Saturday, 5 November 2016

ஈராக் போர்முனை அனுபவங்கள் 20


                      சில விபத்துகள்
   முகாமில் சிலநேரங்களில் அதிகமான கண்டெய்னர் லாரிகள் வந்துவிடும் .சில கண்டெய்னர்களில் கோக் அல்லது பெப்ஸி மட்டுமே இருக்கும் .அந்த லாரிகளை உடனே காலி செய்து மறுநாளே அனுப்பவேண்டும் .அதிக எண்ணிக்கையில் அவற்றை இறக்கும்போது எங்களிடம் அவற்றை வைப்பதற்கு இடம் இல்லாமல் தற்காலிகமாக உணவு கூடத்தின் அருகில் சில நாட்கள் வைத்திருப்போம் .

    அமெரிக்கர்கள் பெரும்பாலும் கோக் ,பெப்ஸி அதிகம் குடிப்பவர்கள் .வெளியே இருப்பதால் ராணுவ வீரர்கள் சிலர் அவர்கள் குடியிருப்புக்கு செல்லும்போது யாரும் பார்க்காதபோது கையில் 24 டின்கள் அடங்கிய ஒரு கேசை சுலபமாக கையில் எடுத்து செல்வர் .

  ஒருநாள் முருகன் என்னிடம் சொன்னான் .பாய் இவிங்க ரொம்ப நல்லவங்க னு சொன்ன .அங்க பாரு அவனுக்கு ஒன்னு ,அவன் கேர்ள் பிரண்டுக்கு (அப்போது ஒரு ராணுவ வீரன் இரண்டு கேஸ் கோக் ஐ எடுத்து கொண்டிருந்தான் இருட்டில் )ஒன்னு .இரண்டும் போற போக்க பாரு கோக் குடுத்தே அவள வளசிருப்பான் போல .

    அதை தடுக்கு நாங்கள் பொருட்கள் வைக்கும் எட்டடி உயரமுள்ள கண்டெய்னர்களின் மேல் அவற்றை அடுக்கி வைத்தோம் யாரும் எளிதில் எடுக்க முடியாதபடி .

   ஒரு நாள் அவரசமாக தேவைப்பட்டபோது பீட்டரிடம் போர்க் லிப்ட் பிளேடில் ஏறிகொள் நான் தூக்குகிறேன் கண்டெய்னர் மேலிருந்து சில கோக் கேஸ்களை எடுக்க சொன்னேன் .அதெல்லாம் பாதுகாப்பற்றது என்னால் முடியாது என்றான் .

    நான் ஏறிகொண்டேன் போர்க்லிப்ட் ன் பிளேடில் மேலே  தூக்கியதும் கண்டெய்னரின் மேலிருந்து தேவையானதை எடுத்து போர்க்லிப்ட் ல்  அடுக்கிவிட்டு கிழே இறங்கும்போது கால்வைக்க கிடைத்த இடத்தில் நின்று கொண்டேன் .
   
     கீழிறங்கும் போது எனது இடது கால்,மேல்-கீழ் இயங்கும் இரு இரும்பு  பட்டைகளுக்கிடையில் மாட்டி கொண்டது .சேப்டி சூ (முன்பக்க இரும்பு தகடு பொருத்திய )அணிந்திருந்ததால் .வேகாமாக காலை இழுத்து வெளியே எடுத்துவிட்டேன் .பெரிய காயம் இல்லை .இருந்தாலும் கடுமையான வலி. உடனிருந்தவர்கள் உடன் அடுமனையின் குளிர் பெட்டிகளிருந்து ஐஸ் கட்டிகளை கொண்டு ஒத்தடம் கொடுத்தனர் .

     எங்கள் முகாமில் உள்ள முதலுதவி மையத்துக்கு  சென்றபோது காப்டன் வெஸ்ட் என்னும் நானறிந்த வயதான பெண்மணி .ஹாய் ஷாகுல் எக்ஸ் ரே எடுக்கவேண்டும் இங்கு அந்த வசதி இல்லை ,ஈகிள் நெஸ்ட் என்னும் அருகில்(பதினாறு கிலோமீட்டர் ) உள்ள வேறு முகாமுக்கு செல்ல வேண்டும் என்றார் .
   
     நாளை காண்வாய் இல்லை .நாளை மறுநாள் காலை 9 மணிக்கு உன்னை அழைத்து செல்வார்கள் .வலி மாத்திரை இது தேவைபட்டால் எடுத்துகொள் என சில மாத்திரைகளை தந்து அனுப்பிவைத்தார் .

   இரவானதும்  நல்ல வலியில் தூக்கம் இல்லாமலும்,சரியாக நடக்கவும்  முடியவில்லை.தூங்காத இரவுகள் எப்போதும் நீண்டவையாகி விடுகின்றன.மறுநாள் பணிக்கும் செல்லவில்லை .அதற்கடுத்தநாள் காலையில் முதலுதவி மையம் அழைத்து சென்றனர் .
   
  காப்டன் வெஸ்ட் என்னிடம் ஒருவரை காட்டி இவர் உன்னுடன் இருப்பார் உனக்கு வேண்டியதை செய்து தருவார் காவ் அ சேப் ஜர்னி என கையசைத்து சென்றாள். ராணுவ மருத்துவ ஜீப்பில் என்னுடன் இரு ராணுவ நோயாளிகள் இருந்தார்கள் .இருவரும் ராணுவ வீரர்கள் .
 
    ஜீப்பில் ஏறி கதவு  மூடியதும் கும்மிருட்டு உள்ளே.இயந்திர சப்தம் மட்டும் சீரான ஓசையில் கேட்டுகொண்டிருந்தது .ஓட்டுனரின் தலைக்குபின் ஆறு அங்குல சதுர கண்ணாடி இருந்தது அதை சிறிது நேரத்திற்கு பின் திறந்ததும் கொஞ்சம் வெளிச்சம் வந்தபோதுதான் இருக்கிறோம் எனும் உணர்வு வந்தது ஒரு பெருமூச்சுடன் .வெளியில் எதையும் பார்க்கமுடியவில்லை.பயணங்களில் எப்போதும் வெளியே வேடிக்கை பார்க்கும் குணம் எனக்கு அந்த இருள் எனக்கு ஒரு ஒவ்வாமையையே தந்தது .அரண்மனைக்குள் வந்தபின் முதல் முறையாக வெளியே செல்கிறேன் .உடன் இருந்தவர்கள் எதுவும் பேசிக்கொள்ளவில்லை.
  
   ஈகிள் நெஸ்ட் முகாம் வாயிலில் சோதனைக்கு பின் உள்ளே அனுமதிக்கபட்டோம் .என்னை அழைத்து சென்ற ராணுவ வீரன் அங்கிருந்த ஒரு செவிலி உடையணிந்த பெண்ணிடம் என்னை ஒப்படைத்தார் .இவள் உனக்கான அனைத்து உதவிகளையும் செய்து தருவாள் .அனைத்தும் முடித்ததும் இங்கேயே காத்திரு என சொல்லி சென்றுவிட்டார் .
 
  அந்த பெண் என் முந்தைய மருத்துவ வரலாறுகளையும்,மருந்து, ஊசிகளால் ஏதாவது ஒவ்வாமை உள்ளதா என கேட்டு குறித்து கொண்டாள்.பின்பு மருத்துவ அறைக்கு சென்றுவிட்டு சில நிமிடங்களுக்கு பின் வந்து என்னை உள்ளே அழைத்து சென்றாள் . உள்ளே சென்றதும் டிபானி எனும் பெயர்கொண்ட அந்த அழகான இளம் பெண் மருத்துவர் என்னை பெயர் சொல்லி அழைத்து முன்பே பழகியவரிடம் பேசுவதுபோல அன்பாக எப்படி அடிபட்டது என கேட்கும்போதே என் காலில் பாதி வலி குறைந்து விட்டது .
 
   ஒன்றும் பயப்படாதே எக்ஸ் ரே எடுத்து பாப்போம் என சொல்லிவிட்டு அருகிலிருந்த அறையில் எக்ஸ் எடுத்து விட்டு வெளியில் காத்திருக்க சொன்னாள்.
  
    நேரம் மதிய உணவு வேளையை நெருங்கியிருந்தது .அந்த செவிலி உடையணிந்த பெண் என்னிடம் சாப்பிடுகிறாயா என இரண்டு கைகளாலும் பர்கர் பன் கடிப்பதை போன்ற சைகை காட்டி கேட்டாள் ஆம் என்றேன். இரண்டு பர்கரும்,கொஞ்சம் சிக்கன் விங்க்ஸ் ம் , ஒரு தண்ணீர் பாட்டிலும், தந்தாள்.
   
