Friday, 12 July 2024

கெபிலியே

 கெபிலியே (GEFELIGE NAVROZE)


       கப்பல் காரனுக்கு தண்டனை கொடுக்க விரும்பினால். இரண்டு நாள் அறையை விட்டு வெளியே வரவேண்டாம் என சொன்னால் போதும். அது மிகக்கடும் தண்டனையாக இருக்கும்.

  என்னைப்போல் அதிகம் பேசுபவர்களுக்கு இன்னும் கஷ்டம்தான். வாசிப்பு பழக்கமாகி அந்த இன்பத்தை உணர்ந்ததால் எனக்கு இப்போது தனிமையும்,அறைக்குள் அடைந்து கிடப்பதும் பிரச்சனை ஏதும் இல்லை.

   இந்த கப்பலில் மார்ச் மாத இறுதியில் கொரியாவிலிருந்து வாட்சில்லா நிறுவனத்தின் ஆறு கொரியர்கள் ஜெனரேட்டர் பணிக்காக வந்தனர்.ஐம்பத்தியைந்து நாட்கள் அவர்கள் கப்பலில் இருப்பார்கள் என காப்டன் சொன்னார். இரு மாதங்களுக்குபின்பும் அவர்கள் பணி தொடர்ந்தது.பணி முடிந்தபோது அவர்கள் இறங்க துறைமுகம் கிடைக்காமல் மேலும் பத்து நாட்கள் இருந்தனர்.

   ஐக்கிய அமீரகத்தின்(UAE) தாஸ் தீவில் யாரும் இறங்க அனுமதியில்லாததால் மீண்டும் நீண்டது அவர்களுடைய கப்பல் பயணம். கொரிய டெக்னீசியன் ஒருவர் ஒருநாள் காலை உணவுக்கு வரும்போது கை கால்கள்,சிவப்பாக தடுத்து அரிக்கிறது என்றார்.

 

“எதோ அலர்ஜி இருக்கிறது சிக்கன்,பீப்,மட்டன்,முட்டை வகைகளை சாப்பிடாதே” என்றேன். ஆனால் அவன் பன்றிக்கறி உட்பட எல்லா இறைச்சி வகைகளையும் வெட்டி விழுங்கிகொண்டிருந்தான். அவனது உடல் நிலையை கவனித்த மருத்துவ அதிகாரி அவருக்கு சின்னம்மை இருப்பதாக சொல்லி அறைக்குள்ளேயே இருக்கசொன்னார். உணவு அறைக்கே வழங்கப்பட்டது. மூன்று வேளையும் மெஸ்மேன் அவனது அறைக்கு வெளியே உணவு தட்டை வைப்பான். காலி தட்டுகள் பின்னர் அடுமனைக்கு கொண்டுவந்து கழுவி மீண்டும் உணவு வழங்குவான். அவனை தாஸ் தீவில் மருத்துவ மனைக்கு அனுப்பி வைத்தார் காப்டன்.

மருத்துவரை சந்தித்துவிட்டு அன்று மதியம் உணவு கூடத்துக்கு வந்த அவனிடம் “டாக்டர் என்ன சொன்னார்” எனக் கேட்டேன். “சிக்கன் பாக்ஸ்” என பதிலளித்தான். “ஏன் இங்கே இருக்கிறாய் அறைக்கு போ” என்றேன்.

 இங்கிருப்பவர்களில் பத்துக்கும் மேற்பட்டவர் பிலிப்பினோ பணியாளர்கள். காடேட்டும், ஓ எஸ் கார்லோவும் “உனக்கு சிக்கன் பாக்ஸ் முன்பு வந்துள்ளதா”? எனக்கேட்டு கொஞ்சம் பயத்தில் இருந்தனர்.

  பத்து தினங்களுக்குப்பின் கொரியர்கள் அமீரகத்திலிருந்து இறங்கி சென்றனர். மறுமுறை அமீரகம் செல்லும்போது பழுதான வேறொரு ஜெனரேட்டரில் பணி செய்ய வாட்சில்லா துபையை சேர்ந்த ஐந்து இந்திய பணியாளர்கள் கப்பலுக்கு வந்தனர்.இது ஜூன் பத்தாம் தேதி.அன்று மதியமே மெஸ்மேன் கெபிலியே நவ்ரோஸ் உடலில் லேசான கொப்பளங்கள் தெரிய அறைக்குள் தனிமைப்படுத்தபட்டான்.

  நவ்ரோஸ் இந்த கப்பலில் மெஸ் மேனாக கடந்த ஏப்ரல் மாதம் சிங்கபூரிலிருந்து பணியில் இணைந்தான். இருபத்தியாறு வயதே ஆன நவ்ரோஸ் ஒல்லியான தேகமும் ஐந்தடி ஐந்து அங்குல உயரமும் என்னைபோல லேசான கறுத்த தேகம் கொண்ட அவன் இந்தியாவின் லட்சதீவிலுள்ள மினிகோய் எனும் ஊரில் பிறந்தவன். 

   மூன்று வருட ஹோட்டல் மேனேஜ்மென்ட் படித்தபின் ஓராண்டு கோவையில் நட்சத்திர விடுதியில் பணி,கொச்சி மினிகோய் பயணியர் படகில் ஆறு மாதம் பணி. பின்னர் உல்லாச கப்பலில் ஓராண்டு பணிசெய்தான்.

  எங்கள் நிறுவனத்தில் கடந்த ஆண்டு தேர்வாகி சிங்கப்பூர் எனர்ஜி எனும் கப்பலில் முதல் முறையாக பணியில் இணைந்தான். மூன்றே மாதத்தில் அக்கப்பலில் ஆட்குறைப்பு செய்ததால் இந்த கப்பலுக்கு பணி மாற்றம் பெற்று வந்தான்.

    ஊரில் வாப்பா,உம்மா உடன் பிறந்தவர்களும் உண்டு. பக்கத்து ஊரில் உள்ள ஒரு பெண்ணுடன் காதல் கொண்டு இவ்வருடம் அக்டோபரில் திருமணம் நிச்சயயிக்கபடுள்ளது. அந்த பெண் ரேடியோ டெக்னீசியனாக கொச்சியில் பணி புரிவதாக சொன்னான். அவனது பெயரை பலநாள் கூர்ந்து நோக்கியும் என்னால் வாசிக்க முடியாததால் “உனது முதல் பெயரை எப்படி உச்சரிப்பது” என கேட்டபோது “கெபிலியே என்ற வீட்டு பேரானு” என்றான்.

(கேரளாவில் பெரும்பாலானவர்களுக்கு வீட்டு பெயர் உண்டு அணில் குமார் கூரியாட், கூரியாட் வீட்டு பேரு,உப்பாலா ஜாவித்,உப்பாலா ஆஸிப்,உப்பாலா ஊரின் பெயர்.)

  மெஸ்மேன் செய்யும் அனைத்து பணிகளும் முடங்கின. சாப்பிட்ட தட்டுகளை அவரவரே கழுகி கொள்ள வேண்டும். காப்டன்,சீப் இஞ்சினியர் உட்பட அனைத்து அறைகளும் சுத்தபடுத்துதல் இல்லாமல் ஆனது. மெஸ் மேன் சுத்தம் செய்ய வேண்டிய குடியிருப்பின் பொது இடங்கள் டெக் பணியாளர்களுக்கு வழங்கப்பட்டது.

   அடுமனையில் சாலட் தயார் செய்தல், அடுமனை பாத்திரங்கள் கழுவுதலை முதன்மைசமையல்காரர் மற்றும் இரண்டாம் சமையல்கரார்கள் செய்தார்கள். இரவுணவுக்கு (வாரத்தில் மூன்று நாட்கள் )சப்பாத்தில் செய்த நாட்களில் ரைமுண்டோ சப்பாத்தியை பரத்தி தர நான் மாலை நான்கரைக்கே அடுமனைக்கு சென்று சப்பாத்தி சுட்டு கொடுத்தேன்.

   நவ்ரோஸ் அறைக்கு சென்ற முதல் நாள் அழைத்தேன் “கெஹ்னத்தே” அவனது தாய்மொழியில் எப்படி இருக்கியாய் என. “ரங்க்காலோ, ரங்க்காலோ” என்று பதில் சொன்னான். வழக்கமாக நானும் அவனும் மலையாளத்தில் பேசிக்கொள்வோம்.

  “மேலில் புள்ளி,புள்ளியாக வந்துள்ளது லேசான அரிப்பும் உள்ளது என்றான்.

 இரு தினக்ளுக்குப்பின் அவனது அறையை தட்டி வெளியில் நின்று அவனை பார்த்தேன். இரு கைகளிலும்,வயிறு,முதுகு கால்கள் தொடை என புள்ளி புள்ளியாக சிறு கொப்புளங்கள் போல இருந்தது. அவனிடம் சொன்னேன் “கோளி இறைச்சி,முட்ட,நான் வெஜ் ஒண்ணும் வேண்டா” என்றேன்.

  “ஞான் இப்போள் ஈ முறிக்குள்ள கிடக்குந்த அவஸ்தையில் ஈ ஆகாரமும் இல்லேங்கி என்னே கொண்டு பற்றுல்லா” என்றான்.

  மருத்துவ அதிகாரி எல்லாம் சாப்பிடலாம் என சொன்னதாக சொன்னான்.பதினான்கு நாட்கள் ஆகியும் அவனுக்கு சரியாகவேயில்லை. இந்தியாவில் இருந்தபோது மருத்துவரிடம் அனுப்ப காப்டன் தவறிவிட்டார். பின்னர் நெடும் பயணமாக கப்பல் ஆப்ரிக்காவின் நைஜீரியாவை நோக்கி புறப்பட்டது இடைநில்லாமல்.

  

நான் அவனை இரு தினங்களுக்கு ஒரு முறை அறைக்கு வெளியே நின்று சந்தித்து வருவேன். அவனிடம் புகைப்படங்களை பெற்று எனது மருத்துவ நண்பர் மாரி ராஜிக்கும், தோழி மகேஸ்வரிக்கும் அனுப்பினேன். புது மாப்பிள்ளை டாக்டர் மாரிராஜ் இது குணமான சின்னம்மை போலுள்ளது. இன்னும் மூன்று தினங்களுக்குப்பின் படம் எடுத்து அனுப்புங்கள் நான் சொல்கிறேன் என்றார்.

