Wednesday, 8 July 2020

பிரார்த்தனைகள் நிறைவேறுமா


பிரார்த்தனைகள் நிறைவேறுமா?
 //அட்சய திருதியை அன்று நாம் எதை வைத்து பூஜை செய்கிறோமோ அது பல மடங்கு பெருகும் என்பது ஐதீகம். தங்கம் வெள்ளி என்பது அவரவர்களுடைய தனிப்பட்ட விருப்பம். ஆனால் இன்றைய உடனடி தேவை என்பது தண்ணீர். போன முறை நாம் இதேபோல் செய்ததன் விளைவு மிகச்சிறப்பாக மழை பெய்து இன்று வரை தண்ணீரை அனுபவித்து வருகிறோம். எனவே அட்சய திரிதியை அன்று ஒரு குடம் அல்லது ஒரு செம்பு நிறைய தண்ணீரை இறைவன் முன்பு வைத்து நமக்கு குறைவில்லாத தண்ணீர் செல்வத்தை வழங்குமாறு பிரார்த்தனை செய்யுமாறு கேட்டுக்கொள்கிறேன். இது சரியான முறை என்று நினைத்தால் தெரிந்தவர்களிடம் கூறி அவர்களையும் ஆண்டவரிடம் பிரார்த்தனை செய்ய சொல்லவும். நீரின்றி அமையாது உலகு.//
இன்று  வாட்ஸ்அப் குழுமம் ஒன்றில் ஒருவர் இவ்வாறு பதிவிட்டிருந்தார்.அப்போது என் நினைவிலிருந்து எழுந்த சிலவற்றை உடனே எழுத வேண்டுமென்று தோன்றியது .
  
மழைத்தவம்,மழைவேண்டி பிரார்த்தனை,மழைவேண்டி சிறப்புத்தொழுகை இவற்றால் என்ன பயன் என.

     நான் ஒரு அத்வைதி அதில் எனக்கு எந்த குழப்பமும் இல்லை .
 வள்ளுவர் வாக்குப்படி வேண்டுதல் வேண்டாமை எனும் நிலையை எப்போதோ அடைந்துவிட்டேன் .

     வேண்டுதல் வேண்டாமை இலான்அடி சேர்ந்தார்க்கு
     யாண்டும் இடும்பை இல .
 
  எழுத்தாளர் எஸ் ராமகிருஷ்ணன் எழுதிய தேசாந்திரி எனும் நூலில் மழை வேண்டி ஒரு கிராமத்தில் தவளைகளுக்கு திருமணம் செய்து வைத்ததையும் பதினைந்து ஆண்டுகளுக்கு முன் வாசித்திருந்தேன் .

    கடந்த 2017  ஆம் ஆண்டு உலகம் முழுவதும் கடும் வறட்சி நிலவியது அனைவருக்கும் நினைவிருக்கலாம்.அந்த ஆண்டு துவக்கத்தில் நான் மெக்காவில் இருந்தேன்.அங்கே ஒருநாள்  மழை வேண்டி சிறப்பு தொழுகை நடைபெற்றது .மெக்கா கவர்னர் உட்பட பெரும்பாலானோர் கலந்துகொண்டு மழை வேண்டி இறைவனிடம் இறைஞ்சினோம் .

     அதே ஆண்டு மார்ச் மாதம் நாகர்கோயில் கோட்டார் பள்ளிவாசலில் மழைவேண்டி சிறப்புத்தொழுகை நடந்த செய்தி புகைப்படத்துடன்  நாளிதழில் வந்தது .ஒருவாரத்திற்குப்பின்  நாகர்கோயில் கலாச்சார பள்ளியில் மழை வேண்டி சிறப்புதொழுகைக்கான அறிவிப்பை ஜும்மாவில் இமாம் வெளியிட்டார் .   கடும் வறட்சி நிலவுகிறது இதே நிலை இன்னும் சில மாதங்கள் தொடர்ந்தால் மனிதன் மட்டுமல்ல,விலங்குகளும்,பிற உயிரினங்களும் பாதிக்கப்படும் எனவே அனைவரும் ஒருநாள் நோன்பு வைத்து மழை வேண்டி சிறப்பு தொழுகை நடத்த உள்ளோம் .உங்கள் வீட்டு பெண்களையும்,பிஞ்சு குழைந்தைகளையும் தவறாது அழைத்து வந்து மழைவேண்டி நடக்கும் சிறப்புதொழுகையில் கலந்து கொள்ளுங்கள் .உள்ளம் உருகி கேட்கப்படும் பிரார்த்தனைகள் நிறை வேற்றப்படும் .நபிகள் நாயகம் இவ்வாறு மழை வேண்டி சிறப்புத்தொழுகை நடத்தியிருக்கிறார் என இமாம் சொன்னார் .
  
         நாகர்கோயில் தண்ணீர் தொட்டி சாலையில் உள்ள ஒய் ஆர் மகாலில் அதற்கான ஏற்பாடு செய்யபட்டிருந்தது.நானும் நோன்பு வைத்திருந்தேன்.(சூரிய உதயத்திற்கு ஒன்றரை மணி நேரத்திற்கு முன் உண்ணலாம் பருகலாம் பின்னர் சூரியன் அஸ்தமதிற்கு பின் உண்ணவும் பருகவும் செய்யாலாம்.இடைப்பட்ட பதினான்கு மணிநேரத்தில் ஒரு சொட்டு நீர்கூட அருந்தக்கூடாது.முக்கியமாக பிறர் மனம் நோகும் படி நடக்கக்கூடாது . நாள் முழுவதும் இறை நினைவுடன், இறை வணக்கங்களில் ஈடு பட வேண்டும் என்பதே நோன்பு.)
  
    மறுநாள் மழை வேண்டி சிறப்புத்தொழுகை, நான்  அதிகாலை தொழுகைக்கு வடசேரி பள்ளிவாசல் சென்றுவந்தபின்,காலை ஏழு மணிக்கு நடக்கும் மழை வேண்டி நடக்கும் சிறப்புதொழுகைக்கு ,எனது மூத்த மகன் ஷாலிமும்,நண்பர் இப்ராகிம் அவர்களும் சென்றோம் .குறிப்பிட்ட நேரப்படி சரியாக காலை ஏழரைக்கு மழைவேண்டி சிறப்புத்தொழுகை தொடங்கியது.இமாமின் வேண்டுகோளை ஏற்று  பெரும்பாலான பெண்களும்,பிஞ்சு குழைந்தைகளும் திரளாக கலந்துகொண்டனர்.
  
     தொழுகை முடிந்து வீட்டிற்கு வந்தோம் என் மகன் ஷாலிம் என்னிடம் “வாப்பா மள இன்னும் வரல்ல” என கேட்டான். என்னிடம் அதற்கு அப்போது பதில் இல்லை அன்று முழுநாளும் என்னால் அவனுக்கு பதில் சொல்ல இயலவில்லை .
   
    மறுநாள் காலை ஐந்து மணிக்கு அதிகாலை தொழுகையை நிறைவேற்ற பள்ளிவாசல் செல்லும் பொருட்டு எழுந்து அறையிலிருந்து வெளியே வந்து கண்ணாடி ஜன்னல் வழியே பார்த்தபோது ஆம் மழை பெய்துகொண்டிருந்தது .வேகமாக அறையினுள் சென்று ஷாலிமை எழுப்பி வெளியே அழைத்து வந்து காண்பித்தேன் .வாப்பா என என்னை கட்டியணைத்துகொண்டான்.


   
   தான் முழு நம்பிக்கையுடன் பிரார்த்தனை செய்ததால் மழை வந்தது என அவன் உள்ளம் உறுதியடைந்த வேளை அது .
ஷாகுல் ஹமீது .
03 april 2019.

Thursday, 2 July 2020

முடி முறித்தல்


கப்பல் காரன் டைரி
                          முடி முறித்தல்
  இரு வாரங்களுக்கு முன் என்னுடன் பணிபுரியும் எர்ணாகுளம் கருணாகர பிள்ளை கோபகுமார் “ஷாஹுலே முடி முறிக்காம் அறியாமோ” என கேட்டார். “ஆம் முறிக்காம் ஞாறாட்ச உச்சக்கி” என சொல்லி வைத்தேன்.உணவு கூடத்தில் என்  எதிரில் அமர்ந்திருந்த குஜாரத்தின் சோலங்கி திலிப்குமார் நதோட் என்னிடம் , “உனக்கு முடி நிறைய வளர்ந்து விட்டது வெட்ட வேண்டும் என்றார்” அவரும் என்னிடம் ஞாயிறு மதியம் சரியாக பனிரெண்டுமணி என்றார் .