 நம்ம ஆள்ட்ட சாப்ட்டச்சானு சைகையில் கேட்பது மிக எளிது .ஒரு கையால் சோறு தின்பது போல் காட்டினால் போதும் .நான் சாப்பிட்டபின் அங்கேயே அமர்ந்திருந்தேன் .நெடுநேரத்திற்கு பின் மீண்டும் மருத்துவர் டிபானியின் அழைப்பு .

   காலில் ஒரு சிறய கீறல் மட்டுமே உள்ளது விரைவில் குணமாகிவிடும்.ஒரு வாரம் ஓய்வு தேவை பணிக்கு செல்லவேண்டாம்,காலில் அணிய ஒரு மரக்கட்டை காலணி தருகிறேன் அணிந்துகொள் .விரைவில் குணமடைய வாழ்த்துக்கள் என சொல்லி சிறிய பற்கள் வெளியே தெரியும்படி புன்னகையுடன் வழியனுப்பி வைத்தாள் .மிக்க நன்றி டாக்டர் டிபானி என விடைபெற்றேன் .
  
    எப்போதும் பரபரப்பாக இயங்கிய எனக்கு பணிக்கு செல்லாமல் குளிரூட்டிய அறையில் முடங்கி கிடப்பது என்பது பெரும் தண்டனையாக இருந்தது . லோகேஷ் மூன்று வேளையும் உணவு கொண்டு தருவான். பகலில் தூங்குவதால் ,உறக்கமற்ற இரவுகளாக கழிந்தது .
   
   ஐந்தாவது நாளே என்னால் இனி முடங்கி இருக்க இயலாது இயன்ற சிறு பணிகளை செய்கிறேன் என சென்றுவிட்டேன்.விரைவிலேயே குணமடைந்துவிட்டேன் .

  ஒருமுறை அடுமனையில் வேலைசெய்யும் சமையற்காரன் ஒருவன் கூர்மையான கத்தியை கையில் வைத்து விளையாட்டாய் சுற்றும்போது மோதிரவிரலின் கீழே சதை துண்டாகி ரத்தம் பீச்சியடித்தது .ரத்தத்தை பார்த்த மானேஜர் ஆலன் குக் எதோ விபரீதம் என நினைத்து ராணுவ ஹெலிகாப்டரை வரவழைத்து அவனை உடனே ஈகிள் நெஸ்ட் முகாமுக்கு அனுப்பிவைத்தார் .

    அவன் அங்கு ஒருநாள் தங்கி சிகிச்சை திரும்பி வந்தான் .விளையாட்டு வினையானது என சிரித்துக்கொண்டே சொன்னான் .எங்கூர்ல நாய் விளையாட்டு கூரையை பிய்க்கும் என சொல்வதுண்டு .

     பராமரிப்பு பணியில் இருந்த ஒருவன் சுடுநீர் கொதிகலனை பழுதுபார்க்க திறந்தபோது எதிர் பாராமல் கொதிக்கும் நீர் அவன் உடல் முழுதும் கொட்டிவிட்டது .தலைக்கு கீழே வெந்து போய்விட்டது .
  
 அவன் முதலில் என்னுடன் திக்ரித்ல் சிறிது காலம் பணிபுரிந்து வேறு முகாமுக்கு மாற்றலாகி சென்றிருந்தான் .ஆபத்தான நிலைமையில் இருந்த அவனை முதலுதவி சிகிட்சை அளித்து ,அவனது உயிர் காக்க எங்கள் நிறுவனம் ஒரு சிறிய தனி விமானத்தை வாடகைக்கு அமர்த்தி பாக்தாத்திலிருந்து ஜோர்டானின் அம்மான் நகரம் கொண்டு சென்றது .அங்கு கிடைத்த உயர் சிகிச்சையில் அவன் பிழைத்துகொண்டான் .
 தனி விமானம் என்பது மிக அதிக செலவு .அவன் வேறு நிறுவனத்தில் இருந்திருந்தால் ..............நினைத்தே பார்க்க முடியாது .

ஷாகுல் ஹமீது
05-11-2016

Sha260@yahoo.co.in

Wednesday, 2 November 2016

ஈராக் போர்முனை அனுபவங்கள் 19


                                                            ஓடிஸ்
                                
.
  ஓடிஸ்   அமெரிக்க ராணுவ வீரன் .  அரண்மனையின் உள்ளே எங்கோ தூரத்தில் இருக்கும் முகாமில் ஒரு இருபது பேரை கொண்ட குழுவில் ஒருவன் .

   தினமும் மாலையில் மட்டும் அவர்கள் குழுவுக்கு உணவு எடுத்து செல்ல வருவார் . .ஓடிசை போலவே பலரும் இதுபோல் தூரத்திலிருக்கும் குழுவுக்கு உணவு எடுத்து செல்வர் . உணவுகளை அடுமனையில் வாங்கிகொள்வார்கள்.எங்களிடம் வருவது அவர்களுக்கு வேண்டிய கோக் அல்லது பெப்சியை வாங்கி செல்ல .

   எங்களுடன் இருந்த விஜயகுமாருக்கும் ,ஒடிசுக்கும் ஒரு ஒப்பந்தம் .தினமும் தமிழில் சில வார்த்தைகள் சொல்லிகொடுப்பதும் ,ஒடிஸ் விஜயகுமாருக்கு ஸ்பானிஸ் சொல்லிகொடுக்கவேண்டும் என்பதே .  தினமும் பேசுவதால் நன்கு பழகியிருந்தோம் ஓடிசுடன்.
 
    சனிக்கிழமைகளில் அங்குள்ள மனமகிழ் மன்றத்தில் நடக்கும் சல்சா டான்சில்  ஆண்களும் ,பெண்களும் ஜோடியாக ஆடுவார்கள் .தனியாக சென்றாலும் ஜோடி கிடைத்துவிடும் .யாரும் யாருடனும் ஜோடி சேர்ந்தால் ஆடலாம் சிலர் சில சமயங்களில் ஜோடி கிடைக்காமல் தனியாக ஆட்டத்தை தொடங்குவர் பெரும்பாலும் ஆட தொடங்கிய சில நிமிடங்களில் ஜோடி சேர்ந்துவிடும்  .


   எங்களுடன் வேலைசெய்தவர்களில் ஏழெட்டுபேர் இரவு 9 மணிக்கு பின்  பணி முடித்தபின் 3 கிலோமீட்டர் தூரத்தில் இருக்கும் மனமகிழ் மன்றத்திற்கு வண்டியில் செல்வர்.அதில் விஜயகுமாரும் ஒருவன் .

     ஓரு சனிக்கிழமையில்  சல்சா ஆட்டம் பார்க்கபோய்விட்டு  வந்த மறுநாள் மாலையில் ஓட்டிஸ் வந்தபோது .விஜயகுமார் ஓட்டிசிடம் .நீ நேற்று ஆட்டிகொண்டிருந்ததை பார்த்தோம் .ஏன் தனியாக ஆடினாய் அவளுடன் சேர்ந்து ஆட வேண்டியதுதானே என அங்கே ஆடின ஒரு அழகான ஒருத்தியை குறித்து கேட்டான் .அவளுடன் ஜோடி சேர பலர் கனவுகளுடன் இருக்கிறார்கள் என .


    விஜயகுமார் சொன்ன அந்த வீராங்கனை பேரழகி .அவளின் பெயர் பலரின் நினைவிலிருந்து அகலாதது .குறிப்பிட்ட அந்த அழகிய பெண் மாலையில் உணவு கூடத்திற்கு  வரும்போது அவளை பார்ப்பதற்காகவே இளைஞர் கூட்டம் ஒன்று  உணவு கூடத்தின் வெளியே காத்து கிடப்பார்கள். புகைத்து கொண்டும் ,கை கடிகாரத்தில் மணியை பார்த்துக்கொண்டும் சுத்தி சுத்தி வருவர் .


    அவள் ஐந்தடிக்கு மேல் உயரம் ,நல்ல நிறமும் ,கொஞ்சம் தென்இந்திய முகச்சாயல் கொண்ட அழகுடையவள் ,இயல்பான புன்னகை  எப்போதும்  இதழ்களில் இருக்கும் இருபது அல்லது இருபத்திரண்டு வயதை கொண்ட அழகு மங்கை .
    

   ஓடிஸ் விஜயகுமாரிடம் சொன்னான் ஐ யாம் எ பாமிலி மேன் என . எனக்கு குடும்பம் இருக்கிறது .நான் மற்ற பெண்களுடன் இடுப்பில் அணைத்து ஒட்டி ,உரசி ஆட என்னால் முடியாது என்றான் .நாங்களெல்லாம் வாயடைத்து நின்றோம்.பெரும்பான்மையானவர்கள் கிடைக்கும் வாய்ப்பை பயன்படுத்தி கொண்டிருப்பதை நாங்களே கண்ணால் பார்த்துகொண்டிருக்கும் போது .கொஞ்சமும் சுய ஒழுக்கம் தவறாத ஒருவனும் இருக்கிறான் என்பதே எங்களனைவருக்கும் ஆச்சர்யம் .
  