  தோழி மகேஸ்வரி மேலும் சில விவரங்களை கேட்டறிந்தபின் சக மருத்துவரிடம் கலந்தாலோசித்து இது வைரல் இன்பெக்ஷன் குணமாக இன்னும் ஒரு மாதம் ஆகலாம் என உடலில் பூச இரு மருந்துகளை பரிந்துரைத்தார்.

   நாட்கள் செல்ல,செல்ல அறைக்குள்ளேயே அடைந்து கிடந்த நவ்ரோஸ் அரை பயித்தியம் போல் ஆகிவிட்டான். அறையின் கண்ணாடி ஜன்னலின் திரைசீலையை விலக்கினால் கொந்தளிக்கும் கடலும்.அலையும் மட்டுமே காண முடியும்.காப்டனிடம் என்னை ஊருக்கு அனுப்புங்கள் என மன்றாடினான். காப்டன் செய்த தவறு அவன் உடல் நலமில்லாமல் ஆனதை எங்கள் நிறுவனத்தில் தெரிவிக்கவேயில்லை. சிக்கன் பாக்ஸ் பதினைந்து நாளில் சரியான பின் அவன் மீண்டும் பணியில் இணைந்துவிடுவான் என உறுதியாக நம்பியிருந்தார்.

   ஒப்பந்த காலம் முடியும் முன்பே வீட்டிற்கு செல்ல வேண்டும் என்றால். விமான கட்டணம் கொடுத்துதான் செல்ல வேண்டும். கப்பல் தென்ஆப்பிரிக்கவாவின் கேப் டவுன் அருகில் செல்லும்போது பணியாளர் மாற்றத்திற்கு கப்பலை நிறுத்தும் திட்டம் இருந்தது. நவ்றோஸ் சொந்த செலவில் செல்லவேண்டுமென்றால் அவனது இருபது நாள் சம்பளத்தை கொடுக்கவேண்டும்.

    காப்டன் அவனது உடல் நிலையை விளக்கியபோது எங்கள் நிறுவனம் அவனை கேப்டவுனில் இறக்கி மருத்து பரிசோதனை செய்துவிட்டு அடுத்த துறைமுகமான நைஜீரியாயில் பணியில் இணைய சொல்லி உத்தரவு வந்தது.

  இருபத்தியைந்து நாட்களுக்குப்பின் கடந்த வெள்ளியன்று (05 july 2024) பணியாளர் மாற்றத்திற்கு கப்பலை நிறுத்தியபோது நவ்ரோஸ் இறங்கி சென்றான் மருத்துவ பரிசோதனைக்கு.

   அவன் கப்பலில் இருந்து இறங்கும்போது மீண்டும் கொரிய வாட்சில்லா பணியாளர்கள் கப்பலுக்குள் ஏறி வந்தனர். முன்பு சிக்கன் பாக்ஸ் வந்தவர் நவ்றோசிடம் “நீ ஏன் சீக்கிரமாக ஊருக்கு செல்கிறாய்” என கேட்டார்.

  “எல்லாம் உன்னால் தான்” என சொன்னான்.

07-07-2024

At sea 

நாஞ்சில் ஹமீது..

ஆட்டம் கண்ட அலையன்ஸ்

     

              தென்னாபிரிக்காவின் ஒரு துறைமுக நகரம் தான் கேப் டவுன். இவ்வூரை சொல்லும்போதே காந்தியும்,நெல்சன் மண்டேலாவும் நினைவுக்கு வருவார்கள். ஆப்ரிக்காவின் தென்பகுதியில் உள்ள தென்ஆப்ரிக்காவில்  இந்தியாவின் cape comerin போல வளைந்த பகுதியில் இருப்பது கேப் டவுன் நகரம்.

 கிழக்கில் இந்தியபெருங்கடலும் , மேற்கில் தென் அட்லாண்டிக் கடலாலும் சூழ்ந்துள்ளது. ஜூன் பத்தொன்பதாம் தேதி இந்தியாவில் முகேஷ் அம்பானிக்கு சொந்த ஊருக்கு அருகிலுள்ள தகேஜ் துறைமுகப்பில் சரக்கை இறக்கியபின் நைஜீரியா செல்லும் உத்தரவு வந்தது. இருபத்தியாறு நாள் பயணம்.

   மே ஆறாம் தேதி முதல் ஐக்கிய அரபு அமீரகத்துக்கும், குஜராத்துக்கும் நான்கு முறை  போய் வந்தோம். நாற்பது நாட்களில் எட்டு துறைமுகம் என்பது கிணற்றில் தண்ணீர் ஊற,ஊற எடுப்பது போல.கப்பல் காரனின் சக்தியை துளியும் மிச்சமில்லாமல் பிழிந்தெடுப்பது மிகக்குறுகிய பயணங்கள். ஒவ்வொரு நான்கு நாட்களிலும் துறைமுகம் கூடவே கடும் கோடை,தலை பொசுங்கிவிடும் சுட்டெரிக்கும் வெயில்.

  நீண்ட பயணத்தை காப்டன் சொன்னதுமே உடலும்,உள்ளமும் ஓய்வுக்கு தயாரானது. சோம்ராஜ் கேட்டான் “அங்கயும் இது போல சூடா இருக்குமா” என.“அங்க இப்ப வின்டர் தொடக்கமாக்கும்” என்றார் போசன்.  செல்லும் வழியில் கேப்டவுனில் பணியாளர் மாற்றம்,உணவுபொருட்கள் தருவித்தல்,உதிரிபாகங்கள் வாங்குதல் போன்றவை திட்டமிடப்பட்டது.

   பயணம் தொடங்கிய மூன்றாவது நாள் ஞாயிறாக இருந்ததால் முழு ஓய்வு கிடைத்தது நீண்ட இடைவெளிக்குப்பின். நைஜீரியா எங்கோ தூரத்தில் இருந்ததால். செய்து முடிக்க வேண்டிய பணிகளுக்கு போதிய நேரமும் அவகாசமும் இருந்ததால் எந்த அழுத்தமும் இல்லை. காலை எட்டு முதல் ஐந்து வரை பணி என சாதாரண நாட்கள். பெரும்பாலும் மதியம் மூன்றரைக்கு மேல் எனக்கு பணியே இல்லாத நாட்கள்.

   துறைமுகம் விட்ட எட்டாவது நாளே கடும் கடல் சீற்றமும்,கொந்தளிப்புமாக இருந்தாள் கடலம்மா. கடும் காற்று காரணமாக டெக் பணியாளர்கள் இரு தினம் குடியிருப்புக்குள்ளேயே  வேலை செய்தார்கள்.வெளியே செல்ல அனுமதியில்லை. காலையில் எல் என் ஜி மோட்டார் அறை மற்றும் கம்ப்ரசர் அறைக்கு நான் சென்றே ஆக வேண்டும் என்பதால் மிக எச்சரிக்கையாக சென்று வந்தேன்.

   இருதினங்களுக்குப்பின் கடல் சாந்தமானது. வெப்பம் வெகுவாக குறைந்தது. இரண்டு நாட்களுக்கு பின் மீண்டும் கடலில் எழுந்த பேரலைகளும், கடும் காற்றும் முன்னூறு மீட்டர் நீளமுள்ள இந்த பெருங்கலத்தையே சுழன்றடிக்க வைத்தது. அறையின் பொருட்கள் அனைத்தையும் மேஜை பெட்டிகளுக்குள் போட்டேன். கப்பல் ரோல்லிங்கில் அவை வலமும்,இடமும் உருண்டோடி மரப்பலகையில் இடித்து எழும் சப்தம் கேட்டு இடைவெளி இல்லாமல் இறுக்கி வைத்தேன்.

ஆடி,ஆடி அசைந்து  தூக்கமே பிடிக்காமல் நெடுநேரத்திற்கு பின் கண்சொருகும் நேரம் ஏதாவது ஒரு பொருள் உருண்டு,ஓடி,இடித்து எழும் ஓசை தூக்கத்தை கலைக்கும். அது எந்த பொருள்,எந்த மேஜை டிராயரில்  என கண்டுபிடித்து துணியை போட்டு அசையாமல் வைத்துவிட்டு தூக்கத்திற்கும்,விழிப்பிற்கும் இடையில் கண்மூடி இரவை கழித்து காலையில் டான்ஸ் ஆடிக்கொண்டே எழுந்தேன்.

   பின்னர் தான் அறிந்தேன் கப்பலில் பலரும் இந்நாட்களில் படுக்கையை தவிர்த்து சோபாவில் தான் துயில்கின்றனர் என. அதன் நீளம் குறைவாக இருப்பதால் தரையில் கம்பளியை விரித்து கப்பலின் குறுக்குவாக்கில் படுத்துக்கொண்டேன். ஆம் தூங்கவும் செய்தேன்.

   மடகாஸ்கர் தாண்டி கேப் டவுனுக்கு வளைந்து திரும்பி மேலேறுகையில் கப்பலின் ஆட்டம் குறையவேயில்லை. ஜூலை ஐந்தாம் தேதி அதிகாலை மூன்று மணிக்கு கேப்டவுனில் கப்பலை நிறுத்தி பொருட்கள் ஏற்றுவதும் பணியாளர் மாற்றமும் நடக்கும். மூன்று மணி நேரம் போதும் என்றார் காப்டன். முந்தைய நாள் மதியத்திற்கு மேல் எங்களனைவருக்கும் ஓய்வு தரப்பட்டது. மறுநாள் அதிகாலையே விழிக்கவேண்டியிருந்ததால். இரு தினங்களுக்கு முன் ஜெனரேட்டர் ஒன்றில் ஏற்பட்ட பழுதால் இருநூறு லிட்டர் அளவுள்ள முப்பது எண்ணெய் பீப்பாய்கள் வருவதும் உறுதியாகியது.நான்காம் தேதியே வரவேண்டிய கப்பல் கடல் சீற்றம் காரணமாக ஒரு நாள் தாமதமானது.

