவிட்டு ,அருகிலிருந்த அவரது வீட்டிலிருந்து பணம் எடுத்து வர சொன்னார் விஜயன் .
   
    சில ஆவணங்களில் கையொப்பம் வாங்கிகொண்டு,சாட்சி யாக பக்கரின் இளைய மகனிடமே கையொப்பம் பெற்றுகொண்டார். அன்றிரவே இளையமகன் பணத்துடன் ராமநாதபுரத்திற்கு சென்றான் .  பயல காலேஜில சேத்து மூணு வருஷம் ஓடி போச்சி .இன்னும் ஒரு வருசத்த படிப்புதான் அதுவர கடிச்சி ,புடிச்சி எப்படியாவது ஓட்டணும் என யோசித்த வாறே சுக்கு காப்பி குடித்த எவர்சில்வர் கப்பை கீழே வைத்துவிட்டு மீண்டும் பாயில் படுத்துக்கொண்டார் பக்கர் .
 பக்கரின் வாழ்க்கை ஓய்வு,தூக்கத்திற்கு வீடும்,வேலைக்கு கடையும் என்பதாக குறுகிபோயிருந்தது.எதையும் வாங்க வேண்டும்,எங்காவது செல்ல வேண்டும் என்ற எண்ணம் எப்போதும் மனதில் எழுவதே .கடையில் சாப்பிட வருபவர்களை திருப்தியாக சாப்பிட கொடுத்து அனுப்புவதிலேயே குறியாக இருப்பார்.
   
       கண்களை மூடியதும்  மனதில் எண்ணங்கள் ஓடின .இன்னைக்கி கடைக்கி போவல்லன்னா தனது எடம் போயிரும் .நான் நிக்க மேசையில் ராமச்சந்திரன் வருவான்.நாளேலேருந்து என்னை சைவ சாப்பாட்டு சைடுக்கு போடுவாரு சூப்றேசரு .அங்க கைமடக்கு ஒரு எளவும் கிடைக்காது .எவனாவது வெளியூர் காரன் எப்பாவாவது ஒரு இரண்டு ரூவா தந்தா உண்டு .எனக்க டேபிள்ல்ல மூணு பேரு புரோட்டாவும் ,ஒரு சில்லி சிக்கனும் ,மட்டன் ரோஸ்டும், பீப் பிரையும்  வாங்குனா இருநூறு  ரூவா பில்லு வரும் கண்ணை மூடிகிட்டு பத்து ரூவா கைமடக்கும் கிடைக்கும்.


  மாச சம்பளத்துல பயலுக்கு அனுப்பி குடுத்துட்டு ,கைமடக்கு கிடைக்க பைசாலதான் வீட்டு பாடு கழியுது.பைனான்ஸ்ல வாங்குன ரூவா வட்டி தெவஞ்சி நிக்கிது என எண்ணியவாறே பக்கர் வியாத்தகண்ணிடம் “நீ அந்த சட்டையை எடு காய்ச்சலுன்னு பாத்த ஒக்காது கேட்டியா நான் கடைக்கி போறேன்” என்றார். வியாத்தகண்ணு பக்கரை தடுக்கவில்லை ,அவர் வேட்டியை மடித்து கட்டிக்கொண்டு நடக்க இயலாமல் செல்வதை வாசலில் நின்று பார்த்துக்கொண்டே இருந்தாள்.

முற்றும் .
ஷாகுல் ஹமீது.

Wednesday, 1 April 2020

கக்கூஸ்




கப்பல் காரன் டைரி                         
                            

கக்கூஸ்
“பி டெக்கில் உள்ள ஸ்பெயர் கேபினில் கக்கூஸ் ப்ளஷ் வேலை செய்யவில்லை மாற்றவேண்டும் உனக்கு தெரியுமா”என இரண்டாம் இஞ்சினியர் பிராங்கி என்னிடம் கேட்டார். “தெரியாது” என்றேன்.
          
கப்பலின் தங்கும் அறையிலுள்ள குளியலறை

   கடந்த ஆண்டு பணியிலிருந்த கப்பல் யோயோ.பிப்ரவரியில் பணிக்கு சேர்ந்தேன்.மார்ச் மாதம் கப்பலின் குடியிருப்பு பகுதியில் உள்ள இரண்டாம் தளத்திலிருந்த இருந்த அறையின் கக்கூஸ் வேலை செய்யவில்லை.அதை சரி செய்யவேண்டுமென பிராங்கி சொன்னார்.அதற்கு இருதினங்களுக்கு முன்  அமெரிக்காவின் பிலேதெல்பியாவில் கப்பல் கரையணைந்த போது புதிதாக பணிக்கு சேர்ந்த இரண்டாம் அதிகாரி கார்த்திக் இரவில் அந்த அறையில் தங்கியிருந்தான்.காலையில் கக்கூஸ் போய்விட்டு ப்ளஷ் பட்டனை அழுத்தியபோது வேலை செய்யவில்லை.அப்படியே விட்டு விட்டு சென்றுவிட்டான் .


     இரு தினங்களுக்கு பின் முதன்மை அதிகாரி மங்களூர் லோரன்ஸ் பிராங்கியிடம் அதுபற்றி சொல்ல.கக்கூஸ் பணி இயந்திர அறைக்கு வந்து சேர்ந்தது.கப்பலில் உள்ள அனைத்து தொழில்நுட்ப வேலைகளும் முதன்மை இன்ஜினியரின் தலைமையில் இயந்திர (engine dept) அறை துறைக்குத்தான் வரும் .எனவே உறுதியாக சொல்வேன் கப்பலுக்கு தலைவன் காப்டனாக இருந்தாலும் .கடவுள் முதன்மை இஞ்சினியர்தான் .கப்பலின்  பொறியியல் சார்ந்த அனைத்து பிரச்சனைக்கும் அவரே பொறுப்பு .
seawage treatment plant

  
                               
     
 காலை எட்டு மணி பணி ஆலோசனை கூட்டத்தில் கக்கூஸ் பணியை செய்வதென முடிவு செய்யப்பட்டது .கப்பலில் இருக்கும் இருபதுக்கும் மேற்பட்ட தங்கும் அறைகளில் உள்ள கழிப்பறைகளிலிருந்து வெளியேற்றபடும் கழிவுகளை அப்படியே கடலில் கொட்டிவிட முடியாது .seawage treatment plant இல் முறையாக சுத்திகரிக்கப்பட்டு ஆழ் கடலில் மட்டுமே அந்த நீரை மட்டுமே வெளியேற்ற வேண்டும்.

                              

       இயந்திர அறையில் கழிவறை சுத்திகரிப்பு தொட்டி ஒன்று இருக்கும் .அது மூன்று அடுக்குகளால் ஆனது .கப்பலில் உள்ள அனைத்து கழிப்பறைகளிலிருந்தும் வெளியேற்றபடும் கழிவுகள் அந்த தொட்டியின் முதல் அறையில் வந்து சேரும். அதில் Gayamyzne 700FN எனும் ரசாயனம் வெதுவெதுப்பான நீரில் கலந்து ஊற்றி வைத்தால்,அதில் மனித கழிவுகளை சாப்பிட்டு வாழும் கிருமிகள் உருவாகி உள்ளேயே வாழ்ந்துகொண்டு இருக்கும்.கிராமங்களில் கழிப்பறை தேக்க தொட்டிகளை கட்டும்போது அதில் கழுதை விட்டையை போடுவார்கள் அதுவும் அந்த கிருமிகளை உருவாக்கும் . உள்ளே வரும் மனித கழிவுகளை அது சாப்பிட்டு உயிர் வாழும் .அதனால் தான் சோப்பு தண்ணீர் உட்பட வேறு எந்த ரசாயனமும் கழிப்பறைகளில் ஊற்ற கூடாது .அது அந்த கிருமிகளை கொன்றுவிட்டால் .கழிப்பறை தேக்க தொட்டி வெகு விரைவில் நிரம்பிவிடும் .
                        