   அடுத்த சில நாட்களில் ஓடிஸ் விடுமுறையில் ஊருக்கு செல்கிறேன் .ஒரு மாத விடுமுறை .பின்னர் நாம் சிந்திப்போம் என்றான் .நான் இங்கு வரும்போது என் மனைவி நிறைமாத கர்ப்பிணியாக இருந்தாள்.என் குழந்தையை முதன்முதலாக பார்க்க போகிறேன் என மகிழ்ச்சியுடன் எங்களிடம் விடைபெற்றான் .

  
     உடன் வந்த வேறு ஒருவரை காட்டி இவன் தான் நாளை முதல் வருவான் எங்கள் குழுவில் இருக்கிறார் .என்னை போலவே இவரையும் சிறப்பாக நடத்துங்கள் என வேண்டினான் ஓடிஸ்.  நான்,முருகன், விஜயகுமார் மனதார வாழ்த்தி வழியனுப்பி வைத்தோம். ஓட்டிஸ் சென்ற பின் விஜயகுமார் சிலரிடம் அமிகோ ,கெப்பாச என சில நாட்கள் சொல்லிகொண்டிருந்தான் .யாரும் அவனுக்கு ஸ்பானிஷ் சொல்லிதரவில்லை .ஆனால்  அவனிடம் சிலர் தமிழ் கற்றுகொண்டிருந்தனர்.


   சரியாக ஒருமாதத்தில் ஓடிஸ் திரும்பி வந்தான் .விடுமுறை முடிந்ததும் சரியாக போர்களத்திற்கு அனுப்பிவைத்துவிடுவார்கள்போல .அன்று மாலை ஓடிஸ் மிக உற்சாகமாகத்தான் இருந்தான் .விஜயகுமாரை கண்டதும் ஸ்பானிஷ் இல் இருவரும் உரையாட தொடங்கினர் .


   முருகன் பாய் ஒரு மாசம் இவங்க தொந்தரவு இல்லாம இருந்தது தொடங்கிட்டாய்ங்க இப்ப என சிரித்தான் .

   ஓடிஸ்  எங்கள் அனைவரிடமும் புன்னகையுடன் கைகுலுக்கி  நலம் விசாரித்தான்.விஜயகுமார் இப்போது நீ சொல் நண்பா என கேட்டான் .எப்படி இருக்கிறாய் என .

   ஒரு குட் நியூஸ் ஒரு பேட் நியூஸ் .முதலில் நான் நல்ல செய்தியை சொல்கிறேன்.எட்டு மாதங்களுக்கு பின் என் குழந்தையை நான் பார்த்தேன் சந்தோஷமான நாள் அது .

  குழந்தையின் பொக்கை வாய் சிரிப்பும் ,அவன் சென்ற சில நாட்களுக்கு பின் அவனை பார்த்ததும் குழந்தை தந்தையை அடையாளம் கண்டு கொண்டு சைகையால் அவனிடம் தூக்க சொன்னதையும் ,குழந்தையுடன் குழந்தையாகவே மாறி அவன்  விளையாடி மகிழ்ந்ததையும் சொல்லி சிரித்தான் .
 
  
   குழந்தையுடன் விளையாடி மகிழ்ந்ததை அவன் சொல்லும்போது அவனது உடல்மொழியும் ,முக பாவனையும் அவன் அனுபவித்ததை எங்கள் கண்முன்னே காட்சியாக்கியது .

   அடுத்து பேட் நியூஸ் என்றான் .என் மனைவி இப்போது என்னுடன் இல்லை.நான் செல்லும்போது அவள் அவளுடைய புது காதலுடன் வீட்டின் உள் அறையில் இருக்கிறாள் என்றான் .



  அதை கேட்ட எங்களுக்கு நம்பவே இயவில்லை .முருகன் என்ன பாய் இது கூறு கெட்ட கலாச்சாராமா  இருக்கு .இவன் அநியாத்துக்கு நல்லவனா இருக்கான் .எங்கூர்ல ன்னா அப்பவே வெட்டி போட்டுருவாய்ங்க .முருகா அவங்களுக்கு இது சாதாரணம் என்றேன் .

  ஆமா இங்க உள்ளதுல அந்த செண்டு கிழவி மட்டும் தான் இனி கல்யாணம் செய்ய பாக்கி என சொல்லி சிரித்தான் .

  தினமும் உணவு கூடத்தில் பணியிலிருக்கும் ஒரு வயதான தோற்றமுடைய பெண்மணி ,தூரத்தில் வரும் போதே முருகன் சொல்வான் செண்டு கிழவி வருகிறாள் என ,அவ்வளவு உயர்ந்த வாசனை திரவியத்தை எப்போதும் உபயோக்கிப்பாள் .

   எங்களால் ஓடிசுக்கு  ஆறுதலாக எதுவும் சொல்ல முடியவில்லை .அடுத்து வந்த நாட்களில் ஓடிஸ் இயல்பாக இருந்தான் .விஜயகுமாருடன் ஸ்பானிஷ் பேசி தமிழ் கற்றுகொண்டிருந்தான் .
  02-11-2016,
ஷாகுல் ஹமீது .

Sha260@yahoo.co.in

Saturday, 29 October 2016

ஈராக் போர்முனை அனுபவங்கள் 18


          முந்தைய  பதிவான 16,17 பெயர் மாற்றியிருக்கிறேன் .தோழி ஒருவரின் வேண்டுதலுக்கிணங்க .
      ஆனால்   அதற்க்கு முந்தைய பதிவுகளிலும் எழுதும் போதே சில பெயர்களை மாற்றித்தான் எழுதியிருந்தேன் என்பதை அனைவருக்கும் தெரிவித்துகொள்கிறேன் .யாரையும் புண்படுத்துவது நோக்காமல்ல என்பதையும் தெரிவித்துகொள்கிறேன் .

  முகாமில் நடந்த விருந்து        
 கோடையில் இங்கு கடும் வெப்பம் இருக்கும் .அதிகபட்சம் 46 டிகிரி வரைக்கும் செல்லும் .கண் கண்ணாடி இல்லாமல் வெளியே வரவே இயலாது.மே மாதம் முதல் செப்டம்பர் வரை கோடை .சூரியன் அஸ்தமம் 9 மணிக்குமேல் .மாலை நேர மகஃரிப் தொழுகை அதன் பிறகுதான் .இரவு நேர இஷா தொழுகை இரவு பத்து மணிக்கு மேல் .


       அக்டோபர் மாதம் தட்பவெப்ப நிலை நன்றாக இருக்கும் .டிசம்பரில் -2 டிகிரி வரை செல்லும் நல்ல குளிர்  .ஊரில் அதிக வெயிலை பார்த்ததே இல்லை அதிகபட்சம் 34-37 தான் எங்களூரில் .குளிர் தெரியவே தெரியாது .


   நல்ல குளிரில் ஒருநாள் ராணுவ வீரன் ஒருவர் என்னிடம் கேட்டார் உங்களூரில் இவ்வளவு குளிர் இருக்கிறதா என.குளிரே தெரியாது எங்களுக்கு என்றேன் .நான் இந்தியாவின் தென்கோடியில் வசிப்பவன் அங்கு நிலவுவது ஒரு மித சீதோஷ்ணநிலை .குறைந்தபட்சம் 22 டிகிரியும்  (டிசம்பரில்) அதிகமாக  35 டிகிரியும்  (மே யில் ) இருக்கும் .வட இந்தியாவில் கோடையில் அதிக வெப்பமும் 46 டிகிரியும் குளிர் காலத்தில் 0 டிகிரி வரையும் இருக்கும் என்றபோது .ஆச்சரியத்துடன் நீ வாழும் தென்கோடி முனை ...... கொடுத்து வைத்தவர்கள் என்றான் .


    திக்ரித் ல் குளிர் துவங்கும் முன் நாம் ஒரு பார் பி கியூ(BBQ) பார்ட்டி நடத்தலாம் என்றார் மானேஜர்  ஆலன் குக். எங்களிடம் இருப்பது அனைத்தும் பதபடுத்தபட்ட உணவுவகைகள்  பார்ட்டிக்காக புதிய இறைச்சிகள் சமைக்கலாம் என்ற  யோசனை ஏற்றுகொள்ளபட்டு.எங்கள் முகாமில்  தின கூலிகளாக வேலை செய்கின்ற உள்ளூர்காரன்  ஒருவனிடம் இரண்டு ஆடுகளின் இறைச்சி வேண்டும் உன்னால் கொண்டு தர முடியுமா என கேட்டார் .ஆலன் குக் சொன்னதை எங்களில் ஒருவன் அரபியில் அந்த ஈராக்கிக்கு மொழி பெயர்த்து சொன்னான் .