   கேப் டவுனுக்கு தயாராகும் பொருட்டு இரவு எட்டரைக்கே படுத்துவிட்டேன். அதிகாலை மூன்று மணிக்கே விழித்திருந்தேன். அதற்கு முன்பும் கப்பலின் ஆட்டத்தால் இரு முறை விழித்தேன்.கழிப்பறையின் தண்ணீர் வாளி அறை சுவரில் இடித்து எழுப்பிய சப்தத்தால்,குளியலறையின் சோப்பு விழுந்து எழுப்பிய சப்தம் என.

   மூன்றரை மணிக்கு ஆகாயத்திலிருந்து விழுந்தது போல எழும்பிய பெரும் ஓசை நெஞ்சில் இடி இறங்கியது போல் கேட்டது. அலைகளுக்கு ஏற்ப கப்பலை திருப்ப முயற்சித்தபோது எழுந்த பேரலை கப்பலை தூக்கி கீழே அடித்தது தான் காரணம். நெஞ்சில் இடி இறங்கிய அந்த ஒரு சப்தம் அனைவருக்கும் நினைவு இருந்தது.

    ஐந்தே முக்காலுக்கு ராம் அழைத்தார். “அண்ணே ஸ்டோர்ஸ் ஹெல்ப் பண்ண கூப்பிறாங்க” என. அழைப்பை நோக்கி காத்திருந்த நான் அடுத்த பதினாறாவது நிமிடத்தில் டெக்கில் இருந்தேன். பாட்டீல்,தலேர் சிங்,போசன் முதன்மை அதிகாரி,மோட்டர்மேன் அஸ்பக்,ஜெர்ரி,வைப்பர் ஜோ, காடேட் ஜேம்ஸ் ஆகியோர் டெக்கில் இருந்தனர். “பாட்டீல் ரொம்ப சீக்கிரமே வந்துட்டா” எனக்கேட்டார். “இப்போது தான் அழைப்பு வந்தது” என்றேன். லேசான காற்றுடன்,மெல்லிய குளிரும் இருந்ததால் அனைவரும் வெப்ப ஆடைகளை அணிந்திருந்தோம்.

  அவர்களை காலை நான்கு மணிக்கே  அழைத்து கப்பலின் முன் பகுதியில் இருந்து அறுபது காலி ட்ரம்களை கொண்டு வந்து  கப்பலின் நடுப்பகுதியில் வைத்திருந்தனர். கப்பலுக்கருகில் பொருட்களுடன் வந்த சிறு படகு கப்பலுடன் அணையாமல் தத்தளித்து கொண்டிருந்தது. கப்பலுக்கு வரவேண்டிய ஐந்து மாற்று பணியாளர்கள், வாட்சில்லா நிறுவனத்தின் கொரிய டெக்னீசியன்கள் ஐவர் படகில் இருந்தனர்.

   கப்பலிலிருந்து ஐம்பது மீட்டர் தூரத்தில் அலைகளில் சிக்கி மேலும்,கீழும்,வலமும்,இடமும் என கள்ள சாராயம் குடித்தவன் போல் தள்ளாடிக்கொண்டிருந்தது படகு.

   அரை மணிநேரத்திற்கு பின் தலேரிடம் கேட்டேன் “இந்த குளுத்திக்கி சூடா ஒரு சாயா குடிச்சா எப்டி இருக்கும்” என.

 “நானும் அதான் நினைச்சேன், ஆனா இந்த ரோல்லிங்ல எப்டி சாயா போடுது”

அஸ்பக்  “ஒரு மணிக்கூரா போட் கிட்ட வர முடியாம சுத்திகிட்டே இருக்கு வா போவோம்” என அடுமனைக்கு அழைத்து சென்றார். கப்பலை நிறுத்தியிருந்ததால் இருபது டிகிரிக்கு மேல் ரோல்லிங் இருந்தது. அடுமனைக்குள் ரைமுண்டோ புர்ஜி போட உடைத்த பதினேழு முட்டைகள் சிதறி தரையில் கொட்டி கிடந்தது. தள்ளாடிக்கொண்டே “பேகன் சூத் மேரா அண்டா கெயா, க்யா ரோல்லிங் ஹை ரே” என சிதறிய பாத்திரங்களை ஒவ்வொன்றாக கிடைத்த இடங்களில் சொருகி கொண்டிருந்தார்.

   இஞ்சி,ஏலக்காய்,பால்,சீனி கலந்து  அடுப்பில் வைத்த பாத்திரம் ஓடாமல் பிடித்து வைத்து  சாயா போட்டு பிளாஸ்கில் ஊற்றி இறுக்கமான இடத்தில் சொருவிவிட்டு குடித்த சூடான சாயா உடலில் பரவி குளிருக்கு சுகத்தை தந்தது. டெக்கிலிருந்து ஒவ்வொருவராக சாயா குடிக்க உணவுக்கூடம் போய் வந்தனர்.மணி எழரையை தாண்டிய பின்பும் படகு அருகணைய முடியவில்லை. இருள் விலகி மெல்லிய வெளிச்சம் கப்பலுக்குள் வரத்தொடங்கியது.

      ஜெர்ரியும்,ஜோவும் காலைவுணவுக்கு சென்றனர். ப்ரிட்ஜிலிருந்து மூன்றாம் அதிகாரி ரவுப் போர்ட் சைடில் ஏணியை போட சொன்னார். பின்னர் சிறிது நேரம்  கழித்து ஸ்டார்போர்ட் சைடில் ஏணியை தயார் செய்யுங்கள் என்றார். பொருட்கள் ஏற்றி வந்த படகுகாரர்  சொல்வதை முதன்மை அதிகாரிக்கு உத்தரவுகளாக சொல்லிகொண்டிருந்தார்.அதற்கேற்ப போசனும் குழுவினரும் கப்பலின் போர்ட்,ஸ்டார்போர்ட் சைடுகளுக்கு பூனை போல சுற்றி கொண்டிருந்தனர். இப்போது இரு பக்கமும் ஏணி தயாராக இருந்தது.

 எட்டுமணிக்கு தலேர் சின் என்னிடம் “நாஸ்டா ஓஹையா க்யா? எனக்கேட்டான். “இல்லை” எனச்சொன்னதும். “போய் ஏதாவது சாப்பிட்டுட்டு வா இது எவ்வளவு நேரம் ஆகும் என தெரியாது” என்றான்.

   எட்டுமணிக்கு மேல் படகு ஸ்டார் போர்ட் சைடில் கப்பலுடன் அருகணைய முயற்சித்தது இரண்டு மீட்டருக்கு மேல் எழுந்த அலையில் மேலும் கீழும் என அலைகளிக்கபட்டது. பெரிய இரு அலைகளுக்கு இடையில் கொஞ்சம் இடைவெளி விட்டு வந்த ஒரு சிறிய அலையில் அருகணைந்த படகிலிருந்து ஏணியில் தாவி ஏறி, இரும்பு காங்க்வேயில் ஏறி கப்பலுக்குள் வந்தார் ஹரியானாவின் விகாஸ்.

      மேலும் பத்து நிமிடம் கழித்தே ஏணியில் தாவும் வாய்ப்பு கிடைத்தது காஸ் இஞ்ஜினியரான லக்னோவின் அருணுக்கு. மூன்றாவதாக காத்திருந்த இந்தோனேசியாவின் நான்காம் இஞ்சினியர் தும்பாக் ஏணியில் தாவ இயலவேயில்லை.இரையை கொண்டு செல்லும் எறும்பு கூட்டங்கள் போல  இடைவெளியில்லாமல் பேரலைகள் ஒன்றன் பின் ஒன்றாக வந்து கொண்டே இருந்தது.

   படகுகாரர் பொருட்களை ஏற்றுவோம்.அலைகள் குறைந்ததும் ஆட்களை அனுப்புகிறேன் என்றார்.கப்பலின் பின் பகுதியில்தான் பொருட்களை இறக்கி எங்களால் அடுமனைக்கும், டெக்,இஞ்சின் ஸ்டோர்களுக்கு கொண்டு செல்ல முடியும். கப்பலின் பின் பகுதி உள்பக்கமாக வளைந்து இருப்பதால் கப்பலின் அடிப்பகுதிக்கு செல்லும் படகு அலையில் மேலெழுந்து கப்பலில் இடித்து உடையும் அபாயம் உண்டு அதனால் கப்பலின் நடுப்பகுதியில் உள்ள கிரேனை கீழே இறக்க சொன்னார்கள்.

   கடும் ஆட்டத்தில் கீழே சென்ற கிரேன் கொக்கியில் பொருட்கள் அடங்கிய பெட்டியை சுற்றிய அதிக எடையை தாங்கும் கயிற்றின் முனையிலுள்ள கொக்கிகளை மாட்டி மேலே தூக்கினர். கிரேன் கொக்கியில் மூன்று கயிறுகளை கட்டி முன்பும்,பின்பும்,பக்கவாட்டிலும் என மூவர் பிடித்து  காற்றின் போக்கில் கட்டுப்பாடில்லாமல் ஆடும் பெட்டியின் ஆட்டத்தை குறைக்க முயற்ச்சித்தது பலனளிக்கவில்லை.

 கப்பலின் பக்கங்களில் இடித்தும், உரசியும் ஒவ்வொன்றாக மேலேறி வந்தது. அலை குறைந்தபோது எலக்ட்ரிகல் ஆபிசர் சுஷ்மாண்டோவும்,இரண்டாம் இஞ்சினியர் அலெக்ஸ் தர்சனும் மேலேறி வந்தனர். குட்டி யானையை போல இருந்த தும்பாக் நீரில் முக்கிய கோழி போல சோர்ந்து வந்து சேர்ந்தான். ஜேம்ஸிடம் சொல்லி உணவுகூடத்துக்கு தும்பாக்கை அழைத்து செல்ல சொன்னேன்.

  சப்பாத்தி மாவு,மைதா பைகள் கிழிந்து டெக்கில் கொட்டி கால்கள் பட்டு நீல நிற டெக் வெண்மையாக மாறியது.  அவ்வப்போது வந்த பெரிய அலைகளில் டெக்கில் வைத்த பொருட்களும் உருண்டோட தொடங்கியது. சக்கரம் பொருத்திய வண்டிகளில் பொருட்களை அடுக்கி உடனடியாக கப்பலின் பின்புறத்தில் கிடைத்த இடத்தில் எல்லாம் வைத்து கட்டினோம்.