    கப்பலின் கழிப்பறை தேக்க தொட்டியில்,முதல்,இரண்டாம் நிலை தாண்டி மூன்றாம்நிலை அறைக்கு வரும் நீரில் குளோரின் கலந்து கடலில் வெளியேற்றபடும்.அந்த தொட்டியில் பொருத்த்பட்டிருக்கும் உயர்நிலை சென்சாரை தண்ணீர் தொட்டவுடன் அதனுடன் இணைக்கப்பட்டிருக்கும் மின் மோட்டார் தானே இயங்கி கழிவு நீரை வெளியேற்றும்.அதனால் அந்த கழிவு தேக்க தொட்டி ஒருபோதும் நிரம்பி வழிய வாய்ப்பில்லை. எனது முதல் கப்பல் (2005) முப்பது ஆண்டு பழமையானது அதில்  கழிப்பறை சுத்திகரிக்கும் தொட்டியில் உள்ள உயர்நிலை சென்சார் வேலை செய்யாது .ஒவ்வொரு நான்கு மணிநேரத்திற்கும் கழிவுநீர் வெளியேற்றும் மின் மோட்டரை பத்து நிமிடத்திற்கு இயக்கவேண்டும் .ஒருநாள் ஒருவேளை அதை இயக்க மறந்ததால் அந்த அறை முழுவதும் கழிவுநீர் வழிந்தோடியது . மிக சிரமப்பட்டு பின்னர் அந்த தளம் சுத்தம் செய்யபட்டது .
                 

   
       எர்னாகுளம் கோபகுமார் அந்த கக்கூஸ் சரி செய்யும் பணியை முந்தைய கப்பலில் செய்ததாக சொன்னார். இரண்டாம் இஞ்சினியர் பிராங்கி முதலில் உதிரி பாகங்கள் இருக்கிறதா என பார்த்தபின் பணியை தொடங்குவோம் என்றார்.கப்பலில் எந்த பணியையும் துவங்கும் முன் தேவையான உதிரி பாகங்கள் இருக்கிறதா என பார்த்துவிட்டே பணியை துவங்க வேண்டும்.
பழைய கப்பல்களில் உள்ள கழிப்பறைகளில்  தண்ணீரை வேகமாக அடித்து வெளியேற்றும் அமைப்புதான் இருக்கும் .இப்போதைய நவீன கப்பல்களில் vacum flush கழிப்பறைகள் வந்துவிட்டன.vacum கழிப்பறைகள் இருக்கும் கப்பல் களில் தண்ணீர் செலவு மிக,மிக குறைவு தினசரி நான்கு முதல் ஆறு டன்கள் மட்டுமே .

         நான் ,பிராங்கி,கோபகுமார் மூவரும் உதிரிபாகங்கள்,மற்றும் உபகரணங்களுடன் சென்றோம்.காலையிலேயே டெக் பணியாளர் ஒருவர் “டாய்லட்டை சுத்தம் செய்து லோசன் ஊத்தி வெச்சிருக்கேன்” என சொன்னார் .

      முதலில் vacum சுவிட்ச் வேலை செய்கிறதா என பார்த்தோம் சுவிட்ச் வேலை செய்தது .ஆனால் வெற்றிடம் உருவாகி நீர் வெளியேறவில்லை .வெற்றிடத்தை உருவாகும் டயாப்ரம் கிழிந்து இருக்கலாம் என்பதை உறுதி செய்தோம் .சுவரில் அமரும் கோப்பையை கழற்றிஆக வேண்டும் தண்ணீர் மற்றும் ,காற்று இணைப்புகளை முன்பே நிறுத்தியிருந்தோம்.எம் 16 அளவுள்ள நான்கு போல்டு,நட்டுகளை கழற்றிவிட்டு கோப்பையை தனியாக எடுத்து கழிந்திருந்த ரப்பர் டயாப்ரம் மாற்றி கோப்பையை பொருத்தி இயக்கி பார்த்தோம் .மீண்டும் வேலை செய்யவில்லை.

      உள்ளே இருக்கும் control mechanism பாக்ஸ்ஐ மாற்றுவோம் என முடிவெடுத்தோம் .மீண்டும் கழற்றினோம் மிகச்சிறிய  போல்ட்டுகள்.allen key யை போட்டு கழற்ற போதுமான இடமில்லாததால் அந்த கண்ட்ரோல் பெட்டியை கழற்ற அதிக நேரம் ஆனது .புதிய கண்ட்ரோல் பெட்டியை பொருத்தியபின் கோப்பையை மீண்டும் பொருத்தி இயக்கி பார்த்தோம் vacum flush வேலை செய்தது .
இயந்திர அறையில் கம்ப்ரசர் ஒன்று ஓடி காற்றை நிரப்பி வைத்திருக்கும் .கழிப்பறையில் உள்ள சுவிட்ச் ஐ அழுத்தியதும்,கண்ட்ரோல் மெக்கானிசம் சமிக்ஞ்சையை பெற்று இயக்கும் போது சிறிது நீர் பீய்ச்சி அடிக்கும் அதே நேரம் டயாப்ரம் வேலைசெய்து வெற்றிடத்தை உருவாக்கும்போது கோப்பையில் உள்ள கழிவுகள்,நீர் மிக வேகமாக உள்ளிளுத்து கொள்ளும் .கண்டிப்பாக இது போன்ற கழிப்பறைகளில் பேப்பர் உட்பட எதையும் போடகூடாது .
  
   இரண்டாம் இஞ்சினியர் பிராங்கி இன்னும் ஒரு கண்ட்ரோல் பாக்சும்,ஒரு டயாப்ரமும் இருக்கிறது என்றார்.நான் பிராங்கியிடம் “நான்கு வருடம் இஞ்சினியரிங் ,ஒரு வருடம் கப்பலுக்கான மேற்படிப்பு,பயிற்சிகள் ,கிளாஸ் 2 சான்றிதழ் போன்ற பெரிய கல்வி தகுதி ,பணி அனுபவங்களுக்கு பின் கடைசில கக்கூஸ் வேல செய்ய வேண்டியதாயிற்றே”என்றேன் .சிரித்துக்கொண்டே “ஜகாஜ் கா நௌக்கிரி சப் குச் கர்ணா படுத்தா ஹ”என்றார் சிகரெட் துண்டு ,பேப்பர் போன்றவற்றை போட்டால் மொத்த கழிப்பறைகளும் உபயோகபடுத்த முடியாத நிலை ஆகிவிட்டால் காலையில் வயிற்றை பிடித்துகொண்டு சரியாவது வரை காத்திருப்பதை தவிர வேறு வழியில்லை .

     கழிவுகள் செல்லும் குழாய்களில் அடைப்பு ஏற்படும் .ஒவ்வொரு குழாயாக கழற்றி  மனித கழிவுகளை சுத்தம் செய்த அனுபவங்களை கேட்டிருக்கிறேன் .குழாய் அடைப்பு ஏற்படாமல் இருக்க உயிரியல் ரசாயனங்களை ஒவ்வொரு மாதமும் எல்லா கழிப்பறைகளிலும் போட்டு குழாய்கள் அடைப்பு ஏற்படாமல் பார்த்துக்கொள்ளும் சில மூன்றாம் இஞ்சினியர்கள் இருக்கிறார்கள்.

  ஷாகுல் ஹமீது ,
      1st april 2020

Monday, 30 March 2020

ஆடு


                                             ஆடு

        மூர்த்தி சீக்கிரமே வந்து நிலைகொள்ளாமல் அங்கும்,இங்கும் ஓடி குரைத்துக் கொண்டிருந்தாள்.மூர்த்திக்ககூட போனேன் சின்னவிளைக்ககிட்ட ஆடு மேய போன இடத்துல ரெண்டு குட்டி போட்டு கிடந்தது. அந்த இடத்துக்கு கூட்டிட்டு போன பொறவுதான் மூர்த்தி அமைதியானது.