      பண்டு ஒசா வீட்டுக்கு வந்து குழைந்தைகளுக்கும்,சின்ன புள்ளையளுக்கும் மொட்டையடிச்சி,முடி வெட்டிட்டு போவாரு.நான் எட்டாம் வகுப்பு படிக்கும்போது  ஸ்டப் கட்டிங் புகழ்பெற்றிருந்தது .அப்போது வந்த ஒரு திரைப்படத்தின் நாயகனின் சிகை அலங்காரம் அது  .
   மணாவாளக்குறிச்சியில்  நான்கு சலூன்கள் இருந்தது.அதில் மோகன் சலூன் புகழ் பெற்றது .கடந்த விடுமுறையில் இளைய மகன் ஷல்மானுக்கு முடி வெட்ட மோகன் சலூனுக்கு போயிருந்தேன் .அவர் நண்பரும் கூட எனக்கு .அவர் ஒரே தொழிலில் ஐம்பது ஆண்டுகளை நிறைவுசெய்ய போகிறார்  இந்த ஆண்டு.
  
  கப்பல் பணியாளர்கள் அனைவரும் கப்பலுக்கு செல்லும் முன் முடியை நல்லா ஒட்ட வெட்டிட்டு போனால் அடுத்த இரண்டு ,மூன்று மாதத்திற்கு முடிபற்றிய கவலையில்லை .கப்பலில் ஒருவர் பிறருக்கு முடி வெட்டி கொள்ளவேண்டியதுதான் .பிலிப்பினோ பணியாளர்கள் அனைவருமே நன்றாக முடி வெட்டதெரிந்தவர்கள்.
  
  இரண்டாயிரத்தி ஐந்தாம் ஆண்டு எனது முதல் கப்பல் ஈராக்கின் உம்காசர் துறைமுகம் சென்றபோது.முடி வெட்டுபவர் வந்திருந்தார்,பாகிஸ்தானை சேர்ந்த முதன்மை பொறியாளர் முடி வெட்டியபின் கூலியாக ஒரு காலி எண்ணெய் பீப்பாயை கொடுத்தார்.அதை பெற்றுகொண்டு மகிழ்ச்சியுடன் சென்றார் அவர்.அதை  ஏழு அமெரிக்க டாலருக்கு விற்க முடியும் அது அவருக்கு பெரும் தொகை .

   இரண்டாயிரத்தி பத்தாம் ஆண்டு நான் பணிபுரிந்த கப்பலில் எனது இரண்டாம் இஞ்சினியர் மங்களூர் முகம்மது சமீர். “ஷாகுல் முடிவெட்ட வேண்டும்” என்றார். “எனக்கு தெரியாது” என்றேன். “கொஞ்சம் சைடுல மட்டும் வெட்டு” என அழைத்து சென்றார் .காதுகளுக்கு மேற்பகுதியிலும்,பின் மண்டையிலும்தான் அவருக்கு முடி இருந்தது.நடுமண்டை கால்பந்து மைதானம் .
  அவரது அறையில் மீசை வெட்டும் கத்திரியால் முடி வெட்டிக்கொண்டிருக்கும் போது அவர் முன்பு அவரது முதன்மை இஞ்சினியருக்கு முடி வெட்டியதை சொன்னார். “ நான் சீப் இஞ்சினியருக்கு முடி வெட்டத்துல அவருக்க  காதை வெட்டிட்டேன் காதுல இருந்து ரத்தம் சொட்ட ,சொட்ட அவர் காதுல இயற் மப் போட்டுட்டு வெட்டுன்னு சொன்னாரு”என்றார் .அப்போது எனது கைகள் உதற தொடங்கியது . “உங்களது காதை கைகளால் பிடித்துக்கொள்ளுங்கள்” என்றேன் .
  அதன் பின் இருவருடங்களுக்குப்பின் என்னுடன் பணிபுரிந்த ஆந்திராவின் சிற்க்காகுளத்தை சேர்ந்த முகி குருமூர்த்தி முடி வெட்டி கேட்டார். “தெரியாது” என்றேன். “நான் சொல்லி தருகிறேன் அதுபோல் வெட்டு,இது ஒரு கலை,நீ காஸ் கட்டிங் செய்பவன் உன்னால் முடியும்.சீப்பை கையில் பிடித்து முடியை மேல் வாக்காக கோதியபின் சீப்பின் மேலிருக்கும் முடியை மட்டும் வெட்டு” என்றார்.அதன்பின் அதே கப்பலில் மூன்று வழுக்கு மண்டைக்கு வெட்டியபின் என் கைதிருந்தியது. ஆனால் முடி வெட்ட நல்ல கத்திரிகோலும்,சீப்பும் அவசியம் என்பதை தெரிந்து கொண்டேன்.சுனிதாவிடம் “முடி வெட்ட படிச்சாச்சு”என்றேன். “அப்ப ஊருக்கு வந்தாலும் வேற தொழில் கைவசம் இருக்குன்னு சொல்லுங்கோ” என சொல்லி சிரித்தாள்..
   
   இருவாரங்களுக்கு முன் நான் கோபகுமாருக்கு முடி முறித்தேன். சோலங்கி எனக்கு நல்ல ஒட்ட வெட்டிவிட்டார் அடுத்த இரு மாதங்களுக்கு பின் மீண்டும் வெட்டி தருகிறேன் என்றார்.என்னை நான் கண்ணாடியில் பார்த்தபோது மந்த புத்தி காரர்களை போல இருந்தது. “கப்பல்ல யாரு பாக்க போறா சப் சலேகா”என்றார் சோலங்கி பாய் .அவர் ஊருக்கு செல்லும் முன் பெரும்பாலானவர்களுக்கு முடி வெட்டி தருவதாக சொன்னார் .   ஒரு போட்டோ எடுத்து சுனிதாவிற்கு அனுப்பினேன் “முடி முறிச்சு” என. “முறிச்சதை எங்கே நட்டு வைத்தீர்கள்” என பதில் கேள்வி வந்தது .
  
    கடந்த சனிக்கிழமை என்னுடன் பணிபுரியும் இனையம் தம்பி ஹெல்டன் “முடி வெட்டி தா” என கேட்டான் .அடுத்த வாரம் ஊருக்கு செல்லவிருகிறார்.நீண்ட விமான பயணத்தில் ஸ்டைலாக போக வேண்டுமென நினைக்கறார் போல.சனியும்,ஞாயிறு மதியமும் எனக்கு பணி.ஞாயிறு பின் மாலையில் அவருக்கும் முடிவேட்டினேன் .அவருக்கு கொஞ்சம் தான் முடியிருந்தது ஆனாலும் அந்த மண்டையில் முடி வெட்டுவது கொஞ்சம் கடினம் .
ஒருமுறை இலங்கையின் நான்காம் இஞ்சினியர் வாரன்கே என்பவருக்கு முடி வெட்டியது மட்டும் நினைவிலிருந்து அகலவேயில்லை .ஆறு மாதங்களுக்கு மேல்  முடிவெட்டாமல் கரடியின் தோற்றத்தில் அலைந்துகொண்டிருந்தவரை காப்டன் கடிந்து கொண்டதால்.முடி வெட்டுமாறு வேண்டினார் .தையல் கலைஞர்கள் உபயோகிக்கும் கத்தரி தான் நாங்கள் கப்பலில் பாக்கிங்ஸ்(JOINTS) வெட்ட பயன்படுத்துவோம் .அந்த பெரிய கத்தரியால் செடியின் இலைகளை வெட்டுவது போல் வெட்டினேன்.வெட்டி எறிந்த முடியை எடை பார்த்திருந்தால் ஒரு கிலோவுக்கு மேல் வந்திருக்குமோ எனும் பிரமிப்பு .அவன் சாப்பிட்டது எல்லாம் அந்த முடிக்கே போய்ட்டோ என்னமோ .
   
         ஆப்ரிக்காவில் குடும்பத்துடன் வாழும் நண்பர் முடி வெட்டியிருப்பதை பார்த்து எங்கே வெட்டினாய் எனக்கும் வெட்டவேண்டும் என சக நண்பர் கேட்டபோது .”நான் வெட்டுன ஆளுட்ட நீ வெட்ட முடியாது ,எனக்க பொண்டாட்டியாக்கும் எனக்கு முடி வெட்டினது”என முன்பு நண்பர் ஒருவர் சொல்ல கேட்டிருக்கிறேன்.வெளிநாட்டில் வாழும் பெண்களும் நன்றாக முடி வெட்டுவதில் தேர்ந்துவிட்டார்கள் போல .