   இருபத்தி எட்டு எண்ணெய் பீப்பாய்கள் கயிற்று வலையில் கட்டி மேலே எடுத்தோம் சிலமுறை டெக்கில் ட்ரம்கள் இடித்த போதும் உடையாதது அதிர்ஷ்டம். ஐந்து லிட்டர் அளவில் உள்ள பெயின்றுக்கான கார்ட்னர்கள் பெருபாலும் உடைந்து கொட்டி விட்டது. இறுதியாக வாட்சில்லா பணியாளர்கள் பன்னிரெண்டு மணிக்கு மேலேறி வந்தனர். படகிலேய வாந்தி எடுத்து சோர்ந்துபோய் இருந்தனர்.

   மீன்,இறைச்சி,பழங்கள்,காய்கறிகள்,பிரட்,ஐஸ்க்ரீம்கள் உடனடியாக அடுமனையின் குளிரூட்டிகளில் கொண்டு செல்லப்பட்டது.கிடைத்த இடைவெளிகளில் ரைமுண்டோவும்,ஜானியும் மதிய உணவையும் தயார் செய்தனர். 

   ஊருக்கு செல்லும் ,லாரன்சும்,ஹபிக்கும் படகில் இறங்கியதுமே வாந்தி எடுத்து பின் படுத்து கொண்டதாக பத்தி சாபும், நவ்ரோசும் சொன்னார்கள். இயந்திர அறைக்கான உதிரி பாகங்கள், பணியாளர்களின் பயண பைகள் மேலே வந்தபின் உடைந்த இயந்திர பாகங்களை அடைத்திருந்த பெரிய பெட்டி ஒன்றை கீழே இறக்கினோம். இருமுறை கவிழ்ந்து கடலில் விழாமல் தப்பித்து படகின் பலகையில் அமர்ந்தது. படகின் போக்கு குழாயில் ஒரு சிறு சொட்டல் மட்டும் விழுந்தது.மிக திறைமையான படகு பணியாளர்கள் கயிறுகளை பிடித்தும், விலகி ஓடியும் பொருட்களை இறக்கினர்.

   ஒன்றரை மணிக்கு மேல் ஆபத்தான ஆப்ரேசன் முடிந்ததாக முதன்மை அதிகாரி சொன்னார். உடனே இஞ்சின் இயக்கப்பட்டு கப்பல் நகர தொடங்கியது. கப்பலின் நடுப்பகுதியில் இருந்த பொருட்களை போசனிடம் சொல்லி அங்கேயே கட்டி வைக்க சொன்னார். முதன்மை அதிகாரி காப்டனிடம் இனிமேல் உணவுக்குப்பின் பொருட்களை அப்புறப்படுத்துவோம் என்றார்.

   முதன்மை அதிகாரி,போசன்,இரு ஒ எஸ், இரு மாலுமி, காஸ் இஞ்சினியர், முதன்மை இஞ்சினியர்,இரண்டாம்,மூன்றாம் இஞ்சினியர்கள், மூன்று மோட்டார் மேன்கள்,வைப்பர், பயிற்சி இஞ்சினியர், இரு அடுமனை பணியாளர்கள், பிரிட்ஜில் காப்டன், மாலுமி ஒருவர், நேவிகேசன் அதிகாரி என இருபது பேர் மிக போராடி முடித்த பணி இன்று.

  எனது பத்தொன்பது ஆண்டு கால அனுபவத்தில் ஜப்பானில் கப்பல் பாறையில் மோதி கப்பலின் முன் பகுதி ஓட்டையாகி தண்ணீர் புகுந்தது,இயந்திர அறையின் ஜெனரேட்டர் வெடித்து பெரும் தீ பற்றி எரிந்தபோது பத்து மீட்டர் அருகில் நின்ற நான் தீயனைப்பானை கொண்டு அணைக்க முடியாமல் ஓடி தப்பியது,இன்சிநிரேட்டர் தீ பற்றிய விபத்து, இயந்திர அறையின் தீ விபத்து ஏற்பட்டால் உபயோகிக்கும் கார்பன்டை ஆக்சைடு தவறுதலாக ஒருவர் திறந்துவிட மயிரிழையில் உயிர்பிழைத்த  மிகக்கடுமையான நாட்களை சந்தித்திருக்கிறேன். ஆனால் இன்று போல் ஆட்டம் கண்ட,இவ்வளவு கடினமான ஒருநாள் இதற்கு முன் இருந்ததில்லை. 

   O5 july 2024,

நாஞ்சில் ஹமீது.

Sunday, 7 July 2024

பணியில் இணைதல்.

 எல் என் ஜி அலையன்ஸ் நாட்குறிப்புகள்

LNG ALLAIANCE 



  கடந்த பிப்ருவரி மாதம் ஜிப்ரேல்டர் வரை வந்து பணியில் இணையமுடியாமல் ஊருக்கு திரும்பிசென்ற இரு தினங்களுக்குப்பின் மும்பை அலுவலகத்தை அழைத்து வேறு கப்பலுக்கு மாற்றசொன்னேன். இருபதாம் தேதி தென் ஆப்ரிக்காவின் கேப் டவுனில் பணியில் இணையலாம் என்றார்கள்.

கப்பல் நைஜீரியாவை நோக்கி சென்றுகொண்டிருக்கும் செய்தி கிடைத்தது.பதிமூன்றாம் தேதி நைஜீரிய துறைமுகம் விட்டபின் தென்னாபிரிக்காவை கப்பல் கடக்கும்போது கேப்டவுன் அருகில்  கப்பலின் வேகத்தை குறைத்து கப்பலில் ஏற வேண்டும். எப்போதும் அங்கு கடல் சீற்றமாக இருக்கும் கடல் அது.  கொஞ்சம் ஆபத்துதான் வேறு வழியில்லை போய் தான் ஆகவேண்டும்.

  பிப்ரவரி இருபத்தி நான்காம் தேதி அதிகாலை திருவனந்தபுரத்திலிருந்து கத்தாரின் தோகா வழியாக கேப்டவுனுக்கு விமானம். இருபத்தி மூன்றாம் தேதி இரவு பத்துமணிக்கு வீட்டிலிருந்து புறப்பட்டு என் அடுக்குமாடி குடியிருப்பில் வசிக்கும் மூர்த்தி அண்ணாவின் ஆட்டோவில் வடசேரி பேருந்து நிலையம் சென்று பஸ் ஏறினேன். ஸாலிமும்,ஷல்மானும்  வந்து ஏற்றிவிட்டார்கள். பஸ் எனது வீட்டை தாண்டும்போது சுனிதா எனக்கு கையசைத்தாள்.

    மறுநாள் திருவனந்தபுரத்தில் ஆற்றுக்கால் பகவதி பொங்கலிடும் நாளாக இருந்ததால் பேருந்து நிரம்பியிருந்தது. “போன ட்ரிப்புல ரூட்ட மாத்தி உட்டானுவோ,போறதுக்கு நாலு மணிக்கூர் ஆகிவிட்டது”என்றார் நடத்துனர். எனக்கு அதிகாலை மூன்று ஐம்பதுக்கு விமானம்  இரண்டு மணிக்குள் விமான நிலையத்தில் இருந்தாக வேண்டும். சாலை காலியாக இருந்ததால் ஒரு மணிக்குள் திருவனந்தபுரம் போய் சேர்ந்துவிட்டேன்.

  தம்பி ஜானகி ஒரு மணிக்கு மேல் வந்து என்னை அழைத்து சென்றான். விமான நிலையத்தில் பணிபுரிவதால் அவனது அடையாள அட்டையை காண்பித்து சகாய விலையில் சுலைமானி குடித்துவிட்டு என்னை அனுப்பி வைத்தான்.

   சிறு நகரங்களிருந்து புறப்புடுகையில் எளிதாக இருக்கிறது.அதிக கூட்டமில்லை. இணையத்தில் இருக்கை பதிவு செய்திருந்ததால் வரிசையில் நிற்காமல் எளிதாக பயண பைகளை போட்டு விட்டு,குடியுரிமை,பாதுகாப்பு சோதனைகளை கடந்து விமானம் புறப்படும் வாயிலின் அருகில் சென்று பயண தொழுகையை தொழுதுவிட்டு சாய்வு நாற்காலியில் அமர்ந்து தூங்கிவிட்டேன். குடியுரிமை அதிகாரி “கடந்த முறை எங்கிருந்து இறங்கி வந்தாய்” என்ற ஒரு கேள்வியை மட்டும் கேட்டார்.

   விமானம் சரியாக நான்கு மணிக்கு வானத்தில் பறக்க தொடங்கியது. நான்கு மணிநேர பயணம் தோகாவிற்கு. நான் அதிக முறை வந்த விமான நிலையம் இதுவாக்கதான் இருக்குமென நினைக்கிறேன்.   விமான நிலையத்தில் இருந்த தொழுகையறைக்கு சென்று காலை நேர பஜர் தொழுகையை ஜமாத்தாக நிறைவேற்றினேன்.


     பிரபுல் மற்றும் ரைமுண்டோ கேப்டவுன் செல்லும் வாயிலில் காத்திருந்தனர். மூவருமாக பேசிகொண்டிருந்ததால் காத்திருப்பு நேரம் விரைவாக கடந்து விமானம் ஏறும் நேரம் வந்தது. பத்து மணி நேர பயணம், இரு முறை நல்ல உணவும்,குடிக்க தேநீர்,பழச்சாறுகள் தந்தனர். நீண்ட நேர பயணம் கொண்ட கத்தார் ஏர்வேஸில் எப்போதும் உணவு நன்றாக இருக்கும்.

     கேப் டவுனில் மாலை மூன்று மணிக்கு மேல் இறங்கியது விமானம். இரு படங்கள் பார்த்தேன்.இப்போதெலாம் சினிமா பார்ப்பது விமான பயணத்தில் தான்.

  ஐந்தரை அடிக்குமேல்  குண்டான கறுப்பின  பெண் குளிரை தாங்கும் வெப்ப ஆடைகளை அணிந்து எங்கள் பெயர் எழுதிய அட்டையை பிடித்துகொண்டிருந்தாள். வேறு கப்பலுக்கு செல்லவேண்டிய பிலிப்பினோ மாலுமிகள் சிலர் வருவதற்காக காத்திருந்தோம்.சுற்றியிருந்த கூட்டத்தை மறந்து விமான நிலையத்திலிருந்து வெளியேறிய இளம் பெண்ணை உதடுகள் அழுந்த முத்தமிட்டு கொண்டேயிருந்தான். மனைவி ஒரு மாதம் தாய் வீட்டிற்கு சென்றிருப்பாள் போல.