  நான் பிறந்துவளர்ந்த காந்தாரிவிளை தெருவில் என் வீட்டை சுற்றியிருந்த பல வீடுகளில் பசு மாடு இருந்தது . சரஸ்வதி மைனி வீடு,செல்லப்பன் தாத்தாவீடு ,ரொட்டி காரர் வீடு,வாட்சர் மாமா வீடு,செய்யதலி அண்ணன் வீடு என.நான் பால் வாங்க வாட்சர் மாமா வீட்டுக்கு போவேன் .மாமா இல்லேன்னா மாமி தான் அந்த மாட்டுல பால் கறக்க முடியும் .
  
  மாட்டின் அருகில் செல்ல எத்தனிக்கும்போது  “லே மோனே கிட்ட வராதே மாடு சவுட்டிரும்” என்பார் மாமா .அவர் மாட்டின் மடியை தண்ணீரால் கழுவிவிட்டு எண்ணெய் போல எனத்தையோ தடவுவாரு ,அதுக்கு பொறவு கட்டை விரலை மடித்து மற்ற நான்கு விரல்களுக்கும் இடையில காம்பை வைத்து லேசாக இழுப்பார் சுர்ர்ர் ,சுர்ர்ர் என இடக்கையில் உள்ள பளபளக்கும் பித்தளை சொம்பில் நுரையுடன் பால் நிறையும்.காலை ,மாலை என இருவேளையும் ஆறு அல்லது எட்டு லிட்டர் பால் கறக்கும் .பின்னர் என்னிடம் உள்ள சொம்பு,அல்லது வாளியில் பால் மாமி எனக்கான பாலை தருவார்.

  எனக்க  வாப்பா கம்பெனிவேலை முடிந்து நான்கு மணிக்கு வீட்டிற்கு வந்தபின் பிளசர்ல திங்கள்சந்தைக்கு போய் ஒரு ஆடு வாங்கிட்டு வந்தோம் .மணவாளகுறிச்சி-திங்கள்சந்தை ஆறு கிலோமீட்டர் தான்.ஆடு வாங்கி வந்தது ஒரு பெரு நிகழ்வு அன்று.செவல நிறத்துல நீள் காதுகளுடன் ,வயிறு வீங்கி பெருசா இருந்தது .அது ஒரு சென ஆடு.
                 


  அந்த ஆடு வீட்டுக்கு வந்ததும் ,வீட்டுக்க சைடுல ஒரு ஓல பெர கட்டப்பட்டது . “ஆட்டுக்கு வீடு வேணும்லா,மள வந்தா நனைய பிடாதுல்லா மாமா” என வாப்பா  எதிர் வீட்டு மீரான்பிள்ளை அப்பாவிடம் சொன்னார்.ஆட்டுப் பெரையின் ஒரு முக்குல ஒரு தறி அடிச்சி ஆடு கட்டப்பட்டது .ஆடு வந்த பொறவு உம்மாக்குதான் வேல கூடுதல்.அருகிலுள்ள வீடுகளில் முன்பே சொல்லி வைத்து கஞ்சிதண்ணி வாங்கி  புண்ணாக்கும்,கொஞ்சம் உப்பும் கலந்த தண்ணி கொடுக்க ,குளிப்பாட்ட என .அந்த ஆடு மூணு குட்டிய போட்டுட்டு செத்துபோச்சி,ஒரு கிடாய்குட்டியும்  ,ரெண்டு பெட்ட குட்டியும். பெட்டகுட்டிகள் இரண்டும் வெள்ளையாகவும்,கிடாய்குட்டி தள்ளய போல செவல நிறத்திலும் இருந்தது .
        

                         

    செக்கினா வாப்புமாதான் அதுக்கு புட்டியில் பாலூட்டி ,குளிப்பாட்டி வளத்துனாவோ.ஆடுகள் வளர்ந்தபோது மீண்டும்,மீண்டும் குட்டிகளை ஈன்றது .எப்போதும் தள்ளையும் குட்டியுமா  வீட்டில் எட்டு முதல் பத்து ஆடுகள் நிக்கும்.ஆடுகள் பெருகியபோது காலையில் மேய்ச்சலுக்கு 
                                 

அவிழ்த்துவிடுவோம் அல்லது  குண்டு விளை,ஆறான் விளையில் நீள கயிற்றில் தென்னமரத்துல கெட்டிபோடுவோம்  மூர்த்தி ஆடுகளுடன் பாதுகாவலனாக செல்லும் .மூர்த்தி  குட்டியாக இருந்தபோது அடிபட்டு ரோட்டில் கிடந்ததை எனது அக்கா கருணையோடு வீட்டிற்கு கொண்டுவந்தாள் வளர்ந்தபின் அதுவும் வீட்டில் ஒருத்தியாகி  விட்டது .
                            


   வாப்பா எப்போதும் மூர்த்தியை  நினைவு கூர்வார்  “நாய் நன்றி உள்ளதாக்கும்” என .மூர்த்தி பெட்ட பட்டிதான். பேப்பட்டி ஊரில் ஆறேழு பேரை கடித்தபின் மூர்த்தியையும் கடித்து விட்டது .மனிதர்கள் வைத்தியம்  பார்த்தார்கள். நல்ல மீன்கறி வெச்சு சோறு தின்ன மூர்த்தி எழும்பவே இல்ல .மூர்த்தி போட்ட குட்டில ஒன்னு மீண்டும் மூர்த்தி ஆகவிட்டது.வீட்டில் மீன் சமைக்காத நாட்களில்உம்மா ஒரு கிண்ணத்தையும் எடுத்துட்டு “பாத்தும்மா மீனு வாங்குனியா,ராஜம் கறிக்கு என்னது பட்டி ரெண்டுநாள மீன்கறி இல்லாம சாப்பிடல்லன்னு சொல்லி யாருட்டயாவது இருந்து மீன்கறி வாங்கி வந்து மூர்த்திக்கு சோறு குடுப்பா .
            


  மூர்த்தி  சில நாட்களில் தனியாக சீக்கிரமாகவே வந்து  நிலைகொள்ளாமல் அங்கும் ,இங்கும் ஓடி குரைக்கும்.ஏதோ விபரீதம் என புரிந்துகொண்டு அவள் அழைத்துச்செல்லும் இடத்திற்கு போனால் ஆடு புதைகுழியில் சிக்கி வெளிவர இயலாமல் தவித்துகொண்டிருக்கும்,சில நாட்கள் வேறு நாய்கள் ஆட்டை கடித்து .நடக்கமுடியாமல் கிடக்கும் ஆட்டை தூக்கி கொண்டு வருவோம் .
கிடாய் குட்டிகள் நிறையவே காணமல் போயிருக்கின்றன.செம்மரி ஆடு மேய்க்க வரும் கோனான் அந்த ஆட்டு கூட்டத்துடன் இதையும் ஓட்டி சென்றிருப்பான் . இரண்டு மூன்று நாட்கள் தேடுவோம்.பின்னர் உறுதியாகும் அது திருடப்பட்டுள்ளது என .

