Tuesday, 18 June 2024

மிகக்குறுகிய பயணங்கள் .

 

நீ.....ண்...........ட  பயணம் என ஒரு பதிவு எழுதியிருந்தேன். யார் கண் பட்டதோ. அமீரகத்தின் தாஸ் தீவில் மே மாதம் ஐந்தாம் தேதி கரையணைந்து ஆறாம் தேதி பின் மதியம் சரக்கு நிறைக்க துவங்கி எழாம் தேதி புறப்பட்டு பன்னிரெண்டாம் தேதி இந்தியாவின் சூரத் அருகிலுள்ள ஹசிராவில் சரக்கை இறக்கினோம்.

தாஸ் தீவு இரவில் 


ஒரு முறை சரக்கு ஏற்றி இறக்க மட்டுமே கப்பலை வாடகைக்கு எடுத்தது ஒரு நிறுவனம். எங்களது எல் என் ஜி கப்பலில் சரக்கு நிறைத்தால் குறைந்தது இருபத்தியைந்து நாட்கள் பயணித்து வேறொரு நாட்டில் சரக்கை கொடுப்போம். அதாவது மாதத்தில் ஒரு துறைமுகம் அல்லது  இரண்டு. மீதி நாட்கள் கப்பல் ஓடிக்கொண்டே இருக்கும். எங்களது பணியும்,கப்பல் வாழ்க்கையும் அதிக சிரமமில்லாமல் நகர்ந்துகொண்டிருக்கும்.

  பதிமூன்றாம் தேதியே  கப்பல் ஹசிரா விட்டபின் வேறொரு நிறுவனம் விரைந்து தாஸ் தீவுக்கு வர சொன்னது தாஸ் தீவில் கப்பல் கரையணைந்தது முதல் கப்பலுக்கு அவர்கள் வாடகை தரத்தொடங்குவார்கள். மே மாதம் பதினேழாம் தாஸ் தீவில் சரக்கை நிரப்பிவிட்டு  பத்தொன்பதாம் தேதி  புறப்பட்டு நான்கு நாள் பயணத்திற்குப்பின் மீண்டும் ஹசிராவை அடைந்தோம்.

  இருபத்தியைந்தாம் தேதியே மீண்டும் புறப்பாடு. ஒவ்வொரு துறைமுகத்திற்கும் இடையில் மிகச்சிறிய இடைவெளிகள். அதிக பட்சமாக நான்கு பயண நாட்கள். கப்பல் காரனுக்கு வேலை மிக கடுமையாகிவிட்டது. துறைமுகம் செல்வதற்கு முன்னால் பாதுகாப்பு ஒத்திகைகள், சரக்கு தொட்டிகளை தயார் செய்தல்,எல் என் ஜி திரவ குழாய்களில் காஸ்கட் மாற்றுதல்,சரக்கு தொட்டி மற்றும் குழாய்களின் வால்வுகளை இயக்கி பார்த்தல், டெக் பணியாளர்கள் கப்பல் கரையில் கட்டப்படும் கயிறுகளை தயார் செய்து வைத்தல், கப்பலை உப்பு பிசுக்கு இல்லாமல் கழுவி சுத்தபடுத்தல்.

  கரையணையும் முன் போக்குவரத்து நெரிசல் உள்ள பகுதிகளில் நேவிகேஷன் அதிகாரியுடன் கண்காணிப்பில் ஒருவர் அதிகமாக இருத்தல். இயந்திர அறையிலும் தானியங்கி சிஸ்டதிலிருந்து மாற்றி இரவும் பகலும்  இருவர் பணியில் இருப்பது. பைலட் மற்றும் கரையில் வரும் அதிகாரிகள் தங்கும் அறையை சுத்தப்டுத்தல். கரையில் இருக்கும்போது நடக்கும் ஆய்வுகளுக்கு கப்பலை தயாராக வைத்தல் இப்படியாக  சனி,ஞாயிறு என பாராமல் எப்போதும் வேலை, வேலை, வேலை ஓடி ஓடி அனைவரும் களைததுவிட்டோம். அதாவது மாதத்தில் ஒரு முறை செய்ய வேண்டிய வேலையை ஆறு முறை செய்யவேண்டிய கட்டாயம்.

  மே மாதம் இரண்டாம் முறையாக ஹசிராவிலிருந்து புறப்பட்டு தாஸ் தீவுக்கு நான்கு நாட்களில் சென்று சேர்ந்தாலும் கப்பல் கரையணைவில்லை. துறைமுகத்தில் சில பழுதுபார்க்கும்பணிகள் நடந்துகொண்டிருந்ததால். துறைமுகம் எப்போது அழைத்தாலும்  செல்லும் வகையில். தாஸ் தீவுக்கு இரண்டு மணி நேர பயண தூரம் இருக்கையில் கப்பலை வட்டமடித்து கொண்டிருந்தோம்.

  முப்பத்தி ஒன்றாம் தேதி உள்ளே வாருங்கள் என செய்தி வந்ததும் போய் சரக்கை நிரப்பினோம்  ஜூன் மாதம் ஐந்தாம் தேதி குஜராத்தின் பரூச் அருகிலுள்ள தகேஜ் என்னுமிடத்தில் துறைமுகம். இங்கே கடுமையான நீரோட்டம் காரணமாக கப்பலை கரையில் கட்டும் கயிற்றின் நுனியில் இருக்கும் வட்டத்தின் நீளம் இருபத்தியிரண்டு மீட்டர் வேண்டும் என்றார்கள்.  முன்பும் பின்பும் மொத்தம் இருபத்திமூன்று கயிறுகளின் நுனியை ஐந்துபேர் கொண்ட குழு ஒரே நாளில் மாற்றி சோர்வடைந்து சாய்ந்தது.ஜூன் ஆறாம் தேதி கடுமையான நீரோட்டம் கொண்ட தகேஜ் துறைமுகப்பில் மிக கஷ்டப்பட்டுத்தான் கப்பலை கட்ட முடிந்தது.