குடியுரிமை அதிகாரி எங்களது கப்பல் நிறுவன கடிதத்தை பெற்றுகொண்டு ஸீ மேன் புக்கை பார்வையிட்டு ,பாஸ்போர்ட்டில் முத்திரை பதித்து தந்தார்.கேள்விகள் ஏதும் இல்லை.சுங்க அதிகாரி எங்கள் பைகளை சோதிக்கவே இல்லை கிரீன் சானலில் வெளியேறினோம்.

  மெல்லிய குளிரில் வெளியே வந்து காரில் ஏறிக்கொண்டோம்.வழியிலேயே முகவர் பெண் இறங்கிகொண்டாள்.அரை மணிநேர பயணத்தில் விடுதியை அடைந்தோம். நீராடி,உடை மாற்றியபின் சுனிதாவிற்கு தகவல் சொன்னேன்.இரவுணவுக்கு சென்று ஆர்டர் கொடுத்துவிட்டு காத்திருந்தோம். முக்கால் மணி நேரத்திற்குப்பின் எங்கள் உணவுகள் மேஜைக்கு வந்தது. உண்டு முடிக்கும்போது ஒரு ஒன்றரை மணிநேரம் ஆனது. உணவுகள் அனைத்து எதிர்பார்த்ததைவிட அளவுகள் அதிகமாக இருந்தது. “வயிறு அடைத்து விட்டது” என்றார் ரைமுண்டோ. எனக்கும் அப்படித்தான் இருந்தது.

       இரவு தொழுகையை முடித்துவிட்டு தூங்கவிட்டேன். நீண்ட பயணத்திற்குப்பின் உடல் சுத்தமாகி வயிறும் நிறைந்ததால் இரவில் நல்லுறக்கம். காலையில் தாமதமாக விழித்தேன்.

  காலை உணவுக்குப்பின் நாங்கள் மூவரும் கேப்டவுன்  சாலையில் ஒரு நீண்ட நடை சென்றோம்.வயிறு லேசாகியது மதியம் மீண்டும் சாப்பிட்டோம்.உணவக்கதில் நீண்ட நேரம் காத்திருக்க வேண்டும் என தெரிந்ததால் ஒரு மணிக்கு முன்பாகவே சென்று ஆர்டர் கொடுத்தோம். மூன்றரை மணிக்கு எங்களை அழைத்துச்செல்லும் காரோட்டி வருவதாக சொன்னதால்.பைகளுடன் வரவேற்பறைக்கு வந்தோம்.

  என்னுடன் சிங்கப்பூர் எனெர்ஜி கப்பலில் பணிபுரிந்த கொரியாவின் முதன்மை இஞ்சினியர் சாய் நின்றுகொண்டிருந்தார். என்னை நினைவிருந்தது அவருக்கு பெயர் சொல்லி அழைத்தார். அந்த கப்பலில் பணிமுடிந்து செல்லும்போது காஸ் பிட்டருக்கு பரிந்துரை செய்து கடிதம் கேட்டேன். தர இயலாது என சொன்னதாக இரண்டாம் இஞ்சினியர் அப்போது சொன்னார்.நான் அடுத்த கப்பலிலேயே காஸ் பிட்டராக பதவி உயர்வு பெற்று சென்றேன். 

    விடுதியிலிருந்து துறைமுக குடியுரிமை சோதனை மற்றும் அனுமதிகள் பெற்று எங்கள் முகவர் அலுவலகத்தை அடைந்தோம். கப்பல் வருவது தாமதமாகிறது எனவே ஒரு மணிநேரத்திற்குப்பின் படகில் புறபட்டால் போதும் எனக்கூறினார்.

    கப்பல் கேப்டவுன் துறைமுகத்திற்கு  வராது. கேப்டவுன் வழியாக கரையிலிருந்து நாற்பது மைல் தொலைவில் சென்றுகொண்டிருக்கும் கப்பலில் படகில் சென்று ஏற வேண்டும். கடல் கொஞ்சம் சீற்றமாக இருந்தது. தத்தளித்து கொண்டே ஒரு மணி நேரத்திற்கும் மேலாக பயணித்தபின் கப்பலை கண்டோம். நைஜீரியாவில் முழுமையாக சரக்கு நிறைக்கப்பட்ட கப்பல் வேகம் குறைத்து மெதுவாக நகர்ந்துகொண்டிருந்தபோது படகு அருகணைந்து  தேர்ந்த சர்க்கஸ் காரனை போல ஏணிகளில் தொத்தி ஏறி டெக்கில் போய் சேர்ந்தோம்.

    உணவு பொருட்கள் மற்றும் உதிரிபாகங்களை படகிலிருந்து கிரேன் மூலம் ஏற்றியபின் எங்கள் பயணபைகளும் வந்து சேர்ந்தது.கேரளாவின் தினேஷ் டெக்கில் நின்றிருந்தார்.அங்கேயே கை குலுக்கி விடைபெற்று கொண்டார். பணிகள் குறித்து போனிலேயே சொல்லியிருந்தார்.இங்கே காஸ் இஞ்சினியர் இருப்பதால் பார்துக்கொள்ளலாம் என நானும் எதுவும் கேட்கவில்லை.

  2018 ஆம் ஆண்டு எனெர்ஜி ஒர்பஸ் எனும் கப்பலில் அவரை விடுவித்துள்ளேன். அறையை மிக சுத்தமாக பராமரிப்பவர். முதல் நாள் இரவில் சுத்தபடுத்தாமலேயே அறைக்குள் தூங்க இயலும்.ஞாயிறு இரவாததால் தூங்கி காலையில் விழித்து.  பணியாடைகள் மற்றும் காலணியை பெற்றுகொண்டு பணிக்கு சென்றேன்.

  என்னுடன் சிங்கப்பூர் எனெர்ஜி கப்பலில் பணிபுரிந்த மாலுமி பிலிப்பினோ ஜோயல் மற்றும் கொரிய காப்டன் கிம் தெரிந்தவர்களாக இருந்தனர். கொரியன்,மலேசியன்,பிலிப்பினோ,ஸ்ரீலங்கன் மற்றும் இந்தியர்கள் பணிபுரியும் கப்பல் இது.

நாஞ்சில் ஹமீது.

26.feb.2024.


Wednesday, 19 June 2024

முழுமையாக கண்ட ஜிப்ரேல்டர்

 


      இரவில் நண்பர் ஒருவன் குறுஞ்செய்தி அனுப்பியிருந்தான். அண்ணா அந்த மலையில் ஏறி விட்டீர்களா எனக்கேட்டு. 

   காலையில் விழித்து நண்பர்களிடம் சொன்னேன் மலைமேல் செல்ல வாகனம் செல்கிறது கட்டணம் செலுத்தவேண்டுமென. தயங்காமல் போகலாம் என்றனர்.



      இரண்டாவது  நாள் நாங்கள் சாலையில் பராக்க பார்த்துக்கொண்டு நடக்கும்போது ஸ்பெயின் எல்லையை தாண்டி வந்த ஒருவன் எங்களிடம் மலை மேல் செல்லும் விளம்பர பேனரை காட்டி “இங்கே எப்படி செல்வது” எனக்கேட்டான். “நாங்கள் இவ்வூருக்கு புதுசு” என்றோம்.



   டவுன் டவுண் எனச்சொல்லும் கடைவீதியிலே மலை மேல் செல்லும் வாகனமும்,நின்றுகொண்டிருந்தது. செயின்ட் மைகேல் குகை,ஐரோப்பா முனை,ஸ்கை வாக் என விளம்பரத்தை பார்த்துக்கொண்டிருந்த அமெரிக்கர்களை  வழிகாட்டி ஒருவர் தெளிவான ஆங்கிலத்தில் பேசி ஆள் சேர்த்துக்கொண்டிருந்தார். அவரே வாகன ஒட்டி. இருபத்தியிரண்டு யூரோ கட்டணம், போய் வ


ர வண்டிக்கு பதினெட்டு நாற்பது யூரோ. மொத்தம் இரண்டு மணிநேரம் ஆகும் என்றான்.

    ஒத்துக்கொண்டு வண்டியில் எறிக்கொண்டோம்.  Europa பாயிண்ட் எனும் இடத்தில் முதல் நிறுத்தம். சவுதி அரேபிய மன்னர் கட்டிகொடுத்த பள்ளிவாசல் ஒன்று இங்கே இருக்கிறது அவரது பெயரிலேயே கிங் பஹத் மஸ்ஜித் என. அட்லாண்டிக் மற்றும் மத்தியதரை கடலிலிருந்து ஜிப்ரேல்டர் வழியாக ஆண்டு தோறும் ஏராளமான பறவைகள் இடம் பெயர்கின்றன அதை விளக்கும் ஒரு படமும். கப்பலோட்டிகளுக்கு வழிகாட்ட ஒரு கலங்கரை விளக்கமும் இருந்தது. கொஞ்சம் உயரதிற்கு வந்துவிட்டோம் இங்கிருந்து ஜிப்ரேல்டர் துறைமுகமும், கடலையும் வேறொரு கோணத்தில் பார்க்க முடிந்தது.

   செயின்ட் மைக்கேல் குகையை பார்த்தபோது இந்த ஜபல் தாரிக் மலை (gibreltar) பல ஆயிரம் ஆண்டுகள் கடலுக்குள் இருந்திருக்க வேண்டும் என தோன்றியது ஆசிரியர் ஜெயமோகனிடம் எனது ஐயத்தை கூறியபோது அப்படி நிச்சயமாக இருந்திருக்கும் என்றார். இந்த மலைமீது இருக்கும் குகைகள் இரண்டாயிரம் ஆண்டுகளாக ராணுவதிற்கு ஆயுதங்கள் வைக்கவும், மருத்துவமனையாகவும் உலக போர்களில் பயன்டுத்தபட்டுள்ளது. மலையின் கீழ் இரண்டாவதாக ஒரு குகை பாதையை உருவாக்க வேண்டி ராயல் இஞ்சினியர்கள் தோண்டிய போதுதான் இந்த அழகான குகையை கண்டுபிடித்துள்ளனர். இது எதிர்பாராமல் நடந்த விபத்து என்றே குறிக்கப்பட்டுள்ளது.

