Tuesday, 29 October 2024

கோலாலம்பூரில்

  

            விடுதி வரேவேற்பறையில் இருந்த தமிழர் ராஜுவிடம். கோலாலம்பூர் செல்லும் வழியை கேட்டேன். நாற்ப்பத்தியைந்து நிமிட பயண தூரம் என்றார். 

  விடுதியறைக்கு அருகிலுள்ள முக்கிய சாலையிலிருந்து செரம்பான் வரை பேருந்தில் சென்று அங்கிருந்து வேறு பேருந்து மாறி kl(கோலாலம்பூர்) செல்லலாம் என்றார்.

பயணிகள் இல்லாத பேருந்து.


    ஐந்து நிமிடத்தில் பேருந்து வந்தது. seremban எனச்சொல்லி டிக்கெட் கேட்டேன் வயதான ஓட்டுனர் உனக்கு எங்கே செல்ல வேண்டும் என ஆங்கிலத்தில் கேட்டார். kl என்றதும் செரம்பனிலிருந்து பஸ்ஸா,ரயிலா? எனக்கேட்டார்.

  எது பெஸ்ட்?எனக்கேட்டேன்.

 நான் உன்னை ரயில் நிலையத்தில் இறக்கிவிடுகிறேன் என்றார்.

 குளிரூட்டப்பட்ட சொகுசு பேருந்தில் ஜீன்ஸ் அணிந்த மலேசிய முஸ்லிம் பாட்டி யூடுபில் ஹிந்தி பாடல்களை பார்த்துக்கொண்டிருந்தார். வேறு பயணிகளே இல்லை. மூன்றரை ரிங்கிட் கட்டணம்.ஒரு மணிநேரத்தில் செரம்பான் ரயில் நிலையம்.

ரயிலில் 


  மிகக்குறைந்த பயணிகளே இருந்த நடைமேடையிலிருந்து ரயிலேறினேன். ஒன்பதரை ரிங்ரிட் பயண சீட்டு கோலாலம்பூர் சென்ட்ரலுக்கு ஐந்து நிமிடத்தில் ரயில் வந்தது. tiroi,labu, batang benar என ஒன்பது நிலையங்களில் நின்று kl சென்ட்ரலை நான் அடையும்போது மணி இரவு பதினொன்றாகி இருந்தது. 

    2006,2013 ஆண்டுகளில் இந்த கோலாலம்பூர் சென்ட்ரல் ரயில் நிலையம் வந்துள்ளேன். விமான நிலையத்துக்கு நிகரானது கோலாலம்பூர் சென்ட்ரல் ரயில்நிலையம். அங்கிருந்து டாக்சியில் இருபத்தியைந்து நிமிடத்தில் செய்யதலி அண்ணனின் வீட்டை சென்று சேர்ந்தேன். இரவு ஒளியில் ஜொலித்துக்கொண்டிருந்த இரட்டை கோபுரத்தை மொபைலில் படம் பிடிக்க முயற்சித்தேன்.

Kl Sentral 



  Twin Palms குடியிருப்பு வாயிலில் இருந்த பாதுகாவலர் நான் செல்லும் வீட்டின் எண்ணை கேட்டு அவர்களிடம் தொலைபேசியில் உறுதிசெய்தபின் என் காரை உள்ளே செல்ல அனுமதித்தார்.விடுதியிலிருந்து புறப்பட்டது முதல் ஹமீமா மைனியிடம் சொல்லிக்கொண்டே இருந்தேன். எங்கே வந்து கொண்டிருக்கிறேன் என.

  அவரது வீட்டு வாசலில் கார் நின்றபோது அந்த இரவிலும் மகன் சுபினுடன்,மைனி சாலையில் வந்து வரவேற்று அழைத்துச்சென்றார். “மைனி ரொம்ப லேட்டா வாறேனா? 

“நீங்க வீட்டுக்கு வாறது எவ்ளோ சந்தோசம் எங்களுக்கு” என்றார். மருமகள்,மகள்,மகளின் கணவர் சையதலி அண்ணன் தூங்க சென்றிருந்தனர். மகன் சுபின் என்னை அமர சொல்லிவிட்டு குடிக்க தண்ணீர் தந்தார்.

 சுபினின் மனைவி ஆயிஷா மாடியிலிருந்து இறங்கி வந்தார். ஐந்து நிமிடத்தில் அண்ணனும் வந்தார். நீண்ட இடைவெளிக்குப்பின் சந்திக்கிறோம். “தம்பீ அஸ்ஸலாமு அலைக்கும்” என இறுக கட்டியணைத்தார்.

 “முதல்ல சாப்பிடு” என்றார். எனக்கு நல்ல பசி கப்பலில் மதியம் பன்னிரெண்டு மணிக்கு சாப்பிட்டபின் மாலையில் படகு,கார்,பேருந்து,ரயில் மீண்டும் கார் என ஓடிகொண்டே இருந்தேன். விடுதியிலிருந்து அழைக்கும்போது வீட்டுக்கு வர தாமதமாகிவிடும் என்றபோது இரவு இங்கே தங்கி விட்டு காலையில் செல்லலாம் வாங்க என்றார் ஹமீமா மைனி.

    ஆயிஷா எனக்கு உணவு பரிமாறினாள். இடியப்பம் போன்ற மலேசிய உணவு, ஆப்பம்,கிழங்கு,மட்டன் கறி,பொரித்த கோழி,அவியல்,அப்பளம்,வெள்ளை சாதம் என ஒரு ஆளுக்காக நிறைய உணவுகள் தயாரித்து வைத்திருந்தனர். வீட்டில் இருக்கும் பிலிப்பினோ பணிப்பெண்ணுக்கும் கொஞ்சம் நீண்ட இரவாகிபோனது.

  உணவுக்குப்பின் அமர்ந்து பழைய காந்தாரிவிளை கதைகளை பேச ஆரம்பித்தோம். சையதலி அண்ணன் “பொறு சாய்மாவும் இந்த கதைகளை கேட்கட்டும்” எனச்சொல்லி மகளை போனில் அழைத்தார். நல்ல தூக்கத்திலிருந்த சாய்மா வந்தமர்ந்து எங்கள் பழைய கதைகளை கேட்டு சிரிக்கத்தொடங்கினாள்.

  முப்பதாண்டுக்கு முந்தைய நினைவுகள்.பத்தாம் வகுப்பில் தோல்வியடைந்து, மீண்டும் பரீட்சை எழுதி மீண்டும் தோற்று உள்ளூரில் வலை கம்பனியில் பணியில் சேர்ந்தபோது. சையதலி அண்ணன் வாப்பாவிடம் பேசி “தம்பி இனி ஒழுங்கா படிப்பான்”என்றபோது. “மக்ளே நீ உன் வேலைய பாரு இவன படிக்க வெக்க பைசாய சின்னவிள கடல்ல போடுவேன்” என வாப்பா சொன்னார்.

   வலை கம்பனியில் வாங்கிய முதல் மாத சம்பளம் இருநூற்றி அறுபத்தியைந்து ரூபாயுடன் நாகர்கோவில் சகாயமாதா டூட்டோரியலில் சையதலி அண்ணன் என்னை சேர்த்து விட்டார். பின்னர் பஸ்சுக்கு தினமும் ஐந்து ரூபாய் வாப்பா தர ஆரம்பித்தார்.

  பத்தாம் வகுப்பில் தோல்வியடைந்த மூன்று பாடங்களும் பாஸாகி இப்போது உங்கள் முன்னால் இருப்பதற்கு இவர்தான் காரணம் என சையதலி அண்ணனின் மகள்,மகன்,மருமகளிடம் சொன்னேன்.