    ஞாயிற்றுக்கிழமை அதிகாலையே வாப்பா எழுப்பும் ஆட்டை கழுவ வேண்டும் என .வள்ளியாத்துக்கு எல்லா ஆட்டையும் கொண்டுபோய் குளிப்பாட்டி கொண்டு வருவோம் .சில சமயம் மூர்த்தியையும் வசமா புடிச்சி வாப்பா ஆத்துல எறியும் அது ஒரு நீச்சல் அடிச்சி,கரையேறி உடலை சிலுப்பிட்டு நிக்கும் .வீடு வந்து சேரதுக்கு முன்ன எல்லா ஆடும் நல்லா ஈரம் ஒணங்கிவிடும் .ஆட்டை வாரம் ஒரு முறையாவது குளிப்பாட்டல்லன்னா கருப்பட்டி காப்பி குடிக்கத்துல லேசா நாறும். வீட்டுல பால் வாங்குவதே இல்லை ஆட்டுப்பாலை காய்ச்சி கருப்பட்டி சேர்த்த காப்பிதான் காலையும்,மாலையும். மருருந்துக்காக சிலர் ஆட்டுப்பால் கேட்டுவருவார்கள்.ஆடு வளத்துனா பெரிய வருமானம் இல்லன்னாலும் ஆத்திர,அவசரத்துக்கு உதவும்.அண்ணன் இஞ்சினியரிங் காலேஜில் படிக்கும்போது பீசு கெட்ட பைசா இல்லன்னா அதுதான் உதவுச்சி .வாப்பா காலையில் கிடாய் குட்டியை கொஞ்ச நேரம் பார்த்துட்டு,அத்துலுட்ட சொல்லிட்டு போறேன் என கண்களை துடைத்துவிட்டு கம்பெனிக்கு போவும் .ஆடு வியாபாரி அத்துல் வந்து தொள்ளாயிரமோ,ஆயிரமோ குடுத்துட்டு கிடாயை அவுத்துட்டு போவாரு .
                      


     வீட்டின் பின்புறமுள்ள உரக்குண்டு எப்போதும் ஆட்டாம் புளுக்கையால் நிறைந்திருக்கும் .எல்லா வீட்டிலும் அப்போது உரக்குண்டு இருக்கும் வீட்டில் உள்ள  சமையல் கழிவுகளும் பழத்தோல்,காய்கறி கழிவுகள்,மீன்,இறைச்சிகழிவுகள் என எல்லாம் அதில்தான் கொட்டப்படும்.அப்போ பிளாஸ்டிக்பைகள் கிடையாது.வயல் நடவுக்கு முன் வந்து பணம் கொடுத்து காளை வண்டியில் அல்லது டெம்போவில் ஏற்றி செல்வார்கள் .ஏதாவது தறுதலாக உரக்குண்டில் போட்டிருந்தால் உரம் எடுப்பவர்கள் அதை வீட்டுக்காரரிடம் கொடுத்துவிடுவார்கள்.
எனது மூத்த தந்தை ஷேக்மீரான் தான் உரமெடுக்க ஆளை அழைத்து வருவார் . “ஓய் நாடாரே எல்லாம் ஆட்டாம் புளுக்கையாக்கும்,நல்ல வெல போட்டு குடும்”என்பார் .நாற்பது ரூபாய் அதிகம் அப்போது .எல்லா மரக்கிளையில் உள்ள இலைகளையும் உரத்திற்காக வெட்டி கொண்டு செல்வார்கள் .அப்போது இயற்கை  உரம் தான் பயன்பாட்டில் இருந்தது .

   “ஆடு பெறும் போல இருக்கு,ரெண்டு மூணு நாளு செனை ஆட்டை மேயா உடாண்டாம்”என சில நேரங்களில் வாப்பா சொல்வார். ஆடு மேய போன இடத்தில் குட்டி போட்டால் வேறு நாய்கள் குட்டிகளை கடிக்கும் வாய்ப்பு அதிகம் . இருந்தாலும் கணிப்பு தவறிவிடும் சமயங்களில் பிறந்த ஆட்டுகுட்டிகளை மூர்த்தி காப்பாத்தி இருக்காள் .

இருவது வருசத்துக்கு முன்ன நாகர்கோவிலுக்கு வீடு மாறும்போது,ஆடுகளும் ,மூர்த்தியும் மட்டும் வரவில்லை .ஆடுகள் ஒவ்வொன்றாக குறைந்து இல்லாமல் ஆனது .மூர்த்தி வயதாகி இறந்தாள்.இங்க டவுனுல ஆடு வளத்த இட வசதி இல்ல.இருந்தாலும் பாத்திமா நகர்ல இருந்தபோது வாப்பா இரண்டு கிடாய் குட்டிய வாங்கி வளத்துச்சி .ஒரு பெருநாள் சமயத்துல வளர்ந்த கிடாயை களவாண கள்ளன் ஒருத்தன் ராத்திரி ஒருமணிக்கு வந்தத சின்ன புள்ள செல்லா பாத்துட்டு சத்தம் போட்டதுல கள்ளன் ஓடி போய்ட்டான்.

ஷாகுல் ஹமீது .
30-03-2020

Saturday, 28 March 2020

இல்லாதவர்களுக்கு உதவுவோம்





வேண்டுகோள்

கடந்த பதினான்காம் தியதி எழுதிய பதிவில் (கொரோனா பிழைக்குமா)கடைகள் அனைத்தும் அடைப்பதற்கான சாத்தியம் இருப்பதாக சிலர் சொன்னதுபோலவே முழு அடைப்பை இருபத்திஒரு நாட்களுக்கு மக்கள் நலன்கருதி அரசு அறிவித்தது .
நிலைமையை புரிந்துகொண்டு வீட்டை விட்டு வெளியே வராமல் இருப்பது நமக்கும் ,நாட்டுக்கும் நல்லது .இன்று நான்காவது நாள் வெளியில் செல்லவேயில்லை . திருவனந்தபுரம் -நாகர்கோவில் சாலையை ஒட்டியே எனது வீடு இருப்பதால் சாலையில் செல்லும் வாகனங்களை பார்க்கிறேன் .இருசக்கரம் ,கார்கள் ,ஆட்டோ என மக்கள் போய்க்கொண்டே இருக்கிறார்கள் .என்ன தேவையோ தெரியவில்லை ?இப்போது நண்பர்களிடம் ஒரு வேண்டுகோள்

இன்று உறவினர் ஒருவருடன் தொலைபேசியில் பேசும்போது அவர் சொன்னது .
"ஐநூறு ரூவா கைல இருந்தது ,அது கொண்டு போய் மருந்து ,கீரை ,சாதனம் கொஞ்சம் வாங்கினேன். தீந்தது ஐநூறு .பைசா உள்ளவனுக்கு ,வெச்சி சாப்புடலாம் .நமக்கு ?வீட்ல ரேசன் அரிசி இருக்கு தீருது வர அத கஞ்சி வெச்சாவது குடிக்கலாம்" என்றார்.
நாமறிந்து பெரும்பாலும் தினசரி உழைத்து பிழைப்பவர்கள் தான் இங்கே அதிகம் அவர்களின் நிலைமை மிக கஷ்டம் இப்போது .அதனால் இருப்பவர்கள் உங்கள் அருகில் உள்ள இல்லாதவர்களுக்கு இயன்றதை செய்து உதவுங்கள் ,பொருளாகவோ ,பணமாகவோ .
பெரும்பாலோர் யாரிடமும் எதுவும் கேட்கமாட்டார்கள் .நாமே அவர்களது சூழ்நிலை அறிந்து உதவுவது கடமையென நினைத்து செய்வோம் .இல்லாதவர்களுக்கு உதவுவதற்கு இது ஒரு நல் வாய்ப்பு என இந்த சூழ்நிலையை பயன்படுத்திகொள்வோம் .கிடைத்த வாய்ப்பை பயன்படுத்திகொள்வோம் .பொருத்தமான குறள் ஒன்று நினைவுக்கு வந்தது .

இரத்தலின் இன்னாது மன்ற நிரப்பிய
தாமே தமியர் உணல்.