     மறுநாள் காலையில் அந்த இராக்கி  வரும் போது ம்மே, ம்மே என சப்தத்துடன் கையில் கயிறுகளை பிடித்திருந்தான்  இரண்டு ஆடுகள் அவனுடன் வந்து கொண்டிருந்தது .


   ஆடுகளை முகாமில் உள்ள ஒரு ஆலிவ் மரத்தில் கட்டினான் .ஆடுகளின் சப்தம் கேட்டு ஆலன் குக் வந்துதும் என்ன என கேட்டுவிட்டு வாய்விட்டு சிரித்தார் .

   இரண்டு ஆட்டின் இறைச்சியை கேட்டால் ஆட்டையே கொண்டுவந்திருக்கிறாய் என கேட்டார் .அந்த ஈராக்கி என்னிடம் ஆடு தானே கேட்டீர் அதன் கொண்டுவந்தேன் என்றான் .

    சரி இன்று இதை கொண்டுபோய்விட்டு நாளை அறுத்து கறியை மட்டும் கொண்டுவா என்றார் .இம்முறை மொழி பெயர்க்க ஆலன் குக் வேறு ஆளை தேடினான் .முந்தையநாள் மொழி பெயர்த்தவனை எங்கும் தென்படவில்லை .

    மறுநாள் பாதியாக வெட்டப்பட்ட பீப்பாயில் (ட்ரம்)  கரியை போட்டு தணலாக்கி,இஞ்சியும் ,பச்சை மிளகாய்,பூண்டும் சேர்த்து அரைத்த கலவையுடன் ,கரம் மசாலா,மிளகு பொடி,    மஞ்சள்,வத்தல்,கொத்தமல்லி,ஜீரகபொடிகளை,ஆலிவ் எண்ணையுடன் உப்புசேர்த்து காலையிலேயே ஊறவைத்திருந்த  புத்தம் புதிய இறைச்சியில் மட்டன் கபாப் ,மட்டன் சுக்கா என ஏதோதோ செய்து ஒவ்வொருவரும் அவர்கள் விரும்பியதை சுடச்சுட வேகவைத்தும்  சாப்பிட்டனர் .


  அனலென ஆரஞ்சு சிவப்பில் உள்ள தணலில் கைகளில் உள்ள மயிர்கள் கருகாமல் இறைச்சியை பதமாக வேகவைப்பது சிலருக்கு மட்டுமே இயலும்.நல்ல பொறுமை வேண்டும் அதற்க்கு .தணலின் மேலே இருக்கும் மெல்லிய இரும்பு ஜாலியின் மேல் இறைச்சியை வைத்துவிட்டு விலகிசென்றால் மேற்பகுதி கரிந்துவிடும் .உள்ளே வேகாமல் பச்சையாக இருக்கும் .

    அருகிலேயே  நின்று நீளமான கம்பியால் அல்லது இடுக்கியால் கைகளில் சூடு கொள்ளாதமுறையில் ,புரட்டி ,திருப்பி ,மறித்து வைத்துக்கொண்டே இருக்கவேண்டும் .அப்போதுதான் கருகாமலும் ,முறுகாமலும் சாப்பிட பதமான வகையில் வெந்து கிடைக்கும் சுவை நாவை அதற்க்கு அடிமையாக்கிவிடும் .

  இறால் ,மீன் போன்றவற்றை அப்படியே வைத்து வேக வைக்க முடியாது ,சில்வர் பாயிலில் பொதிந்து நீண்ட நேரம் குறைவான வெப்பமுள்ள ஒரு மூலையில் வைத்து எடுத்தால் அதன் சுவையே தனி .தனக்காகவும் ,பிறருக்காகவும் ருசியாக, அன்பு கலந்து சமைப்பது ஒரு தனி திறமை . எனது வாப்பும்மா*,அரிசியை உலை வைக்கும் போதும் ,முறுக்கு சுடும்போதும் ,வாய் பேசாமலும் ,சின்ன குழைந்தைகள் அருகில் இல்லாமலும் பார்த்துகொள்வார்கள்.சமைப்பதை ஒரு தியானம் போல செய்வார்கள் .

   ஒவ்வொரு சமையல் கலைஞனும் தன் திறமையை காட்ட விதவிதமான  உணவுவகைகள் செய்திருந்தனர் , ஆவியில் வேக வைத்து உப்பும் ,மிளகு தூளும் தூவப்பட்ட மீன்,கேரள பாணியில் தேங்காய் வறுத்து அரைத்து செய்த மீன் குழம்பு ,சோழ மாவு தடவிய இறால் பொரித்தது ,இளம் கோழியின் ஒரே அளவிலான தரம்பிரிக்கபட்ட கால் துண்டுகளை மிதமான காரத்துடன் பொரித்தது,கணவாய் மீன்களை துண்டுகளாக வெட்டி அதை சில்வர் பாயிலில் பொதிந்து தணலில் இட்டு வேகவைத்தது என  .

    வடஇந்திய நண்பன் செய்த புலாவும் ,சப்பாத்தியும்,ஆலு பரோட்டாவும், பருப்புகறியும் ,சிறு துண்டுகளாக வெட்டிய ஆப்பிள் பழத்துடன்,மெல்லிசாக சீவிய காரட்,உலர் திராட்சை ,மையோனஸ் சேர்த்து செய்த கோல் சிலா எனும் சாலடுடன் அனைவரும் இன்முகத்துடன் சாப்பிட்டனர் .உடன் பணிசெய்த அனைத்து அதிகாரிகளும் ,உணவு கூடத்தில் பணியிலிருக்கும் ராணுவ வீரர் ,வீராங்கனைகளும் ஒன்றாய் அமர்ந்து கதைகள் பேசி இரவு பதினோரு மணிவரை நீண்டது  அந்த விருந்து .

  அனைவருக்கும் அது ஒரு நிறைவான ஒரு அனுபவத்தை அளித்தது .அந்த அனுவபவம் மனதிலிருந்து விலகும்முன் அடுத்த மாதம் எங்களுடன் இருந்த கலீல் பாய் ,அவரது மகள் சம்ரீனின் பிறந்தநாளை கொண்டாடினார் .முந்தையதைபோலவே அனைவரும் கலந்துகொண்ட விருந்து அது. இம்முறை உணவு வகைகள் உணவு கூடத்தில் செய்திருந்தோம் .
* வாப்பும்மா =தந்தையின் தாய் (பாட்டி ) 

  ஷாகுல் ஹமீது .

30-10-2016

Sunday, 23 October 2016

ஈராக் போர்முனை அனுபவங்கள் 17


நட்பை விலக்கி சென்ற பாயல்


       எங்கள்  முகாமில் ஆன்றனி என ஒரு கோவாவை சேர்ந்த சைக்கோ ஒருவன் இருந்தான் .கார்த்திக்கிற்கு ஒருநாள் அவனுடன் கொஞ்சம் வாய்த்தகராறு .ஆன்றனி கொஞ்சம் குடித்திருந்தான் .போர்முனையில் மது அனுமதிஇல்லை தான்.இருந்தாலும் கழிப்பறை சுத்தம் செய்ய வரும் ஈராக்கி டாங்கர் லாரி ஓட்டுனர் வாயிலில் உள்ள கடும் சோதனையை தாண்டி தினமும் சில மது பாட்டில்களை உள்ளே கொண்டு வந்துவிடுவான் .

  தகராறு நீண்டபோது  ஆன்றனி போதையில் நீங்கள் தினமும் மிலிட்டரி பொம்பளைய உள்ள வெச்சி மணிக்கணக்காக பேசிகொண்டிருக்கிறீர்கள் என்றான் .கார்த்திக் அவனை கெட்ட வார்த்தையால் திட்டினான் .ஆம் நாங்கள் பேசுகிறோம் சில நேரங்களில் நீங்களும் பலர் வந்து பேசுகீறீர்கள்.அது பொது இடம் அதில் என்ன தப்பு என தகராறு நீண்டு விட்டது .
       அவன் வெறுப்பில் ஏதோதோ திட்டினான் மற்ற கோவா அன்பர்கள் எங்களிடம் அவனுடன் பேசாதீர்கள் என சொல்லிவிட்டு அவனை அழைத்து சென்றனர் .அதன் பிறகு மீண்டும் போதை ஏற்றியவன் தன் கைகளில் கத்தியால் கிழித்து கொண்டான் .
   ஆன்றனி  இரவில் ஒரு மணிக்கு மானேஜர் டெர்ரி ஆண்டேர்சனின் அறை கதவை தட்டினான் .நள்ளிரவில் பதட்டத்துடன்  டெர்ரி ஆண்டர்சன் கதவை திறந்தவுடன் ஐ வான்ட் டு டாக் டு யு என்றான் ஆன்றனி . என்ன சொன்னான் என்றே தெரியவில்லை .கைகளில் காயத்தை பார்த்தவர் அவனை அடுமனைக்கு கொண்டு சென்று விசாரித்துவிட்டு அவனை கூடாரத்திற்கு செல்லும்படி எச்சரித்து அனுப்பினார் .
     மறுநாள் டெர்ரி ஆண்டெர்சன் என்னிடம் .நீங்கள் இனி அந்த ராணுவ வீராங்கனையை கூடாரத்திற்குள் அனுமதிக்க கூடாது என்றார் .உள்ளே அனைவரும் ஆண்கள்  அதனால் வெளிய சந்திக்கும் போது  பேசிக்கொள்ளுங்கள் என்றார் .