   வெளிநாடுகளில் பல பணியாளர் முகாம்களிலும் இப்படிதானிருக்கும் என நினைக்கிறேன் .முடி வெட்டுவது வெளிநாடுகளில் பெரும் பொருட்செலவு வேறு .நான் மெக்ஸிகோவில்  uni sex hair dressing எனும் பெயர் பலகையை கண்டு உள் நுழைந்தேன். “கட்டணம் எவ்வளவு என” கேட்டேன். “சிங்கோ டாலர்” என்றாள் அங்கிருந்த பெண்மணி .இருக்கையை காட்டி அமர சொல்லிவிட்டு உள் அறைக்கு சென்றுவிட்டாள்.வேறு ஆள் வருவார்கள் என நினைத்து அமர்ந்திருந்தேன் .அந்த பெண்மணியே கையில் கத்த்ரிகோல்,சீப்புடன் வந்து   சில சிகையலங்கார படங்களை காட்டி எப்படி வெட்ட வேண்டும் என கேட்டுவிட்டு  அவளே முடி வெட்டத்தொடங்கினாள்.

   கடந்த பத்து வருடங்களாக நாகர்கோயில்,கல்லூரி சாலையில், விஜயதா மண்டபத்தின் அருகில் இருக்கும் அன்பு சலூன் சரவணனிடம் தான் செல்கிறேன்.கடந்த பிப்ரவரியில் முடி வெட்ட கட்டணம் எண்பது ரூபாய் .எனது மகன் ஷாலிமுக்கு மாதம்தோறும் முடி வெட்டி கொள்ளவேண்டும்.அவனுக்கு சரவணன் கடைக்கு செல்ல பிடிக்காது .இப்போது நகரில் குளுகுளு வசதி செய்யப்பட்ட பல சிகையலங்கார கடைகள் வந்து விட்டது .எந்த புதிய முடி வெட்டு கடை திறந்தாலும் அங்கு ஒரு முறை அவனுக்கு போகவேண்டும் .அவனுக்கு முடி வெட்ட கட்டணம் நூற்றியிருபது ரூபாய் க்கு மேல் .

முடி வெட்டும் கடைகளில் காத்திருக்கும் நேரம் மிக சுவராசியம் மிகுந்தது .கையில் தினதந்தியுடன் அரசியல்,பொருளாதார,விஞ்ஞான நிபுணர்களின் விவாதம் நடக்குமிடம் அது.அடுத்த முறை நண்பர்கள் சலூன் கடைக்கு சென்றால் தேர்தல் முடிவுகளையும்,அடுத்த பிரதமர் யார் என்பதையும் அறியமுடியும் .ஒட்டு எண்ணும் மே இருபத்திமூன்றாம்  தேதி வரைகாத்திருக்க தேவையில்லை .
       ஷாகுல் ஹமீது ,
         30.april 2019
   கடந்த ஆண்டு ஏப்ரிலில் எழுதியது.
இந்த கொரோனா காலத்தில் இளையவன் சல்மானுக்கு ஒருமுறை முடி வெட்டி கொடுத்தேன் .இன்று காலை மூத்தவன் ஸாலிம் மொட்டை அடித்து தர வேண்டினான் .

Sunday, 10 May 2020

கப்பல் காரன் டைரி

கப்பல் காரனின் தனிமை நாட்கள் 

  இந்த தனிமை நாட்கள் என் போன்ற கப்பல்காரனுக்கு பெரிய கடினம் இல்லை .அங்கேயும் வாழ்க்கை இப்படி தானிருக்கும் .கூடவே வரக்கூடிய எதிர்பாராத கடும் பணி ,பெரும்புயல், இடி மின்னலுடன் கொட்டும்  மழையையும் சமாளித்தே ஆக வேண்டும் . எங்களூரை சார்ந்த நண்பர் காப்டன் பீட்டரை போனில் அழைத்தபோது “நமக்கு இது ஒன்னும் ஒரு பிரச்சனையுமில்லியே நாமோ எப்படி எல்லாம் சமாளிப்போம்”என்றார்.
240 மீ நீளமுள்ள  lpg கப்பலின் முன் பகுதி


    கப்பலின்  நீளம்,அகலம் எவ்வளவோ அதுக்குள்ளேதான் அவன் நகர முடியும். கரையணையும் போது வாய்ப்பு கிடைத்தால் மட்டும் நிலத்துல காலு வைக்கலாம்.காஸ் டாங்கர் ,எண்ணெய் ஏற்றும் (very large gas carrier and oil tanker,ultra large  gas tanker and oil tanker) பெரும் கலங்கள் என்றால் .பணிக்கு சேர்ந்து ஆறு மாதமோ எட்டு மாதமோ கழிச்சி வீட்டுக்கு வரத்துலதான் கால் நிலத்தில் பதியும் .
  
இரு கப்பல்கள் இணைத்து கட்டப்பட்டு சரக்கு பரிமாற்றம் செய்யபடுகிறது 
      எட்டு மணி வேலைக்கு ஏழு ஐம்பத்தி ஐந்துக்கு அறையில இருந்து இறங்குனா போதும், உண்மையில் அவன் அதிர்ஷ்டகாரன்,மிக குறைந்த நேரத்தில் தங்குமிடதிலிருந்து பணியிடத்திற்கு செல்பவன் கப்பல் காரன்  மட்டுமே. ரயில் ,பஸ்ஸில் மணிக்கணக்கில் பயணம் இல்லை, கூட்டத்துல இடி படாண்டாம் ஐம்பது அடி தூரத்தில் கொண்டு போய் நிறுத்தப்படும் பேருந்தை நோக்கி மாரத்தான் ஓடவேண்டாம்.பதினோரு ரூபாய் ஐம்பது காசு பயண சீட்டுக்கு “சில்லறை இல்லேன்னா பஸ்ல  ஏன் வாரியறு ஒய் கீழ இறங்கும்” என கண்டக்டரிடம் திட்டு வாங்க வேண்டாம். ரயிலில் கூட்டத்தில் சகலம் தள்ளி இரி என சொல்லிவிட்டு நம் தொடைமேல் அமரும் பெரிய புட்டத்தை உடைய சக பெண் பயணியை சுமந்து செல்லும் சிரமம் கிடையாது .

      காலையில் சர்பிரைஸ் தரும்  டயர்  பஞ்சர்,கார் டிரைவர் வரல ,இன்னைக்கு ஹர்த்தால் என எந்த எந்த பிரச்னையும் இல்லை.என்னை போல டே டியூட்டி யில் உள்ளவர்கள் அவசர வேலை ஏதும் இல்லைனா மாலை ஆறு  மணிக்கு முன்பே அறைக்கு வந்து நீராடி இரவுணவையும் முடிச்சிட்டு .மெஸ் ரூம்லே இருந்து கூட்டமா ஒரு படம் இல்லேன்னா அறையில போய் சொந்த மடி கணினியில் படம் பாக்குலாம் .

    டெக்கில் வேலை செய்பவர்கள் கொஞ்சம் அதிகமாக நகர்பவர்கள்.கப்பலின்  நீளம் இருநூற்றி நாற்பது மீட்டர் என்றால் இருநூறு மீட்டர் வரை போய் வரலாம் .அகலம் முப்பது மீட்டர்.அவர்களுக்கு கரையை ஒட்டிய பயணங்களில் மலையும்,காடும் உள்ள இயற்கையை ரசிக்கவும் முடியும் .
கதிரெழுதல்
கதிரணையும் ஆபூர்வ காட்சி  கார் மேகங்கள்  சூழ்ந்திருக்கையில்

    இரவுகள் இன்னும் இனிமையானவை. கப்பல் கவிந்து விடுவது போன்ற  புயல்,முன்னர் நிற்பவர் தெரியாத அளவிற்கு சுழற்றியடிக்கும் மழை உடலை ஊடுருவி செல்லும் கடுங்குளிரோ இல்லண்ணா முழுநிலவை ஒட்டிய நான்கைந்து நாட்களில் ஒளி வீசும் கடல் பரப்பு,நீச்சம் குளம் போல காட்சியளிக்கும்.  கரு நிலவு நாட்களில் வானில் கொட்டி கிடக்கும் எண்ணிலா நட்சத்திரங்களும், அதில் தினமும் நாம் பார்க்கும்  குறிப்பிட்ட நட்சத்திரங்கள் காண்கையில் ஏற்படும் அகமகிழ்வும்  கரைலிருப்பவர்களுக்கு வாய்ப்பே இல்லை.
     
    இரவில் விளக்குகள் அனைத்தும் அணைக்கப்பட்டு கும்மிருட்டில் பயணிப்போம் .நிலத்தில் நம்மை சுற்றிலும் வெளிச்சம் இருப்பதால் கருநிலவு நாளில்  நான் சொன்ன வானில் கொட்டி கிடக்கும் நட்சத்திரங்கள் மிஸ்ஸிங் ஈரட்டி,அட்டகட்டி அருகில் உள்ள சத்சதன் போன்ற காட்டு பகுதிகளில்  கரு நிலவு நாளில் இரவு தங்குபவர்கள் அறைகளின் மின் விளக்குகளை அணைத்துவிட்டு அதை பார்த்தால் அதை உணர முடியும் .
  இஞ்சினில் வேலை செய்பவர்கள் இன்னும் குறைவாகவே நகர முடியும். இஞ்சின் காரனுக்கு சூரிய ஒளியே கிடைக்காது அதனால கை,கால், இணைப்பில் வலி உள்ளவர்கள் நிறையபேர் உண்டு .சூரிய ஒளி படா நம் வீட்டு மங்கையர் பலரும் இதுபோல் வலியுடனே வாழ்கிறார்கள் .

