Monday, 2 April 2018

நடை பயணம்

                    நீண்ட நடை அவ்வப்போது செல்வதுண்டு இன்று காலை நடையாக நான் தற்போது வசிக்கும் நாகர்கோவிலில் இருந்து எனது சொந்த ஊரான மணவாளக்குறிச்சிக்கு காலை தொழுகைக்கு பின் நடக்க தொடங்கினேன் .வெகு நாட்களாகவே  நான் பிறந்து வளர்ந்த ஊருக்கு கால் நடையாக செல்ல வேண்டுமென எண்ணியிருந்தேன் .நாகர்கோயில்–மணவாளக்குறிச்சி பதினாறு கிலோமீட்டர்கள்.


  முன்பு ஒருமுறை நாகர்கோயில் –கன்னியாகுமரி நடந்திருக்கிறேன் இருபது கிலோமீட்டர்கள்.பொற்றையடியில் இருக்கும் மருந்துவாழ் மலைக்கு ஓவ்வொரு விடுமுறையிலும் இருமுறையாவது ஏறி விடுவேன் .சதுரகிரி மலைக்கு ஏறி இறங்கியபின் மருந்துவாழ் மலை மிக சிறியதாக இருக்கிறது .

  1989  ஆம் ஆண்டு ஆண்டுதோறும் நடக்கும் தக்கலை பீர்முஹம்மது அப்பா தர்காவில் நடக்கும் ஞான புகழ்ச்சி விழாவிற்கு சென்றிருந்தோம் .இரவு முழுவதும் அங்கு இருந்துவிட்டு காலையில் வீட்டிற்கு செல்வது திட்டம் .அதிகாலை ஐந்துமணிக்கு கலைஞர் கருணாதியின் ஆட்சி கலைக்கப்பட்டது எனும் செய்தி கிடைத்தது .

 பேருந்துகள் ஓடவில்லை நானும் நண்பர்களும் தக்கலை- மனவளாக்குறிச்சிக்கு  நடக்க தொடங்கினோம்  பதிநான்கு கிலோமீட்டர் .மூன்றரை மணிநேரம் அதுதான் எனது முதல் நீண்ட நடை .

இப்போது சூரிய உதயம் மிகவும் தாமதமாகிவிட்டது  ஆறரைக்கு தான் கதிரவன் வெளிவருகிறான் .காலை நேர தொழுகை ஐந்து நாற்பதுக்கு .ஆறு மணிக்கு முன்பே வீட்டிலிருந்து வெளியே வந்தேன்.குளிரே இல்லை டிசம்பர் ,ஜனுவரியில் உலகின் பெரும்பகுதி கடும் குளிரில் அவதிப்படும் .ஞாயிறு ஆகையால் நகரம் இன்னும் விழித்திருக்கவில்லை .

  வில்லியம் மருத்துவமனையை ஒட்டிய ஹென்ரி சாலை வழியாக ஜோஷ்வா தெரு சாலை .ஹென்றி சாலையிலுள்ள ஆல்பா பள்ளியின் வெள்ளிவிழா அலங்கார வளைவு பெரும் பொருட்செலவில் கட்டி முடியும் நிலையில் இருந்தது.வில்லியம் மருத்துவமனை அருகில்  துவங்கும் ஹென்றி சாலை முடிவில் சாம் மருத்துவமனை இருக்கிறது.

 ஸ்காட் பள்ளியை ஒட்டிய சாலை மிக குறுகலானது ஓரல் காது கேளாதோர் பள்ளியை தாண்டினால் ஹாஸ்டல் மைதானம் .நடை பயிற்சி செய்பவர்கள் யாரும் இன்னும் மைதானத்திற்கு வரவில்லை .கிரிக்கெட் மட்டையுடன் சில மாணவர்கள் மைதானத்தின் வாயில் வழியாக நுழைந்து கொண்டிருந்தனர் .

   மைதானத்தை ஒட்டிய கிறிஸ்தவ கோயில் ஞாயிறு காலை பிரார்த்தனைக்கு தாயராகிகொண்டிருந்தது .ஆலயம் கிறிஸ்மஸ்,புத்தாண்டுக்கு போடபட்டிருந்த மின்விளக்குகளால் ஜொலித்துக்கொண்டிருந்தது .இந்த சாலை தண்ணீர் தொட்டி சாலையில் முடியும் .இதன் முடிவிலும் ஓராண்டுக்கு முன் புதிதாக ஒரு மகப்பேறு மருத்துவமனை வந்துவிட்டது .ஓஹி புயல் தாக்கியபோது இந்த சாலை மரங்களும் ,மின் கம்பங்களும் விழுந்து முழுமையாக இருநாட்கள் துண்டிக்கபட்டு இருந்தது நினைவில் வந்து மறைந்தது .