 நள்ளிரவு ஒன்றரை மணிக்கு பிள்ளைகள் தூங்க சென்றார்கள். நானும் அண்ணனும் ஒரு சுலைமானி குடித்துவிட்டு நடைக்கு சென்றோம்.குடியிருப்பின் காவலர்கள் அப்போதும் ரோந்து வந்துகொண்டிருந்தனர். சையதலி அண்ணன் வீட்டில் நின்றிருந்த டெஸ்லா காரை காண்பித்து “தம்பி ஒரு ரவுண்டு போயிட்டு வா”என்றார்.

 



   காலையில் ஓட்டலாம் என மறுத்தேன்.அவர் ஊரில் பூக்கடை கல்லூரியில் பணியில் இருக்கும்போது இரவு தாமதமானால் ஹாஸ்டலில் தங்கி பயிலும் மாணவர்களின் பைக்கில் வீட்டுக்கு வருவார். ஒருநாள் அதிகாலை என்னை எழுப்பி “தம்பி இதுல 110 கிமீ வேகத்தில் ஒரு ரவுண்டு போயிற்று வா” என்றார்.அது சுசூகி சோகன் பைக். இப்போதும் அப்படியேதான் இருக்கிறார் அண்ணன்.

  அதிகாலை இரண்டு மணிக்கு தூங்க சென்றேன். வீட்டின் நில அமைப்பு வியப்பானது. தரை தளத்தில் இருக்கும் வாயில் கதவு.அடுமனையும், உணவு கூடமும் இருக்கும் பின்புறம் முதல் மாடியாகயுள்ளது அதன் கீழ் பகுதியில் படியிறங்கி சென்றால் அங்கே உடற்பயிற்சி கூடத்தை ஒட்டிய அறையில் படுத்துக்கொண்டேன். அந்த அறை பின்புற தரைதளம்.அந்த குடியிருப்பில் மொத்தம் நான்கு வீடுகளுக்கு மட்டுமே இந்த நில அமைப்பு உள்ளது.

   காலை ஏழு மணிக்குத்தான் எழுந்தேன். தொழுகை முடித்து வந்தபோது பணிப்பெண் தென்னிந்திய சுவையில் சூடாக சாயா தந்தார். கண்ணாடி கதவை திறந்து அமர்ந்தேன்.அண்ணனும் நானும் காலை நடைக்கு சென்றோம். வீட்டின் பின்புறம் சென்றபோது நான் படுத்திருந்த அறை தரைப்பகுதியிலும்,அந்த வீட்டின் முன் பகுதியில் துவங்கும் தரைத்தளம் பின் பகுதியில் மாடியாகவும் இருக்கும் விந்தையான அமைப்பை கண்டேன்.



    சாய்மாவின் கணவருடன் டெஸ்லாவை ஓட்டிப்பார்த்தேன்.பிள்ளைகள் தயாராகி தங்களுக்குரிய கார்களில் பணிக்கு சென்றுவிட்டனர்.அண்ணன் இன்று கொஞ்சம் தாமதமாக செல்வதாக சொன்னார். அவர் பணிபுரியும் நிறுவனத்தில் அவர்தான் தலைவர் (CEO) அவருக்கு ஒரு பாதுகாவலரும்,ஓட்டுனரும் காலையிலேயே வந்து விட்டனர்.



   மைனி காலை உணவாக,புட்டு,பயறு,பப்படம் மற்றும் தோசை,சட்னி,சாம்பார் செய்திருந்தார். சந்தோசத்தின் வெளிப்பாடு ஒரு மனிதனுக்காக இவ்வளவு உணவு வகைகள். மைனி என்னை ஷாப்பிங் மாலுக்கு அழைத்து சென்று என் மகன்களுக்கு சாக்லேட்கள் வாங்கி தந்தார்.



ஓட்டுநர் பாலா 


  அவரது காரிலேயே என்னை விடுதியறைக்கு அனுப்பிவைத்தார்.ஓட்டுனர் பாலா மலேசிய தமிழர்.ஒரு மணி நேர பயணத்தில் விடுதியை அடைந்தேன். மதிய உணவை ரைமுண்டோ,பாட்டீலுடன் சாப்பிட்டேன். 

  ஜெர்ரி இரண்டு மணிக்கு புறப்பட்டு சென்றார். எங்களை அழைத்து செல்ல நான்கு மணிக்கு ஓட்டுனர் வந்தார். பாட்டீல் கிளம்பிவர சற்று தாமதமாகவே நான்குகரைக்கு புறப்பட்டோம். ஏழரை மணிக்கு எங்கள் மூவருக்கும் மும்பைக்கு விமானம். ஐந்தரை மணிக்குவிமான நிலையம் வந்து சேர்ந்தோம்.

நாஞ்சில் ஹமீது.

29 –10-2024.

 இந்த பதிவு சற்று தாமதமாகிவிட்டது . இதன் தொடர்ச்சி நாளையே பதிவிடுவேன்.

இரட்டை கோபுரம்


விடுதியறையிலிருந்து 







Wednesday, 9 October 2024

விடை தந்த அலையன்ஸ்

  


இந்த கப்பலில் ஞாயிறுகளில் நான் காலை கூடத்துக்கு இயந்திர அறைக்கு செல்வதில்லை. இயந்திர அறையில் காலை பத்து மணிவரை பணி.டெக்கில் குடியிருப்பை சுத்தபடுத்தும் பணியை செய்வார்கள். 

     எனக்கு மோட்டார் அறை மற்றும் கம்ப்ரசர் அறை ரவுண்ட்ஸ் மட்டும் போய் வந்தால் போதும். இன்று காலை கூட்டத்துக்கு இயந்திர அறைக்கு போய் வந்தேன். 

 

காலை கூட்டத்தில் 

   முதன்மை இஞ்சினியர் ஞாயிறுகளில் பிரார்த்தனை நடத்துகிறார்.இங்கிருக்கும் அனைத்து பிலிப்பினோ பணியாளர்களும் கிறிஸ்தவர்கள்  எனவே அவர்கள் கலந்து கொள்கிறார்கள். இரண்டாம் சமையல்காரர் ஜானியைதவிர. 

    ஞாயிறில் வாசித்தும் எழுதியும் நாள் கடந்து போனது. எனது உடைமைகள் அனைத்தயும் அடுக்கி பயண பைகளை தயார் செய்தேன். இப்போது பாக்கிங் செய்வதும் சலிப்பாக இருக்கிறது. ஆவணங்கள் தவிர பத்து கிலோ எடையுள்ள சிறிய பையுடன் பயணிப்பது போல எதிர்காலத்தில் இருந்தால் நன்றாக இருக்கும்.

    திங்கள்கிழமை காலையில் எனக்கு பணியேதும் தரவில்லை. கப்பலில் இருந்து இறங்கும் நாள். காலை ரவுண்ட்ஸ்க்கு சென்றபோது காஸ் இஞ்சினியர் அருண், சோம்ராஜ்,கார்லோ கம்ப்ரசர் அறையில் வெளிக்காற்று வரும் ப்ளோவர் கதவுகள் தானியங்கி முறையில் இயங்காததை ஆடிட்டர் கண்டு சொன்னார். அதை சரி செய்யும் முயற்சியில் இருந்தனர்.

 காற்று அல்லது மின்சாரத்தால் அதை இயக்கம் கருவியில் கோளாறு இருக்கலாம் அதை மட்டும் கழட்டி பாருங்கள் என்றேன். கப்ப்ரசர்  அறையில் தீ விபத்து ஏற்பட்டால் வெளிக்காற்று உள்ளே வராதவாறு காற்று இயந்திரம் தானியங்கி முறையில் நின்றுவிட வேண்டும். அதன் கதவுகள் மூடிகொள்ளும்.