பிறர்க்கு ஈ.வதால் குறையக் கூடுமென்று, குவித்து வைத்துள்ளதைத் தாமே உண்ணுவது என்பது கையேந்தி இரந்து நிற்பதைக் காட்டிலும் கொடுமையானது.
ஷாகுல் ஹமீது ,
28-2020

Saturday, 14 March 2020

கொரோன பிழைக்குமா

கொரானா பீதி
 கடந்த இருதினங்களுக்கு முன்பு இத்தாலியில் இருந்து கேரளம் வந்த சிலருக்கு கொரோனா பாதிப்பு உறுதி செய்யப்பட்டதால் கேரள அரசு பள்ளி கல்லூரிகளுக்கு விடுமறை அளித்தது. மால் கள், திரை அரங்குகளை் மூட வும் உத்தரவு பிறப்பித்தது.
நேற்று காலை முதல் திருவனந்தபுரம் சாலைகள் , தம்பானூர் ரயில் நிலையம் வெறிச்சோடி கிடக்கிறது. கடைகளில் வியாபாரம் பாதித்துள்ளது.
நேற்று எனது கடைக்கு நான்கு பேர் மட்டுமே பொருள் வாங்க வந்தனர்.
அருகில் இருக்கும் தமிழகத்தை சேர்ந்த ராஜாவின் தேநீர் விடுதியில் யாருமே இல்லை. இன்றுதான் அவரது கைபேசியை திறந்து பார்க்க நேரம் அமைத்து கொடுத்தது
கொறோனா.
மாளவிகா ஃபேன்ஸி ஸ்டோர் சேச்சி ""இந்து இது வர கைநீட்டம் விற்றில்லா"" என்றார் மதியம் ஒரு மணிக்கு.
நாகர்கோயில் திருவனந்தபுரம் ரயிலில் காலை எட்டு மணிக்கு பள்ளிவிளை ரயில் நிலையத்திலிருந்து ஏறினால் வண்டி காலியாக இருக்கும். ஆளூர், இரணியல், பள்ளிவிளை தாண்டி குழித்துறை வரும்போது அனைத்து இருக்கைகளும் நிரம்பிவிடும் தமிழக எல்லை முடிந்து கேரளம் துவங்கும் பாறசாலை ரயில் நிலையத்தில் இன்னும் பெருங்கூட்டம் ஏறும். நான்கு பேர் மட்டுமே அமரும் இருக்கைகளில்  "சகலம் தள்ளி இரு" என கூறி  நம் தொடை மேல் குண்டியை வைத்து இயல்பாக பயணம் செய்யும் ஆண்களும் பெண்களும் இங்கு உண்டு.
திருவனந்தபுரம் செனட்ரல் ரயில் நிலையத்தில் இறக்கிய பின்பும் படிக்கட்டுகளில் ஐந்து முதல் பத்து நிமிடங்கள் காத்திருந்து தான் ஏறி கடக்க முடியும்.
இன்று பள்ளிவிளை ரயில் நிலையம் வந்தபோது வண்டி போய் விட்டதோ? என எண்ணினேன். ரயில் நிலையம் வெறிச்சோடி கிடந்தது.
எட்டுபேர் இருக்கும் இரு இருக்கைகளில் மூவர் மட்டுமே.
தம்பானுர் -வழுதகாட் செல்லும் பேருந்தின்
பெண் நடத்துநர் முக கவசமும,் கையுறையும்
அணிந்து சீட்டுகளை கொடுத்து கொண்டிருந்தார்.
ஜிம் மற்றும் ப்யூட்டி பார்லர் களும் இன்று அடைத்துவிட்டார்கள் .
மாலை வேளையில் கடைக்கு வந்த வியாபாரி சங்க தலைவர் திங்கள் முதல் அனைத்து கடைகளும் அடைக்க அறிவிப்பு வரும் சாத்தியம் உள்ளது என்றார்.
சாகுல் ஹமீது.
14-3-2020

Tuesday, 26 November 2019

முகங்கள்

                                                                       பஞ்சர் பீர் முகமது
                                       
இரண்டாயிரத்தி பத்தாம் ஆண்டு சுசூகி மோட்டார் பைக் ஒன்று வாங்கினேன் .அது 1997 ஆம் ஆண்டு தாயரிக்கபட்டது .அப்போது அதற்கு ஒன்பதாயிரம் ரூபாய் கொடுத்தேன் .அதில் பாட்டரி கிடையாது .கப்பலுக்கு போகும் போது  மூடி வைத்துவிட்டு செல்வேன் . நான் கப்பலில் இருக்கும் ஆறு முதல் எட்டு மாத காலம் அப்படியே நின்றிருக்கும் கப்பலிலிருந்து விடுமுறையில் ஊருக்கு வருவதற்கு சில தினங்கள் முன்பு நண்பர் மணியிடம்(மெக்கானிக்) சொன்னால் வீட்டிற்கு வந்து பைக்கை கொண்டுபோய் தண்ணீர் அடித்து கழுவி ,புதிதாய் கொண்டுவந்து வீட்டில் நிறுத்தியிருப்பார்,.நான் விடுமுறையில் இருக்கும் மூன்று மாதமும் அதையே உபயோகிப்பேன் .
    
   என்னிடம் எனது மூத்த மகன் ஸாலிம் “வாப்பா மணி மாமா ஒரே அடியில் ஸ்டார்ட் ஆக்கிவிட்டது”என்பான். செலவு ரூ முந்நூறுக்கும் குறைவு. .எப்போதும் தலைகவசம் அணிந்தே வண்டி ஓட்டுவதால் என்னை எங்கும் எப்போதும் போலீசார் நிறுத்தியதே இல்லை .இரண்டாண்டுகளுக்கு முன் மணி என்னிடம் “வண்டியை எப் சி காட்டுவோம்” என சொன்னார். “இந்த வண்டியை வித்தா மூவாயிரம் ரூவா கூட கிடைக்காது ,எப் சி காட்ட ஆறாயிரம் செலவு ஆகும்” என்றார். “பரவாயில்லை” எப் சி காட்டி ,வண்டியயை என் பெயரில் மாற்றினேன் .

   சமீபத்தில் நான் மணியிடம் “மைலேஜ் மிக குறைவாக கிடைப்பதால் வண்டியை மாற்றலாம்” என சொன்னேன். “இந்த வண்டிக்கு நீங்கள் பராமரிப்பு செலவேதும் செய்வதில்லை.அதிக பட்சமாக ஒருமுறை அறுநூறு ரூபாய் மட்டும் ஆகியது .இது மிக நல்ல வண்டிஆனாலும் வாகன சட்டங்கள் மாறிவிட்டதால் இதுபோல் பழைய வணடிகளை சாலையில் ஓட்டமுடியாது” என்றார் .எனது இளைய சகோதரன் “வண்டியை மாற்றுவதாக இருந்தால் விற்கவேண்டாம் என்னிடம் தந்துவிடு,எனது பழைய பொருட்கள் சேகரிப்பில் இது இருக்கட்டும்” என்றான் .

    கடந்த பத்தாண்டுகளில் எனது வண்டி பஞ்சர் ஆனது இருமுறை மட்டுமே .இரண்டாண்டுகளுக்கு முன் பின்பக்க சக்கரம்  பஞ்சர் ஆனபோது பஞ்சர் கடை அருகில் இருந்தது .அவரால் டயரை கழட்டவே இயலவில்லை .வேறொரு கடைக்கு கொண்டு சென்று ஜாக்கி வைத்து கழட்டியதாக சொன்னார். “ஸார் டயர களத்தி நாளாச்சோ?”என கேட்டார் .ஆம் எட்டாண்டுகள் என்றேன் .அதன் பின் நேற்று காலை முன்பக்க சக்கரம் பஞ்சராகிவிட்டது  சாலையில் சென்றுகொண்டிருக்கும் போது.வண்டியை நிறுத்திவிட்டு எனது கைபேசியில் ‘நடமாடும் பிஸ்மில்லாஹ் பஞ்சர்’ ஓட்டும் பீர்முகமதுவின் எண் இருக்கிறதா என தேடினேன். அவரை அழைத்து ஸ்டேடியம் சுசுகி எனது பைக் பஞ்சராகி நிற்கிறது என்றேன் . “காக்கா  ஐந்து நிமிடத்தில் வருகிறேன் .குட்டியானை ஆட்டோவில் வருவேன்” என்றார் .பத்து நிமிடங்களுக்குள் ஸ்டேடியம் அருகில் வந்துவிட்டார் .பீர் முகம்மது கருப்பு கண்ணாடி அணிந்து,கையில் செல்போனுடன் இருந்தார் .ஆட்டோவை ஓட்டஒருவர் ,பஞ்சர் பார்க்க ஒருவர் என இரு உதவியாளர்கள் அவருடன் இருந்தனர் .