 கரை தொடா நீண்டபயணத்தில் சுற்றிலும் நீர் மட்டுமே எல்லையில்லாமல் விரிந்து கிடக்கும்.சில பயணங்களில் எட்டு முதல் பத்து நாட்கள் வரை எந்த கப்பலும் எதிரிலோ,அருகிலோ கடந்து செல்லாது.உலகமே இப்போது அறைகளில் முடங்கி கவலையுடன் நாட்களை யுகம் போல் கழிக்கிறார்கள்  கொள்கிறது,
கப்பல் காரனின் மிக சிறிய அறை

கப்பல் காரனின் அறை மிக சிறியது. எட்டுக்கு நான்கடியில் உள்ள தங்கும் அறை . தடுப்புடன் கூடிய ஒரு  கட்டில்,படுத்த பொறவு ரோல்லிங்கில் கீழ உளபிடாதுல்லா. ஒரு சோபா,ஒரு நாற்காலி,ஒரு மேசை . அதுக்குள்ளேயே குளியலறையும்,கழிப்பறையும்.ரேங்க் ஐ பொறுத்து காப்டன் முதல் பயிற்சி சீ மேன் வரை அறையின் சைசும் ,அதில் உள்ள பொருட்களும் மாறுபடும்.
  
சீப் இன்ஜினியரின்  ரூம் (very large bulk carrier)இரண்டரை லட்சம் டன்  சரக்கு ஏற்றும் மிகப்பெரிய கப்பல் முன்னூற்றி இருபது மீட்டர் நீளமும் ,ஐமபத்தி நான்கு மீட்டர்  அகலமும் உடையது  முந்நூறு  சதுர அடி கொண்டது 
     
காப்டனுக்கும் ,சீப் இன்ஜினியருக்கும் டே ரூம் ஒன்னும் ,நைட் ரூம் ஒன்னும் 
சீப் இன்ஜினியரின்  படுக்கை அறை நூறு சதுர அடியில் 


இருக்கும்.அவர்களின் அறையே அவர்களுக்கு அலுவலகமும் கூட .அங்க ஒரு பெரிய தொலைக்காட்சி பெட்டி மேஜை ,கணினி,ஐந்தாறு பேர் அமரும் வகையில் நாற்காலிகளும் இருக்கும் .உடனே அத ஒரு கொட்டாரம் போல கற்பனை செய்யாண்டாம் .அறையின் சைசு எட்டுக்கு பத்துதான்,தூங்கும் அறை அதைவிட சின்னதுதான்.
.
     நைட் ரூமில் பொருட்கள் வைக்க அறையுடன் கூடிய மேஜை,துணி வைக்க அலமாரி,காபி, டீ போடுவதற்கு  தண்ணீர் கொதிக்க வைக்கும் மின்சார கேத்தல்,சக்கரை,பால் பொடி தேயிலை,காப்பி ,கிரீன் டீ வகையறாக்கள் இருக்கும் .காப்டனுக்கு கூடுதலா நேவிகேஷன் மானிட்டரும் ,ஒரு கூடைல கொஞ்சம் பழமும் .குளியலறை பாத் டப் உடன் இருக்கும்.(எல்லா கப்பல்லயும் பாத் டப்  இருக்குமுண்ணு சொல்ல முடியாது ,சில கப்பல்ல எல்லா அறையிலும் பாத் டப் இருக்கும்) பின்னே அவ்வோ அறைகளை தினமும் சுத்தம் செய்ய ஆள் உண்டு.

      காலையில எந்திரிச்சி குளிச்சி (குளிக்காமலும் வேலைக்கு போற கேஸுகள்உண்டு )உணவுகூடத்துக்கு சாப்பிட போகணும்னா அதிகபட்சம் ஒரு நிமிஷம்.காலத்தே எழும்பி பெரும்பாலும் எல்லாரும் போறது அடுமனைக்குதான் மெட்ராஸ் பாபு ஹுசைன் ,செங்கனூர் ஸ்ரீ குமார் போல உள்ள செப்பாக இருந்தா அங்க போய் கொஞ்ச நேரம் பேசி சிரிச்சி இந்த நாள் இனிய நாள் என துவங்கும் .பரேரா  போல உள்ள குட் பிரைடேக்கள் செப்பாக இருந்தால் அடுமனை கிட்ட யாரும் எட்டியே பார்க்கமாட்டோம்.
 
செங்கனூர் ஸ்ரீ குமார்

     கப்பல்ல கேலி (galley) நியுஸ் ரொம்ப முக்கியம் .காப்டன் உட்பட எல்லாரும் அடுமனைக்கு வாரதுனால எப்ப கப்பல் நிக்கும் ,போவும் ,சம்பளம் கூடுமா ,டிரில் உண்டா ,சனிக்கிழமை யாருக்க பார்டி,கரையணைந் பின்  அந்த ஊரில் எங்கு செல்வது ,எப்படி போனும்.மெக்ஸிகோவின் அக்கபுல்கோவில்  வெளிய செல்பரிடம் எனக்கு ஒரு மெஸ்கல் வாங்கி வந்துரு என சக ஊழியரிடம் சொல்லும் இடமும் அதுதான் .ஆனால் கேலி நியுஸ்ல நிறைய பொய் தான் இருக்கும் .
  
 பின்ன சாப்பாடு. பயணத்தை முன் கூட்டியே கணக்கிட்டு தேவைக்கு அதிகமான பொருட்களை எப்போதுமே ஸ்டாக் வெச்சிருக்கணும்.நீண்ட பயணத்துல பச்சகறிதான் கஷ்டம் தக்காளி பதினைந்து நாள்,மல்லி இலை,புதினா,லெட்டுஸ் ஏழு நாளு(லெட்டுசில் மேலே உள்ள அழுகிய இலையை மட்டும் தினமும் பார்த்து நீக்கி விட்டால் பத்து நாள் இருக்கும்) ஒரு மாசத்துக்கு பொறவு வெங்காயம் இல்லாமதான் சமையல் கலைஞன் ரொம்ப கஷ்டபடுவான். நீண்ட பயணத்துக்கு பிறகு இன்னும் இரண்டு நாளில் உணவு பொருட்கள் வந்துவிடும் என்றிருப்போம் . கப்பல் கரையணைவதில் தடங்கல்கள் வரும்போது பொருட்கள் கிடைப்பது இன்னும் தாமத மாகிவிடும் .

   சாப்பாட்டின் சுவை காப்டன்,செப்பை பொறுத்தது நல்ல சுவையாக சமைக்கும்  செப் காப்டன் தரும் குறைவான,தரமற்ற பொருட்களால் வாயில் வைக்க முடியாமல் போகும்.தரமுள்ள நல்ல பொருட்கள் கிடைத்தாலும்உணவு தயாரிப்பை பெரும் பணியாக நினைத்து சமைக்கும் சமையல் காரனின் உணவு பெருமளவு வீணாகிவிடும். நல்ல சுவையாக சாப்பிட தெரிந்த, எங்களின் மேல் அக்கறையுள்ள சில காப்டன்கள் உணவு பொருட்களை பார்த்து பார்த்து வாங்குவார்கள்  பஞ்சாபின் திலாவர் சிங்,அசுதோஷ்,எஸ்தீப் சௌத்ரி,இலங்கையின் பெர்னாண்டோ,பங்களாதேசின் பிப்லோப் ஆகியோர் நல்ல உணவு தந்தவர்கள் .

    பதினஞ்சி வருஷம் பத்தொன்பது கப்பல் ல வேல பாத்ததுல மங்களூர் செட்டி,கோழிகோடு பிரபீஷ் கிருஷ்ணா,கோவா வின் மெல்வின்,லிவிஸ்லி டயாஸ்,பரேரா,காசர்கோடு பக்கியார ராஜன் சென்னை பாபு ஹுசைன் ஆகயோரின் சுவை மட்டுமே நாவில் எஞ்சியுள்ளது.
2015  புத்தாண்டு கொண்டாட்ட  உணவு  வகைகள்

கை காட்டுபவர்  செப் காசர்கோடு பக்கியார  ராஜன்

  தனிமை நாட்கள் ஆரம்பித்த முதல் பதினைந்து நாட்கள் வீட்டிலிருந்தேன் .சுனிதா தேவையான பொருட்கள் கொஞ்சமாக வாங்கி வைத்திருந்தாள்.உறுதியாக எதற்கும் வெளியே செல்ல கூடாது என என்னிடம் ஆணையிட்டாள்.அதிகாலை ஸுபுஹ் தொழுகைக்கு முன் எழுவது குடும்பமாய் தொழுகையை நிறைவேற்றுவது .பின்னர் மொட்டை மாடியில் இளைய மகன் சல்மானுடன் கதிரெழுவதை பார்த்துக்கொண்டே யோகா பயிற்சிகள் செய்வது.
     