   இப்படியாக மே ஆறாம் தேதி முதல் ஜூன் ஆறுக்குள் ஆறு முறை கரையில் கப்பலை கட்டி சரக்கை கையாண்டோம்.மே மாதம் அரபிக்கடல் கடுமையான கோடை வெள்ளி உருகுவது போல வெயில் இறங்கும் வெப்பத்தால் கடல்நீர் உருகி மேலெழும் நீராவியின் வெப்பமும்.  .தலையிலிருந்து கழுத்து வரை வெள்ளைத்துணியால் கட்டி கண்களுக்கு கறுப்பு கண்ணாடியும் அணிந்தோம். தண்ணீரும்,எலுமிச்சை உப்பு,சீனி கலந்த பானம்,மோர் குடித்து தகிக்கும் வெயில் நாட்களை சமாளித்தோம்.

    இப்போதும் தாஸ் தீவில் கடந்த பதினொன்றாம் தேதி சரக்கு நிரப்பிவிட்டு  தகேஜ் நோக்கி புறப்பட்டு வந்து கொண்டிருக்கிறோம். பதினேழாம் தேதி கரையணைவோம். அடுத்து எங்கு செல்வது என இதுவரை தகவல் இல்லை. மிகக்குறுகிய பயணத்தில் தேதி, கிழமை நினைவில்லாமல் போனதில் ஒரு மாதம் விரைவாக ஓடிவிட்டது.

Dahej (gujrat)


  நாஞ்சில் ஹமீது,

16  june 2024.

ஜிப்ரேல்டர் எங்கே இருக்கிறது.


 

       தூங்கி எழுந்து  அதிகாலை தொழுகைக்குப்பின் இன்றும் கடற்கரைக்குப்போனேன்.காலை உணவுக்கு சென்றேபோது வரவேற்பறையில் எங்களுக்கு எந்த செய்தியும் இல்லை. முகவரை அழைக்க சொன்னோம். பதினோரு மணிக்கு மேல் தான் இங்கே அழைப்பது வழக்கம் என்றார். வரவேற்பறையில் இருந்த லூசி. 

  லூசி நேற்றிரவும் பணியில் இருந்தாள். தான் ஸ்பெயினில் வசிப்பதாகவும். தினமும் இங்கு வந்து போவதாகவும் தன்னை போல தினமும் பத்தாயிரம் பேர் ஸ்பெயினிலிருந்து இங்கு பணிக்கு வந்து செல்வதாக சொன்னாள். இங்கே சம்பளம் கொஞ்சம் அதிகம் என்றாள்.

  நான்காவது மாடியிலுள்ள என் அறையிலிருந்து படிக்கட்டுகள் வழியாக இறங்கும்போது விடுதியின் பின்புறமுள்ள மயானமும்,விமான ஓடுதளமும்,கடலும் காட்சியளித்தது.அதை லூஸியிடம் சொல்லி எனக்கு முன் பக்க அறையின் கண்ணாடி ஜன்னல் வழியாக பார்த்தல் ஓங்கி உயர்ந்த ஜிப்ரால்டார் மலையின் சிறு பகுதி தெரிவதை சொன்னபோது. “ நீ அதிர்டசாலி முன் பக்க அறை கிடைத்தது. பாறை தெரிவது பரவாயில்லை, பின்புற அறையில் இருந்தால் இரவில் ஆவிகளை பார்க்கும் வாய்ப்பு உனக்கு கிடைக்கும்” என மஞ்சள் நிற பற்கள் தெரிய சப்தமாக சிரித்தாள். 


   காலை உணவு முடிந்து வெளியே சென்றோம் நேற்று சென்ற திசைக்கு எதிர் திசை இன்று. விமான நிலையத்தின் ஓடு பாதைக்குள் புகுந்து மறுபுறம் சென்றோம். ஓடு பாதையில் நின்று படம் எடுத்துக்கொண்டோம்.விமானம் இறக்கும் பாதையில் நடந்து செல்வது ஒரு கிளர்ச்சியை தந்தது. மறு புறம் ஸ்பெயின் எல்லை உரிய ஆவணங்கள் இருப்பவர்கள் ஸ்பெயின் நாட்டிற்குள் செல்கிறார்கள். விமான நிலையத்தை சுற்றி இடுப்பளவு கம்பி வேலி அமைத்திருக்கிறார்கள். நாட்டின் எல்லை அதுதான்.கண்காணிப்பு காமிரா மூலம் கண்காணிப்பார்கள் போல. ஸ்பெயின் – ஜிப்ரால்டர் கடற்கரையும் அதேயளவு கம்பி வேலியிட்டு உள்ளனர்.

Runway 


   விமானம் ஒன்று தரை இறங்கியது ஓடு பாதையின் இருபுறம் மூடப்பட்டு காவலர்கள் பாதுகாத்தனர். மீண்டும் பாதை திறந்தபின் மக்கள் செல்ல அனுமதித்தனர். வாகனங்களுக்கு அனுமதியில்லை.மதியம்வரை சுற்றிவிட்டு விடுதிக்கு வந்தபோது மேலும் இருதினங்கள் காத்திருக்க சொல்லி தகவல் வந்திருப்பதை வரவேற்ப்பறை பெண் சொன்னாள்.

    ஜிப்ரேல்டர் எங்கே இருக்கிறது மத்தியதரைக்கடலில் ஸ்பெயினுக்கும், மொராக்கோவுக்கும் இடையில் உள்ள பகுதி. பிரிட்டனின் ஆளுமைக்கு உட்பட்டது. பிரிட்டனின் கவர்னர் ஆட்சி புரிகிறார்.எல்லா வரலாற்றையும் போல் இங்கும் சண்டையும் உயிர்பலியும் ஏராளமாக நடந்துள்ளது. இஸ்லாமிய மன்னர் தாரிக் பின் சயீத் என்பவர் பெயரால் ஜபல் (மலை) தாரிக் என இருந்த இங்குள்ள மலையின் பெயரால் பின்னர் இப்பகுதி ஜிப்ரால்டர் என பெயர் பெற்றுள்ளது. முன்பு இந்த மலை ஜபல் மூஸா எனவும் இருந்துள்ளதாக வராலாற்று குறிப்புகள் சொல்கிறது. தொழிற்நுட்பம் வளரும் முன் இந்த ஜிப்ரேல்டார் மலை கப்பலோட்டிகளுக்கு பெரும் உதவியாக இருந்துள்ளது.