         எனது வண்டியின் முன் சக்கரத்தை கொஞ்சம் சிரமப்பட்டுதான் கழட்டினார்.டியூப் மாற்ற வேண்டும் என்றார் .அவரிடமே புதிய டியூப் இருந்தது .அதனால் எனக்கு ஒரு அலைச்சல் மிச்சமாகியது.டியூபுக்கு ரூ முன்னூறும் ,சக்கரத்தை கழட்டி மாட்ட ரூ நூறும் பெற்றுக்கொண்டு விடை பெற்றார் .அரை மணிநேரத்தில் நான் நின்ற இடத்திலேயே எனது வாகனம் எந்த சிரமும் இன்றி தயாராகிவிட்டது .அவரை ஒரு படம் எடுத்துகொண்டபின் சலாம் கூறி விடை பெற்றேன் .

      பதினைந்து ஆண்டுகளாக இதே தொழிலை செய்து வருகிறார் .ஆரம்பத்தில் ஒரு இருசக்கர வாகனத்தின் பின்புறம் ,ஒரு காற்றடிக்கும் கம்ப்ரசரும் ,பஞ்சர் ஓட்ட தேவையான தண்ணீர் ,தண்ணீர் தொட்டிகளுடன் நாகர்கோவில் நகர் முழுவதும் எங்கு யார் கூப்பிட்டாலும் சென்று பஞ்சர் ஒட்டி கொடுப்பார் .அவரது கடின உழைப்பும்,நடமாடும் பஞ்சர் என்ற புதிய யோசனையும் அவருக்கு நிறைய வாடிக்கையாளர்களை பெற்றுத்தந்தது .ஒன்றரை ஆண்டுக்கு முன் பைக்கிலிருந்து ஆட்டோவாக மாற்றியிருக்கிறார் .அதனுள் பெரிய கம்ப்ரசர்  வைத்துள்ளார் .இப்போது கார்களுக்கும் பஞ்சர் ஒட்டி கொடுக்கிறார் .
   
       நகரில் பெரும்பாலானவர்களிடம் அவரது எண் இருக்கிறது .வாகனங்கள் வைத்திருக்கும் அனைவரும் பிஸ்மில்லாஹ் நடமாடும் பஞ்சர் பீர் முகமதுவின் எண்ணை (9843758861)வைத்திருப்பது தேவையான ஒன்று .வேறு நகரங்களில் இப்படி நடமாடும் பஞ்சர் இருக்கிறதா என தெரியவில்லை .இந்த தொழில் தெரிந்தவர்கள் அவரை போல வேறு ஊர்களிலும் முயற்சிக்கலாம்.தனது உழைப்பாலும்,காலத்திற்கேற்ப புதிய யோசனையை செயல் படுத்தியதாலும் வெற்றி பெற்ற பீர் முகம்மதுவுக்கு எனது வாழ்த்துக்கள் .
ஷாகுல் ஹமீது ,
26 nov 2019

Sunday, 22 September 2019

சொகுசு பேருந்தில் திருடர்கள்



     கடந்த ஞாயிறன்று சேலம் சென்றிருந்தேன்.நண்பன் ஜானகிராமனின் இளையவள் ஜமுனாவின் திருமணத்தில் கலந்துகொள்வதற்காக.சனிக்கிழமை இரவு நாகர்கோவில் –கோவை ரயிலில் சென்று ஈரோட்டில் இறங்கி அங்கிருந்து பேருந்தில் காலை ஏழு மணிக்கு சேலம் சென்று சேர்ந்தேன்.உறவினர்  பாபு பேருந்து நிலையம் வந்து வீட்டிற்கு அழைத்துச் சென்றார்.
  
   ஞாயிறு இரவு எட்டு ஐம்பது மணிக்கு ஈரோட்டிலிருந்து நாகர்கோயில் செல்ல ரயிலில் முன்பதிவு செய்திருந்தேன் .உறவினர் பாபு “திருமண வரவேற்பு நடக்கும் மண்டபம் இருக்கும் வனவாசி சேலத்திலிருந்து முப்பது கிலோமீட்டர் தொலைவு,ஏழுமணிக்குதான் திருமண வரவேற்பு ஆகவே நீங்கள் இரவு ஈரோட்டிலிருந்து ரயிலை பிடிக்க இயலாது .இவ்வளவு தூரம் வந்துட்டு தலையை காட்டிட்டு போனது போல இருக்கும்”என்றார்.  எனவே ரயில் டிக்கெட்டை ரத்து செய்துவிட்டு இரவு பத்துமணி  பேருந்தில் பயணச்  சீட்டு முன்பதிவு செய்துதருகிறேன் என்றார் .
  
பாபுவுடன் 

பகவத் பவன் 


நண்பர் சரவணன் மற்றும் சகோதரி பிரேமா 







       காலை பத்து மணிக்குமேல் அவரது இருசக்கர வாகனத்தில்  புறப்பட்டு அயோத்தியாபட்டணம் அருகில் இருக்கும் பகவத் பவன் சென்று ,நண்பர்கள் ஜீவமணி ,சரவணன் ஆகியோர் குடும்பத்துடன் அங்கிருந்ததால் அவர்களையும் ,முந்தைய நாள் இரவு சென்னையிலிருந்து வந்திருந்த வாழும் ஞானி ஸ்ரீ பகவத் அவர்களையும் சந்தித்தேன் . மலைகள் சூழ்ந்த இயற்கை எழில் கொஞ்சும் இடத்தில் அமைந்துள்ளது பகவத் பவன். அங்கேயே சுவையான மதிய உணவை பரிமாறினர் சகோதரிகள் அன்புக்கரசி ,பிரேமா,கீதா .

      மாலை மூன்று மணிக்கு ஜானகியின் வீட்டிற்கு சென்று சேர்ந்தேன்.ஐந்து மணிக்குமேல் ஜானகியின் குடும்பத்தினர்,உறவினர்கள் ஒன்றாக ஒரு வேனில் புறப்பட்டோம் வனவாசியில் உள்ள திருமண மண்டபத்திற்கு.வனவாசியை நெருங்குகையில் இடி மின்னலுடன் நல்ல மழை ஏழு மணிக்கு சற்று முன் தான் திருமண மண்டபத்தை சென்று சேர்ந்தோம் . மலை சூழ்ந்த பகுதி அது இருட்டிவிட்டதால் வனவாசியின் அழகை காண கிடைக்கவில்லை .இரவு பத்து மணி பேருந்தை பாபு உறுதி செய்திருந்ததால் எட்டு மணிக்கே புறப்பட எத்தனித்தேன்.ஜானகியின் தந்தை இங்கே தங்குவதற்கான அனைத்து வசதிகளும் உள்ளது நீங்கள் தங்கி செல்வதுபோல் வந்திருக்கலாம் என சொல்லிவிட்டு உணவு கூடத்திற்கு சென்று வந்தவர் சாப்பிட்டு செல்லுமாறு வேண்டினார் .கை நனைத்தல் எனும் சடங்குக்குபின்(வயதில் பெரியர்வர்கள் முதலில் சாப்பிடுவது) தான் சாப்பாடு பரிமாறும் வழக்கம் அங்கிருப்பதால் .என்னை அடுமனைக்கு அழைத்து சென்று உணவு பரிமாறினார் .
                                  