பின்னர் நீராடி காலை உணவு.சிறுது ஓய்வுக்கு பின் வீட்டில் எதாவது ஒரு பகுதியை மகன்களுடன் சுத்தம் செய்வது ,துணிகளை துவைப்பது சமையல் பாத்திரங்களை கழுவுவது .மாலையில் மொட்டை மாடியில் சல்மானுடன் சின்ன விளையாட்டு . மக்ரிப்  தொழுகைக்குப்பின் குரான் ஓதுதல் இஷா தொழுகை,இரவுணவு பத்துமணிக்கு ஆழ் துயில்  என நாட்கள் கழிந்தன .
  
ஏழாவது
நாள் இரவு சல்மான் சப்பாத்தியும் முட்டை கறியும் வேண்டுமென்றான் . “இன்னும் மூணு உள்ளி தான் இருக்கு இன்னக்கி   முட்டை கறி செய்தா உள்ளி தீந்துரும் ,நாளைக்கி வாப்பா வெளிய போவனும் ,அதுனால ரெண்டு நாளு கழிச்சி செய்து தாரேன்” என்றாள்.பத்தாவது நாள் தான் வெங்காயம் உட்பட அத்தியாவசிய பொருட்கள் தீர்ந்தால் வெளியே சென்று பொருட்கள் வாங்கி வந்தேன் .
   திருவனந்தபுரத்திலிருந்து
சென்றது முதல் தினமும் அழைப்புகள் வந்துகொண்டே இருந்தது .உங்கள் எண்ணையை உபயோகித்த பின் வேறு எண்ணையில் சமைக்க முடியவில்லை எப்போது கடை திறப்பீர்கள் என அழைத்ததில் அனேகம்பேர் பெண்கள்.

எனது எண்ணை கலப்படமில்லாத,சுத்தமானது அதனால் ஏப்ரில் பதினொன்றாம் தியதி இங்கு வந்து கடையை திறந்தேன் .எண்ணை ஆலையில் நானே எண்ணையை தயாரித்து வினியோகிக்க துவங்கினேன்.ரசயானம் கலவாத தேங்காய் கொப்பரைகள் வீணாவதிலிருந்து தப்பித்தது .
வேலை சரியாக இருக்கிறது .தொலைக்காட்சி,பத்திரிகை சமூக ஊடகங்களிருந்து முழுமையாக விலகி இருப்பதால் .நாட்டில் நடப்பவை ஏதும் தெரியவில்லை .நேற்று அமெரிக்காவிலிருந்து தீபன் அழைத்திருந்தார் .இந்தியாவிலிருந்து உறவினர்களும் நண்பர்களும்  அவரை போனில் அழைத்து அங்கே நிலைமை மோசமாக உள்ளது என சொல்கிறார்களாம் .தம்பி தீபனுக்கு அமெரிக்க செய்திகள் ஏதும் தெரியவில்லை அவரும் தொலைக்காட்சி பார்ப்பதில்லை . “தீபன் அங்கே எத்தனை பேர் இறந்துள்ளனர்” என கேட்டேன். “தெரியாது” என்றார்.  

   கணவனும் மனைவியும் வீட்டிலிருந்து வேலைசெய்கிறார்கள்.ஆறு ,மூன்று வயதில் இரு பெண்குழைந்தைகள் .மகிழ்ச்சியாக இருக்கும் அவரை இங்கிருந்து போனில் அழைத்து பீதியை கிளப்ப முயற்சிகிறார்கள் பயத்தில் இருப்பவர்கள் .
        ஈராக் போர்முனையிலும் மிக குறுகிய வட்ட்திலேதான் வாழ்ந்தேன் .ராணுவ முகாமை விட்டு வெளியே செல்ல இயலாது .முகாமில் உள்ள முகங்களை தவிர வேறு யாரையும் பார்க்கவும் முடியாது .   

    இன்று முதல் இனி வரும் எல்லா ஞாயிற்றுக்கிழமையும். கேரளாவில் முழு ஊரடங்கு அறிவித்துள்ளார் முதல்வர் பிரனாயி விஜயன் .இன்று கடையும் ,எண்ணை ஆலையும் திறக்கவில்லை       

.இங்கு வந்து ஒரு மாதத்தில் ஓய்வே கிடைக்கவில்லை .அதிகாலை நோன்பு வைக்க மூன்று மணிக்கு எழுந்து சோறு வடித்து,கடுகு,கறிவேப்பிலை,வத்தல் போட்டு  வெங்காயம் வதக்கி,இஞ்சி,பூண்டு இடித்து சேர்த்து,இரவே ஊற வைத்த கொண்டை கடலையுடன் மல்லி,மிளகு,கரம் மசாலா, உப்பு கலந்து கொதிக்க வைத்து மல்லி இலை தூவிய கடலைகறியுடன்,வெள்ளரிக்காய் சின்ன வெங்காயம் ,தக்காளியுடன் எலுமிச்சை சாறும், உப்பு சேர்த்து சலாடுடன் சாப்பிட்டு நோன்பு வைத்தேன் .

   அதிகாலை   தொழுகைக்குப்பின் ஆறரை மணிக்கு துயில சென்றுவிட்டு எட்டரைக்கு எழுந்து ஒன்பது மணிக்கு எழுத துவங்கினேன் .ஆயிரத்தி நூறு வார்த்தைகள் எழுத நான்கு மணி நேரமாகியுள்ளது .
இன்று அதிகம் நகர இயலாது முழுநாளும்  எழுபத்திரண்டு சதுரஅடியுள்ள   சிறிய அறைதான் ,அடுமனையும் ,குளியலறையும் தனியாக உள்ளது .   

 2011 ஆம் ஆண்டு நியூயார்க்–மும்பை  பதினான்கு மணிநேர விமான பயணத்தில் குறிப்பிட நேரத்தில் தரையிரங்குவோம் என தெரிந்த பின்பும் என்னருகில் இருந்தவர் “கப் ஆயாக ,கப் ஹம் உத்ரேகா” என கேட்டுகொண்டே இருந்தார். நான் ஊரில் இருக்கும்போது எப்போதும் சுற்றி அலைபவன் இப்போது இயல்பாகவே சிறிய அறைகளில் இருக்க மனம் பழகிகொண்டது .
ஷாகுல் ஹமீது ,
10 May 2020

Friday, 17 April 2020

பக்கரு -சிறுகதை

பக்கரு –சிறுகதை

  அதிகாலை வடசேரி பள்ளியில் *ஸுபஹ் தொழுகைக்கான பாங்கு காற்றில் மிதந்து வந்தது அல்லாஹ் அக்பர்,அல்லாஹ் அக்பர்.பக்கரின் வீட்டுக்காரி வியாத்தகண்ணு பக்கருடைய  கழுத்து, ,நெற்றியில்  கை வைத்து  பார்த்துவிட்டு  “தீ போல கொதிக்குது நீங்கோ இன்னைக்கு கடைக்கி போவாண்டாம்”என்றாள் பக்கரிடம்.

  “ராத்திரியே நல்ல காய்ச்சலாத்தான் இருந்துது.கடையிலயிருந்து வரும்போது ஒரு அஞ்சால் அலுப்பு மருந்த கட்டன் சாயால கலந்து குடிச்சிட்டுத்தான் வந்து படுத்தேன்.காலத்த செரி ஆவுண்ணும் நினேச்சன்.நீ போய் தண்ணி போட்டு கொண்டுவா” என வியாத்தகண்ணுவிடம் சொல்லிவிட்டு இடப்புறமாக சரிந்து கையை ஊன்றி மெதுவாக எழுந்து பாயில் அமர்ந்தார் பக்கர்.வியாத்தகண்ணு சுக்கும்,மிளகும்,கொத்தமல்லியும்,ஜீரகமும் சேர்த்து இடித்து சுக்குகாப்பிக்கு பாத்திரத்தில் தண்ணீரை ஊற்றி ,துண்டு கருப்பட்டியை போட்டு அடுப்பை பத்தவைத்தாள்.
    
  
    உம்மா,வாப்பா வைத்த பெயர்  அபூபக்கரா இருந்தாலும்,அவரை அனைவரும் அழைப்பது பக்கரு என்றுதான் .ரேஷன்கார்டுக்கு பேரு எழுதும்போதுதான் தன் பெயர் அபூபக்கர் என அவருக்கே நினைவுக்கு வரும் .
  