   நைட்ரோஜன் அளவுகளை பதிவு செய்துவிட்டு. காலை தேநீருக்கு சென்றேன். பதினோரு மணிக்கு எங்கள் மாற்று பணியாளர்கள் வருவது உறுதியானது. மும்பையிலிருந்து வரும் மோட்டார் மேன் சந்தோசை அழைத்தேன். ஜெட்டியை நெருங்கி விட்டதாக சொன்னான். சிறிது நேரத்தில் காப்டன் மாற்று பணியாளர்கள் மதியம் மூன்று மணிக்குதான் வருவார்கள் என்றார். இரண்டாம் இஞ்சினியர் வரும் விமானம் பதினோரு மணிக்குத்தான் தரையிறங்கும் என்ற செய்தி வந்தது. நாங்கள் இறங்குவது மாலை ஐந்து மணியாகியது. 

ரை முண்டோவின் கடைசி போகா 


   ரைமுண்டோ மதிய,இரவு உணவுவுகளையும் தயார் செய்திருந்தார்.மதிய உணவுக்குப்பின் தொழுகை முடிந்து படுத்தேன் யெல்லோ பீவர் அட்டை,சி டி சியை பெற்றுச்செல்ல  விகாஸ் அழைத்தான். மீண்டும் அறைக்கு வந்து குட்டி தூக்கம் போட்டு எழுந்தேன்.மணி மூன்றை தாண்டியிருந்தது. மாற்று பணியாளர்கள் வரவில்லை. நான்கு மணிக்குத்தான் அவர்களை அழைத்து வரும் படகு வருவதாக சொன்னார்கள். 

  நீர்மட்டம் (low tide) குறைவாக இருக்கும்போது படகு கரையிலிருந்து கடலுக்கு வர இயலாது அடி முட்டிவிடும். எனவே தாமதம் என்றார்கள். மாற்று பணியாளர்களின் படகு கரையணையும் போது மணி நான்கரை ஆகிவிட்டது. முஹமத் கவுஸ் ஆந்திராவை சார்ந்த காஸ் பிட்டர் என்னை விடுவிக்க வந்தார். 

Reliver onboard 


   இயந்திர அறையில் எனது பணிமனை மற்றும் டெக்கில் தினசரி செய்யும் பணிகளை காண்பித்து கொடுத்தேன். ஆடிட்டர் முன்பு காப்டனாக இருந்த கப்பலில் கவுஸ் பணிபுரிந்துள்ளான். காப்டன் ஆசுதோஷ் “அரே பாடி புல்டர் வந்துட்டான்,ஏதாவது இரும்ப வளைக்கனுமின்னா இவன்ட்ட குடுத்தா போதும்” என்றார்.

   ஆறு மணிக்கு முன்பாகவே எங்களை அழைத்து செல்லும் ஆறு மணிக்கு எல் என் ஜி அலையன்ஸ் எங்களுக்கு விடை தந்தது. தென் ஆப்ரிக்காவின் கேப்டவுனில் இருந்து பிப்ரவரி மாதம் இருபத்தியைந்தாம் தேதி பணியில் இணைந்தேன். இருநூற்றி இருபது நாட்கள். அதிர்டவசமாக கடந்த வாரம் தரையிங்க வாய்ப்பு கிடைத்தது.(மலாக்கா பதிவு பின்னர் வரும்). நீண்ட நாள்களுக்குப்பின் நீரிலிருந்து நிலத்தில் இறங்கும் உற்சாகம்.



 முப்பது நிமிட படகு பயணம். கரையில் முகவர் எங்கள் பாஸ்போர்ட்,லேண்டிங் பெர்மிட்,குடியுரிமை அதிகாரிக்கு கடிதம் ஆகியவற்றை வந்தார். இங்கு சோதனையோ,சரிபார்ப்போ ஏதுமில்லை. கார் நின்றுகொண்டிருந்தது. 



 போர்ட் டிக்ஸன் அரை மணிநேர பயணம்.அங்கே கெஸ்ட் விடுதியில் இரவு தங்கல் மறுநாள் மாலை ஏழரைக்கு எங்களுக்கு விமானம்.பிலிப்பினோ ஜெர்ரிக்கு ஐந்தரைக்கு விமானம்.அவரை அழைத்து செல்ல இரண்டு மணிக்கும்,எங்களுக்கு நான்கு மணிக்கும் வருவதாக  ஓட்டுனர் சொன்னார்.

நாஞ்சில் ஹமீது,

30 செப்டம்பர் 2024

Sunday, 29 September 2024

கடைசி பிரியாணி

   


       சன்னி கிரீன் எனும் கப்பலில் 2017 இல் பணியில் இணைந்தபோது கப்பல் சிங்கப்பூர் கெப்பல் ட்ரை டாக்கில் இருந்தது. நான் காலையில் சென்றேன். நான் விடுவித்த பிட்டர் மாலையில் கிளம்பிச்சென்றார். காலியான இருந்த ஒரு அறையை தந்தார்கள்.

   பத்து நாட்கள் ட்ரைடாக்கில் கடும் பணியாக இருந்தது. கப்பல் சிங்கைவிட்டபின் ஒரு நாள் பிட்டருக்கான அறையைப் போய் பார்த்தேன். உபரி அறையில் நெடுநாட்கள் இருக்க இயலாது. அவரவர்க்கான அறைக்கு போயாக வேண்டும்.

    கப்பலில் இணைந்த முதல் நாள் அறையில் தூங்குவது கடினம். ஊருக்கு செல்பவர் அறையை சுத்தபடுத்தமால் போயிருப்பார். கப்பல் ட்ரைடாக்கில் இருந்ததால் அந்த அறையும் சுத்தமின்றி இருந்தது. நான் சுத்த படுத்த துவங்கினேன். ஒரு மணிநேரத்திற்கு மேல் ஆகியும் குப்பையும் அழுக்கும் வந்துகொண்டே இருந்ததால்  மனதில் வெறுப்பு தட்டி அந்த அறைக்கு நான் போகமாட்டேன் இப்போது இருக்கும் அறையிலேயே இருக்கிறேன் என இரண்டாம் இஞ்சினியரிடம் சொல்லி எனது தொலைபேசி எண்ணை மாற்றிகொள்ளுங்கள் என்றேன்.

  “ஸ்பெயர் கேபின்ல நீ இருக்க முடியாது,மாறித்தான் ஆக வேண்டும்” என்றார்.  

“என்னால முடியாது கேபின கீளீன் பண்ணித்தர சொல்லுங்க” என்றேன்.

மோட்டார் மேன் ராவ் “கெயா பிட்டர் சூத்தியா கந்தா ஆத்மி த்தா” என்றார்.

 மறு வருடம் வேறொரு கப்பலுக்கு போனபோது அறை,குளியல் அறை அனைத்தும் படு சுத்தம். இரண்டாம் இஞ்சினியர் அபிசேக் பானர்ஜியிடம் “ரூம் படு கிளீன்”என்றேன்.

“ரெண்டு மூணு நாளா அவன் கேபின கிளீன் பண்ணிட்டு இருந்தான் என்றார்.”அபிஷேக் பானர்ஜிதான் சன்னி கிரீனிலும் இரண்டாம் இஞ்சிரியராக இருந்தார். இம்முறை நான் விடுவித்தவர் கேரளாவின் தினேஷ் அவரை முன்பே அறிவேன்.

  போனில் அவருக்கு நன்றி சொன்னேன். தினேஷ் “ஷாகுலே  ஞான் கப்பல் கேறிய ஆத்தியத்த திவசம் முறில உறங்காம் பற்றுல்லா,அது கொண்டு ஞான் என்ற ரீலீர்வர்க்கு கேபின் விற்த்தியாயிட்டு கொடுக்கணும் மென்னு”..............என்றார்.