   இஸ்லாமியர் ஆட்சியை வெளியேற்றி விட்டு ஸ்பானிஷ் ஆட்சி நெடுங்காலம் அமைந்துள்ளது.பின்னர் ட்ச்சு,பிரெஞ்ச் ஆளுமைக்கு உட்பட்டும் ஆட்சி நடந்துள்ளது. முதல் மற்றும் இரண்டாம் உலகப்போரில் எரிபொருள் நிரப்பி செல்லும் இடமாக போக்குவரத்திற்கு மிகவும் பயன்படுத்தப்பட்டுள்ளது. அப்போதுதான் பிரிட்டிஷ் கைபற்றியிருக்க வேண்டும்.

   இறுதியாக ஆட்சி மாற்றத்துக்காக நடந்த ஒட்டெடுப்பில் பெருன்பான்மை மக்கள் பிரிட்டன் ஆட்சியை விரும்பியாதல் அதுவே இப்போதும் நீடிக்கிறது. பிரிட்டனின் கடற்படை தளம் ஒன்றும் இங்குள்ளது.

  மொத்தமே 6.4 சதுர கிலோமீட்டர் பரப்பளவு உள்ள இந்நாட்டின் மக்கள் தொகை (34,000)முப்பதினான்காயிரம் மட்டுமே.வருமான வரி மற்றும் இன்ன பிற சலுகைகளை வழங்கி இங்கே தொழில் தொடங்க வருமாறு அழைப்பு விடுக்கும் விளம்பரங்கள் ஆங்காங்கே உள்ளது.

    மாலையில் கடற்கரைக்கு சென்றபோது வயதான இந்தியர் ஒருவர் மீன்களுக்கு பூஞ்சை பிடித்த பிரட்டை பிய்த்து போட்டுகொண்டிருந்தார். (1975 இல் இங்கு பணிக்காக வந்தவர்) ஐம்பது ஆண்டுகளாக இங்கே வசிப்பதாவும் பிறந்து வளர்ந்தது இந்தியாவில் பஞ்சாப் மாநிலத்தின் அமிர்தசரஸ் நகரம் என்றும் சொன்னார்.

   அங்கே கட்டபட்டிருந்த விலையுர்ந்த உல்லாச படகு ஒன்றை புகைப்படம் எடுத்தோம்.ஆப்ரிக்காவிலிருந்து இங்கிலாந்தில் குடியேறிய நண்பர்கள் குழு  சுற்றலா வந்திருந்தது.




  இந்தியர் எங்களின் ஜிப்ரேல்டர் வருகை குறித்து கேட்டறிந்தபின் அவரது காரில் எங்களை விடுதியில் இறக்கி விடுவதாக சொன்னார். நடந்தே ஊர் சுற்ற இருப்பதை சொன்னபோது இந்த ஊரில் நீங்கள் வழி தவற வாய்ப்பே இல்லை இந்த மலையை பார்த்துகொண்டு நடந்தால் எளிதாக உங்கள் விடுதிக்கு சென்று விடலாம் எனச்சொல்லி விடைபெற்றார்.

 தனது மகள் இங்கே மருத்துவராக பணிபுரிவதாக சொன்னார்.இங்கே வசிப்பிடம் மிக விலைஅதிகம் எனவும் சொன்னார். இடப்பற்றாக்குறையே அதற்கு காரணாமாக இருக்கும்.

   இரவு வரை சுற்றி களைத்துவிட்டு விடுதிக்கு திரும்பினோம்.

 நாஞ்சில் ஹமீது,

03-feb-2024

Thursday, 23 May 2024

ஜிப்ரேல்டர்

 


       அதிகாலை தூங்கி எழுந்து தொழுகைக்குப்பின் விடுதியிலிருந்து வெளியேறி நேற்று நடந்த திசைக்கு எதிர்பக்கமாக நடந்தேன். விடுதியின் எதிரில் அந்த ஜிப்ரேல்டர் ராக் நின்றுகொண்டிருக்கிறது.அதிகாலையே குளிருக்கான வெப்ப ஆடை

 


அணிந்து பேட்டரி சைக்கிளில் நின்றபடி பணிக்கு சென்றுகொண்டிருந்தாள் ஒருத்தி.ஒரு கிலோமிட்டருக்குள்ளாகவே கடற்கரை வந்தது.  



   கடற்கரை ஆளோழிந்து கிடந்தது நல்ல காற்றும் கடல் லேசாக சீற்றமாகவும் இருந்தது, தூரத்தில் சில கப்பல்கள் காற்றில் ஆடிகொண்டிருந்தது. கடற்கரையில் நாய்கள் அனுமதியில்லை,மாற்றுதிறனாளிகளுக்கு வாகனம் நிறுத்த தனியிடம்,ஒரு வாகனம் அதிகபட்சமாக ஒரு மணிநேரம் மட்டுமே நிறுத்த அனுமதி, காற்றில் அடித்து சென்று விடாமல் இருக்க இறுக்கமாக கட்டிவைத்த மூடி போட்ட குப்பைத்தொட்டிகள் சீரான இடைவெளியில்,கடலில் குளித்தபின் நன்னீரில் குளிக்க நன்னீர் குழாய்கள் சில அங்கே இருந்தது.

   இறுக்கமாக உடையணிந்த ஒருவர் ஓட்டபயிற்சி செய்து கொண்டிருந்தார். சாலையை ஒட்டிய வணிக நிறுவன சுவர்களில் நாய்கள் கால்களை தூக்கி மூத்திரம் போக அனுமதியில்லை எனும் படம் என்னை ஆச்சரியபடுத்தியது.சில உணவகங்கள் திறந்திருந்தன. இருவர் மட்டும் வெளியில் அமர்ந்து பெரிய குவளையில் காபி குடித்துக்கொண்டிருன்தனர்.

   ஹாலிடே இன் எனது விடுதியில் நுழைந்து வரவேற்பறையில் ஒரு கப் நீர் அருந்திவிட்டு அறைக்கு சென்று நீராடினேன். காலை உணவுக்குப்பின் முந்தையநாள்  மாலை சென்ற கடைவீதிக்கு பிரபுல், ரைமுண்டோவை மற்றும் சௌகானை அழைத்துச்சென்றேன்.



  மிக பழமையான கடைவீதி கருங்கற்களால் ஆன நடைபாதை  காயத்ரி ஜிவல்லர்ஸ்,விஜய் மணி எக்ஸ்செஞ் ஆகிய இந்திய நிறுவனங்கள் இங்கும் இருக்கிறது.சௌகான் எனது இன்னொரு பெயர் விஜய் என் பெயரில் இங்கே கடை இருக்கிறது என மகிழ்ந்து படம் எடுத்துக்கொண்டார்.அங்கே தனக்கொரு மதுகுப்பியை வாங்கிக்கொண்டார் விஜய் சௌகான்.