   பக்கரு பதினெட்டு வருடமாக வேலை செய்வது நாகர்கோயிலில்   மணிக்கூண்டு அருகில் உள்ள அசன் மொதலாளி நடத்தும் அம்ஸா சைவ,அசைவ ஹோட்டலில் .அம்ஸா ஹோட்டல் என்று சொன்னால் மாவட்டத்திலும் ,அருகில் உள்ள கேரளாவிலும்  தெரியாதவர்கள் கிடையாது . "நல்ல பேரு கேட்ட ஹோட்டலாக்கும் நாக்குக்கு ருசியான கோழி பிரியாணி,ஆட்டிறைச்சி பிரியாணி இல்லானக்க நல்ல புரோட்டாவும்,மாட்டிறைச்சியும்,எறச்சி சால்னா ஊத்தி,முட்டையும் போட்டு கொத்துன கொத்துப்புரோட்டா தின்னனும்னாக்க அம்ஸா ஹோட்டலுக்குதான் போனும்னு" சுவை அறிந்தவர்கள் சொல்வதுண்டு.
  

    பக்கரு பிறந்தஊர் நெல்லை மாவட்டம் வள்ளியூர் அருகிலுள்ள துலுக்கப்பட்டி. தனது திருமணத்திற்கு பிறகு வருமானம் போதாமால் இவ்வூருக்கு வந்தார் .வடசேரி ஓட்டு பெரைத்தெருவில் வசித்தபோது பக்கத்துவீட்டு பாத்திமுத்துவின் வீட்டுகாரர் தனது செல்வாக்கை பயன்படுத்தி பக்கரை அம்ஸா ஹோட்டலில் வேலைக்கு சேர்த்துவிட்டார்.
 பக்கர் எண்பத்தைந்தில் அம்ஸா ஹோட்டலில் பணிக்கு சேரும்போது தின சம்பளம் பனிரெண்டு ரூபாய், வெளியூர் ஆட்கள் சாப்பிட வந்தால் ஐம்பது பைசா,ஒரு ரூபாய் என  கைமடக்கு கிடைத்தால்  ஒரு ஐஞ்சு முதல்  ஏழு ரூபாய் கிடைக்கும்.ஒன்னும் கிடைக்காத  நாட்களும் நிறைய  உண்டு. அப்போது  பெரிய முதலாளி அன்வர் கடையில்  இருந்தார் அவர் மாத சம்பளம் தரும்போது கணக்கு பாக்காமல் புள்ள,குட்டிகாரன்னு ஐஞ்சி ரூபாய் கூட அதிகமாக தருவார்
  
    அன்வர் முதலாளி எண்பத்தேழில் மரித்தபின்   அவருடைய  மச்சினன் அசன் முதலாளி தான் கடையை நடத்துகிறார்.இவுரு கொஞ்சம் முசுடு ,எல்லாவற்றுக்கும்  கணக்கு பார்ப்பார் .வாயில் வந்தது போல பணியாளர்களை திட்டுவதால், யாரும் இங்கே அதிக நாட்கள் பணியில் தாக்கு பிடிப்பதில்லை .பக்கரும் இன்னும் சிலரும் மட்டும் குடும்ப சூழல் கருதி எதையும் காதில் வாங்குவதில்லை.

    அம்ஸா ஹோட்டலின் அசைவ பிரிவில் தற்போது பக்கர் கவனிக்கும் நான்கு மேசைகளும் அவர் பணிக்கு சேர்ந்தபுதிதில் இப்ராகிம் தான் இருந்தார். 'இப்ராகிம் கஸ்டமர்ட்ட  ரெண்டு சிக்கன் பிரை,ஒரு பிளேட் மட்டன  குடுத்துட்டு  ஒரு முட்டைகறிக்கு மட்டும் பில் போட்டு கைமடக்கு வாங்கத்துல ரஹீம் பிடிச்சு போட்டாரு,அதனால முதலாளி இப்ராகிம நிருத்திடாரூ"  என ராமச்சந்திரன் சொன்னார். பொறவு அங்க நின்னது ஐயப்பன் ,அவன் கோயிலு கொடைக்கு முதலாளிட்ட ஆயிரம் ரூவா வாங்கிட்டு போனவன் திரும்பி வரல .அப்போதுதான் அசன் முதலாளி பக்கரை அழைத்து  “நீ அந்த பேமிலி முறிக்க கிட்ட உள்ள மேசைல நில்லுடே”என்றார்.
  
     அன்று பக்கர்,மனைவி வியாத்தகண்ணுவிடம் “இன்னேலேருந்து எனக்க டேபிளு மாத்தமாக்கும் என்னமும் சில்லற படியறும் அதுல”என முகத்தை கோணலாக்கி சிரித்தார்.பக்கர் இருப்பாதாலேயே அம்ஸா ஹோட்டலுக்கு பல நிரந்தர வாடிக்கையாளர்கள் உண்டு.அம்ஸா ஹோட்டல் பரபரப்பாக இயங்கும் மதிய வேளைகளில் பக்கர் மூன்று ப்ளேட் பிரியாணி,இரண்டு சிறிய ப்ளேட் சிக்கனை வலது கையிலும்,இடக்கையில் ஒரு பிளேட்டுமாக கொண்டு செல்வதை வாடிக்கையாளர்கள் கண்கள் விரிய பார்ப்பதுண்டு.
   
        நெய்யூர் ஆஸ்பத்திரி டாக்டர் கீயுபட் நாகர்கோயிலுக்கு வந்தால் அம்ஸாவில்  ஒரு பிரியாணி தின்னுட்டுத்தான் செல்வார்  .அன்று சனிக்கிழமை டாக்டர் கீயுபட் வந்திருந்தார் .
“என்ன பக்கரே சொகமா இருக்கீரா”
“டாக்டர் வரணும் நல்லா இருக்கேன் ,நீங்கோ சொகந்தானா? ஒருவாரமா கை முட்டுல லேசா வலி”என்றார் பக்கர் 
 “அடி என்னமும் பட்டுதா ஓய்” என சட்டைபைலிருந்து கண் கண்ணாடியை எடுத்து போட்டுவிட்டு பக்கரின் கையில் அழுத்தி பார்த்தார் டாக்டர் கியூபட் .
 “ ரெத்தகெட்டு இருக்குவோய்,இதுக்கெல்லாம்  இங்க்லீஷ் மருந்து வேண்டாம்,கோபால் ஆசான்ட்ட சொல்லி ஆலம் பால் தைலம் வாங்கி ஒருவாரம் போடும் அடுத்த வாரம் நான் வரத்துல பாக்குலாம்” என்றார்.
   


        "இன்னைக்கி பிரியாணி மாஸ்டர் மாத்தமாக்கும் சுலைமான் பாய் மொவளுக்கு கல்யாணம்ன்னு கடையநல்லூருக்கு போயிட்டாரு, சுபைராக்கும் இன்னைக்கி மாஸ்டரு , நெய்சோறும் கறியும் சாப்புடுங்கோ நல்லா இருக்கும் ,இல்லன்னா உங்களுக்கு பிடிச்ச பொரிச்ச நெய்மீன் இருக்கு,காலத்த சூசை கன்னியாமரியிலருந்து கொண்டு வரத்துல துடிச்சிட்டு இருந்தது”.என்றார் பக்கர். “சரி நீரு சொன்ன பொறவு நான் பிரியாணி தின்னபுடாது,பொரிச்ச மீனும் நெச்சோறும் தாரும்” என்றார் டாக்டர் .  நிரந்தர வாடிக்கையாளர்களின் நாவின் ருசி அறிந்தவர் பக்கர் .

   வியாத்தகண்ணு தந்த ஆவி பறக்கும் சுக்குகாப்பிய கையில வாங்கி ஒரு மடக்கு ஊறிஞ்சி குடிச்ச  பக்கரு மூணு  வருசத்துக்கு முந்தைய நினைவில் மூழ்கினார்.  ஒருநாள் சாயங்ககாலம்  “மொலாளி பயல இஞ்சினியரிங் காலேஜில சேக்கணும் ஒரு முப்பதாயிரம் ரூவா கடனா வேணும் காலேஜி பீசடைக்க” எனக்கேட்டார் அபூபக்கர் . “பக்கரே உனக்க தகுதிக்கு போல ஆசைப்படு ,இஞ்சினியருக்கு படிக்க வைக்க உனக்கு முடியுமா டே,வேற என்னத்தையாவது சின்னதா படிக்க வை”என்றார் அசன் முதலாளி பக்கரிடம்.
  