    அப்போதுதான் தெரிந்தது ஆன்றனி மட்டுமல்ல மற்ற சிலரும் பாயல் எங்களுடன் பழகியதில் ,பொறாமையும் ,எரிச்சலும் கொண்டிருந்தனர் என.மனித மனம் அப்படித்தான் இருக்கிறது .எப்படி இனிமேல் பாயலிடம் எங்கள் கூடாரத்திற்கு வராதே என சொல்வது என இருந்தபோது,  கார்த்தி என்னிடம் கேட்டான் ஷாகுல் பிரதர் எப்படி அக்காட்ட சொல்ல போறீங்க என கேட்டான்.நீயே சொல் என அவன்  என்னிடம் சொல்லாமல் சொன்னான். கார்த்தி விடுமுறையில் ஊர் செல்லும் நாளாக இருந்தது மறுநாள் .

      அடுத்த சில தினங்கள் பாயல் வராததால் மனம் கொஞ்சம் லேசாகியிருந்தது .பலமுறை சொல்ல வேண்டிய வார்த்தைகளை மனதுக்குள்ளேயே சொல்லி பார்த்துக்கொண்டேன் .இது போன்ற சூழ்நிலைகளில் கால அவகாசம் கிடைப்பதும் நன்றே .பின்பு சந்தித்த போது நடந்த ஆன்றனி,கார்த்திக் சண்டையையும் ,கூடாரத்திற்குள் நீங்கள் வரக்கூடாதென மானேஜர் சொல்லியதையும் சொன்னேன் .என் தலை கவிழ்ந்தே இருந்தது சொல்லும்போது  அவள் விழியை என்னால் சந்திக்க இயலவில்லை .
   
  பின்பு அக்கா என்றழைத்து அவள் முகத்தை பார்த்தேன் .அவள் முகத்தில் எந்த சலனமும் இல்லை .சாதரணமாகத்தான் இருந்தாள்.அன்று அது பகல் பொழுது போய் வருகிறேன் பின்னர் சிந்திப்போம் என சொல்லிவிட்டு சென்றாள்.
   அடுத்த சில தினங்களுக்கு பிறகு வந்து மீண்டும் கூடாரத்திற்குள் வந்து அமர்ந்து பேசிகொண்டிருந்தாள் .எப்போதுமே வராத டெர்ரி ஆண்டர்சன் உள்ளே வந்தார் .எதுவும் சொல்லாமலே சென்றுவிட்டார் .அடுத்த ஐந்தாவது நிமிடத்தில் உணவுகூடத்தில் பணியில் இருக்கும் ஒரு ராணுவ வீராங்கனையுடன் வந்தார் .அவள் பாயலிடம் நீங்கள் கூடாரத்திற்குள் வருவதை தவிருங்கள் என நாகரீகமாக சொன்னாள்.இங்கே அனைவரும் ஆண்கள் என.

   அதை சற்றும் எதிர்பாராத பாயல் உடனே எழுந்து சென்றுவிட்டாள் .மனம் வலித்திருக்கும் ,கவலைபட்டிருப்பாள்.எங்களுக்கும் அது சற்று கடினமாகி விட்டது .மறுநாள் இரவுஉணவின் போது சந்தித்த போது பாயலின் முகத்தில் அந்த வலியும் ,கவலையும் தெரிந்தது .இருந்தாலும் பொய்யாக சிரித்துகொண்டே பேசினாள் .ஐ யாம் ஓகே என்றாள் .

     உங்கள் மானேஜர் பெண் மட்டும் உள்ளே வரக்கூடாது என்கிறார்.ஆனால் பலர் கூடாரத்திற்குள் நீல படம் பார்க்கிறார்கள்.முகாமில் பலர் திருட்டுதனாமாக மது அருந்துவதும் ,எல்லைமீறி நடப்பதையும் ஏன் உங்கள் மானேஜர் ஒன்றும் கேட்பதில்லை என கேட்டாள்.

      தீடிரென வரக்கூடாது என்றதில் மிகுந்த வருத்தமும் ,கவலையும் இருந்தது .அதன் பின் எப்போது உணவு கூடத்திற்கு வந்தாலும் ஒரு சில நிமடங்களாவது சந்தித்து பேசிவிட்டு செல்வது வழக்கம் .
    ஒருநாள் தன்னுடன் பணிபுரியும் மூத்த அதிகாரி ,உடன் பணிபுரிந்த பெண்ணுடன் வந்து சாப்பிட்டு கொண்டிருந்தவர்களை நான் அவர்களிருந்த மேஜையில் சென்று சந்தித்தேன் .அவர்களை எனக்கு அறிமுகம் செய்து வைத்தாள் .திஸ் இஸ் ஷாகுல் மை க்ளோஸ் பிரன்ட் என அவர்களிடம் சொன்னாள் .

   அதன் பின் சில தினங்களுக்கு பின் இரவு உணவுக்கு வந்த பாயல் ஷாகுல் சாப்பிட்டபின் உன்னிடம் நான் கொஞ்சம் பேச வேண்டும் .உணவு கூடத்திற்கு வெளியே என்னை கண்டிப்பாக சந்திக்கவும் என்றாள் .

   உணவு கூடத்திற்கு வெளியே மேசையுடன் கூடிய மர நாற்காலிகள் இருக்கும் அதில் அமர்ந்திருந்தேன்.இரவுணவு சாப்பிட்டு வந்த பாயல் என்னருகில் நாற்காலியில் அமர்ந்து கொண்டாள்.ஷாகுல் நாளை முதல் என்னை சந்திப்பதையும்,பேசுவதையும் நிறுத்திவிடு என்றாள் .எனக்கு அதிர்சியாக இருந்தது .

       எதுவும் கேட்க தோன்றவில்லை தலையசைத்து விட்டு நேராக குடியிருப்பு கூடாரத்திற்கு சென்று விட்டேன் . அங்கிருந்த ஒருவன் என்னிடம் கேட்டான் ஷாகுல் என்னாச்சி என .ஏன் என கேட்டேன் உன் முகம் மாறி இருக்கிறதே எப்போதும் நீ சிரித்த முகத்துடன் இருப்பதை தான் நான் பார்த்திருக்கிறேன் என்றான் .ஒன்றும் இல்லை என்றேன் .
   எப்படி கண்டிபிடித்து விட்டான் என தோன்றியது .முகம் மாறியிருந்தால் தாய் விரைவில் கண்டுபிடித்து விடுவாள். இப்போது சுனிதாவும் என்ன சாரே மூஞ்சி சரியில்லையே என்னாச்சி என .
  ஏன் அப்படி சொன்னாள் என யோசித்தேன் ஒரு காரணமும் புரியவில்லை.லோகேஷிடம் சொன்னேன் பாயல்  நாளைமுதல் ,பேசேவோ ,பார்க்கவோ வேண்டாம் என சொல்லி விட்டாள் என .ஏன் என கேட்டான் .தெரியாது என்றேன் .
    
  அடுத்தமுறை பாயல் வரும்போது அவளிடம் கேட்டு விடவேண்டும் என நினைத்துக்கொண்டு தூங்கிவிட்டேன் .மறுநாள் இரவில் பாயலை பார்த்தேன் சாப்பிட்டுவிட்டு வாருங்கள் நான் உங்களுடன் பேச வேண்டும் என்றேன் .

   முந்தைய நாள் இருந்த அதே மர நாற்காலியில் அமர்ந்திருந்தேன் .ஷாகுல் சொல் என்ன விஷயம் என கேட்டாள் .ஏன் இப்படி தீடிரென பார்காதே ,பேசாதே என்கிறீர்கள் என்றேன் .
  