   மதியம் வரை சுற்றிவிட்டு விடுதிக்கு வந்தோம் நீண்ட நடை லேசான குளிர் இருந்ததால் களைப்பே இல்லை.சாப்பிட்டுவிட்டு மூன்று மணிக்குமேல் நல்ல தூக்கம். மாலைகுளியலுக்குப்பின்  பெட்டியில் அனைத்தையும் அடுக்கி தயார் செய்தேன்.ஆறுமணிக்குமேல் ஏஜென்ட் எங்களை கப்பலுக்கு அழைத்துச்செல்ல வரலாம்.

 மாலையில் உணவுகூடத்தில் அமர்ந்திருந்தோம் முகவரின் வருகையை எதிர்பார்த்து. ஆறரை மணிக்குமேல் சௌகான் சொன்னார் அவர் கப்பலுக்கு செல்வது ரத்தாகி விட்டது என.

தனது மொபைலில் கப்பல் ஜிப்ரேல்டர் தாண்டி சென்று கொண்டிருப்பதை காண்பித்தார்.அவரது கப்பல் நிறுவனமே அவருக்கு குறுஞ்செய்தி அனுப்பியிருந்தது. அவருடன் பணியில் இணைய வேண்டிய காப்டனும் உணவு கூடத்தில் வந்து அவருக்கு அந்த செய்தியை உறுதி செய்தார்.

    பிரபுல் நாங்கள் இணைய வேண்டிய கப்பலின் இரண்டாம் இஞ்சினியரை தொடர்புகொண்டார். நாங்கள் பணியில் இணைவதும் ரத்தான செய்தி உறுதியானது. நான் கப்பல் சென்று விடுவிக்கவேண்டிய தினேஷ் எனக்கு செய்தி அனுப்பியிருந்தார். எங்கள் பயண பைகளை டெக்கில் வைத்துவிட்டு கப்பலில் இருந்து இறங்குவதற்காக நாங்கள் நெடுநேரம் காத்திருந்தோம். காப்டன் அழைத்து “யுவர் சைன் ஆப் கேன்சல்” என சொல்லிவிட்டதாக சொன்னார்.

   எங்களுக்கு ஒன்றும் புரியவில்லை ஏன் ரத்தானது என. நாங்களும் தயாராக இருந்தோம் கப்பல் செல்ல. ஜிப்ரல்டர் துறைமுகம் இன்று  மூடபட்டிருப்பதாகவும்,படகு கடலுக்குள் செல்ல இயலாது எனவும் அறிந்தோம். ஆப்பிரிக்காவின் நைஜீரியாவை நோக்கி செல்லும் கப்பல் ஜிப்ரேல்டரை கடக்கும்போது படகில் சென்று நாங்கள் ஏறிகொள்ள வேண்டும் என்பது திட்டம். தீடீர் கடல் சீற்றம் காரணமாக படகு கடலுக்குள் செல்ல இயலாததால் நாங்கள் பணியில் இணைவது ரத்தாகி போனது.

  இரவில் தினேஷ் செய்தி அனுப்பியிருந்தார் அருகில் கனேரி எனும் தீவில் பணியாளர் மாற்றம் செய்ய காப்டன் முயற்சிக்கிறார் என. அது சாத்தியமானால் ஞாயிறன்று நீங்கள் கப்பலுக்கு வரமுடியும் என்றார்.

  எங்கள் ஏஜென்டிடம் இருந்து எந்த தகவலும் இல்லை. அடுத்து என்ன ஆகும் என எந்த உறுதியும் இல்லாமல் இரவில் தூங்க சென்றோம்.

03 feb2024,

நாஞ்சில் ஹமீது.

Sunday, 19 May 2024

பணிக்கு திரும்பினேன் 2

 

         ஜிப்ரேல்டரில் இறங்கினேன்.

ஜிப்ரால்ட்டர் விமான நிலையம் 


                  பிரிட்ஷ் ஏர்வேஸ் விமானம் பத்தரை மணிநேர பயணத்திற்குபிறகு பத்திரமாக லண்டன் ஹீத்ரூ விமான நிலையத்தில் தரையிறங்கியது.

   விமானத்தில் இருமுறை நல்ல உணவு தந்தார்கள். ரைமுண்டோ உடன் இருந்ததால்  நான்கரை மணிநேர காத்திருப்பு எளிதாக கடந்தது. லண்டன் விமான நிலையத்தில் பணிபுரிபவர்களும்,பயணிகளுமென இந்தியர்களால் நிரம்பியிருந்தது.

 ஐந்து டெர்மினல்களை கொண்ட மிகப்பெரிய விமான நிலையம்.பேருந்துகளில் ஏற்றி சென்று காத்திருப்பு பகுதியில் விடுவார்கள். அடுத்த விமானம் புறப்படும் வாயில் மற்றும் டெர்மினலை திரையில் பார்த்துவிட்டு சரியான வாயிற் கதவுக்கு செல்ல ரயிலில் செல்லவும் நேரிடும்.இங்கே விமானத்தை தவறவிடுபவர்கள் அனேகம்பேர். ரைமுண்டோவிடம் சொன்னேன் “எவ்வளோ ஸ்மார்ட்டா இருந்தாலும் கொஞ்சம் கவனம் சிதறினால் அவ்ளோதான்.கொஞ்சம் பெப்பே பேன்னு வாறவன் இங்க தலகறங்கி நிப்பான்” என.

  எங்களுடன் வர வேண்டிய மூன்றாம் நபர் பிரபுல் பாட்டிலை நாங்கள் லண்டன் வந்தபின்பும் காணவேயில்லை. இரு இந்தியர்களிடம் “ஸீ மேனா” எனக்கேட்டேன் “ஆம்” என்றனர். ஆனால் அவர்கள் பிரபுல் பாட்டில் இல்லை.

    ஜிப்ரேல்டர் செல்லும் விமானத்தில் எனதருகில் வந்தமர்ந்தவரிடம் பெயர் என்ன என கேட்டபோது பிரபுல் பாட்டில் என்றார். மும்பை – லண்டன் விமானத்தில் எனக்கு அடுத்த வரிசையிலும்,ரைமுண்டோவிற்கு முன்னாலும் அமர்ந்திருந்தார்.