மகனுக்கு பிளஸ்டூவில் நல்ல மதிப்பெண் அவன் இஞ்ஜினியர்தான் படிப்பேன்னு சொன்னான்.முதலாளி ரூவா இல்லைன்னு சொன்னதால வியாத்தக்கண்ணுக்க ஒரு மாலையையும்,கையில கிடந்த இரண்டு சின்ன காப்பையும் வித்து வெச்சிருந்தேன்.மொவன் அவனுக்கு பிரண்டுக்க கூட இராமநாதபுரம் செய்யது அம்மாள் காலேஜில் இடம் இருக்குன்னு போயிட்டு மறுநாள் போண் பண்ணினான்.  உச்ச* நேரம் போன் வந்தத அசன் முதலாளி மூணு மாணிக்க மேலதான் பக்கரிடம் சொன்னாரு “ஒய் பக்கரு மொவன் போன் பண்ணினான் நாளைக்கு காலைல காலேஜில பீஸ் கெட்டினால் இடம் கிடைக்குமாம்,இல்லேன்னா அந்த இடத்த வேறு யாருக்காவது கொடுத்துரு வாங்களாம்” என சொல்லி நிரறுத்திகொண்டார் .
    
        அசன் மொதலாளி பைசா தரமாட்டுருன்னு தெரியும் .அப்பத்தான் வில்லுக்குறி விஜயா பைனான்ஸ்,ஓறும* வந்தது. அப்போது மணி ஐந்தாகி இருந்தது. சின்ன பயல கூப்பிட்டு “மக்களே ஒனக்கு பிரண்டு பிரான்சிஸ்க்க ஸ்கூட்டர் வாங்கிட்டு வா,வாப்பா கேட்டுதுன்னுசொல்லு” என ,கையில் முப்பது ரூபாயை  பெட்ரோல் போட கொடுத்து அனுப்பினார் .வில்லுக்குறி விஜயா பைனான்ஸ்க்கு போய் சேரும்போது மணி ஆறாகி விட்டது.விஜயன் வெளியே நின்றுகொண்டு இருந்தார் .பணிப்பெண் கதவை பூட்டிக்கொண்டு இருந்தாள்.பக்கரை கண்டதும் “ஓய் பக்கர் சாயிப் வாரும் ,என்ன விஷயம்” என கேட்டார் விஜயன் .பக்கர் அவரது காதில் ரகசியம்  பேசுவது போல “ஒரு அர்ஜெண்டு முப்பதாயிரம் ரூவா வேணும் ,பயல காலேஜில சேக்கணும்” என்றார் பக்கர்.இரியும் என அங்கிருந்த மர பெஞ்சை காட்டிவிட்டு,பணிப்பெண்னிடம் அலுவலக கதவை திறக்க சொல்லிவிட்டு ,அருகிலிருந்த அவரது வீட்டிலிருந்து பணம் எடுத்து வர சொன்னார் விஜயன் .
   
    சில ஆவணங்களில் கையொப்பம் வாங்கிகொண்டு,சாட்சி யாக பக்கரின் இளைய மகனிடமே கையொப்பம் பெற்றுகொண்டார். அன்றிரவே இளையமகன் பணத்துடன் ராமநாதபுரத்திற்கு சென்றான் .  பயல காலேஜில சேத்து மூணு வருஷம் ஓடி போச்சி .இன்னும் ஒரு வருசத்த படிப்புதான் அதுவர கடிச்சி ,புடிச்சி எப்படியாவது ஓட்டணும் என யோசித்த வாறே சுக்கு காப்பி குடித்த எவர்சில்வர் கப்பை கீழே வைத்துவிட்டு மீண்டும் பாயில் படுத்துக்கொண்டார் பக்கர் .
 பக்கரின் வாழ்க்கை ஓய்வு,தூக்கத்திற்கு வீடும்,வேலைக்கு கடையும் என்பதாக குறுகிபோயிருந்தது.எதையும் வாங்க வேண்டும்,எங்காவது செல்ல வேண்டும் என்ற எண்ணம் எப்போதும் மனதில் எழுவதே .கடையில் சாப்பிட வருபவர்களை திருப்தியாக சாப்பிட கொடுத்து அனுப்புவதிலேயே குறியாக இருப்பார்.
   
       கண்களை மூடியதும்  மனதில் எண்ணங்கள் ஓடின .இன்னைக்கி கடைக்கி போவல்லன்னா தனது எடம் போயிரும் .நான் நிக்க மேசையில் ராமச்சந்திரன் வருவான்.நாளேலேருந்து என்னை சைவ சாப்பாட்டு சைடுக்கு போடுவாரு சூப்றேசரு .அங்க கைமடக்கு ஒரு எளவும் கிடைக்காது .எவனாவது வெளியூர் காரன் எப்பாவாவது ஒரு இரண்டு ரூவா தந்தா உண்டு .எனக்க டேபிள்ல்ல மூணு பேரு புரோட்டாவும் ,ஒரு சில்லி சிக்கனும் ,மட்டன் ரோஸ்டும், பீப் பிரையும்  வாங்குனா இருநூறு  ரூவா பில்லு வரும் கண்ணை மூடிகிட்டு பத்து ரூவா கைமடக்கும் கிடைக்கும்.


  மாச சம்பளத்துல பயலுக்கு அனுப்பி குடுத்துட்டு ,கைமடக்கு கிடைக்க பைசாலதான் வீட்டு பாடு கழியுது.பைனான்ஸ்ல வாங்குன ரூவா வட்டி தெவஞ்சி நிக்கிது என எண்ணியவாறே பக்கர் வியாத்தகண்ணிடம் “நீ அந்த சட்டையை எடு காய்ச்சலுன்னு பாத்த ஒக்காது கேட்டியா நான் கடைக்கி போறேன்” என்றார். வியாத்தகண்ணு பக்கரை தடுக்கவில்லை ,அவர் வேட்டியை மடித்து கட்டிக்கொண்டு நடக்க இயலாமல் செல்வதை வாசலில் நின்று பார்த்துக்கொண்டே இருந்தாள்.

முற்றும் .
ஷாகுல் ஹமீது.

Wednesday, 1 April 2020

கக்கூஸ்




கப்பல் காரன் டைரி                         
                            

கக்கூஸ்
“பி டெக்கில் உள்ள ஸ்பெயர் கேபினில் கக்கூஸ் ப்ளஷ் வேலை செய்யவில்லை மாற்றவேண்டும் உனக்கு தெரியுமா”என இரண்டாம் இஞ்சினியர் பிராங்கி என்னிடம் கேட்டார். “தெரியாது” என்றேன்.
          
கப்பலின் தங்கும் அறையிலுள்ள குளியலறை

   கடந்த ஆண்டு பணியிலிருந்த கப்பல் யோயோ.பிப்ரவரியில் பணிக்கு சேர்ந்தேன்.மார்ச் மாதம் கப்பலின் குடியிருப்பு பகுதியில் உள்ள இரண்டாம் தளத்திலிருந்த இருந்த அறையின் கக்கூஸ் வேலை செய்யவில்லை.அதை சரி செய்யவேண்டுமென பிராங்கி சொன்னார்.அதற்கு இருதினங்களுக்கு முன்  அமெரிக்காவின் பிலேதெல்பியாவில் கப்பல் கரையணைந்த போது புதிதாக பணிக்கு சேர்ந்த இரண்டாம் அதிகாரி கார்த்திக் இரவில் அந்த அறையில் தங்கியிருந்தான்.காலையில் கக்கூஸ் போய்விட்டு ப்ளஷ் பட்டனை அழுத்தியபோது வேலை செய்யவில்லை.அப்படியே விட்டு விட்டு சென்றுவிட்டான் .


     இரு தினங்களுக்கு பின் முதன்மை அதிகாரி மங்களூர் லோரன்ஸ் பிராங்கியிடம் அதுபற்றி சொல்ல.கக்கூஸ் பணி இயந்திர அறைக்கு வந்து சேர்ந்தது.கப்பலில் உள்ள அனைத்து தொழில்நுட்ப வேலைகளும் முதன்மை இன்ஜினியரின் தலைமையில் இயந்திர (engine dept) அறை துறைக்குத்தான் வரும் .எனவே உறுதியாக சொல்வேன் கப்பலுக்கு தலைவன் காப்டனாக இருந்தாலும் .கடவுள் முதன்மை இஞ்சினியர்தான் .கப்பலின்  பொறியியல் சார்ந்த அனைத்து பிரச்சனைக்கும் அவரே பொறுப்பு .
seawage treatment plant

  
                               
     
 காலை எட்டு மணி பணி ஆலோசனை கூட்டத்தில் கக்கூஸ் பணியை செய்வதென முடிவு செய்யப்பட்டது .கப்பலில் இருக்கும் இருபதுக்கும் மேற்பட்ட தங்கும் அறைகளில் உள்ள கழிப்பறைகளிலிருந்து வெளியேற்றபடும் கழிவுகளை அப்படியே கடலில் கொட்டிவிட முடியாது .seawage treatment plant இல் முறையாக சுத்திகரிக்கப்பட்டு ஆழ் கடலில் மட்டுமே அந்த நீரை மட்டுமே வெளியேற்ற வேண்டும்.