 உள்ளே சென்றதும் மங்கிய இருளில் கொஞ்சம் பயந்துதான் போனேன்.எங்கோ பாதாள அறையில் இறங்குவது போலிருந்தது. தலைக்கு மேலே முள்ளம்பன்றி போல் வரிசையாக அடுக்கப்பட்ட ஊசிக்கற்கள், இயற்கையாக செதுக்கப்பட்டவை போன்ற மிக அழகான பாறைகள் வெள்ளை, மற்றும் பல நிறங்களில் இருந்தது.மனிதனால் இந்த அழகிய வேலைப்பாடுகளை உருவாக்கவே முடியாது என அப்போது உணர்ந்தேன்.  உள்ளே நாற்பது மீட்டர் அகலத்தில் பளிங்குபோல தெளிவான ஒன்றரை லட்சம் லிட்டர் நன்னீரும் இருந்துள்ளது. இது இருபதாயிரம் ஆண்டுகளாக மூடியே இருந்திருக்க வேண்டும் என நம்புகின்றனர்.

    கொஞ்சம் இடத்தை வெட்டி தட்டையாக்கி அதில் நாற்காலிகள் போட்டு பார்வையாளர்கள் அமர்ந்தபின். அந்த செதுக்கு ஊசி பாறைகள் மேல் வண்ண,வண்ண வெளிச்சம் பாய்ச்சி(light show) காட்சி ஒன்றை காட்டுகிறார்கள். அதன் அழகில் மயங்கி நின்ற ரைமுண்டோ  “பைசா வசூல்” என்றார்.இயற்கை 

    அதன் ஸ்கை வாக் ஒரு பாறை உச்சியில் கண்ணாடி பாலம் அமைத்திருக்கிறார்கள்.கால்கள் கூச,வயிறு கலங்கி அதில் நடந்து ஒரு பீதியுடன் வெளியேறினேன். அங்கிருந்து பார்க்கையில் கடலின் ஒரு பகுதியில் கற்களை போட்டு அலைகளை தடுத்து மணலை பரப்பி செயற்கையாக கடற்கரையை உருவாகியிருந்தார்கள் பார்க்க நீச்சல்குளம் போல காட்சியளித்தது. (ஜிப்ரேல்டருக்கு ஒரு கடற்கரையும் இருக்கு)

    இறுதியாக மலையுச்சியின் குகைகளுக்கு சென்றோம். ராணுவ மருத்துவமனையும், ஓய்வெடுக்கும் அறைகளும், தளவாடங்கள்,போர்கருவிகள் வைக்கும் இடமாக பயன்படுத்தியுள்ளனர். முழு மலையையும் குடைந்து பாதைகள் அமைத்து காற்று வருவதற்கு ஜன்னல்கள் உருவாகியுள்ளனர்.ஒரு பகுதியிலிருந்து குடைந்து மலையின் அனைத்து திசைக்கும் சுரங்கபாதை அமைக்க எத்தனை வருடங்கள்,எவ்வளவு மனித ஆற்றல் செலவாகியிருக்கும். பிரபுல் “இவனுவளுக்கு வேற வேலையே இல்ல போல”என்றான். ஒரு திசையில் மத்தியதரை கடலும்,இன்னொரு முனைவிளிம்பில் எனது விடுதி,விமானநிலையம் ஓடு பாதை,வேறொரு திசையில் அட்லாண்டிக் கடல்,மற்றுமொரு சுரங்க முடிவில் டவுன் டவுண் கட்டிடங்கள் என பார்க்க முடிந்தது. எனது விடுதியறையிலிருந்து பார்த்தபோது மலையில் தெரிந்து சிறு துவாரங்கள் அங்கே எப்படி உருவாயிற்று யார் இந்த செங்குத்தான மலையில் ஏறி சென்றிருப்பார்கள் எனும் கேள்விக்கு விடையும் கிடைத்தது.


              நாங்கள் வண்டியில் செல்லும்போதே விமானம் ஒன்று தரையிறங்க வந்துகொண்டிருந்தது. மலையிலிருந்து அதை காண்பது ஒரு நல்ல அனுபவமாக இருக்கும் தெளிவாக தெரியும் இடத்தில் நான் வண்டியை நிறுத்துகிறேன் என்றார் ஓட்டுனர். ஆனால் சாலை பராமரிப்பு வண்டி ஒன்று அங்கே திரும்பிகொண்டிருந்ததால் எங்களால் விமானம் தரையிறங்கும் காட்சியை காண முடியவில்லை.

   மலைக்குள் குகையில் இருக்கும்போது விமானம் மேலெழும்புவதை கண்டோம்.  ஓட்டுனர் திரும்பிவருகையில் நடக்க இயலுமாயின் நடந்தே வாருங்கள் அது ஒரு நல்ல அனுபவத்தை தரும் என்றார். எங்களுடன் வந்த வயதான அமெரிக்கர்கள் வண்டியில் சென்றார்கள். நாங்கள் மூவரும் மலையிச்சியில்  இருந்து குகைகளை கண்ட பின் நடந்தே கீழிறங்கி வந்தோம்.

 பாறைகளிலேயே வீடுகளும் முடிவில் கடை வீதியும் இருந்தது.வீட்டுக்கு தேவையான காய்கறிகளை வாங்கி வந்து ஒரு பெண்மணி மலைப்பாதையில் தனது இருசக்கர வண்டியை நிறுத்திவிட்டு பாறைகளில் வெட்டபட்டிருந்த படிக்கட்டுகளில் சிரமப்பட்டு இறங்கிகொண்டிருந்தாள். மனமிரங்கிய பிரபுல் ஒரு பையை தூக்கி கொண்டு வீட்டு வாசல் வரை கொண்டு கொடுத்துவிட்டு வந்தான்.

ஒரு ஊருக்கு சென்றால் அதன் ஒரு சிறு பகுதியை மட்டுமே நாம் காண்போம். ஜிப்ரேல்டார் எனும் இந்த ஒரு நாட்டை நாங்கள் முழுமையாக சுற்றி பார்த்தோம் என உறுதியாக சொல்வேன்.

 களைத்து விடுதிவந்து சேர்ந்து குளித்து ஓய்வெடுத்து இரவுணவுக்குப்பின் ரைமுண்டோவிடம் கேட்டேன். “இன்னும் ஒரு இடம் மட்டும் பாக்கி இருக்கிறது நாம் பார்க்காதது” என. “செல்வோம்” என்றார். 

 கடை வீதி,உணவகங்கள், மிதக்கும் உல்லாச கப்பல் வடிவில் கட்ட பிரமாண்ட கட்டிடம். வரிசையாக நிறுத்திவைக்கபட்டிருந்த ‘யாட்ச்கள்’ வங்கிகள், ஷேர் மார்கெட் கட்டிடம் என பார்த்தோம்.அந்த இரவிலும் கால்பந்து போட்டி நடந்துகொண்டிருந்த மைதானத்தில் நுழைந்து காலரியில் அமர்ந்து சிறிது நேரம் போட்டியை கண்டோம். ரைமுண்டோ முன்னாள் கால்பந்து வீரர். ரோடு போன போக்கில் எங்கெல்லாமோ நடந்தோம்.இறுதியாக மலையுச்சியில் தெரிந்த விளக்கொளியை அடையாளம் வைத்து விடுதி இருக்கும் திசையை கணித்து நடக்க தொடங்கினோம்.

  ஜிப்ரேல்ட்டரை முழுமையாக கண்டுவிட்டோம் எனும் அக மகிழ்வில் நடந்து களைத்து விடுதியை அடைந்தோம். மறுநாள் காலை பத்தரை மணிக்கு புறப்பட வேண்டும். லண்டன் வழியாக மும்பை- திருவனந்தபுரம் செல்ல விமான டிக்கெட்டுகள் வந்திருந்தது. ரைமுண்டோ கோவாவிற்கும்,பிரபுல் மும்பைக்கும்.

05 feb 2024.

நாஞ்சில் ஹமீது.

Tuesday, 18 June 2024

மிகக்குறுகிய பயணங்கள் .

 

நீ.....ண்...........ட  பயணம் என ஒரு பதிவு எழுதியிருந்தேன். யார் கண் பட்டதோ. அமீரகத்தின் தாஸ் தீவில் மே மாதம் ஐந்தாம் தேதி கரையணைந்து ஆறாம் தேதி பின் மதியம் சரக்கு நிறைக்க துவங்கி எழாம் தேதி புறப்பட்டு பன்னிரெண்டாம் தேதி இந்தியாவின் சூரத் அருகிலுள்ள ஹசிராவில் சரக்கை இறக்கினோம்.

தாஸ் தீவு இரவில் 


ஒரு முறை சரக்கு ஏற்றி இறக்க மட்டுமே கப்பலை வாடகைக்கு எடுத்தது ஒரு நிறுவனம். எங்களது எல் என் ஜி கப்பலில் சரக்கு நிறைத்தால் குறைந்தது இருபத்தியைந்து நாட்கள் பயணித்து வேறொரு நாட்டில் சரக்கை கொடுப்போம். அதாவது மாதத்தில் ஒரு துறைமுகம் அல்லது  இரண்டு. மீதி நாட்கள் கப்பல் ஓடிக்கொண்டே இருக்கும். எங்களது பணியும்,கப்பல் வாழ்க்கையும் அதிக சிரமமில்லாமல் நகர்ந்துகொண்டிருக்கும்.

  பதிமூன்றாம் தேதியே  கப்பல் ஹசிரா விட்டபின் வேறொரு நிறுவனம் விரைந்து தாஸ் தீவுக்கு வர சொன்னது தாஸ் தீவில் கப்பல் கரையணைந்தது முதல் கப்பலுக்கு அவர்கள் வாடகை தரத்தொடங்குவார்கள். மே மாதம் பதினேழாம் தாஸ் தீவில் சரக்கை நிரப்பிவிட்டு  பத்தொன்பதாம் தேதி  புறப்பட்டு நான்கு நாள் பயணத்திற்குப்பின் மீண்டும் ஹசிராவை அடைந்தோம்.