      மென்மழைத் தூறிக்கொண்டே இருந்த வேளையில்  .ஜானகி சேலம் பேருத்தில் ஏற்றிவிட்டார்.ஒன்பதரைக்குள் வந்துவிடுவேன் என பாபுவை அழைத்துச் சொன்னேன் .சற்று நேரத்திற்குப்பின் அவர் என்னை மீண்டும் அழைத்து பத்து மணி பேருந்து ஒசூர் அருகே பழுதாகி நின்றுவிட்டது என தகவல் வந்திருப்பதாக சொன்னார் .மதுரை சென்று அங்கிருந்து சென்றுவிடலாம் என முடிவு செய்தேன் .இரவு பாபுவின் வீட்டிற்குச்  சென்று உடல் கழுவி பயணத்திற்கு வசதியாக வேட்டி கட்டிக்கொண்டேன். பெனாசிர் தந்த சூடான  சுலைமானியை குடித்துவிட்டு அங்கிருந்து விடைபெற்றேன் .
  
            சேலம் பேருந்து நிலையத்தில் திருநெல்வேலி செல்லும் பேருந்து ஒன்று வந்துகொண்டிருந்தது அதில் ஏறிக்கொண்டேன் .நானூற்றி இருபத்தியைந்து ரூபாய் கட்டணம் என்றார் நடத்துனர் .வண்டி காலியாக இருந்தபோதும் ஓட்டுனர் பதினைந்துக்கு மேலே அமருங்கள் என்றார் . அக்காளுக்க மாப்ள அந்த முன் இருக்கைகளில் வருவானா இருக்கும் எனநினைத்துக்கொண்டேன். நாகர்கோவில் செல்லும் அரசு பேருந்து ஒன்று புறப்பட்டு செல்வதை கண்டு இறங்கி ஓடிச்சென்று அதில் ஏறினேன் பேருந்தினுள் சென்றபின் தான் தெரிந்தது ,அது படுக்கை வசதியுடன் கூடிய குளிரூட்டி பொருத்தப்பட்ட பேருந்து.இதுபோல் அரசு சொகுசு பேருந்து இருப்பதை இப்போதுதான் அறிகிறேன் .
                     
         நாகர்கோவிலுக்கு ஆயிரத்தி நாற்பத்தைந்து ரூபாய் கட்டணம்.கட்டணத்திற்கு தகுந்தவாறு அந்த பேருந்தும் இருக்கைகளும் சுத்தமாக இல்லை அதிக கட்டணம் பெற்றும் அரசு பேருந்துகள் மட்டும் ஏன் பராமரிக்க இயலவில்லையோ?  சே அந்த பஸ்ல போயிருந்தால் ஐநூறு ரூவால பெயிருக்கலாம் என ஒரு எண்ணம் தோன்றி மறைந்தது .ஓட்டுனரிடம் பயணச்சீட்டை பெற்றுக்கொண்டபின் சட்டைப்பையில் இருந்த  ஆயிரத்திஐநூறு ரூபாயை  பயணப்பையில் வைத்து விட்டு ,கைபேசியை தலைக்கு மேல் இருந்த மின் இணைப்பில் பொருத்திவிட்டு ,எனது போர்வையை விரித்து படுத்துக்கொண்டேன்.சொகுசுப்பேருந்து தந்த பாதுகாப்பு உணர்வால்,பயணப்பையை காலருகில் பொருட்கள் வைக்கும் கம்பியில் வைத்துவிட்டு தூங்க தயாரானேன்.பேருந்து காலியாக இருந்தது,என் அருகிலும் யாரும் இல்லை.படுத்த சிறிது நேரத்தில் ஆழ் துயிலுக்குச்  சென்றுவிட்டேன் .சிறுநீர் கழிக்க உந்துதல் வந்தபோதுதான் விழித்து நடத்துனரிடம் சொன்னேன் “இப்பதான் மாட்டுத்தவாணில பத்து நிமிஷம் நிறுத்தியிருந்தேன்” என்றார்.அப்போதுதான் கவனித்தேன் காலருகில் இருந்த  பையை காணவில்லை நான் படுத்திருந்த இருக்கை முழுவதும் தேடிவிட்டு நடத்துனரிடம் சொன்னேன். “பையை பத்திரமா வெக்காண்டாமா,அஞ்சு ஆளு மதுரைல இறங்கிச்சி”  என்றார். பேருந்து சிம்மக்கல் பழ சந்தையை தாண்டி வந்துகொண்டிருந்தது.
நான் படுத்திருந்த படுக்கை 
                      நான்  நடத்துனரிடம் புகார் அளிக்கவேண்டும் எனது ஓட்டுனர் உரிமம்,வாக்களர் அடையாள அட்டை,தானியங்கி இயந்திரத்தில் பணம் எடுக்கும் வங்கி அட்டைகள்  அதில் இருந்தது என்றேன். “நான் என்ன வேணும்னாலும் செய்து தாரேன், கிட்ட வரக்கூடிய ஸ்டேஷன்ல நிறுத்தேன்” என சொல்லிவிட்டு, “நீங்கோ கொஞ்சம் கெவனமா இருக்காண்டாமா? ரூவா நறைய இருந்துதா?” எனவும் கேட்டார் . பெரியார் நிலையம் அருகில் வந்தபோது அவர் ஓட்டுனரிடம்  “டே இங்குன நிறுத்து,போலீஸ் ஸ்டேஷன் இங்க ஒன்னு உண்டு”  என்றார் .நானும் ,நடத்துனரும் வண்டியிலிருந்து இறங்கி சென்றபோது அதிகாலை மூன்றரை மணி அருகிலிருந்த  அனைத்து மகளிர் காவல் நிலையம் பூட்டியிருந்தது எதிரிலிருந்த பஞ்சர் கடையில் விழித்திருந்து மொபலை நோண்டிக்கொண்டிருந்த வாலிபனிடம் கேட்டு சி 2 குற்ற பிரிவு காவல் நிலையம் சென்றோம்.காவலர் ஒருவர் உள்ளே அமர்ந்து கைப்பேசியில் வீடியோ பார்த்துக்கொண்டிருந்தார் கதவு வெளிப்பக்கம் பூட்டியிருந்ததால் “சார் திறக்கலாமா” என அனுமதி கேட்டு உள்ளே சென்றோம். அந்த காவலர் இருக்கையை காட்டி அமரச்சொன்னார்.எங்களிடம் விபரங்களை கேட்டபின் போனில் யாரையோ அழைத்து அவரிடம் விபரங்களை சொல்லிவிட்டு காத்திருக்க சொன்னார் .சிறிது நேரத்தில் அவரது கைப்பேசி ஒலித்ததும் ,பேசிவிட்டு . “இன்ஸ்பெக்டர்,பஸ்சுக்க பக்கத்தில் நிற்கிறார் நீங்கள் அங்கே செல்லுங்கள்” என்றார்.இன்ஸ்பெக்டர் என்னிடம் விசாரித்துவிட்டு பேருந்துனுள் ஏறி எல்லா இருக்கையிலும் பார்க்கச்சொன்னார்.பயணிகள் இருப்பதால் நான் பார்க்கவில்லை என்றேன் .அவரே தூங்கிகொண்டிருந்த அனைத்து பயணிகளையும் எழுப்பி எனது பை இருக்கிறதா என பார்க்க சொன்னார். பை பேருந்துனுள் இல்லை என்பது உறுதியானதும் கீழே இறங்கி எனது ஊர் பெயர்,முகவரி ஆகியவற்றை கேட்டபின். “அட்ரஸ் ,போன் நம்பர் கொடுத்துவிட்டு போறீங்களா இல்ல  கம்ப்ளைன்ட்  குடுக்கீறீர்களா?” எனக்கேட்டார் .
                    