    மழுப்பலான காரணங்களை அடுக்கினாள் எதற்காகவோ தவிர்க்கிறாள் என புரிந்து கொண்டேன்.இன்று தான் கடைசி இனிமேல்  எப்போதும் உங்கள் முன்னால் வரமாட்டேன் என சொல்லி விடைபெற்றேன் .
   கார்த்தி விடுமுறை சென்று வந்ததும் கேட்டான் அக்கா எப்படி இருக்கிறாள் என .விபரங்களை கூறினேன் .அன்று உணவு கூடத்தில் உணவு வழங்கிகொண்டிருந்த கார்த்திக்கிடம் .எப்போது வந்தாய் ,நலமா என பாயல் விசாரித்தபோது .கார்த்தி பதிலேதும் சொல்லவில்லை .
    நான் கார்த்திக்கிடம் சொன்னேன் .நீ அவளிடம் பேசு என்னிடம் தானே பேசக்கூடாது என்றாள் என்றேன் .ஷாகுல் உன்னால தான் அந்த நட்பு கிடைத்தது  உனக்கே இல்ல இப்ப .நான் மட்டும் ஏன் பேச வேண்டும் என்றான் .
 
   பாயலின் நல்ல நட்பு இப்போது ஒரு நினைவாக மட்டுமே எஞ்சி விட்டது .அதன் பின் ஈராக்கின் பணி முடிந்து அமரிக்கா செல்லும் போது கார்த்தியை சந்தித்து விடை பெற்று சென்றாள்.

  அதன் பின் நான் ஊர் வந்து என் திருமணதிற்கு முன் என் திருமண அழைப்பிதழையும்,திருமணதிற்க்குபின் மனைவியுடன் எடுத்த புகைப்படத்தையும் பாயலுக்கு மின்னஞ்சல் செய்ததேன் .ஒரு வாழ்த்து கடிதம் மட்டும் அனுப்பினாள் .

  

  பாயல்  அவளாகவே வலிய வந்து பழகியவள் ,நட்பை அவளாகவே வளர்த்துகொண்டாள் .அதுபோலவே விலகியும் சென்று விட்டாள்.



ஷாகுல் ஹமீது ,
23-10-2016

Saturday, 22 October 2016

ஈராக் போர்முனை அனுபவங்கள் 16


பாயல்


      ஒருநாள் நாங்கள் இரவு உணவின் போது    சாப்பாத்தி சாப்பிட்டு கொண்டிருந்தோம் .அப்போது அமெரிக்க ராணுவ உடையில் வந்த ஒரு இந்திய பெண்  சப்பாத்தியா நான் கொஞ்சம் சாப்பிடலாமா? என கேட்டு விட்டு பதில் கிடைக்கும் முன் உரிமையுடன் தட்டில் இருந்த சப்பாத்தியை பிய்த்து சாப்பிட்டுவிட்டு நன்றி என்றாள்  .

    அமெரிக்கபடையில் நிறைய இந்திய வம்சாவளியினர் இருந்தனர் .சிலருக்கு இந்திய மொழிகளும் தெரிந்திருந்தது .  எங்களது முகாமில் நாங்கள் சென்று இரு மாதங்களுக்கு பின் சந்தித்து தோழியான பெண் பாயல் ..

   பாயல் தான் எங்களில் ஒருவனிடமிருந்து சப்பாத்தியை பிய்த்து சாப்பிட்டது .அன்று தான் முதல் சந்திப்பு .எதுவும் பேசிக்கொள்ளவில்லை நன்றி என சொல்லிவிட்டு வேகமாக சென்றுவிட்டாள்.

    மெக்ஸிகோவில் பிறந்த வீரர்கள் சிலர் நம்மை போல கொஞ்சம் காரம் சாப்பிடுபவர்கள்.மெக்ஸிகோவின் தட்பவெப்ப நிலை தமிழ்நாட்டை போலவே இருக்கும் .அதனால் அதில் சிலர் எங்களிடம் நட்பாகி எங்களுக்கு என சமைக்கப்படும் கறியை வாங்கி செல்வார்கள் .எங்கள் சமையல்காரர்களும் இன்முகத்துடன்  அவர்களுக்காக தனியாக எடுத்து வைத்து அவர்கள் வரும் வேளையில் கொடுப்பார்கள் .

    சிலர் தமிழில் கோளி கொலம்பு நல்லா இர்க்கு நன்டி என சொல்லி செல்வர் .சில தினங்களுக்கு பிறகு மீண்டும் உணவு கூடத்தில் பாயலை சந்தித்தேன் .
   ஹாய் என்றாள்.
  இன்று சப்பாத்தி இல்லையா ,
 இல்லை  என்றேன் .
  சிரித்துகொண்டே தன்னை அறிமுகம் செய்துகொண்டு .இங்கு இவ்வளவு இந்தியர்கள் பார்ப்பதில் பெரு மகிழ்ச்சி என்றாள் .இந்திய கலாச்சாரத்தை நேரில் காணும் வாய்ப்பு இல்லாமல் இருந்தேன் .எனவே பழக ஆர்வமாயிருக்கிறேன் என்றாள்.இந்திய மொழி எதுவும் பேச தெரியாது என்றாள் ஆங்கிலத்தில் .வெல்கம் என வரவேற்றோம் .

    அடுத்த சில தினங்களில் நாங்கள் இரவுணவு சாப்பிடும்போது எங்களுடன் சேர்ந்து சாப்பிடுவதும் .ஒவ்வொருவருடைய ஊர் அது எங்கிருக்கிறது என்பன போன்ற நிறைய கேள்விகாளாக கேட்டுகொண்டே இருப்பாள் .எல்லாம் நிறைய விசயங்களை அறியும் ஆர்வ கோளாறுதான். இந்தியர்களையும் இந்திய கலாசாரத்தையும் பெருமையுடன் பேசிக்கொண்டிருப்பாள் .

     ஒருநாள் உணவை எடுத்து கொண்டு சாப்பிடும் மேஜையில் அமர்ந்துகொண்டு லோகேஷ் வருவதற்காக சாப்பிடாமல் காத்திருந்தோம் அப்போதும் பெருமையாக சொன்னாள். நண்பனுக்காக காத்திருக்கும் பண்பாட்டை .

    பாயல் பணியில் இருந்தது முக்கிய அரண்மனையில் .ராணுவ கமாண்டோ அங்கு தான் இருந்தார் .பாதுகாப்பு மிகுந்த இடம் நாங்கள் அங்கு செல்ல அம்னுமதியில்லை .

      பாயலிற்கு 24 மணிநேரம் தொடர்ந்து வேலையும்  பின் இரு நாள் முழு ஓய்வும் .பணியில் இருக்கும் நாளில் சாப்பிட வருவதில்லை .அவள் தங்கியிருக்கும் அறையில் மேலும் 5 ஆண்கள் தங்கி இருப்பதாகவும் .குளியலறையும் ,கழிப்பறையும் அவர்களுடன் பகிர்ந்து கொள்ளும் வகையில் இருப்பதாகவும் சொல்வாள் .

    பின்பு என்னுடனும் ,கார்த்திக்குடனும் மிக நெருங்கிய நட்பாகி விட்டாள் .தினமும் சந்தித்து உரையாட தவறுவதில்லை .இரவில் எட்டுமணிக்கு முன்பே வந்து விட்டால் .கார்த்திக் இரவு பணியிலிருப்பதால் 9 மணிக்கு தான் செல்லவேண்டும் .அதனால் நாங்கள் தங்கும் கூடாரத்தில்  அமர்ந்து அரட்டை அடித்து கொண்டிருப்பாள் .சீக்கிரம் பணி முடியும் நாட்களில் நானும் இணைந்து கொள்வேன் .
 
    மற்றவர்கள் பாயலின்  ரைபிளுடனும் ,அவளுடனும் புகைப்படம் எடுத்து கொள்வர் .அவளது தாய் மொழி குஜராத்தி .அவளுக்கு தெரிந்த  ஒரு சில குஜராத்தி   வார்த்தைகளில் குஜராத்தியர்களுடன் பேசி சிரிப்பாள்.பெங்காளி ஒருவனிடம் எனக்கு பெங்காலியில் ஒரே ஒரு வார்த்தை தெரியும் என்றாள்.  அமி துமிசே பாலே பாஷி  (ஐ லவ் யூ ).தன்னுடைய தோழியின் காதலன் பெங்காலி   என்பதால்.அந்த ஒரு வார்த்தை மட்டும் தெரியும் என இப்படி வயிறு வலிக்க   சிரித்த நாட்கள் பல .

   கூடாரத்தில் அமர்ந்து பேசிகொண்டிருக்கும் போது 9 மணிக்கு பகல் பணி முடிந்து நண்பர்கள் வந்து ஆடை மாற்றி ஜட்டியுடன் கூடாரத்தினுள் உலாவி கொண்டுதான் குளியலறைக்கு செல்வார்கள் பலர் .அதனால் 9 மணி நெருங்குவதற்கு முன்பே .அக்கா பசங்க வர நேரமாகிவிட்டது கிளம்பு என்போம் .பொறு இன்னும் ஐந்து நிமிடம் இருக்கிறது .இரவு பணியாளர் செல்லும் போது செல்கிறேன் என்பாள் .வலு கட்டயமாக கூடாரத்திலிருந்து வெளியேற்றுவோம் .
 