  தண்ணீர் தொட்டி சாலையை தாண்டி டெரிக் சந்திப்புக்கு செல்லும் சாலையின் துவக்கத்தில் இருக்கும் கோழிகடை மின் விளக்குகளால் விழித்திருந்தது .இந்த சாலையிலும் ஒரு மருத்துவமனை இருக்கிறது .நண்பர் சாம் பிரின்சின் வீடும் இங்குதான் .டெரிக் சந்திப்பில் வந்து சேர்ந்தேன் .இது தான் பிராதன சாலையான  கே .பி ரோடு .

 மணவாளகுறிச்சி செல்ல ஆசாரிபள்ளம் சாலையை அடைந்தேன்.வசந்த் அன் கோ ,ஐரின் மருத்துவமனை தாண்டினால் பிஷப் வளாகம் .அதன் முன் குப்பை மலைபோல் குவிந்திருக்கிறது நாற்றம் வேறு .

 நேசமணிநகர் சி எஸ் ஐ ஆலயத்தில் ஞாயிறு பிரார்த்தனை தொடங்கியிருந்தது .ராணிதோட்டம் அரசு போக்குவரத்து கழக பணிமனையிலிருந்து பேருந்துகள் வந்துகொண்டிருந்தன .ஓட்டை ,ஓடிசல்கள் தான் இப்போது அதிகம் .இருபத்தியைந்து ஆண்டுகளுக்கு முன்பு நேசமணி பேருந்துகள் அழகாக இருக்கும் .

 இங்கு பணிமனையில் புதிய பேருந்துகளுக்கு உடல் வடிவமைக்கும்(body building ) மையம் ஒன்று தனியாருக்கு கொடுக்கபட்டிருந்தது .திருநெல்வேலிக்கும், மற்ற மாவட்ட பேருந்துகளையும் இங்கு உடல் வடிவமைத்து கொடுப்பார்கள் .அது காணாமல் போனதற்கு உழல் தான் காரணமோ என்னமோ?நான் அப்போதெல்லாம் பேருந்தை பார்த்தாலே சொல்வேன் இது நாகர்கோயிலில் வடிவமைக்கபட்டது என .

அனந்தன் பாலம் இடப்புறமாக சானல் கரையை ஒட்டி சென்றால் .கோணம் அகில இந்திய வானொலி நிலையம் சென்றுவிடலாம் .அனந்தன் பாலம் அருகில் இப்போது வங்கிகளும் ,ஏ டி எம் களும் ,நிறைய கடைகளும் வந்துவிட்டன.
ஆசாரிபள்ளம் மருத்துவகல்லூரி.பழைய காச நோய் மருத்துவமனை சிறுவனாக இருக்கும் போது இவ்வழியில் பேருந்தில் செல்லும்போது மிகவும் சுற்றிகொண்டு செல்கிறதுபோல் தோன்றும் .
மருத்துவகல்லூரி வளாகத்திற்குள் நுழைத்தேன் .நிறைய உயரமான தேக்கு  மரங்கள் இருப்பதை இப்போதுதான் பார்க்கிறேன் .பிரதான வாயிலில் நுழைந்து பின்புறமுள்ள வாயில் வழியாக வாகனத்தில் செல்ல அனுமதி கிடையாது.

 முன்பு காச நோய் மருத்துவமனையாக இருக்கும்போது .என் வீட்டருகில் உள்ள ராமகிருஷ்ணன் தாத்தா மகன் ஸ்ரீதரன் மாமாவுடன் இருசக்கர வாகனத்தில் உள் புகுந்து வெளியேறினோம் .அப்போதும் அனுமதி இருந்ததா என தெரியவில்லை .
பின்புற வாயிலுக்கு வெளியேதான் தான் பரபரப்பாக காலை நேர இட்லி,ஆப்பம் என வியாபாரம் நடக்கிறது .வாயிலை ஒட்டியிருக்கும் கடையின் முன்பகுதி அழுக்கும் ,தூசியுமாக பாழடைந்த கடை போல இருக்கிறது .
இங்குதான் நோயாளிகளுக்கு உணவும் ,பானங்களும் தயாராகிறது .மருத்துவ கல்லூரி அருகிலேயே எப்படி இவ்வளவு சுத்தமில்லாமல் கடைகள் நடத்துகிறார்களோ .பணம் சம்பாதிப்பது மட்டுமே குறிக்கோள் போல .

ஆசாரிபள்ளம் காவல் நிலையமும் மரக்கடையும் தாண்டி சானல்கரை அருகிலும்,அதை ஒட்டிய தென்னந்தோப்பிலும்  பாலிதீன்
தண்ணீர் பாக்கெட்கள் குவிந்து கிடக்கிறது கண்ணுகெட்டிய தூரம் வரை .பின்புதான் தெரிந்தது  அரசு டாஸ்மார்க்
கடைதான் காரணம் என .மருத்துவ கல்லூரி அருகிலேயே சாரயக்கடை .