இயந்திர அறை காலை கூட்டம் 


    இன்று ஞாயிறு காலையில்இயந்திர அறைக்கு கூட்டத்திற்கு சென்ற வந்தபின். பார்வர்ட் விஞ்சில் ப்ரேக் டெஸ்ட் செய்த ஹைட்ராலிக் ஜாக் மற்றும் கருவிகளை கொண்டு வந்து ஸ்டோரில் வைத்ததோடு பணி முடிந்தது. இன்று தூங்கி எழுந்ததும் குளிக்கவில்லை. 



  அறைக்கு வந்து சுத்தம் செய்ய தொடங்கினேன். அறையிலேயே  ஐவேளை தொழுகையையும் நிறைவேற்றுவதால் எனது அறை எப்போதும் சுத்தமாகவே இருக்கும். வேக்கும் க்ளீனரால் தூசிகளை உறுஞ்சி,மேஜைகளை துடைத்து,தேவையற்ற அனைத்தையும் அகற்றினேன்.

 குளியலறையை வாரம் தோறும் கழுகி விடுவேன்.கடந்த வாரம் அதன் திரைசீலையை மாற்றியிருந்தேன். கழிப்பறையும் இரு தினங்களுக்கு முன் சுத்தம் செய்திருந்தாலும் இன்றும் கழுவி சுத்தம் செய்தபின் எண்ணெய் தேய்த்து குளித்து வெளியே வந்தபோது(சுனிதா காய்ச்சி தந்த தலைக்கு தேய்க்கும் தேங்காய் எண்ணெய் காலி) போசன் அழைத்தார்.



“சாயா உண்டு” என.சாயாக்கு சென்றபோது பாட்டீல் “டாக்குமென்ட் வாங்க விகாஸ் கூப்பிட்டான்” என்றான்.

 பிரிட்ஜில் சென்று அனைத்து சான்றிதழையும் சரி பார்த்து வாங்கி கப்பல் பதிவு செய்யபட்டிருக்கும் மார்ஷல் புத்தகத்தில் கையெழுத்து போட்ட்டேன். “ஸீமேன்,எல்லோ பீவர் நாளைக்கு தருவேன்.பாஸ்போர்ட் ஏஜென்டிடம் இருக்கு”.

  அறைக்கு வந்து லூகா தொழுதுவிட்டு சுனிதாவிடம் பேசினேன். பாக்கிங் பற்றி சொன்னபோது “கொண்டு போனத வாரி பெட்டிக்குள்ள போட வேண்டியது தானே, கொண்டு போற புக்கு தானே நிறைய இப்ப” என்றாள்.

 பாக்கிங் இப்போது பெரிய சோர்வை தருகிறது. லக்கேஜ் இல்லாமல் டாக்குமென்ட் மட்டும் ஒரு பையில் கொண்டு செல்வது போல் இருந்தால் நன்றாக இருக்கும் என எண்ணினேன். கப்பல் காரனுக்கு எதையுமே வாங்க இயலாது. அதுதான் பிரச்னை கப்பலில் இருக்கும் ஆறு முதல் எட்டு மாதத்திற்கான அனைத்தையும் கொண்டு வந்தாக வேண்டும். 

  ஒவொரு முறையும் நினைக்கிறேன் மிகக்குறைவான பொருட்களுடன் ஒரேயொரு பெட்டியுடன் பயணிக்க வேண்டும் என. புத்தகங்கள் மட்டும் பத்து கிலோவுக்கு மேல் வந்து விடுகிறது.

  சன்னி ஜாய் கப்பலில் இருந்த செல்வின் ஊருக்கு செல்லும்போது அவனது பயணப்பை பதினேழு கிலோ மட்டுமே இருந்தது. அது போல் முயற்சிக்கிறேன் இயலவில்லை.

  துணிகள் அனைத்தையும் துவைத்து இரு தினங்களுக்கு முன்பே பெட்டியில் அடுக்கினேன். இன்று சேவிங் செட்,கத்தரிக்கோல்,ஹேர் ட்ரிம்மர் என அனைத்தயும் போட்டு எடை பார்த்தேன். இருபத்தி ஏழு கிலோ இருந்தது. மலேசியன் ஏற்லைன்ஸில் ஒரு பெட்டி இருபத்தி மூன்று கிலோவுக்கு மேல் கூடாது என்றிருந்ததை இணையத்தில் பார்த்தேன். 



 அதிலிருந்து இரு புத்தகங்கள் மற்றும் குளிருக்கு அணியும் ஜாக்கெட்டை வெளியே எடுத்தேன். ஒரு பெட்டி தயார். இரண்டாவது பெட்டியில் மீதமுள்ள பொருட்களை போட்டு எடை பார்த்தபோது பத்து கிலோவுக்கும் குறைவாக இருந்தது. எனக்கு நாற்பது கிலோ வரை கொண்டு செல்லும் மரைன் டிக்கெட் தருவார்கள். இரண்டாவது பெட்டியில் வைக்க வேண்டியவற்றை நாளை காலைதான்  செய்ய முடியும்.

செஃப் ரைமுண்டோ 


   இன்று ரைமுண்டோ சிக்கன் பிரியாணி சமைத்திருந்தார். கவனமாக அளவாக சாப்பிட்டேன். சோம்ராஜிடம் “இவரோட பிரியாணி எப்பவுமே டாப்” என்றேன். 



 “அவருக்கு எல்லாமே நல்லா சமைக்க முடியும்” என்றார்.

போசன் “உங்களுக்கு கடைசி பிரியாணி,நாளைக்கு லஞ்சு முடிச்சி இறங்கிரலாம்”

 விடுமுறை உறுதியான பதிவை படித்த கப்பல் காரன் டைரியின் வாசகியும் மூத்த சகோதரியுமான பிரிஸ்பேன் டெய்சி “ஷாகுல் இன்னும் ரெண்டு பிரியாணி தான் இருக்கு” என சொன்னார். 

 கப்பலில் விடுமுறையை  கணக்கிடும்போது இன்னும் எத்தனை பிரியாணி பாக்கி என்பது தான் பேச்சாக இருக்கும். மாலையில் விகாஸ் அழைத்து கணக்கை முடிந்து கையொப்பமும் வாங்கினார். கொஞ்சம் பணம் கையில் தந்து,மீதியை வங்கியிலும் அனுப்புவார்கள்.

    


  மாற்று பணியாளர்களில் ஒருவரான சந்தோஷ் மும்பை விமான நிலையத்துக்கு சென்றுவிட்டதை உறுதி செய்தார். நாளை காலைபதினோரு மணிக்குள் அவர்கள் கப்பலுக்கு வந்துவிடுவார்கள். நாங்கள் மூன்று மணிக்கு கப்பலில் இருந்து இறங்குவோம்.

நாஞ்சில் ஹமீது,

29-10-2024

Saturday, 28 September 2024

கடைசி பணிநாள்

 


                          கப்பல்காரன் மிக கவனாமாக வேலை செய்யவேண்டியது கடைசி பணிநாட்களில். பாதுகாப்பு விதிமுறைகளை முழுமையாக  கையாண்டு வேலையை திறம்பட செய்ய வேண்டிய நாட்கள் இந்த கடைசி நாட்கள்.

   விடுமுறை உறுதியாகி மாற்று பணியாளரின் பெயர் வரும் முதலில்.பின்பு அவரின் மருத்துவ பரிசோதனை வெற்றிகரமாக முடிய வேண்டும். பின்னர் விசா தேவைப்படும் நாடுகளாக இருந்தால் தாமதமின்றி பயண தினத்துக்கு முன் விசா பெற்றிருக்க வேண்டும்.

   இறுதியாக அவர் பயணிக்கும் நாளில் அவரது கொள்ளு பாட்டியோ,தாத்தாவோ மேலுலகை நோக்கி பயணத்தை தொடங்ககூடாது. அவர் விமானம் ஏறும் நாளில் பேய் மழை பெய்து விமான நிலையம் மூடிவிடக்கூடாது. 