  சில நாட்களில் 9 மணிக்கு பிறகு கூடாரத்திற்கு வெளியே உள்ளே விளக்கு தூணின் கீழே நின்று பத்துமணி வரை பேசிக்கொண்டுதான் செல்வாள் .
   தன்னுடைய பணியிடத்தில் எந்த பிரச்னையும் இல்லை .என்னுடைய பாஸ் மிக நல்லவர் (மூத்த அதிகாரி ) .தங்குமிடத்தில் சில டார்ச்சர்கள் இருக்கிறது.என்னுடன் இருப்பவர்கள் அனைவரும் என்னைவிட கொஞ்சம் உயர் பதவியில் இருப்பவர்கள் எனவே நான் உங்களுடன் இருக்கும் நேரங்களில் மகிழ்ச்சியாக இருக்கிறேன், அதிகமாக உங்களுடன் தான் பேசுகிறேன் .ஷாகுல் என்பாள் .  

      அவளுக்கு திருமணம் ஆகியிருந்தது .கணவனை பற்றியும் ,ஈராக்கில் இந்தியர்களுடன் கிடைத்த நட்பை பற்றியும் அவரிடம் சொல்லி இருக்கிறேன் என்பாள் .தீபாவளியன்று எங்கள் அனைவருக்கும் வாழ்த்து சொல்லிவிட்டு, கார்த்திக் தீபாவளி சுவீட் எங்கே என கேட்டாள்.அவன் பதிலுக்கு சிரித்தான்.சிரித்தால் போதாது காரட் அல்வா எனக்கு வேண்டும் செய்து தா என்றாள் .கார்த்திக்கிற்கு அதை செய்ய தெரியாது .இருந்தாலும் சமாளித்தான்.

   விடவில்லை பாயல் காரட்டை சிறியதாக சீவ வேண்டும் ,நெய்யும் ,பாலும் வேண்டும் அவ்ளோ தான் .இதெல்லாம் இங்கே எளிதாக கிடைக்கிறதே .நான் நாளை சாப்பிட வருவேன் என்று சொல்லி சென்றாள்.
   அன்றிரவே கார்த்திக் ஏலக்காய்,நெய் மணம் வீசிய  நல்ல சுவையான காரட் அல்வா செய்து யாருக்கும் தெரியாமல் வைத்திருந்தான் .மறுநாள் பாயல் வந்த போது தான் அதை கொண்டு வந்து தந்தான். தனக்கு பிடித்த இனிப்பு காரட் அல்வா ,தீபாவளி தினத்தன்று அது கிடைத்ததில் பெருமகிழ்ச்சியடைந்திருந்தாள்.கார்த்திக்குடன் இருகைகளையும் குலுக்கி நன்றி கூறினாள் .
  ஒருநாள் வந்து கவலையுடன் அமர்ந்திருந்தாள்.இரண்டு நாட்கள் முகாமைவிட்டு வெளியே பயிற்சிக்காக செல்ல வேண்டியுள்ளது .முகாமில் இருப்பது தான் பாதுகாப்பு வெளியே செல்லும்போது தாக்குதல்களை எதிர் கொள்ள வேண்டும் .குறிப்பாக  ராணுவ வாகனங்களை குறி வைத்து தாக்குவார்கள் என சொன்னாள்.அடுத்த சில தினகளுக்கு நாம் சந்திக்க இயலாது போய் வருகிறேன்.மகிழ்ச்சியுடன் இருங்கள்  பை என சொல்லி விட்டு சென்றாள்.

    பாயலுடன் எங்கள் நட்பு மிக நெருக்கமாகி விட்டது .அவள் வரமுடியாத நாட்களில் பகல் பொழுதில் வந்து நாங்கள் பணியில் இருப்பதால் ஒரு ஹாய் மட்டும் சொல்லி சிரித்துவிட்டு செல்வாள் .
    அது குளிர் காலம் தொடங்கியிருந்த சமயம் .அப்போது ஒருநாள் காலை உணவுக்கு வந்தவள் என்னை சந்தித்து .ஷாகுல் குளிருக்கான வெப்ப ஆடைகளை அணிந்து வந்துவிட்டேன் .இப்போது ரொம்ப சூடாக இருக்கிறது எனக்கு ஆடை மாற்ற வேண்டும் என்னை உங்கள் தங்கும் கூடாரத்தினுள் அழைத்துசெல் என்றாள் .


    நீங்களே போகலாமே என் படுக்கை அருகில் மறைவான இடம் இருக்கிறது போய் வாருங்கள் என்றேன் .வேண்டாம் நான் தனியாக போவது சரியில்லை நீ என்னுடன் வா .இரவு பணி முடிந்த உன் அனைத்து நண்பர்களும் உள்ளேதான் இருப்பார்கள் .நான் மட்டும் தனியாக செல்வது ...........வேண்டாம் என்றாள் .நான் உள்ளே அழைத்து சென்று தள்ளி நின்று கொண்டேன்.ஆடை மாற்றியபின் ராணுவ சீருடையின் உள்ளே அணியும் வெப்ப ஆடையை என்னிடம் தந்து இங்கே வைத்துகொள் இரவில் சந்திக்கும்போது வாங்கிகொள்கிறேன் .மிக்க நன்றி என கூறி சென்றாள்.
ஷாகுல் ஹமீது ,

21-10-2016

Thursday, 20 October 2016

ஈராக் போர்முனை அனுபவங்கள்15


  கடும் தாக்குதலை  எதிர் நோக்கிய பதட்டம் நிறைந்த நாட்கள் .


      எதிர்பாராத விதமாக சாலை போக்குவரத்து நீண்ட நாட்களாக தடைபட்டுவிட்டது .உணவு வழங்குவதில் பெரும் சிக்கலை சந்தித்தோம். நாளுக்கு நான்கு வேளை உணவு வழங்கிவந்தோம், பசி என்பதை யாருமே அறிந்திருக்கவில்லை .ருசி மட்டும் தான் அனைவர் நாவிலும் இருந்திருக்கும்.


   பணியாளர்களுக்கு தடையின்றி உணவு கிடைத்தது.காலை உணவு இல்லாதபோது யாருக்கும் பெரிதாக தோன்றவில்லை.நிறைய பழங்களும், பாகெட்டுகளில் அடைத்த பழரசமும் ,பால் வகைகளும் நிறையவே எங்களிடம் இருந்தது .விரைவில் நிலைமை சீரடைந்துவிடும் என்றே எதிர் பார்த்தோம் . உணவு பொருட்கள் தொடர் பற்றாகுறையால் அடுத்த சில நாட்களில் நடுஇரவு உணவும் ,அதை தொடர்ந்து மதிய உணவும் ரத்தாகியது .எங்களுக்கும் மதிய உணவு கிடையாது .

   அமெரிக்க அரசால் ராணுவ வீரர்களுக்கு வழங்கப்படும் ஒரு பொட்டலம் தருவார்கள் அதனுள்  காற்று புகாத வகையில் ,ஒரு வருடம் வரை கெட்டு போகாத பதப்படுத்திய உணவுகள் சிறிய பொட்டலங்களில் இருக்கும் .


     பீப் ,ரைஸ் ,நூடுல்ஸ்,கேக் ,பன் ,பிஸ்கட் என பலவகைகளில்.ஒரு பாலிதீன் பையில் கொஞ்சம் ரசாயன பொடியும் இருக்கும் .அதில் வேண்டிய உணவு பொட்டலத்தை எடுத்து ரசாயன பொடி இருக்கும் பையில் கொஞ்சம் தண்ணீர் ஊற்றி உள்ளே வைத்தால் உணவு பொட்டலத்திலிருக்கும் ரைஸ் அல்லது நூடுல்ஸ் ஐ சூடாக சாப்பிடலாம் .

    அமெரிக்கர்களின் பெரும்பாலான உணவு வகைகளில் போர்க் பேக்கன் எனும் பன்றி இறைச்சி கலந்திருக்கும் .அதை அதில் எழுதபட்டிருக்கும் .நான் பெரும்பாலும் அதில் இருக்கும் பான் கேக் ஒன்றை எடுத்து கொள்வேன், நண்பர்களும் பான் கேக் அவர்களின் பாகெட்டுகளில் இருந்தால் எனக்கு தந்து விடுவர் .