இதில் தான் பையை வைத்திருந்தேன் 
  
              எனது ஓட்டுனர் உரிமம் அதிலிருந்ததால் புகார் அளித்து,ரசீது பெற விரும்புகிறேன் என்றேன் .அவருடன்  இருந்த காவலருடன் நாங்கள்  காவல் நிலையம் சென்றோம் ,இன்ஸ்பெக்டர் தனது பைக்கில் வந்தார் .அவரது அறைக்கு சென்று இருக்கையில் அமரசொல்லிவிட்டு ,ஒரு வெற்று காகிதத்தில் என்ன எழுதவேண்டும் என சொன்னார். “சார் நான் சொன்னதை கேட்டு கிட்டியளா?” என கேட்டுவிட்டு .நடத்துனரிடம் விசாரணையை தொடங்கினார்.தனது பாணியில் விசாரித்து அவரை குழப்பிவிட்டு ,என்னிடம் “ஸார் பை காணாமல் போனதை நீங்கள் பார்த்தது சிம்மக்கல் அருகில் இந்த புகாரை நான் பெற்றுகொள்ள முடியாது ,நீங்கள் சிம்மக்கல் காவல் நிலையத்தில்தான் புகார் கொடுக்க வேண்டும்” என்றார் .நான் புகார் எழுதுவதை நிறுத்திவிட்டு ,நீங்கள் வாங்கவில்லை என்றால் நான் போய் வருகிறேன் என்றேன். இல்ல ஸார் மேலதிகாரி என்னிடம் கேட்பார் நாங்கள் இங்கு இந்த புகாரை வாங்க கூடாது என்றதும்.எனது பை காணாமல் போன பின் ,நான் கண்ட முதல் ஸ்டேஷன் இது நீங்கள் புகாரை வாங்க மறுத்தால் நான் செல்கிறேன் என்றதும்.இன்ஸ்பெக்டர் வேறொருவருக்கு தொலைபேசியில் அழைத்து பேசிவிட்டு புகாரை பெற்றுகொண்டார் .
நாளை தான் ரசீது கிடைக்கும்,.நீங்கள் வந்து பெற்றுக்கொள்ளுங்கள் என்றார்.எனது நண்பன் முத்து தலைமை காவலராக மதுரையிலேயே இருக்கிறார் அவர் வந்து பெற்றுகொள்வார் என சொல்லிவிட்டு பேருந்துக்கு வந்து புறப்படுகையில் மணி ஐந்தை நெருங்கியிருந்தது.போர்வையும்,கைபேசியும் மட்டும் மிச்சம் .நாகர்கோயில் –ஈரோடு ரயிலில் பயணிக்கையில் இரண்டாம் வகுப்பு தூங்கும் வசதிகொண்ட பெட்டியில் பையை தலைக்கு அடியில் வைத்திருந்தேன் .சொகுசுப்பேருந்தில் திருடர்கள் இருப்பார்கள் என நினைக்கவேயில்லை .பேருந்தின் ஓட்டுனர் ஆம்னி பேருந்துகளிலும் திருட்டுகள் நிறையவே நடக்கிறது என்றார் .
நான் எப்போதும் சொல்வதுண்டு “ கள்ளன் பெருசா ,காப்பான் பெருசா” கள்ளன் தான் பெருசு. ஆம்னி பேருந்துகளில் அடிக்கடி பயணம் செய்யும்  நண்பர்கள் சிலர் இப்படியும் நடக்குமா! ,இவ்வளவு நாள் இதில் உள்ள பாதுகாப்பை நம்பித்தான்அதிக கட்டணம் செலுத்தி விலையுர்ந்த பொருட்களுடன் பயணிக்கிறோம்  என்றனர் .

          மீண்டும் படுத்து தூங்கிவிட்டேன் ,நெல்லை வந்தபின் நடத்துனர் ,வாங்க டீ குடிக்கிலாம் என அழைத்தார்  மறுத்தேன் கட்டாயப்படுத்தி அழைத்து சென்று டீ வாங்கிகொடுத்தார்.இரண்டு குறுஞ்செய்தி வந்திருந்தது எனது இரண்டு வங்கி அட்டைகளையும் ,தானியங்கி இயந்திரத்தில் போட்டு பணமெடுக்க முயற்சித்துள்ளனர் பையை திருடியவர்கள் .
எட்டரை மணிக்கு வடசேரி பேருந்துநிலையத்தில் இறங்குகையில் பெரியவர் ஒருவர்,பஸ்சுக்கு பைசா வெச்சிருக்கியளா என கேட்டு ரூ நூறை நீட்டினார்,எல் ஐ சி கிட்ட தான் வீடு நடந்து போயிருவேன் நன்றி என சொல்லிவிட்டு .நடக்க ஆரம்பித்தேன் .சுனிதாவை போனில் அழைத்து   இப்பதான் வடசேரியில இறங்குனேன்,ஒரு அபத்தம் பற்றி போச்சி கேட்டியா ,என்னது என கேட்டாள் பேக்க களவாண்டுட்டுவானுவோ என்றேன்.சும்மா சொல்லாதீங்கோ,போனு எப்படி இருக்கு ,அத கள்ளன் எடுக்கல்ல என்றேன் கையில் போர்வையுடன் வீட்டிற்கு வந்ததும் “வேட்டிய உருவாம உட்டானே,வாச்சிய களத்தி பையில வெக்கலையோ அதனால அது தப்பிச்சி” என்றாள்
  
         மாலை மூன்றரை மணிக்கு போனில் ஒருவர் என்னை  அழைத்து ஸார் மணி பர்சு,பாப்பாக்க போட்டோ ,அஞ்சாறு கார்டு எல்லாம் மாட்டுத்தாவணி பஸ் ஸ்டாண்டு பக்கத்துல கிடக்குது .இதுல ஏதாவது உங்களுக்கு தேவையா ,தொலைத்து விட்டீர்களா?என கேட்டார் டிரைவிங் லைசன்சு இருக்கா என கேட்டேன் .இருக்கு ஸார் என்றார் .எனது எண் எப்படி கிடைத்தது ,ஒரு கார்டுல நம்பர் இருக்குது .அதனால் தான் அழைத்தேன் என்றார் .அனைத்தையும் தபாலில் அனுப்புமாறு வேண்டினேன். தந்து பெயர் பழனிவேல் ,சொந்த ஊர் விழுப்புரம் ,மதுரை டி வி எஸ் இல் பணி செய்கிறேன் என்றார்.எனது பையில் ஒரு ஜீன்ஸ் பாண்ட்,பெல்ட்,ஷூ ஒரு சட்டை ,பனியன்,ஜட்டி,கைத்துண்டு,பணம் ஆயிரத்திஐநூறு,மணி பர்ஸ் ஆகியவை இருந்தது .உடைகள் இருந்த பையையும் ,பர்சில் இருந்த பணம் ,வங்கி அட்டைகளையும் எடுத்துவிட்டு பர்ஸை மட்டும் வீசி எறிந்துள்ளனர் திருடர்கள்  .அடையாள அட்டை ஒன்றில் கைபேசி எண் இருந்ததால் பழனிவேல் என்னை தொடர்புகொள்ளவும் முடிந்தது .
  
         கடந்த புதன்கிழமை மதியம் எனது அசல் ஓட்டுனர் உரிமம் மற்றும் பர்ஸ் தபாலில் வந்து சேர்ந்தது .நீண்ட நேரம் மழையில் கிடந்து ஊறி போயிருந்ததால் பர்ஸ் உபயோகிக்க முடியாததாகிவிட்டது .பழனிவேல் போன்றவர்கள்  இருப்பதால்தான் இந்த புவி இன்னும் சுழல்கிறது என நினைத்துகொண்டேன் .முகமறியா அந்த பழனிவேலுக்கு நன்றிகள் .வாழ்க வளமுடன் .
ஷாகுல் ஹமீது ,
21 sep 2019 .