    மூன்று மணிநேர பயணத்தில் ஜிப்றேல்டரில் இறங்கினோம். இரு பக்கமும் கடல் நடுவே விமான ஓடு தளம் மறுபுறம் ஸ்பெயின். விமானம் இறங்கும்போது மட்டும் இரும்பு கதவால் மூடப்படுகிறது  ஓடுதளம்.பின்னர் இரும்பு கதவுகளை திறந்து பாதசாரிகள்,மற்றும் சைக்கிளில் செல்பவர்கள் ஓடுதளத்தில் வரையப்பட்ட இரு கோடுகளுக்குள் ஒரு புறமிருந்து,மறுபுறம் செல்ல இங்கே அனுமதிப்பது விந்தையாக இருந்தது.

   நாங்கள் வந்திறங்கிய மதிய வேளையில் அந்த ஒரு விமானம் மட்டுமே வந்தது. ஜிப்ரேல்டர் விமான நிலையத்தில் மிக எளிதாக குடியுரிமை சோதனையை முடித்துவிட்டு வெளியே வந்தோம். வாயிலில் எங்கள் முகவர் பெயர்களை எழுதிய காகிதத்துடன் நின்றுகொண்டிருந்தார். வெளியில் டிரைவர் நிற்கிறார் உங்களை ஹோட்டலுக்கு அழைத்து செல்வார் என்றார்.

ஜிப்ரால்ட்டர் ராக் 


   ஐந்தே நிமிடத்தில் ஹோட்டல் ஹாலிடே இன்னில்  நுழைந்தோம்.காற்றில் லேசான குளிர் இருந்தது. வெதுவெதுப்பான நீரில் குளித்துவிட்டு குளிருக்கான வெப்ப ஆடைகளை அணிந்துவிட்டு வெளியே வந்தேன். நல்ல பசி மதிய உணவு நேரம் மூன்று மணிக்கே முடிந்திருந்தது.ஆறரைக்கு டின்னர் தொடங்கும் என்றாள் பணிப்பெண்.




  ஹோட்டலிலிருந்து வெளியே வந்ததும் கிறிஸ்தவ தேவாலயம் இருந்தது.உள்ளே சென்று ஐந்து நிமிடம் அங்கிருந்த அமைதியை கவனித்துவிட்டு சாலையில் நடந்தேன்.நீண்ட தூரம் நடந்து துறைமுக பகுதியை அடைந்தேன்.

    சாலையில் வாகனங்களும்,மனிதர்களும் குறைவாக இருந்தனர்.பழமையான கட்டிடங்களை அப்படியே பராமரிக்கிறார்கள்.நடந்து களைத்தபின் அறைக்கு திரும்பி வந்தேன்.எந்த ஊருக்கு போனாலும் அங்கே மீண்டுமொருமுறை வரும் வாய்ப்பு உறுதி கிடையாது அதனால் கிடைக்கும் நேரத்தில் முடிந்தவரை சுற்றிபார்க்க முயல்வேன்.

  என்னுடன் வந்த ரைமுண்டோவும்,பாட்டிலும் இரவுணவுக்கு தயாராக இருந்தனர். கோழி குழம்பும் சாலடும்,ரொட்டியும் சோறும் சாப்பிட்டோம்.வேறொரு நிறுவனத்தை சார்ந்த சௌகான் அமர்ந்து மதுவருந்திகொண்டிருந்தார். இப்போதைக்கு தகவல் ஏதும் இல்லை நாளை காலை உங்கள் முகவர் கப்பலுக்கு செல்லும் நேரத்தை சொல்வதாக வரவேற்ப்பரையில் இருந்த பெண் சொன்னாள்.


  இரு இரவுகள் சரியான தூக்கமில்லதாதல் அறைக்கு வந்து தொழுதுவிட்டு படுத்துவிட்டேன்.

02 பிப்ரவரி 24

நாஞ்சில் ஹமீது.

sunitashahul@gmail.com

Saturday, 18 May 2024

Das Island (தாஸ் தீவு)



                         சில தீவுகள் எங்கே இருக்கிறது என்பதே பலருக்கும் தெரிவதில்லை. இந்தியாவின் லட்ச தீவு,மற்றும் அந்தமான் நிகோபார் தீவுகள்  பலரும் அறியாததே.

     தாஸ் தீவு ஐக்கிய அரபு எமிரேட்ஸ் இன் அபுதாபியிலிருந்து நூறு மைல் தொலைவில் உள்ளது. மிக சிறிய தீவு. 2.4 கிலோமீட்டர் நீளமும்,1.21 கிலோமீட்டர் அகலமும் கொண்ட செவ்வக வடிவத் தீவு. கத்தார் நாடு மிக அருகில் உள்ளது.

  பின்னர் கற்களை நிரப்பி தீவை விரிவாக்கியுள்ளனர். இங்கே எண்ணெய்,எல் பி ஜி,எல் என் ஜி துறைமுகமும், எண்ணெய் உற்பத்தி (oil rig ) மையமும் இங்குள்ளது.கரையிலிருந்து தூரத்தில் இருப்பதால் மிக பாதுகாப்பானது. இங்கிருந்து L P G, L N G,Crude oil உலகெங்கும் ஏற்றுமதியாகிறது.

   ஆமைகள் இன பெருக்கத்துக்காக நிறைய வருகின்றன. கடல்  பறவைகளும் அதிகமாக இங்கு வந்து இனபெருக்கம் செய்வதாக தகவல்கள் சொல்கிறது. இங்கு துறைமுகம் அமைத்தபிறகும். பறவைகள் மற்றும் ஆமைகள் வருவதில் பாதிப்பு ஏதும் ஏற்படவில்லை. முத்து குளிப்பர்ப்பவர்களும்,மீன் பிடிப்பவர்களும் இங்கு எண்ணெய் உற்பத்தி மையம் துவங்குவதற்கு முன் இந்த தீவை ஓய்வெடுக்க பயன்படுத்தியுள்ளனர்.

   நாங்கள் இங்கே மே மாதம் எல் என் ஜி டெர்மினலில் சரக்கு நிறைப்பதற்காக வந்தோம். கப்பல் (05 may 2024) சனிக்கிழமை  இரவு எட்டு மணிக்கு துறைமுகத்தில் கட்டப்பட்டது.