  இவ்வளவையும் கடந்து விமானத்தில் ஏறி பத்திரமாக தரை இறங்கியபின்  குடியுரிமை,சுங்க சோதனைகளையும் தாண்டி ஏணி வழியாக ஏறும் போது தண்ணீரில் விழுந்துவிடாமல் கப்பலுக்குள் வந்துவிட்டால். கப்பல் பணியில் இணைவதற்கு தேவையான அனைத்து சான்றிதழ் அடங்கிய பையை வீட்டில் மறந்துவிட்டு வராமல் இருந்தால்தான்  விடுமுறைக்கு செல்பவனின் விடுமுறை உறுதியாகும் .

(முன்பு ஒருவர் பணியில் இணையும்போது கடலில் விழுந்து விட்டார்.பத்திரமாக தூக்கிவிட்டார்கள். பாணி அண்ணா எனும் பெயர் மட்டும் பதினைந்து ஆண்டுகளாக நிலை பெற்று விட்டது.)

      எனது கடைசி பணி நாட்கள் வார இறுதியாக வந்ததால்  சிரமமில்லாத நாட்களாக அமைத்திருக்க வேண்டியது. சனிக்கிழமைகளில் சில ஆலாரம் சோதனை மற்றும் எளிய பணிகள் மட்டும் எனக்கு. மதியத்திற்கு மேல் ஓய்வும் மூன்றரை மணிக்கு ட்ரில்ல்ஸ் நடக்கும் நாள் முடிந்தது.

 ஞாயிறில் காலை எட்டு முதல் பத்துவரை மோட்டார் அறை,கம்ப்றசர் அறையை பார்த்துவிட்டு வந்தால் மதிய பிரியாணிக்கு மேல் தூக்கமும் வாசிப்பும்,எழுத்துமாக கழியும்.

   நேற்று முன்தினம் கப்பலுக்கு ஆடிட்டர் வந்துவிட்டார். காப்டன் அசுதோஷ் கவுல். நான் பணிபுரிந்த மிக சிறந்த காப்டன்களில் ஒருவர். ஆறு ஆண்டுகளுக்கு முன் அவருடன் கப்பலில் இருந்தேன். இப்போதும் தொடர்பில் இருக்கிறேன்.

 கப்பலுக்கு வரும் போதே இரு கைகூப்பி வணக்கம் சொன்னபோது “நமஸ்காரம் நீ கப்பலுக்க பேர சொன்னா இங்கேயே வர வேண்டியதா போச்சி”

 “காப்டன் சாப் நீங்க எப்ப ஆடிட்டர் ஆனீங்க”

காப்டன் ஆசுதோஷ்  கவுல் 


“ஒரு வருசம் ஆச்சிடே கொஞ்ச நாள் களிச்சி திரும்பியும் செய்லிங் போவேன்” என சொல்லி சிரித்தார்.

  அவருடன் இருந்த நாட்களில் கப்பலில் தினமும் மாலையில் கிரிக்கெட் விளையாட்டும்,இரவுணவுக்குப்பின் சினிமா அல்லது புதிய கேம்களை அறிமுகபடுத்தி விளையாடுவது என இரவு பத்து மணிவரை நேரம் போனதே தெரியாமல் இருந்த நாட்கள்.

   ஆடிட்டர் கப்பலை முழுமையாக ஆய்வு செய்து ஆய்வறிக்கை சமர்ப்பிக்க வேண்டும். கொஞ்சம் விவரமான ஆள் என்றால். ரொம்பவே குடஞ்சி சோதனையும்,கேள்வியும் கேட்பார்கள். காப்டன் அசுதோஷ் இன்று கப்பலின் நான்கு கிரேன்களின் லிமிட் ஸ்விட்ச்சை சோதனை செய்தார். நானும்,காஸ் இஞ்சினியரும் உடனிருந்தோம். போசனும்,சோம்ராஜும் கிரேனை இயக்கி காட்டினர்.

சுழலாத கப்பி 


 அதற்க்கு முன்பே (லைப் போட்) அவசர கால படகுகளை இயக்கி பார்த்திருந்தார். அதில் ஒரு கப்பி(pully) சுற்றவில்லை. ஏதாவது செய்து அதை சுற்ற வையுங்கள் இல்லையெனில் முடியாது. பெரிய ரிமார்க என்றார்.

கிரேனின் சோதனை முடிய மதியம் பன்னிரெண்டு மணியை தாண்டியிருந்தது. மதிய உணவுக்குப்பின்  போசன்,தலேர் சிங்,கார்லோ,காஸ் இஞ்சினியர் சேர்ந்து கப்பியை சுற்ற வைக்க செய்த அனைத்து முயற்சிகளும் பயனற்று போனது. போசன் செயின் பிளாக் போட்டு இழுக்கலாம் என்றார். அதை செயல்படுத்த யோசித்து கொண்டிருந்தோம். ஒரு வழியும் தெரியவில்லை. சுத்தியலால் அடித்து கைகள் ஓய்ந்து போயிருந்தது.

 கப்பியில் இருந்த துளையில் பொருந்தும் சக்கிள் எதுவும் கிடைக்கவில்லை. காப்டன் அசுதோஷ் வந்தார். என்னன்ன செய்தோம் என கேட்டபின். “சூடாக்கணும் ஆனா அதுக்கு முடியாது”

காஸ் கப்பலில் அது முடியவே முடியாது. புல்லியில் இருந்த துளையில் நுழையும் அளவுள்ள ஸ்டெயின்லெஸ் ஸ்டீல் கம்பியை சொருகி செயின் பிளாக்கால் இழுத்து பார்க்க சொன்னார். கொஞ்சம் சுற்றியதும் என்னை கூப்பிடு என சொல்லிவிட்டு வேறு சோதனைகளுக்கு சென்று விட்டார்.

   உபகரணங்களை தயார் செய்து இழுத்தோம் கொஞ்சம் அசைந்தது.எதிர் புறத்தில் செயின் பிளாக்கை போட்டு மீண்டும் இழுத்தோம். தலேர் காப்டனை அழைத்தான். அவர் மீண்டும் எதிர் எதிர் திசைகளில் இரு முறை அசைக்க சொன்னார்.



 போசனிடம் படகை  இறக்க சொன்னார். புல்லி சுற்றவில்லை நான்கில் மற்ற மூன்று புள்ளிகள் சுழன்றது. காப்டன் சுத்தியலும்,துணியும் எண்ணையும் கேட்டார். அவரே மேலேறி சுத்தியலால் அடித்து துருவை நீக்கி படகை மேலேற்ற சொன்னார் புல்லி சுழன்றது.மேலும் பலமுறை படகை இறக்கியும்,மேலற்றியும்  சுத்தியலால் அடித்ததில்  புல்லி இலகுவாக சுழல தொடங்கியது. 

  மூன்று மணிக்கு மேல் பணி முடிந்தது.நல்ல வெயில் நாள் இன்று. காலை முதல் லேசான தலைவலியும் இருந்தது. ஒரு வழியாக பணி முடிந்ததில் ஆசுவாசம் அடைந்தோம். மூன்றரைக்கு மாதந்ததிர பாதுகாப்பு கூட்டம். முதன்மை அதிகாரி பதினைந்து நிமிடம் தாமதமாக துவங்க கப்பல் காப்டன் ஷின்னிடம் அனுமதி பெற்றார்.

  அறைக்கு வந்து லுகர் தொழுதுவிட்டு கட்டன் காப்பியுடன் கூட்டத்திற்கு சென்றேன். ஒன்றரை மணிநேர மீட்டிங்கில் இன்று தான் தூங்காமல் அமர்ந்திருந்தேன். கட்டன் காப்பியின் வேலையாக இருக்கலாம்.