                              

       இயந்திர அறையில் கழிவறை சுத்திகரிப்பு தொட்டி ஒன்று இருக்கும் .அது மூன்று அடுக்குகளால் ஆனது .கப்பலில் உள்ள அனைத்து கழிப்பறைகளிலிருந்தும் வெளியேற்றபடும் கழிவுகள் அந்த தொட்டியின் முதல் அறையில் வந்து சேரும். அதில் Gayamyzne 700FN எனும் ரசாயனம் வெதுவெதுப்பான நீரில் கலந்து ஊற்றி வைத்தால்,அதில் மனித கழிவுகளை சாப்பிட்டு வாழும் கிருமிகள் உருவாகி உள்ளேயே வாழ்ந்துகொண்டு இருக்கும்.கிராமங்களில் கழிப்பறை தேக்க தொட்டிகளை கட்டும்போது அதில் கழுதை விட்டையை போடுவார்கள் அதுவும் அந்த கிருமிகளை உருவாக்கும் . உள்ளே வரும் மனித கழிவுகளை அது சாப்பிட்டு உயிர் வாழும் .அதனால் தான் சோப்பு தண்ணீர் உட்பட வேறு எந்த ரசாயனமும் கழிப்பறைகளில் ஊற்ற கூடாது .அது அந்த கிருமிகளை கொன்றுவிட்டால் .கழிப்பறை தேக்க தொட்டி வெகு விரைவில் நிரம்பிவிடும் .
                        


    கப்பலின் கழிப்பறை தேக்க தொட்டியில்,முதல்,இரண்டாம் நிலை தாண்டி மூன்றாம்நிலை அறைக்கு வரும் நீரில் குளோரின் கலந்து கடலில் வெளியேற்றபடும்.அந்த தொட்டியில் பொருத்த்பட்டிருக்கும் உயர்நிலை சென்சாரை தண்ணீர் தொட்டவுடன் அதனுடன் இணைக்கப்பட்டிருக்கும் மின் மோட்டார் தானே இயங்கி கழிவு நீரை வெளியேற்றும்.அதனால் அந்த கழிவு தேக்க தொட்டி ஒருபோதும் நிரம்பி வழிய வாய்ப்பில்லை. எனது முதல் கப்பல் (2005) முப்பது ஆண்டு பழமையானது அதில்  கழிப்பறை சுத்திகரிக்கும் தொட்டியில் உள்ள உயர்நிலை சென்சார் வேலை செய்யாது .ஒவ்வொரு நான்கு மணிநேரத்திற்கும் கழிவுநீர் வெளியேற்றும் மின் மோட்டரை பத்து நிமிடத்திற்கு இயக்கவேண்டும் .ஒருநாள் ஒருவேளை அதை இயக்க மறந்ததால் அந்த அறை முழுவதும் கழிவுநீர் வழிந்தோடியது . மிக சிரமப்பட்டு பின்னர் அந்த தளம் சுத்தம் செய்யபட்டது .
                 

   
       எர்னாகுளம் கோபகுமார் அந்த கக்கூஸ் சரி செய்யும் பணியை முந்தைய கப்பலில் செய்ததாக சொன்னார். இரண்டாம் இஞ்சினியர் பிராங்கி முதலில் உதிரி பாகங்கள் இருக்கிறதா என பார்த்தபின் பணியை தொடங்குவோம் என்றார்.கப்பலில் எந்த பணியையும் துவங்கும் முன் தேவையான உதிரி பாகங்கள் இருக்கிறதா என பார்த்துவிட்டே பணியை துவங்க வேண்டும்.
பழைய கப்பல்களில் உள்ள கழிப்பறைகளில்  தண்ணீரை வேகமாக அடித்து வெளியேற்றும் அமைப்புதான் இருக்கும் .இப்போதைய நவீன கப்பல்களில் vacum flush கழிப்பறைகள் வந்துவிட்டன.vacum கழிப்பறைகள் இருக்கும் கப்பல் களில் தண்ணீர் செலவு மிக,மிக குறைவு தினசரி நான்கு முதல் ஆறு டன்கள் மட்டுமே .

         நான் ,பிராங்கி,கோபகுமார் மூவரும் உதிரிபாகங்கள்,மற்றும் உபகரணங்களுடன் சென்றோம்.காலையிலேயே டெக் பணியாளர் ஒருவர் “டாய்லட்டை சுத்தம் செய்து லோசன் ஊத்தி வெச்சிருக்கேன்” என சொன்னார் .

      முதலில் vacum சுவிட்ச் வேலை செய்கிறதா என பார்த்தோம் சுவிட்ச் வேலை செய்தது .ஆனால் வெற்றிடம் உருவாகி நீர் வெளியேறவில்லை .வெற்றிடத்தை உருவாகும் டயாப்ரம் கிழிந்து இருக்கலாம் என்பதை உறுதி செய்தோம் .சுவரில் அமரும் கோப்பையை கழற்றிஆக வேண்டும் தண்ணீர் மற்றும் ,காற்று இணைப்புகளை முன்பே நிறுத்தியிருந்தோம்.எம் 16 அளவுள்ள நான்கு போல்டு,நட்டுகளை கழற்றிவிட்டு கோப்பையை தனியாக எடுத்து கழிந்திருந்த ரப்பர் டயாப்ரம் மாற்றி கோப்பையை பொருத்தி இயக்கி பார்த்தோம் .மீண்டும் வேலை செய்யவில்லை.

      உள்ளே இருக்கும் control mechanism பாக்ஸ்ஐ மாற்றுவோம் என முடிவெடுத்தோம் .மீண்டும் கழற்றினோம் மிகச்சிறிய  போல்ட்டுகள்.allen key யை போட்டு கழற்ற போதுமான இடமில்லாததால் அந்த கண்ட்ரோல் பெட்டியை கழற்ற அதிக நேரம் ஆனது .புதிய கண்ட்ரோல் பெட்டியை பொருத்தியபின் கோப்பையை மீண்டும் பொருத்தி இயக்கி பார்த்தோம் vacum flush வேலை செய்தது .
இயந்திர அறையில் கம்ப்ரசர் ஒன்று ஓடி காற்றை நிரப்பி வைத்திருக்கும் .கழிப்பறையில் உள்ள சுவிட்ச் ஐ அழுத்தியதும்,கண்ட்ரோல் மெக்கானிசம் சமிக்ஞ்சையை பெற்று இயக்கும் போது சிறிது நீர் பீய்ச்சி அடிக்கும் அதே நேரம் டயாப்ரம் வேலைசெய்து வெற்றிடத்தை உருவாக்கும்போது கோப்பையில் உள்ள கழிவுகள்,நீர் மிக வேகமாக உள்ளிளுத்து கொள்ளும் .கண்டிப்பாக இது போன்ற கழிப்பறைகளில் பேப்பர் உட்பட எதையும் போடகூடாது .
  
   இரண்டாம் இஞ்சினியர் பிராங்கி இன்னும் ஒரு கண்ட்ரோல் பாக்சும்,ஒரு டயாப்ரமும் இருக்கிறது என்றார்.நான் பிராங்கியிடம் “நான்கு வருடம் இஞ்சினியரிங் ,ஒரு வருடம் கப்பலுக்கான மேற்படிப்பு,பயிற்சிகள் ,கிளாஸ் 2 சான்றிதழ் போன்ற பெரிய கல்வி தகுதி ,பணி அனுபவங்களுக்கு பின் கடைசில கக்கூஸ் வேல செய்ய வேண்டியதாயிற்றே”என்றேன் .சிரித்துக்கொண்டே “ஜகாஜ் கா நௌக்கிரி சப் குச் கர்ணா படுத்தா ஹ”என்றார் சிகரெட் துண்டு ,பேப்பர் போன்றவற்றை போட்டால் மொத்த கழிப்பறைகளும் உபயோகபடுத்த முடியாத நிலை ஆகிவிட்டால் காலையில் வயிற்றை பிடித்துகொண்டு சரியாவது வரை காத்திருப்பதை தவிர வேறு வழியில்லை .

     கழிவுகள் செல்லும் குழாய்களில் அடைப்பு ஏற்படும் .ஒவ்வொரு குழாயாக கழற்றி  மனித கழிவுகளை சுத்தம் செய்த அனுபவங்களை கேட்டிருக்கிறேன் .குழாய் அடைப்பு ஏற்படாமல் இருக்க உயிரியல் ரசாயனங்களை ஒவ்வொரு மாதமும் எல்லா கழிப்பறைகளிலும் போட்டு குழாய்கள் அடைப்பு ஏற்படாமல் பார்த்துக்கொள்ளும் சில மூன்றாம் இஞ்சினியர்கள் இருக்கிறார்கள்.

  ஷாகுல் ஹமீது ,
      1st april 2020