   குழாய் பொருத்த வந்த குழுவில் அருப்புகோட்டையை சார்ந்த சரவணன் என ஒருவர் இருந்தார். ஆறு ஆண்டுகளாக இங்கே பணிபுரிவதாக சொன்னார்.தற்போது பதினான்கு நாட்கள் பணியும்,பதினான்கு விடுமுறையும் என்ற சுழற்சியில் இருக்கிறார். உள்ளூர் பணியாளர்களுக்கு பதினான்கு நாள் வேலை பத்து ஓய்வு எனும் சுழற்சி உள்ளது.

   கொஞ்சம் அடர்ந்து வளர்ந்த மரங்களும்,  எண்ணெய், மற்றும் திரவ வாயு வைக்கும் தொட்டிகளும்,அலுவலக கட்டிடங்கள்,பள்ளிவாசல்,தங்குமிட கட்டிடங்களுடன் ஒரு சிறிய விமான நிலையமும் உள்ளது.

 தொழிற்சாலை பகுதி என்பதால் சுற்றுலாவுக்கோ,கேளிக்கைகள் என ஏதும் இங்கே இல்லை. கடுமையான பாதுகாப்பு விதிகள் பின்பற்றப்படுகிறது.

 நான் இங்கே முதல் முறையாக வருகிறேன்.குழாய் பொருத்தும் குழுவில் ஒரு அரேபிய பெண்ணும் இருந்தாள். பெண்களும் இதுபோன்ற பணிகளுக்கு வந்திருப்பது ஆச்சரியம்தான். ஏழாம் தேதி மாலை சரக்கு (142300 ton)சரக்கு நிரப்பியது முடிந்து இரவில் இங்கிருந்து புறப்பட்டோம் இந்தியாவின் சூரத் அருகிலுள்ள ஹசிராவை நோக்கி.



நாஞ்சில் ஹமீது,

12 may 2024.

நீண்ட பயணம்


 

            கப்பலில் எப்போதும் நீண்ட பயணம்தான்.2008 ஆம் ஆண்டு நான் இருந்த ஐஜின் எனும் கப்பல் சிங்கபூரிலிருந்து- சிலியின் சாண்டியாகோவுக்கு கார்களை ஏற்றிக்கொண்டு 20knot வேகத்தில் (1knot=1.85km)இருபத்தியாறு நாட்கள் பயணித்து சிலியை அடைந்தது. அப்போது அதுதான் எனது நீண்ட பயணமாக இருந்தது.

  2013 இல் பிக்சஸ் லீடரில் ஜப்பானின் டோயோகாசியிலிருந்து பனாமா கால்வாயை கடந்து அமெரிக்காவின் நியூயார்க் செல்ல முப்பது நாட்களுக்கு மேல் எடுத்துக்கொண்டது.

   2007 ஆம் ஆண்டு  ஸ்டேயிட்ஸ் வென்சர் எனும் கப்பலில் இருந்தபோது அதன் நீண்ட பயணம் மேற்கு மலேசியாவின் கோட்ட கினா பாலுவிலிருந்து தாய்லாந்தின் லாம் சா பானுக்கு முப்பத்தியாறு மணிநேரம். மலேசியா,சிங்கப்பூர்,இந்தோனேசியா,தாய்லாந்து மட்டுமே செல்லும் கப்பல் அது.ஏறக்குறைய தினமும் துறைமுகம் தான். அதிகாலை இரண்டு மணிக்கு கோட்ட கினா பாலு, காலை எட்டு மணிக்கு லௌபான் என இரு மலேசிய துறைமுகங்களுகப்பின் மதியம் இரண்டு மணிக்கு புருநேவின் மௌரா துறைமுகம். ஒரே நாளில் மூன்று துறைமுகம் என்பது கப்பல் காரனின் ரத்தத்தை உறிஞ்சிவிடும்.

  2016 ஆண்டு முதல் எல் பி ஜி கப்பலில் இணைந்தேன். முதல் இரண்டு ஆண்டுகள் மத்திய கிழக்கு நாடுகளின் அபுதாபி,கத்தார்,சவூதி,குவைத் நாடுகளில் சரக்கை ஏற்றி கிழக்கு நாடுகளான ஜப்பான்,சீனாவில் இறக்கவேண்டும்.போய் வர ஒரு மாதம் ஆகும். உணவும்,எண்ணையும்,உதிரி பாகங்களும் ஏற்றி,தேவைபட்டால் பணியாள் மாற்றமும் செய்ய கப்பலை பன்னிரண்டு மணிநேரம் சிங்கையில் நிறுத்துவோம்.

   2019 ஆண்டுமுதல் அமெரிக்காவில் சரக்கை நிரப்பி ஆசியாவின் ஜப்பான்,சீனா,வியத்னாம் நாடுகளுக்கு வர 16knot வேகத்தில் ஒரு மாதம் வரை ஆகும். தென்னாப்பிரிக்காவை சுற்றி வருவதென்றால் நாற்பது நாட்களுக்கு மேலாகும்.

  சன்னிஜாய் நாட்குறிப்புகள் எழுதிய நாட்களில் சன்னிஜாய் இந்தியாவின் கல்கொத்தாவிலிருந்து  கொச்சி,சுயஸ் கால்வாய்,மத்தியதரைக்கடல் ஜிப்ரேல்டர் முனை தாண்டி அட்லாண்டிக் வழியாக அமெரிக்காவை அடைந்தபோதும் முப்பத்தி மூன்று நாட்களே ஆனது. மீண்டும் அவ்வழியாக இந்தோனேசியா என இருமுறை உலகை வட்டமடித்தோம். அது நீண்ட பயணமாக இருந்தாலும் சவ்வு முட்டாய் போல இழுவையில்லை.

 தற்போது இருக்கும் எல் என் ஜி அலையன்சில் கடந்த மார்ச் மாதம் 26ஆம் தேதி கொரியாவில் சரக்கை இறக்கிவிட்டு புறப்பட்டோம். சிங்கப்பூர் நோக்கி மிக குறைந்த வேகத்தில் செல்லுங்கள் என கப்பல் நிறுவனம் சொன்னது. இந்த கப்பலில் இஞ்சின் கிடையாது. 11,000kv ஜெனரேட்டர்கள் மூன்றும்,சிறிய ஜெனரேட்டர் ஒன்றும் உள்ளது.  அதிலிருந்து வரும் மின்சாரத்திலிருந்து மோட்டார் ஒன்றை சுற்ற வைத்து அது ப்ரோப்பல்லருடன் இணைக்கப்பட்டிருக்கும்.(ஆல்டேர்னட்டர்).