  மாலையில் கப்பல் பணியாளர் அனைவருக்கும் வழங்கிய டீ சர்ட் அணிந்து குழு புகைப்படம் எடுத்தோம்.விடுமுறையில் ஊருக்கு செல்பவர்களின் பெயரில் காப்டன் பார்ட்டி வைத்திருந்தார். மிக குறைந்த உணவுகளுடன் (புலாவ்,பொரித்த இறால்,பீப் ஸ்டேக்,போர்க் ஸ்டேக்,சிப்பி,சில்லி சிக்கன்,பன்னீர் பட்டர் மசாலா காபி கேக்,காராமல் புட்டிங், கேக்) பீர்,மற்றும் வைன் இருந்தது.

எல்லாம் காலி.



    வழக்கமாக உற்சாக மிகுதியால் ஊருக்கு செல்லும் முன் சில நாட்கள் தூக்கமிழப்பும், லேசான சோர்வும் இருக்கும். தொடர்ந்து எதிர் மறையான கனவுகள் வரும் (விமானத்தை தவறவிடுதல்,விமானம் தண்ணீரில் இறங்குவது,விமான நிலையத்தில் கைப்பை காணமால் போவது) சரியாக தூங்காமல் நீண்ட விமான பயணத்திற்குபின் வீடு போனபின் ஜெட் லாக் காரணமாக இரவில் விழிப்பும்,பகலில் தூக்கமும் அதனால் ஏற்படும் முதுகு வலியும் சரியாக பத்து நாட்கள் ஆகிவிடும்.

    கடந்த மூன்று ஆண்டுகளாக ஊருக்கு செல்லும் உற்சாகத்தினால் தூக்கமின்மை,கனவுகள் என எதுவும் இல்லை. இரவுகளில் ஏழு மணி நேரத்திற்கு மேல் நல்ல நித்திரை கனவுகளின்றி.

  உடன் பணி புரியும் ஜெர்ரி கடந்த வாரம் முதலே அதிகாலை மூன்று மணிக்கே விழித்து விடுவதாக சொன்னான். ஜெர்ரி பணியில் இணைந்து பத்து மாதங்கள் ஆகப்போகிறது.

    நாளை ஞாயிறு ஆதலால் அதிக பணியேதும் இல்லை. மாற்று பணியாளர்கள் நாளை இரவு விமானம் பிடித்து திங்கள்கிழமை வந்துவிடுவார்கள். நாங்கள் மதியம் கப்பலை விட்டு இறங்க வேண்டும்.எனவே எனக்கு இன்றே கடைசி பணிநாள்.

நாஞ்சில் ஹமீது,

28-10-2024

Friday, 27 September 2024

விடுமுறையும் பயணசீட்டும்

 


                 ஏழுமாத பணிஒப்பந்தத்தில் பிப்ரவரி ஒன்றாம் தேதி ஜிப்ரேல்டரில் வந்திறங்கி கப்பல் ஏற முடியாமல் போனதால். மீண்டும் 23 ஆம் தேதி தென்னாப்பிரிக்காவின் கேப் டவுனில் இருந்து பணியில் இணைந்து ஏழு மாதங்கள் முடிந்துவிட்டது.

  இம்மாதம் முதல் வாரத்தில் சிங்கையிலிருந்து ஊருக்கு செல்கீறிர்களா? என கேப்டன் கேட்டபோது  ஊருக்கு செல்பவர்களில் நான்குபேர் தயாராகவில்லை. மாத இறுதியில் பணிஒப்பந்தம் முடிந்து செல்கிறோம் என விருப்பத்தை தெரிவித்தனர்.

   ஆப்ரிக்காவின் புன்டா ஐரோப்பாவை நோக்கி சென்ற கப்பல் திரும்பி மலேசியாவுக்கு வந்து நங்கூரம் பாய்ச்சி நிறுத்தியதால். இப்போது ஊருக்கு செல்லும் வாய்ப்பு கிடைத்தது.

 ஆம் இருபதாம் தேதியே கோலாலம்பூர் அலுவலகம் இம்மாத இறுதியில் பணியாளர் மாற்றம் செய்யவிருப்பதை உறுதி செய்தது. மாற்று பணியாளர்கள் வரும் முப்பதாம் தேதி காலை கப்பலுக்கு வருவர். முதன்மை அதிகாரி மற்றும் இரண்டாம் இஞ்சினியர் ஒரு நாள் கப்பலில் இருந்துவிட்டு ஒன்றாம் தேதி இறங்குவார்கள்.

  நான,ரைமுண்டோ,பாட்டீல்(நாங்கள் மூவரும் ஒன்றாய் பணியில் இணைந்தோம்)ஜெர்ரி வரும் திங்கள்கிழமை மதியம் கப்பலில் இருந்து இறங்கி கோலாலம்பூரில் ஒரு நாள் தங்கி (01-10-2024)மறுநாள் மாலையில் விமானம்.

   ஜெர்ரி மணிலாவுக்கும் நாங்கள் மூவரும் மும்பைக்கும் பயணிப்போம். இங்கிருந்து திருவனந்தபுரம் நான்கு மணிக்கும் குறைவான நேரம் பறந்தால் போதும். கோலாலம்பூர்-மும்பைக்கு ஐந்தரைமணி நேரம். மும்பையில் இரவு பத்தரைக்கு இறங்கி மறுநாள் அதிகாலை ஐந்தே முக்காலுக்கு அடுத்த விமானம்.

   மாலையில் காப்டனை சந்திக்க பிரிட்ஜில் சென்றேன். இரண்டாம் அதிகாரி விகாஸ் உள்நாட்டு பயண சீட்டு முன்பதிவுக்கு போன் நம்பர் கேட்டிருந்தார். அப்போது தான் தெரியும் எனக்கு கோலாலம்பூர் – திருவனந்தபுரம் டிக்கெட் வரவில்லை என. விகாஸ் கணினியில் எனது பயண சீட்டை காட்டினார். இங்கருந்து நேரடி விமானம் இருப்பதை சொல்லி அதில் டிக்கெட் கேட்டு நேற்றே சொல்லியிருந்தேன்.

    “கேப்டன்ட்ட சொல்லி பாரு, ஆனா எதுவுமே புரியாது அந்த மனுஷனுக்கு”என்றான் விகாஸ்.

 கொரிய காப்டன் ஷின் பேசும் ஆங்கிலம் இங்கே யாருக்கும் புரியாது. நாம் சொல்ல வேண்டிய விசயத்தை,கை,கால்,கண்,வாயை உபயோகித்து சொன்னால் அவர் புரிந்து கொண்டாரா இல்லையா என்பதும் நமக்கு தெரியாது.

  காப்டன் வரும் வரை காத்திருந்து விசயத்தை சொன்னேன்.

“இப்படி தான் டிக்கெட் வந்திருக்கு”

“திரும்ப ஒரு மெயில் அனுப்பி டைரக்ட் பிளைட் புக் பண்ண சொல்லுங்க, நான் இரவு முழுவதும் பாம்பேல காத்து கிடைக்கணும்” என்றேன்.

 “நான் கோலாலம்பூர் அலுவலகத்துக்கும் மெசேஜ் அனுப்பிட்டேன்,டைரக்ட் பிளைட்ல டிக்கெட் இல்லையா இருக்கும் அதான் இப்படி வந்துருக்கு” என சொல்லிவிட்டார்.

   பேசி புரிய வைக்க முடியாது  என்பதை நான் புரிந்து கொண்டேன். 

  விமான சீட்டு பதிவு செய்யும் நிறுவனத்துக்கு காப்டன் கப்பல் பணியாளர் பெயர்,பதவி,செல்லும் ஊர் ஆகிய விபரங்களை அனுப்பினால் அங்கிருந்து இரண்டு அல்லது மூன்று விமான விபரங்களை அனுப்புவார். அதை காப்டன் அவர் விருப்பம்போல் அல்லது எங்களிடம் கேட்டுவிட்டு டிக்கெட்டை பதிவு செய்ய சொல்வார்.

