டாலஸ்புரம்

 

   பசுபிக் சக்சஸ் கப்பலில் பணியில் இணைவதற்காக ஹூஸ்டன் வந்து இன்றோடு பதினெட்டு நாட்கள் ஆகிவிட்டது.

இங்கே கடுமையான பனிப்புயல் வீசியதால் சற்று தூரத்திலிருக்கும் நண்பர்களை சென்று சந்திக்க இயலவில்லை. பனிப்புயல் வீசியபோது ஹூஸ்டனில் ஐஸ் விழவேயில்லை மழை பெய்து வெப்பம் மைனஸ் மூன்று டிகிரிவரை சென்றது.

 ஹூஸ்டனில் இருக்கும் நண்பர் சிவா “இந்த வார இறுதியில் டாலஸ் போய்வாருங்கள் வெதர் நன்றாகிவிட்டது” என ஊக்கினார்.   டாலஸில் வாழும் நெருங்கிய செந்தில் நண்பர் தாராளமாக வாருங்கள் என்று பேருந்தில் டிக்கெட் முன்பதிவு செய்து அனுப்பினார். எழுத்தாளர் ஜெயமொகனுக்கு உலகம் முழுக்க வாசகர்கள்,அவரது வாசகர்களுக்கு உலகம் முழுக்க நண்பர்கள்.

    2020 கோவிட் காலத்தில் சுக்கரி வாசிப்பு குழுவில் அறிமுகமாகி 2023 இல் செந்தில் சென்னை வந்திருந்தபோது நான் மும்பை செல்லும் வழியில் சென்ட்ரல் ரயில் நிலையம் வந்து ரயில் புறப்படும் முன் பத்து நிமிடங்கள் மட்டுமே சந்தித்தோம். கடந்த அக்டோபரில் செந்தில் இந்தியா வந்திருந்தபோது திருநெல்வேலி மாவட்டம் கடையம் சென்று அவரது இல்லத்தில் சந்தித்தேன்.

   பாரதி செல்லாம்மாளின் வீட்டை அவரது தந்தை விலைக்கு வாங்கி குடியிருக்கிறார்.அவ்வகையில் அவரது குடும்பமும் வரலாற்றில் இடம்பெற்றுவிட்டதை இனி யாராலும் மாற்ற முடியாது.

  வெள்ளிக்கிழமை மாலை நான்கு மணிக்கு பஸ் ஹூஸ்டனின் டவுன்டவுனிலிருந்து கிளம்பும். என் விடுதியிலிருந்து இருபது நிமிட பயண தூரம்தான். போக்குவரத்து நெரிசல் இருந்ததை விடுதியின் எட்டாவது மாடியில் இருக்கும் உணவுகூடத்தில் இருக்கும்போது கண்டதால் மதிய உணவுக்குப்பின் கீழே வந்து ஊபர் டாக்ஸியில் புறப்பட்டேன். மூன்று மணிக்கே பஸ் புறப்படும் மரியாட் ஹோட்டல் அருகில் வந்துவிட்டேன். டவுண்டவுன் சாலையில் நாற்பது நிமிடங்கள் நடந்தே சுற்றிவந்தேன்.

இங்கு கேட், கேட் கீப்பர் இல்லாமல் சாலையிலேயே ரயில் ஓடுகிறது.

   நான் செல்லவேண்டிய ரெட்கோச் பேருந்து ஐந்துநிமிடம் தாமதமாக வந்தது.சுத்தமான கழிப்பறை,இணைய வசதியுடன் முப்பத்தி நான்கு இருக்கைகள் கொண்ட பேருந்தில் பதினைந்துபேர் மட்டுமே இருந்தோம். இரு இருக்கைகளுக்கிடையில் தாராளமாக இடைவெளிவிட்டு நன்றாக சாய்ந்து அமர்ந்து கால்களை தொங்கவிடாதவாறு நீட்டிகொள்ளும் வசதியான இருக்கை.ஹூஸ்டன் நகர் பகுதியை கடக்கவே ஒரு மணிநேரம் ஆனது. ஆறுவழிச்சாலையில் பெரும்பாலும் கார்களும்,டிரக்களும் தான் ஏராளமாக செல்கிறது.

 நகரை கடந்த பின் நான்கு வழி சாலையாக குறுகி இருபுறமும் விரிந்த புல்வெளிகள் அல்லது மரங்கள் நிறைந்த காடுகளாக இருந்தது.சில மாட்டுபண்ணைகளும் இருந்தது.  இரு நூறுஏக்கர்,நூறு ஏக்கர் விற்பனைக்கு என போர்டுகள் நிறைய இருக்கிறது.ஹூஸ்டன் எல்லையில் ஸாம் ஹூஸ்டனின் வெண்ணிற உயர்ந்த சிலையும் இருந்தது.

இடைநில்லா பேருந்து என்றால் இதுதான் சீரான வேகத்தில் எங்கும் நிற்கவேயில்லை. டாலஸ் நெருங்கியபின்தான் சிக்னலில் வண்டி நின்றது.குறிப்பிட்ட நேரத்திற்கு முன்னதாகவே வண்டி டாலசை அடைந்தது.நான் இரண்டாவது நிறுந்தமான ப்ளானோவில் இறங்கினேன்.நான்கு மணிநேர பயணம். அடுத்த நிறுத்தமான ப்ரிஸ்கோ நண்பர் செந்திலின் வீட்டிலிருந்து மிக அருகில்தான். டிக்கெட் முன்பதிவு செய்யும் அதை கவனிக்க தவறிவிட்டோம்.

   

செந்தில் அங்கே காரில் காத்திருந்தார்.இருபது நிமிடத்தில் எட்டரைக்குள் வீடு சென்று சேர்ந்தோம்.வீட்டு வாசலில் ஐஸ் இன்னும் உருகாமல் இருந்தது.

அவரது மகன் சித்தார்த், மகள் சாதனா என்னை காண்பதற்கு மிக ஆவலாய் காத்திருந்தனர். சேலம் ஆர் ஆர் பிரியாணி கடையிலிருந்து மட்டன் பிரியாணி தயாராக இருந்தது. அவரது மனைவி சியாமளா நான் தூங்க வேண்டிய அறையை காண்பித்தார். கடந்த ஓராண்டுக்கு முன் அவர்கள் வாங்கிய கனவு வீடு.நான்கு படுக்கையறை,மீடியா அறை,சலவை இயந்தர அறை,கூடம்,அடுமனை,உணவுக்கூடம் ஒன்றாக இணைந்து மிகப்பெரிய மாடி வீடு.நல்ல குளிராக இருந்தால் எரிவாயு கணப்புடன் இணைக்கபட்டிருந்தது கூடம். இரு கார்களை நிறுத்த வசதியான கார் நிறுத்தம்.இரவு பன்னிரண்டு மணிவரை பேசிக்கொண்டிருந்துவிட்டு தூங்க சென்றோம்.

 சனிக்கிழமை மாலை நண்பர்கள் சந்திக்க வருவதாக சொல்லியிருந்தார்.

மேலும்.....

நாஞ்சில் ஹமீது,

03 feb2026.

sunitashahul@gmail.com