  இந்த ஜெனரேட்டர்கள் டீசலில் இயங்கும் அல்லது எல் என் ஜி வாயுவில் இயங்கும்.ஒரேயொரு ஜெனரெட்டரை இயக்கி மெதுவாக செல்ல அறிவுறுத்தப்பட்டதால் கப்பல் ஐந்து நாட் வேகத்தில் சிங்கப்பூரை வந்தடைய பதினாறு நாட்களை எடுத்துகொண்டது. (ஒரு நாள் ஜெனரேட்டர் இயங்க 25 டன் டீசல் வேண்டும்) 

  சிங்கையில் ஒரு நாள் நிறுத்தி 2200டன் டீசல் நிரப்பி,உணவு,உதிரி பாகம் வாங்கி,பணியாள் மாற்றமும் நடைபெற்றது. அப்போதுதான் தகவல் வந்தது மிக மெதுவாக துபாயை நோக்கி செல்லுங்கள் மே மாதம் ஆறாம் தேதி அங்கு போய் சேர்ந்தால் போதுமென.கப்பல் நிற்கிறதா,நகர்கிறதா என தெரிவதேயில்லை. கடலம்மா சாந்தமாக இருந்ததால் காலியாக இருந்த இந்த பெருங்கலம் ஆடவே இல்லை. கப்பல் ஓடிக்கொண்டிருக்கும்போது ஒரு அதிர்வு இருந்துகொண்டே இருக்கும்  அவையேதும் இல்லாமல் மிக சாந்தமாக காளை வண்டி செல்வது போல் போய்கொண்டே இருந்தோம். இலங்கையை சுற்றி எங்களூரின் கன்னியாகுமரி, மணக்குடி,சொத்தவிளை முட்டம், என் கிராமமான மணவாளக்குறிச்சி,குளச்சல், தேங்காய்பட்டணம் கேரளா,மங்களூர்,மும்பை குஜராத் வழியாக அமீரகத்தின் தாஸ் தீவுக்கு மே மாதம் ஐந்தாம் தேதி வந்து சேர்ந்தோம். கப்பலின் கடிகாரமும் வாரம் ஒரு மணிநேரம் என ஐந்து வாரமாக பின்னோக்கி என்றதில் தெரியவேயில்லை.வழக்கமாக துபாயிலிருந்து கொரியா செல்ல பதினாறு நாட்கள் எடுத்துகொள்ளும் .

    என் வாழ்வில் இதுதான் மிக நீண்ட கப்பல் பயணம் நாற்பது நாட்கள்.

Das Island 


  நாஞ்சில் ஹமீது,

08-may-2024

sunitashahul@gmail.com

Tuesday, 9 April 2024

நோன்பு காலம்

      
பெருநாள் பிறையை தேடியபோது


       இம்முறை கப்பலில் எட்டுபேர் இஸ்லாமியர்கள் இருந்தோம். ரமலான் மாதம் துவங்கும் முன்பே மோட்டார் மேன்  இம்ரான் கேட்டார். “நோன்பு வைக்கிறாயா” என. “பார்க்கலாம்” என்றேன்.

   கப்பலில் நோன்பு வைப்பது கொஞ்சம் சிரமம்தான். கப்பல் காரன் டைரி வாசித்தவர்களுக்கு தெரியும் இங்குள்ள கடுமையான பணி சூழல், உள்ளாடை,காலுறை வரை பிழிந்து வியர்வையை எடுக்குமளவுக்கு  கொடுமையான வெப்பம் போன்றவை காரணங்கள்.

   இஸ்லாமியராக இருந்தால் ரமலான் மாதத்தில் நோன்பு இருப்பது கடமை. குழந்தைகள்,வயோதிகர்கள்,நோயாளிகள்,கர்ப்பிணிகள் மற்றும் பாலூட்டும் தாய்மார்கள் தவிர அனைவருக்கும் நோன்பு நோற்ப்பது கட்டாய கடமையாகும்.பெண்கள் மாதவிடாய் நாட்களில் நோன்பு வைக்க வேண்டாம்.

   ஐந்து,ஆறு வயதாக இருக்கும்போதே குழந்தைகள் நோன்பு வைத்து பழகுவார்கள் முதலில் ஒரு நோன்பை கஷ்டப்பட்டு பூர்த்தி செய்வார்கள்.(மாலை மூன்று மணியிலிருந்தே நோம்பு எப்ப முடியும்,எப்ப முடியம் எனக்கேட்டு “கொஞ்சம் தண்ணி குடிக்கட்டா உம்மா” கேட்டு தவிப்பார்கள்)

  பின்பு பள்ளி விடுமுறை நாள்களில் நோன்பு வைத்து பழகுவார்கள் எட்டு வயதிற்கு மேல் முப்பது நாட்கள் நோன்பிருக்கும் உடல்,மன வலிமையை பெற்று விடுவார்கள்.எனது மகன்கள் இருவரும் எட்டு வயதிலிருந்து எல்லா நோன்புகளையும் வைத்து விடுகிறார்கள்.
  
   பத்து வயதிற்குள்  இருக்கும்  சிறுவர்கள் உள்ள வீட்டில் உள்ள பெண்கள்  மாதவிடாய் நாட்களிலும் நோன்பு போலவே இருக்கும் சூழல்தான். பெரும்பான்மை இசுலாமியர் மட்டுமே இருக்கும் சில நிறுவனங்களில் உள்ள முஸ்லிம் அல்லாத மாற்று மத சகோதரர்கள் நோன்பாளியின் முன் உண்ணவதையும்,பருகுவதையும்  தவிர்க்கும் பொருட்டு பகலில் அவர்களும் நோன்பிருப்பதை கண்டிருக்கிறேன். (என் மாமா கடையில் வேலைபார்த்த ராமையா)

  2007 ஆம் ஆண்டு டெக்கில் பயிற்சி பிட்டராக இருந்தபோது நோன்பு வைத்தேன்.கொஞ்சம் கடுமையான சூழல்தான் சமாளித்தேன்.2013 ஆண்டு ஹார்மொனி ஏஸ் எனும் கப்பலில் இருந்தபோது கப்பல் தென்னமெரிக்கா,மெக்ஸிகோவில் ஓடிக்கொண்டிருந்தது. அப்போது அங்கே நீண்ட பகல் பொழுது அதிகாலை இரண்டு மணிக்கே சகர் உண்டுவிட வேண்டும். நோன்பு திறக்கும் நேரமும் இரவு எட்டரை மணிக்கு மேல். நோன்பு இறுதி நாட்களில் முடியாமல் கடைசி நான்கு நோன்புகளை விட்டு விட்டேன்.அன்று ஒன்று முடிவு செய்தேன் கப்பலில் இருக்கும்போது நோன்பு வைப்பதில்லை என.