    நாங்கள் இங்கு வந்து முகாம் தொடங்கும் வரையில்  ராணுவ வீரர்கள் நெடுநாட்கள் இதையே சாப்பிட்டு கொண்டிருந்தனர்.லோகேஷ் சொல்வான் பாய் இத சாப்புட்டு எப்படி இவனுக சண்ட போட்டானுவோ ?வயத்துல ஒரு மூலைக்கு தானே ஆச்சி இது .இப்பெல்லாம் இந்த கட்டு ,கட்டுறானுக என்பான். நாங்கள் வந்தபின்பு தான்  வித விதமாக நான்கு வேளை உணவு சாப்பிட ஆரம்பித்தனர் .(நடுஇரவு உணவு இரவு பணியில் இருப்பவர்களுக்குத்தான் .கூட்டம் குறைவாக தான் இருக்கும் அதிகபட்சம் 800 லிருந்து  900  பேர் வரை வந்து சாப்பிட்டு செல்வர்.)
  
     இரவு ஒருவேளை உணவு மட்டும் சமைப்பதால் பணியாளர்களுக்கு  வேலை  குறைந்து விட்டது.ஆனால் இரவு உணவின் எண்ணிக்கை முன்பைவிட ஆயிரம் அதிகரித்துவிட்டது .

   நான் பார்த்ததில் அமெரிக்கர்கள் நிறைய சாப்பிடுபவர்கள் .பீப் ஸ்டேக் ,டி போன் ஸ்டேக் என பெரியதும் , நீளமான  உணவு வகைகள் அவர்களுடையது . வீட்டில் கார்களும் பெரிதாக தான் வைத்திருக்கின்றனர் .

   அப்படி சாப்பிட்டு பழகிய அவர்களுக்கு கஷ்டமாக இருந்திருக்கும். எங்களின் குடியிருப்புக்கு அருகில் வேறு நிறுவனத்தை சார்ந்த பிலிப்பினோ பணியாளர்களின் குடியிருப்பு இருந்தது .நடுவில் ஒரு முள் வேலி மட்டும் தான் இருக்கும் .அவர்கள் முகாம்களில் வேறு பணிகள் செய்பவர்கள் .
   
     எங்களின் சாப்பாட்டுக்கான அரிசி தீர்ந்த போது அருகில் இருக்கும் பிலிப்பைன்ஸ் பணியாளர்களிடம் அரிசி தாராளமாக இருப்பதாகவும், அவர்களின் இறைச்சி வகைகள் தீர்ந்துவிட்டதாகவும் சொன்னார்கள் .
 
   தெனிந்தியர்களை போலவே பிலிப்பைன்ஸ் மக்கள் அதிகம் அரிசி சாதம் சாப்பிடுபவர்கள் .எங்களின் மானேஜர் ஆலன் குக் அவர்களிடம் பேசி பண்ட மாற்று முறையில் மாட்டிறைச்சியும் ,கோழி கறியும் கொடுத்து அரிசியை அவர்களிடமிருந்து பெற்றுகொண்டோம் .(சோறு தின்னாம காது அடைச்சி உறக்கம் வரல என சோறு தின்று பழகியவர்கள் இரவில் சோறு கிடைக்காத நாட்களில் சொல்லி கேட்டிருக்கிறேன் )


    ஒரு மாதத்திற்குள்ளாகவே நிலைமை சீராகிவிட்டது .கடும் பாதுகாப்புகளுடன் சாலை போக்குவரத்து தொடங்கியது .வழியில் எங்கும் நிற்காது தொடர் வரிசையில் செல்லும் காண்வாய்கள் .எதாவது ஒரு  வாகனத்தில் கோளாறு ஏற்பட்டால் அந்த கண்டெய்னர் லாரிகளை அப்படியே விட்டு விட்டு ஓட்டுனரை  மட்டும் வேறு வண்டியில் ஏற்றிகொள்வார்கள்.         காண்வாய்யை தலைமையேற்று நடத்தும் ராணுவ தளபதி .


   உணவு கூடதிற்க்கான உணவு பொருட்கள் தடையின்றி வர ஆரம்பித்தது .பிறகு மீண்டும் உற்சாகத்துடன் நான்கு வேளை உணவும் தடையின்றி வழங்க ஆரம்பித்தோம் .ராணுவ வீரர்களும் மகிச்சியுடன் உணவுண்டு சென்றனர் .(பாய் இவனுக்க மூஞ்சிய பாரு இப்பதான் சிரிக்கான் இவ்ளோ நாளா செத்த வீட்டுக்கு போறவன் மாதிரி மூஞ்சி இருந்தது என சிலர் ராணுவ வீரர்களை பார்த்து சொல்லி சிரிப்பான் விஜயகுமார்)

   எனினும் கடும் தாக்குதல் தொடர்ந்துகொண்டே தான் இருந்தது .நாங்களும் தொலைக்காட்சியில் தினமும் ஈராக்கில் நடந்த உயிரிழப்புகளையும் ,படுகொலைகளையும் பார்த்துகொண்டிருந்தோம் .

  எங்கள் அனைவரையும் கூட்டி ஒரு கூட்டம் ஒன்று நடத்தினார்கள் .பாதுகாப்பு குறித்த சில விசயங்கள் விரிவாக விவாதிக்கப்பட்டது .பின்பு எங்கள் திக்ரித் முகாம் மீது அடுத்த சில நாட்களில் ஒரு கடும் தாக்குதல் நடைபெற வாய்ப்பு உள்ளதாக உளவுத்துறை செய்தி வந்துள்ளதாக ராணுவம் எங்கள் அதிகாரிகளிடம் சொன்னதை எங்களுக்கு தெரியபடுத்தினர்.

    அனைவரும் மூன்று நாட்களுக்கு முகாமிலிருந்து வேறு ஒரு இடத்துக்கு செல்ல வேண்டும் .உங்களது பொருட்களை இங்கே வைத்து விடுங்கள் .கடவுசீட்டு ,பணம் ,மூன்று நாட்களுக்கு தேவையான உடைகளை முடிந்தவரை ஒரு சிறிய பையில் எடுத்து கொள்ளுங்கள் .
 
     ஒவ்வொருவரும் உணவு ,மற்றும் தண்ணீர் பாட்டில்களை கொண்டு செல்ல வேண்டியிருப்பதால் .தேவையற்ற எந்த பொருட்களையும் எடுக்கவேண்டாம்  என உறுதியாக சொன்னார்கள் .

   வரைபடம் ஒன்றை தந்தார்கள் அதில் வாகனங்கள் எந்த வரிசையில் நிறுத்தபட்டிருக்கும் என்ற விபரமும் ஒவ்வொரு வாகனத்துக்கும் ஒரு வரிசை எண்ணும் இருந்தது .எங்களிடம் 2 சிறிய பேருந்துகளும் ,நான்கு கார்களும் இருந்தது மற்றவை எல்லாம் ராணுவ வாகனங்கள் .

  ஒருநாள் ஒத்திகை பார்க்கும் பொருட்டு வரைபடத்திலிருந்தபடி வாகனங்கள் நிறுத்தபட்டு ,கண்ணாடிகளில் வரிசை எண்கள் ஒட்டபட்டிருந்தது  ஒவ்வொருவரும்  அமர வேண்டிய வாகனங்களை பார்த்துகொண்டோம் . தண்ணீர் பாட்டில்கள் அடங்கிய பெட்டிகளும் ,உணவு பொட்டலங்களும் தாயராக வைத்திருந்தோம் .

  அவசர அழைப்பிற்கு பின் பத்து நிமிடத்திற்குள் வாகனங்கள் புறப்பட்டாக வேண்டும் .அதற்குள்ளாக அனைவரும் வாகனங்களில் ,தங்களின் பைகளுடன் அமர்ந்திருக்க வேண்டியது கட்டாயம் .

  அந்த நாட்களில் பெரும்பாலானோர் இரவில் தூக்கமின்றி ,கவச உடையும்,தொப்பியும் அருகிலேயே வைத்துகொண்டிருந்தனர். (கக்கூசுக்கு போவும் போதும் அந்த ஹெல்மட்டையும் ,ஜாக்கெட்யும் போட்டுட்டு போனவன் எல்லாம் உண்டு ) ஒரு பெரும் அசம்பாவிதம் நடந்து விடும் என்ற பயம் அது .முகங்களில் ஒரு பதட்டம் தெரிந்தது .எப்போதும் எதுவும் நடந்து விடலாம் எனும் உச்ச கட்ட பயத்தில் நகர்ந்த நாட்கள் அவை .விழித்திருப்பவனுக்கு இரவு மிக நீண்டது .அதுபோல் மிக மெதுவாக அந்த நாட்கள் நகர்ந்தது .

   அந்த சூழ்நிலையிலும் மேலே வானம் ,கீழே பூமி ,சோளிக்கே பீச்சே கியா ஹை  என பாட்டு பாடி மகிழ்ந்து இருந்தவர்கள் பலர் .

    ஆனால் எல்லோரும் பயந்ததுபோல் அப்படி ஏதும் நடக்கவில்லை .யாரும் முகாமைவிட்டு வெளியே செல்ல வேண்டிய ஒரு நிலை ஏற்படவில்லை .
ஷாகுல் ஹமீது

20-10-2016