  இருபத்தியைந்தாம் தேதியே மீண்டும் புறப்பாடு. ஒவ்வொரு துறைமுகத்திற்கும் இடையில் மிகச்சிறிய இடைவெளிகள். அதிக பட்சமாக நான்கு பயண நாட்கள். கப்பல் காரனுக்கு வேலை மிக கடுமையாகிவிட்டது. துறைமுகம் செல்வதற்கு முன்னால் பாதுகாப்பு ஒத்திகைகள், சரக்கு தொட்டிகளை தயார் செய்தல்,எல் என் ஜி திரவ குழாய்களில் காஸ்கட் மாற்றுதல்,சரக்கு தொட்டி மற்றும் குழாய்களின் வால்வுகளை இயக்கி பார்த்தல், டெக் பணியாளர்கள் கப்பல் கரையில் கட்டப்படும் கயிறுகளை தயார் செய்து வைத்தல், கப்பலை உப்பு பிசுக்கு இல்லாமல் கழுவி சுத்தபடுத்தல்.

  கரையணையும் முன் போக்குவரத்து நெரிசல் உள்ள பகுதிகளில் நேவிகேஷன் அதிகாரியுடன் கண்காணிப்பில் ஒருவர் அதிகமாக இருத்தல். இயந்திர அறையிலும் தானியங்கி சிஸ்டதிலிருந்து மாற்றி இரவும் பகலும்  இருவர் பணியில் இருப்பது. பைலட் மற்றும் கரையில் வரும் அதிகாரிகள் தங்கும் அறையை சுத்தப்டுத்தல். கரையில் இருக்கும்போது நடக்கும் ஆய்வுகளுக்கு கப்பலை தயாராக வைத்தல் இப்படியாக  சனி,ஞாயிறு என பாராமல் எப்போதும் வேலை, வேலை, வேலை ஓடி ஓடி அனைவரும் களைததுவிட்டோம். அதாவது மாதத்தில் ஒரு முறை செய்ய வேண்டிய வேலையை ஆறு முறை செய்யவேண்டிய கட்டாயம்.

  மே மாதம் இரண்டாம் முறையாக ஹசிராவிலிருந்து புறப்பட்டு தாஸ் தீவுக்கு நான்கு நாட்களில் சென்று சேர்ந்தாலும் கப்பல் கரையணைவில்லை. துறைமுகத்தில் சில பழுதுபார்க்கும்பணிகள் நடந்துகொண்டிருந்ததால். துறைமுகம் எப்போது அழைத்தாலும்  செல்லும் வகையில். தாஸ் தீவுக்கு இரண்டு மணி நேர பயண தூரம் இருக்கையில் கப்பலை வட்டமடித்து கொண்டிருந்தோம்.

  முப்பத்தி ஒன்றாம் தேதி உள்ளே வாருங்கள் என செய்தி வந்ததும் போய் சரக்கை நிரப்பினோம்  ஜூன் மாதம் ஐந்தாம் தேதி குஜராத்தின் பரூச் அருகிலுள்ள தகேஜ் என்னுமிடத்தில் துறைமுகம். இங்கே கடுமையான நீரோட்டம் காரணமாக கப்பலை கரையில் கட்டும் கயிற்றின் நுனியில் இருக்கும் வட்டத்தின் நீளம் இருபத்தியிரண்டு மீட்டர் வேண்டும் என்றார்கள்.  முன்பும் பின்பும் மொத்தம் இருபத்திமூன்று கயிறுகளின் நுனியை ஐந்துபேர் கொண்ட குழு ஒரே நாளில் மாற்றி சோர்வடைந்து சாய்ந்தது.ஜூன் ஆறாம் தேதி கடுமையான நீரோட்டம் கொண்ட தகேஜ் துறைமுகப்பில் மிக கஷ்டப்பட்டுத்தான் கப்பலை கட்ட முடிந்தது.

   இப்படியாக மே ஆறாம் தேதி முதல் ஜூன் ஆறுக்குள் ஆறு முறை கரையில் கப்பலை கட்டி சரக்கை கையாண்டோம்.மே மாதம் அரபிக்கடல் கடுமையான கோடை வெள்ளி உருகுவது போல வெயில் இறங்கும் வெப்பத்தால் கடல்நீர் உருகி மேலெழும் நீராவியின் வெப்பமும்.  .தலையிலிருந்து கழுத்து வரை வெள்ளைத்துணியால் கட்டி கண்களுக்கு கறுப்பு கண்ணாடியும் அணிந்தோம். தண்ணீரும்,எலுமிச்சை உப்பு,சீனி கலந்த பானம்,மோர் குடித்து தகிக்கும் வெயில் நாட்களை சமாளித்தோம்.

    இப்போதும் தாஸ் தீவில் கடந்த பதினொன்றாம் தேதி சரக்கு நிரப்பிவிட்டு  தகேஜ் நோக்கி புறப்பட்டு வந்து கொண்டிருக்கிறோம். பதினேழாம் தேதி கரையணைவோம். அடுத்து எங்கு செல்வது என இதுவரை தகவல் இல்லை. மிகக்குறுகிய பயணத்தில் தேதி, கிழமை நினைவில்லாமல் போனதில் ஒரு மாதம் விரைவாக ஓடிவிட்டது.

Dahej (gujrat)


  நாஞ்சில் ஹமீது,

16  june 2024.

ஜிப்ரேல்டர் எங்கே இருக்கிறது.


 

       தூங்கி எழுந்து  அதிகாலை தொழுகைக்குப்பின் இன்றும் கடற்கரைக்குப்போனேன்.காலை உணவுக்கு சென்றேபோது வரவேற்பறையில் எங்களுக்கு எந்த செய்தியும் இல்லை. முகவரை அழைக்க சொன்னோம். பதினோரு மணிக்கு மேல் தான் இங்கே அழைப்பது வழக்கம் என்றார். வரவேற்பறையில் இருந்த லூசி. 

  லூசி நேற்றிரவும் பணியில் இருந்தாள். தான் ஸ்பெயினில் வசிப்பதாகவும். தினமும் இங்கு வந்து போவதாகவும் தன்னை போல தினமும் பத்தாயிரம் பேர் ஸ்பெயினிலிருந்து இங்கு பணிக்கு வந்து செல்வதாக சொன்னாள். இங்கே சம்பளம் கொஞ்சம் அதிகம் என்றாள்.

  நான்காவது மாடியிலுள்ள என் அறையிலிருந்து படிக்கட்டுகள் வழியாக இறங்கும்போது விடுதியின் பின்புறமுள்ள மயானமும்,விமான ஓடுதளமும்,கடலும் காட்சியளித்தது.அதை லூஸியிடம் சொல்லி எனக்கு முன் பக்க அறையின் கண்ணாடி ஜன்னல் வழியாக பார்த்தல் ஓங்கி உயர்ந்த ஜிப்ரால்டார் மலையின் சிறு பகுதி தெரிவதை சொன்னபோது. “ நீ அதிர்டசாலி முன் பக்க அறை கிடைத்தது. பாறை தெரிவது பரவாயில்லை, பின்புற அறையில் இருந்தால் இரவில் ஆவிகளை பார்க்கும் வாய்ப்பு உனக்கு கிடைக்கும்” என மஞ்சள் நிற பற்கள் தெரிய சப்தமாக சிரித்தாள். 


   காலை உணவு முடிந்து வெளியே சென்றோம் நேற்று சென்ற திசைக்கு எதிர் திசை இன்று. விமான நிலையத்தின் ஓடு பாதைக்குள் புகுந்து மறுபுறம் சென்றோம். ஓடு பாதையில் நின்று படம் எடுத்துக்கொண்டோம்.விமானம் இறக்கும் பாதையில் நடந்து செல்வது ஒரு கிளர்ச்சியை தந்தது. மறு புறம் ஸ்பெயின் எல்லை உரிய ஆவணங்கள் இருப்பவர்கள் ஸ்பெயின் நாட்டிற்குள் செல்கிறார்கள். விமான நிலையத்தை சுற்றி இடுப்பளவு கம்பி வேலி அமைத்திருக்கிறார்கள். நாட்டின் எல்லை அதுதான்.கண்காணிப்பு காமிரா மூலம் கண்காணிப்பார்கள் போல. ஸ்பெயின் – ஜிப்ரால்டர் கடற்கரையும் அதேயளவு கம்பி வேலியிட்டு உள்ளனர்.

Runway 


   விமானம் ஒன்று தரை இறங்கியது ஓடு பாதையின் இருபுறம் மூடப்பட்டு காவலர்கள் பாதுகாத்தனர். மீண்டும் பாதை திறந்தபின் மக்கள் செல்ல அனுமதித்தனர். வாகனங்களுக்கு அனுமதியில்லை.மதியம்வரை சுற்றிவிட்டு விடுதிக்கு வந்தபோது மேலும் இருதினங்கள் காத்திருக்க சொல்லி தகவல் வந்திருப்பதை வரவேற்ப்பறை பெண் சொன்னாள்.

    ஜிப்ரேல்டர் எங்கே இருக்கிறது மத்தியதரைக்கடலில் ஸ்பெயினுக்கும், மொராக்கோவுக்கும் இடையில் உள்ள பகுதி. பிரிட்டனின் ஆளுமைக்கு உட்பட்டது. பிரிட்டனின் கவர்னர் ஆட்சி புரிகிறார்.எல்லா வரலாற்றையும் போல் இங்கும் சண்டையும் உயிர்பலியும் ஏராளமாக நடந்துள்ளது. இஸ்லாமிய மன்னர் தாரிக் பின் சயீத் என்பவர் பெயரால் ஜபல் (மலை) தாரிக் என இருந்த இங்குள்ள மலையின் பெயரால் பின்னர் இப்பகுதி ஜிப்ரால்டர் என பெயர் பெற்றுள்ளது. முன்பு இந்த மலை ஜபல் மூஸா எனவும் இருந்துள்ளதாக வராலாற்று குறிப்புகள் சொல்கிறது. தொழிற்நுட்பம் வளரும் முன் இந்த ஜிப்ரேல்டார் மலை கப்பலோட்டிகளுக்கு பெரும் உதவியாக இருந்துள்ளது.