    2020 ஆண்டில் பணியில் இணைந்த கப்பல் சன்னி ஜாய் (கப்பல் காரன் டைரி ஆயிரம் பக்கங்கள் எழுதிய கப்பல்) நோன்பு காலம் துவங்கும் முன்பே   அப்போது என்னுடன் இருந்த இம்ரான் கேட்டார். “நோன்பு வெக்குந்துண்டோ” என.

  அப்போது இருந்த பணி சூழல் மற்றும் எனது உயரதிகாரிகளான ,முதன்மை இஞ்சினியர் ஆல்பர்ட் மற்றும் இரண்டாம் இஞ்சினியர் சுப்பு சாப் தன்மையான மனிதர்கள் அதனால் அப்போது முப்பது நோன்புகள் அதிக சிரமமின்றி பூர்த்தி செய்தேன்.

   2022 ஆண்டு பதினைந்தாவது நோன்பில் கப்பல் ஏறினேன் (சிங்கப்பூர் எனர்ஜி) கடுமையான வெப்பம் அதனால் ஏழு மாதம் பணி முடிந்து வீட்டுக்கு சென்றபின் மீதமுள்ள நோன்புகளை பூர்த்தி செய்தேன்.

    இம்முறை நோன்பு துவங்கும்முன் யோசித்து கொண்டே இருந்தேன் . ஒருநாள் மக்ரிப் தொழுகைக்குப்பின் முடிவு செய்தேன் நோன்பிருப்பது என. மார்ச் பன்னிரெண்டாம் தேதி நோன்பு துவங்கிய நாளில் இந்தோனேசியாவில் துறைமுகத்தில் இருந்தோம். சுட்டெரிக்கும் வெயில் காரணமாக மிக கடினமாகி போனது.
மீண்டும் இரு தினங்களுக்குப்பின் சிங்கப்பூரில் ஒரு முழு நாள் கப்பலை நிறுத்தி உதிரி பாகங்கள்,உணவு பொருட்கள் மற்றும் எரி எண்ணெய் நிரப்பினோம்   அன்றும் மிக கடினமாகி போனது வெப்பம் கராணமாக.

  அங்கிருந்து கப்பல் கொரியாவுக்கு  சென்றது சிங்கையிலிருந்து புறப்பட்ட மூன்று தினங்களுக்குப்பின் சூடு குறையத்தொடங்கி பத்தாவது நாள் கொரியாவை அடையும்போது குளிராக இருந்தது. அறையில் வெப்ப இயந்திரத்தை இயக்கி 21 பாகையில் வைத்திருந்தேன். நோன்பு வைத்திருப்பதே தெரியவைல்லை. 

  கொரியாவிலிருந்து  புறப்பட்டபோது கப்பலுக்கு சரக்கு ஏதும் கிடைக்கவில்லை அதனால் மிக மெதுவாக கப்பலை கொண்டுவந்தால் போதும் என கப்பல் நிறுவனம் சொன்னது. அதனால் மீண்டும் சிங்கையை நோக்கி பயணிக்கையில் பதினாறு நாட்களை எடுத்துக்கொள்ளும்.
     வெயில் நாட்கள் மீண்டும் தொடங்கியது எனினும் பணிமனையிலும்,அதிக கடினமில்லாத வேலை இருந்ததால் கடினமான நாட்களை கடந்து நோன்பு நாட்களை முழுமையாக பூர்த்தி செய்ய முடிந்தது(இறைவனுக்கு நன்றி). (சவூதிஅரேபியாவில் நோன்பு முப்பது நிறைவடைந்து இன்று பெருநாள் கொண்டாடபடுகிறது.)29வது நாள் நோன்பு திறந்து இஷா தொழுகைக்குப்பின் இந்தியாவின் கேரளாவின் பொன்னாணியில் பிறை பார்த்த தகவல் உறுதியானபின்,மலேசியாவிலும் பெருநாள் உறுதியானது.
நோன்பு திறக்கும் வேளை 



   நாங்கள் இங்கே மூன்று மலேசிய முஸ்லீம் மற்றும் நால்வர் இந்தியர்கள்  இன்று பெருநாள் கொண்டாட முடிவு செய்தோம்.

   காலையில் போசன் ஜாவித் சேமியா,பால் சேர்த்து இனிப்பு(சேவ்)ஒன்று செய்தார்.மெஸ் மேன் நவ்ரோஸ் நெய் சோறும்,மட்டன் கறியும்,சிக்கன் குறுமாவும் செய்கிறார்.
  நான் காலையில் சற்று தாமதமாக விழித்தேன். காலை பஜர் தொழுகைக்குப்பின் குளித்து நான்கு பேரீச்சம்பழம் உண்டபின்  ஊரிலிருந்து கொண்டுவந்த புதிய டி சர்ட்,வேஷ்டி அணிந்து இரண்டு ரக்காத் சுன்னத் தொழுதுவிட்டு  உணவு கூடம் சென்று நண்பர்களுக்கு வாழ்த்துகளை சொன்னபின் இரண்டு முட்டை மட்டும் சாப்பிட்டு வந்தேன்.


    இன்று வழக்கமான பணி நாள் தான். எனினும் எனக்கு பணியேதும் இல்லை.காலை டெக்கில் சென்று ரவுண்ட்ஸ் முடித்துவிட்டு வந்தேன். சுனிதாவிற்கும்,உறவினர்களுக்கும் போனில் அழைத்து வாழ்த்துக்களை சொன்னேன்.
  மாலையில் கப்பலில் பார்ட்டி இருக்கிறது.
நாஞ்சில் ஹமீது,
10 april 2024.