   அதில் மாற்றங்கள் வேண்டுமெனில் செய்து கொள்ளலாம். இரண்டாம் அதிகாரி ஹபீசி “அவரு ஒரு மெயில் அனுப்பனும் உன் டிக்கெட்ட மாத்த சொல்லி,அங்கே இருந்து திரும்ப ஒரு பிளைட் டீட்டெயில் அனுப்பி கேப்பாங்க.இவரு அத திரும்ப கன்பார்ம் பண்ணனும்,இத செய்ய மடிச்சிதான் தான் முடியாதுன்னு சொல்றாரு” என்றார்.



  விகாசிடம் கிட்டேன். “ஆப்லோக் இன்கே சாத் கைசே காம் கர்த்தா ஹே”

  “பாய் பூச் மத்,ரொம்ப கஷ்டம்”என்றான்.

  வரும் புதன்கிழமை காலை பத்து மணிக்கு நாகர்கோவிலில் வீட்டில் இருப்பேன்.

  நாஞ்சில் ஹமீது,

27-09-2024


  

Friday, 20 September 2024

நிலம் பார்க்க போகும் கப்பல் காரன்

  .

           கடந்த திங்கள்கிழமை (09-09-2024) மலேசியாவின் லிங்கியில் நங்கூரம் பாய்ச்சி நிறுத்தினோம். கொரியாவில் ஞாயிறு முதல் புதன் வரை தேங்க்ஸ் கிவிங்க் விடுமுறை. கப்பலில் செவ்வாய்க்கிழமை ஒருநாள் மட்டும் விடுமுறை அறிவித்து திங்கள்கிழமை மாலையில் ஒரு சிறு கூடுகை.



  சில எளிய உணவுகளும் மூன்று பாட்டில் வைன் மட்டும் வைத்திருந்தார் காப்டன் ஷின். குடிப்பிரியர்கள் மூணு பாட்டில் வைன் எந்த மூலக்கி ஆச்சி என வேதனை பட்டனர். பீர் வைக்கவில்லை எனும் ஏமாற்றம். என்னை போல் குடிக்காதவர்களுக்கு எந்த சிரமமும் இல்லை.

   எனக்கு செவ்வாய்க்கிழமை சிம் கார்டு கிடைத்தது. மாலையில் இருபதாம் தேதி மற்றும் இருபத்தி ஐந்தாம் தேதி கரைக்கு செல்ல படகு ஒருங்கு செய்திருப்பதை காப்டன் சொன்னார். இரு வாரங்களுக்கு ஒரு முறை மட்டும் ஐம்பது சதவீத பணியாளர்கள் கப்பலில் இருக்கவேண்டும் என்பது கட்டாயம்.

   கப்பலிலிருந்து கரைக்கு செல்ல படகு அங்கிருந்து மலாக்கா செல்லும் போக்குவரத்து கம்பனி கணக்கில். கப்பலில் எப்போதுமே எதுவும் நடக்கலாம். கல் கோன் தேக்கா என ஹிந்ந்தியில் சொல்லாவர்கள் நாளைய தினத்தை கண்டது யார். அதனால் முதல் குழுவில் இருபதாம் தேதி கரைக்கு செல்ல பெயர் பதிந்து கொண்டேன். காலை ஒன்பது மணிமுதல் மாலை நான்கரை மணிவரை. திங்கள் முதல் வெள்ளிவரை இரவு கரையில் தங்க அனுமதியில்லை. பிப்ரவரி இருபதியைந்தாம் தேதி கப்பலில் ஏறினேன். அதன் பின் இதுவரை நிலத்தில் கால் படவில்லை. இருநூற்றி எட்டு நாட்களுக்குபிறகு வரும் வெள்ளிக்கிழமை என் பாதம் நிலத்தில் பதியும் வாய்ப்பு பிரகாசமாகியது.

  கரை செல்வது வெள்ளிக்கிழமை கிடைத்தால் ஜிம்மா தொழ வாய்ப்பு கிடைக்கும் என எண்ணினேன் அதுபோல் வெள்ளிக்கிழமை ஷோர் லீவ் அமைந்தது. இங்கே கோலாலம்பூரில் சையதலி அண்ணன் இருக்கிறார். கடந்த ஜனவரியில் அவரது மகள் சாய்மா திருமணம் நடந்தபோது கலந்துகொள்ள இயலவில்லை. ஜூலையில் மகனின் திருமணம் அப்போது கப்பலில் இருந்தேன். 

  அங்கே அவர்கள் இல்லம் செல்ல வேண்டும் என எண்ணியிருந்தேன் மலாக்காவிலிருந்து கோலாலம்பூர் போக இரண்டு மணிநேர பேருந்து பயணம். போக்குவரத்து நெரிசலில் சிக்கினால் இன்னும் தாமதம் ஆகும். மதியம்  ஜும்மா தொழுகை. 

  ஆறு மணி நேரத்தில் இதெல்லாம் சாத்தியம் இல்லை என்பதால் நேற்று ஹமீமா மைனியிடம் போன் பண்ணி வீட்டுக்கு வரவில்லை என சொன்னேன். 2007 இல் கப்பல் மலேசியாவின் போர்ட் கெலாங்க் வந்தபோதும், 2013 இல் குடும்பத்தோடும் அவர்கள் இல்லம் சென்றுள்ளேன். இப்போது சந்தித்து நீண்ட நாள்கள் ஆகிவிட்டது.

   எனது பத்தாம் வகுப்பு கட்டுரையில் இறுதி தேர்வில் தோல்வியடைந்ததோடு அந்த தொடரை நிறுத்தியிருந்தேன். அதன் பின்பான என் வாழ்வின் மாற்றத்திற்கு சையதலி அண்ணனே காரணம். எனது பத்தாம் வகுப்பு இரண்டாம் பாகம் எழுதும்போது சையதலி அண்ணனை பற்றி விரிவாக ஒரு கட்டுரை எழுதவேண்டும்.

       இன்று மாலை இரவுணவுக்கு சென்றபோது எங்கள் விடுமுறை உறுதியான செய்திகிடைத்தது இம்மாத இறுதியில் நான்,பாட்டீல்,ரைமுண்டோ,ஜெர்ரி,இரண்டாம் இஞ்சினியர் அலெக்ஸ்,முதன்மை அதிகாரி ஹோ ஆகியோரின் மாற்று பணியாளர்களுக்கான பெயர்கள் வந்தது. தேதி குறிப்பிடாமல் இம்மாத இறுதியில் கப்பலிலிருந்து இறக்கவிட கோலாலம்பூர் அலுவலகம் உத்தேசித்துள்ளது.

  விடுமுறை செய்தி கப்பல் காரனுக்கு எப்போதுமே மிகுந்த உற்சாகத்தை தரும். பிலிப்பினோ மோட்டர்மேன் ஜெர்ரிக்கு ஒன்பதரை மாதங்கள் ஆகிறது. ரைமுண்டோ,நான்,பாட்டீல் ஒன்றாக கப்பல் ஏறினோம் வரும் இருபத்தி மூன்றாம் தேதி ஏழு மாத பணிஒப்பந்தம் முடியும்.

   கப்பலிலிருந்து விடுமுறைக்கு செல்லும் முன் கரைக்கு போய் வருவதும் நல்ல வாய்ப்பு. மலாக்கா வரலாற்று சிறப்புமிக்க சுற்றுலா தளம். பள்ளிவாசல்,இந்து கோயில்,சர்ச் 1511  கட்டப்பட்ட கோட்டை,மலாக்கா ஆறு இப்படி பலதையும் பார்க்கவும் பின்னர் விரிவாக ஒரு கட்டுரையும் எழுதலாம்.

  நாஞ்சில் ஹமீது,

18 september 2024.