   இஸ்லாமியர் ஆட்சியை வெளியேற்றி விட்டு ஸ்பானிஷ் ஆட்சி நெடுங்காலம் அமைந்துள்ளது.பின்னர் ட்ச்சு,பிரெஞ்ச் ஆளுமைக்கு உட்பட்டும் ஆட்சி நடந்துள்ளது. முதல் மற்றும் இரண்டாம் உலகப்போரில் எரிபொருள் நிரப்பி செல்லும் இடமாக போக்குவரத்திற்கு மிகவும் பயன்படுத்தப்பட்டுள்ளது. அப்போதுதான் பிரிட்டிஷ் கைபற்றியிருக்க வேண்டும்.

   இறுதியாக ஆட்சி மாற்றத்துக்காக நடந்த ஒட்டெடுப்பில் பெருன்பான்மை மக்கள் பிரிட்டன் ஆட்சியை விரும்பியாதல் அதுவே இப்போதும் நீடிக்கிறது. பிரிட்டனின் கடற்படை தளம் ஒன்றும் இங்குள்ளது.

  மொத்தமே 6.4 சதுர கிலோமீட்டர் பரப்பளவு உள்ள இந்நாட்டின் மக்கள் தொகை (34,000)முப்பதினான்காயிரம் மட்டுமே.வருமான வரி மற்றும் இன்ன பிற சலுகைகளை வழங்கி இங்கே தொழில் தொடங்க வருமாறு அழைப்பு விடுக்கும் விளம்பரங்கள் ஆங்காங்கே உள்ளது.

    மாலையில் கடற்கரைக்கு சென்றபோது வயதான இந்தியர் ஒருவர் மீன்களுக்கு பூஞ்சை பிடித்த பிரட்டை பிய்த்து போட்டுகொண்டிருந்தார். (1975 இல் இங்கு பணிக்காக வந்தவர்) ஐம்பது ஆண்டுகளாக இங்கே வசிப்பதாவும் பிறந்து வளர்ந்தது இந்தியாவில் பஞ்சாப் மாநிலத்தின் அமிர்தசரஸ் நகரம் என்றும் சொன்னார்.

   அங்கே கட்டபட்டிருந்த விலையுர்ந்த உல்லாச படகு ஒன்றை புகைப்படம் எடுத்தோம்.ஆப்ரிக்காவிலிருந்து இங்கிலாந்தில் குடியேறிய நண்பர்கள் குழு  சுற்றலா வந்திருந்தது.




  இந்தியர் எங்களின் ஜிப்ரேல்டர் வருகை குறித்து கேட்டறிந்தபின் அவரது காரில் எங்களை விடுதியில் இறக்கி விடுவதாக சொன்னார். நடந்தே ஊர் சுற்ற இருப்பதை சொன்னபோது இந்த ஊரில் நீங்கள் வழி தவற வாய்ப்பே இல்லை இந்த மலையை பார்த்துகொண்டு நடந்தால் எளிதாக உங்கள் விடுதிக்கு சென்று விடலாம் எனச்சொல்லி விடைபெற்றார்.

 தனது மகள் இங்கே மருத்துவராக பணிபுரிவதாக சொன்னார்.இங்கே வசிப்பிடம் மிக விலைஅதிகம் எனவும் சொன்னார். இடப்பற்றாக்குறையே அதற்கு காரணாமாக இருக்கும்.

   இரவு வரை சுற்றி களைத்துவிட்டு விடுதிக்கு திரும்பினோம்.

 நாஞ்சில் ஹமீது,

03-feb-2024

Thursday, 23 May 2024

ஜிப்ரேல்டர்

 


       அதிகாலை தூங்கி எழுந்து தொழுகைக்குப்பின் விடுதியிலிருந்து வெளியேறி நேற்று நடந்த திசைக்கு எதிர்பக்கமாக நடந்தேன். விடுதியின் எதிரில் அந்த ஜிப்ரேல்டர் ராக் நின்றுகொண்டிருக்கிறது.அதிகாலையே குளிருக்கான வெப்ப ஆடை

 


அணிந்து பேட்டரி சைக்கிளில் நின்றபடி பணிக்கு சென்றுகொண்டிருந்தாள் ஒருத்தி.ஒரு கிலோமிட்டருக்குள்ளாகவே கடற்கரை வந்தது.  



   கடற்கரை ஆளோழிந்து கிடந்தது நல்ல காற்றும் கடல் லேசாக சீற்றமாகவும் இருந்தது, தூரத்தில் சில கப்பல்கள் காற்றில் ஆடிகொண்டிருந்தது. கடற்கரையில் நாய்கள் அனுமதியில்லை,மாற்றுதிறனாளிகளுக்கு வாகனம் நிறுத்த தனியிடம்,ஒரு வாகனம் அதிகபட்சமாக ஒரு மணிநேரம் மட்டுமே நிறுத்த அனுமதி, காற்றில் அடித்து சென்று விடாமல் இருக்க இறுக்கமாக கட்டிவைத்த மூடி போட்ட குப்பைத்தொட்டிகள் சீரான இடைவெளியில்,கடலில் குளித்தபின் நன்னீரில் குளிக்க நன்னீர் குழாய்கள் சில அங்கே இருந்தது.

   இறுக்கமாக உடையணிந்த ஒருவர் ஓட்டபயிற்சி செய்து கொண்டிருந்தார். சாலையை ஒட்டிய வணிக நிறுவன சுவர்களில் நாய்கள் கால்களை தூக்கி மூத்திரம் போக அனுமதியில்லை எனும் படம் என்னை ஆச்சரியபடுத்தியது.சில உணவகங்கள் திறந்திருந்தன. இருவர் மட்டும் வெளியில் அமர்ந்து பெரிய குவளையில் காபி குடித்துக்கொண்டிருன்தனர்.

   ஹாலிடே இன் எனது விடுதியில் நுழைந்து வரவேற்பறையில் ஒரு கப் நீர் அருந்திவிட்டு அறைக்கு சென்று நீராடினேன். காலை உணவுக்குப்பின் முந்தையநாள்  மாலை சென்ற கடைவீதிக்கு பிரபுல், ரைமுண்டோவை மற்றும் சௌகானை அழைத்துச்சென்றேன்.



  மிக பழமையான கடைவீதி கருங்கற்களால் ஆன நடைபாதை  காயத்ரி ஜிவல்லர்ஸ்,விஜய் மணி எக்ஸ்செஞ் ஆகிய இந்திய நிறுவனங்கள் இங்கும் இருக்கிறது.சௌகான் எனது இன்னொரு பெயர் விஜய் என் பெயரில் இங்கே கடை இருக்கிறது என மகிழ்ந்து படம் எடுத்துக்கொண்டார்.அங்கே தனக்கொரு மதுகுப்பியை வாங்கிக்கொண்டார் விஜய் சௌகான்.



   மதியம் வரை சுற்றிவிட்டு விடுதிக்கு வந்தோம் நீண்ட நடை லேசான குளிர் இருந்ததால் களைப்பே இல்லை.சாப்பிட்டுவிட்டு மூன்று மணிக்குமேல் நல்ல தூக்கம். மாலைகுளியலுக்குப்பின்  பெட்டியில் அனைத்தையும் அடுக்கி தயார் செய்தேன்.ஆறுமணிக்குமேல் ஏஜென்ட் எங்களை கப்பலுக்கு அழைத்துச்செல்ல வரலாம்.

 மாலையில் உணவுகூடத்தில் அமர்ந்திருந்தோம் முகவரின் வருகையை எதிர்பார்த்து. ஆறரை மணிக்குமேல் சௌகான் சொன்னார் அவர் கப்பலுக்கு செல்வது ரத்தாகி விட்டது என.

தனது மொபைலில் கப்பல் ஜிப்ரேல்டர் தாண்டி சென்று கொண்டிருப்பதை காண்பித்தார்.அவரது கப்பல் நிறுவனமே அவருக்கு குறுஞ்செய்தி அனுப்பியிருந்தது. அவருடன் பணியில் இணைய வேண்டிய காப்டனும் உணவு கூடத்தில் வந்து அவருக்கு அந்த செய்தியை உறுதி செய்தார்.

    பிரபுல் நாங்கள் இணைய வேண்டிய கப்பலின் இரண்டாம் இஞ்சினியரை தொடர்புகொண்டார். நாங்கள் பணியில் இணைவதும் ரத்தான செய்தி உறுதியானது. நான் கப்பல் சென்று விடுவிக்கவேண்டிய தினேஷ் எனக்கு செய்தி அனுப்பியிருந்தார். எங்கள் பயண பைகளை டெக்கில் வைத்துவிட்டு கப்பலில் இருந்து இறங்குவதற்காக நாங்கள் நெடுநேரம் காத்திருந்தோம். காப்டன் அழைத்து “யுவர் சைன் ஆப் கேன்சல்” என சொல்லிவிட்டதாக சொன்னார்.

   எங்களுக்கு ஒன்றும் புரியவில்லை ஏன் ரத்தானது என. நாங்களும் தயாராக இருந்தோம் கப்பல் செல்ல. ஜிப்ரல்டர் துறைமுகம் இன்று  மூடபட்டிருப்பதாகவும்,படகு கடலுக்குள் செல்ல இயலாது எனவும் அறிந்தோம். ஆப்பிரிக்காவின் நைஜீரியாவை நோக்கி செல்லும் கப்பல் ஜிப்ரேல்டரை கடக்கும்போது படகில் சென்று நாங்கள் ஏறிகொள்ள வேண்டும் என்பது திட்டம். தீடீர் கடல் சீற்றம் காரணமாக படகு கடலுக்குள் செல்ல இயலாததால் நாங்கள் பணியில் இணைவது ரத்தாகி போனது.

  இரவில் தினேஷ் செய்தி அனுப்பியிருந்தார் அருகில் கனேரி எனும் தீவில் பணியாளர் மாற்றம் செய்ய காப்டன் முயற்சிக்கிறார் என. அது சாத்தியமானால் ஞாயிறன்று நீங்கள் கப்பலுக்கு வரமுடியும் என்றார்.

  எங்கள் ஏஜென்டிடம் இருந்து எந்த தகவலும் இல்லை. அடுத்து என்ன ஆகும் என எந்த உறுதியும் இல்லாமல் இரவில் தூங்க சென்றோம்.

03 feb2024,

நாஞ்சில் ஹமீது.