மேற்கில் உதித்த சூரியன்

 . 


            நீண்ட பயணம் கப்பல்காரனுக்கு ஒரு சமாதானத்தை தரும். பணியின் அழுத்தம் இல்லாமல் சாவகாசமாக சனிக்கிழமை அரை நாள் மற்றும் ஞாயிறு முழுநாள் ஓய்வு உறுதியாக கிடைக்கும் என்ற சந்தோஷம்தான்.

       தொழுகைக்காக எப்போதும் திசை பார்ப்பது வழக்கம். அல்லாஹ் அக்பர் என கைகட்டி நிற்கும்போது மெக்காவை நோக்கி நிற்கவேண்டும். திசை தெரியவில்லை எனில் எப்படி நின்றாலும் தவறில்லை.பயணத்தில் முடிந்தவரை திசைய கணிக்க முயற்சிக்கலாம். இல்லையெனில் தவறொன்றும் இல்லை. 

 கப்பலில்  திசையும்,நேரமும் கணிப்பது மிக எளிது. இங்கே பணியிலிருக்கும் நேவிகேஷன் ஆபிசர் இருவர் இஸ்லாமியர். நகரும் கப்பலின் வேகத்தையும்,கடக்கும் தூரத்தையும் கணக்கிட்டு அந்த நாளில் எந்த நாட்டில் இருக்கிறோம் என்பதை கணித்து தினமும்  தொழுகை நேரத்தை அனுப்புகிறார் பங்களாதேஷ் மூன்றாம் அதிகாரி ஆஷிக்.

   மெக்கா திசையை கணிக்க நான் சூரியனையும் கப்பல் செல்லும் திசையையும் பார்ப்பேன். கடந்த மாதம்  ஒன்பதாம் தேதிக்குபின் கப்பல் கடிகாரம் மாறவேஇல்லை. சிங்கப்பூர்,சைனா,மலேசியா ஒரே டைம் சோனில் இருக்கிறது. GMT +8 hrs.

      இப்போது கப்பல் மேற்கு நோக்கி பயணிக்கிறது. மெக்கா இருக்கும் திசை கப்பலின் போர்ட் சைட் பார்வேடை நோக்கி. port bow என்போம்.  சனிக்கிழமை அதிகாலை தொழுகையை port bow திசையில் தொழுது முடித்தேன். ஆனால் மேற்கில் வானம் வெளுக்க துவங்கியது. கப்பல் மேற்கு நோக்கி பயணிப்பதால் சூரிய உதயம் கிழக்கு என்றால் கப்பலின் ஆப்ட் எனப்படும் பின்புறம் (starboard quatar). 



   நேர் எதிர் திசையில் சூரிய உதயம் என்னை காலையிலேயே குழப்பிவிட்டது. கப்பல் வேகமாக சென்று சேர வேண்டும் அப்படியெனில் தவறுதலாக எதிர் திசையில் திருப்பினால் இலக்கை சென்றடைய இன்னும் தாமதமாகும். எதற்காக கப்பலை திருப்பினார்கள்.ஒன்றும் புரியாமாலே ஏழரை மணிக்கு அடுமனை சென்றேன். “கப்பல் லிங்கி செல்கிறது ஆப்ரிக்கா கேன்சல்” என்றார் ரைமுண்டோ. இங்கிருந்து  சைன்-ஆப் எளிதாக கிடைக்கும் என்றார். அவரவர் கவலை அவரவர்க்கு.

  சோம்ராஜ் நேற்றிரவு   காப்டனுக்கு போன் வந்தது இரவு பத்து மணிக்கு கப்பலை திருப்பிவிட்டார்கள் என்றான். இரு ஜெனரேட்டர்கள் நிறுத்தப்பட்டு கப்பலின் வேகம் குறைக்கப்பட்டு வீல் ஹௌஸ் வாட்ச் கீப்பிங்கில் இருந்தது.

    காலை கூட்டத்துக்குப்பின் கட்டுப்பாட்டு அறைக்கு வந்து மின்னஞ்சலை திறந்தேன். ஆப்ரிக்கா செல்வது ரத்து செய்யப்பட்டு கப்பலை மலேசியாவின் லிங்கியில் நங்கூரம் பாய்ச்சி நிறுத்த அறிவுத்தபட்டிருந்தது.அடுத்த ஆர்டர் கிடைத்ததும் சொல்கிறோம் என்றிருந்தது.   முதன்மை இஞ்சினியர் ஆல் வெரி ஹாப்பி என சிரித்துக்கொண்டே சொன்னார்.இங்கு இதே நிறுவனத்துக்கு சொந்தமான மேலும் மூன்று எல்என்ஜி கப்பல்கள் நிறுத்திவைக்கப்பட்டுள்ளது. 

     கப்பல் மிக மெதுவாக நகர்ந்து நேற்று காலை பத்து மணிக்கு லிங்கியை  அடைந்தது. உள்ளூர் பைலட் வந்து நங்கூரம் பாய்ச்சி நிறுத்திவிட்டு சென்றார். நான் முன்பு(2022) பணிபுரிந்த சிங்கப்பூர் எனர்ஜி கப்பல் மிக அருகில் நிற்கிறது. இங்கே பணிபுரிவர்களில் பெரும்பாலனவர்கள் இங்கே நிற்கும் வேறு கப்பல்களில் பணிபுரிந்தவர்கள். அந்த கப்பல்களில் சிங்கப்பூர் எனர்ஜி இரண்டு ஆண்டுகளாகவும், மெர்ச்சன்ட் ஒன்றரை ஆண்டுகளாகவும்,ஹாங்காங் எனெர்ஜி ஓராண்டாகவும் இங்கே நிற்கிறது. 

 சிங்கப்பூர் எனர்ஜியில் safe manning முறையில் கடந்த ஆறுமாதமாக பதினான்கு பணியாளர்கள் மட்டுமே உள்ளனர். மற்ற இரு கப்பல்களும் முழு பணியாளர்களும் இருந்தாலும் எப்போது வேண்டுமாலும் விலை போகும் நிலையில் உள்ளது.

   நீண்ட நாட்களுக்குபின் கப்பலின் கடிகாரம் வெள்ளிக்கிழமை இரவு ஒரு மணிநேரம் முன்னே சென்றது. சனிக்கிழமை மீண்டும் ஒரு மணிநேரம் பின்னோக்கி சென்றது.


    இங்கே அனைவருக்கும் மலேசிய சிம் கார்ட் கிடைத்தது. விலை ரொம்ப அதிகம் ஏஜென்ட் இருபத்தி டாலர் வீதம் அடித்து விட்டான். கரையில் பத்து ரிங்கிட் மதிப்புள்ள சிம் இது. 



  எல்லோருக்கும் கரைக்கு செல்லும் வாய்ப்பு கிடைக்கும். பிப்ரவரி இருபத்தி ஐந்தாம் தேதி கப்பல் ஏறியபின் இதுவரை கால் நிலத்தில் படவே இல்லை. வரும் வெள்ளிக்கிழமை முதல் குழு வெளியே செல்ல வாய்ப்பு உள்ளது. 

   


இங்கிருந்து பணியாளர் மாற்றம் மிக எளிது. ரைமுண்டோ காப்டனிடம் என்னை அனுப்புங்கள் என கேட்டார். காப்டன் விடுமுறை விண்ணபத்தை எழுதி வாங்கி அனுப்பி வைத்தார், நேற்றும் இன்றும் மலேசிய அலுவலகம் விடுமுறை நாளை விடுமுறைக்கான செய்தி வருமென காத்திருக்கிறார்.

  நானும் இம்மாத இறுதியில் ஊர் வந்துவிடுவேன். அடுத்த திங்கள்கிழமை பணி ஒப்பந்தம் முடிகிறது.

  நாஞ்சில் ஹமீது,

17 sep-2024.