 அந்த தென்னம்தோப்பில் அனைத்து தென்னை மரங்களும் மொட்டையாக இருப்பதை முன்னரே இருசக்கர வாகனத்தில் செல்லும்போது பார்த்திருக்கிறேன் .கடந்த ஆண்டு வறட்சியில்தண்ணீர் இல்லாமல் பட்டு போனதாக அறிந்தேன் .
பாம்பன்விளைக்கு முன்பு ஒரு பெரிய மருத்துவமனையும் புதிதாக வந்துள்ளது .மருத்துவ கல்லூரி மருத்துவர்கள் இங்குபகுதி நேரமாக பணி செய்ய ஏற்ற இடம் என ஒரு எண்ணம் வந்து மறைந்தது .
பின்பு தோப்பூர் சந்திப்பு  சுற்றிலும் தென்னை மரங்கள் சூழ்ந்துள்ளது .அதனால் இவ்வூருக்கு இப்பெயர் வந்திருக்கலாமோ?தோப்பூர் சந்திப்பிலிருந்து ராஜாக்கமங்கலம் ,எதிர் திசையில் இரணியல்-தக்கலை செல்லும் சாலைகள் உள்ளன.

அதன் பின் சாந்தபுரம் ,இங்குள்ள அரசு பள்ளி மைதானத்தில் தொண்ணூறுகளில் கிரிக்கெட் விளையாட வந்திருக்கிறேன் .காலையில் மாணவர்கள் கால்பந்து விளையாடி கொண்டிருந்தனர் .சாந்தபுரம் கிறுஸ்தவ ஆலயம் மிக பழமையானது பார்பதற்கு மிக பெரிதாக தெரிந்தது .
கொஞ்சம் மேலே அரசன்விளைக்கு முன்பு ஒரு இந்து கோயில் உள்ளது அதன் எதிரில் உள்ள வீட்டின் முன்பு உள்ள தண்ணீர் குழாயில் பித்தளை நல்லி இருந்தது  ஆச்சரியம்தான். அந்த வீட்டுக்காரர் நிச்சயம் எழுபது வயதுக்காரர் ஆக இருக்க வேண்டும் .அந்த தண்ணீர் குழாய்க்கும் அவரே காவல் அதனால் தான் பித்தளை நல்லி  அங்கு மட்டும் இருகிருக்கிறது . வழிநெடுகிலும் எங்கும் பொதுகுழாய்களில் பிளாஸ்டிக் நல்லி தான் பொருத்தபட்டிருந்தது.சில இடங்களில் நல்லியே எல்லாம் குடிகாரர்கள் வேலைதான்  .

அரசன் விளை சந்திப்புக்கு முன் ஒரு சாமில் அதன் எதிரில் கொட்டாரம் (அரண்மனை)போல் ஒரு பெரிய வீடு .இங்கு யோகிராம் சூரத் குமார் ஆஸ்ரமம் ஒன்று உள்ளது இந்த வழியாக செல்லும்போதெல்லாம் அங்கு ஒருமுறை செல்ல வேண்டும் என நினைப்பேன் பல ஆண்டுகளாக செல்லவேயில்லை .

இன்று உட்புறமாக அந்த பெயர் பலகை இருந்த அம்புக்குறியை நோக்கி நடந்தேன் .பிரதான சாலையிலிருந்து பத்தடி தாண்டியதும் எங்கும் பாலிதீன் தண்ணீர் உறைகள் நிறைந்து கிடக்கிறது .அருகில் எங்கோ டாஸ்மார்க் இருக்கிறது .
குழாயில் தண்ணீர் குடத்துடன் நின்ற இளம்பெண்ணிடம் ஆஸ்ரமம் எவ்வளவு தூரம் என விசாரித்தேன் ,நேர போங்க கிட்டதான் என்றாள்.

ஒரு தென்னம் தோப்புக்குள் இருக்கிறது ஆஸ்ரமம்.அடர் காட்டுக்குள் வந்துவிட்டதுபோல் சுற்றிலும் மரங்கள்.புதியதாக கட்டிடம் கட்டிகொண்டிருக்கிறார்கள் .ஒரு வயதானவர் யோகிராம் சூரத்குமார் ,யோகிராம் சூரத்குமார் ஜெயகுருராயா என உச்சரித்து கொண்டே தியான கூடத்தை சுத்தம் செய்து கொண்டிருந்தார் .

  என்னை கண்டதும் உள்ளே வாருங்கள் என அன்போடு அழைத்தார் .காலணியை கழற்றிவிட்டு உள் சென்று நாற்காலியில் அமர்ந்தேன்.தென்னை ஓலையால் முடைந்த மேற்கூரையும் ,பக்க சுவர்களும்  (நாங்கள் அதை செத்த பெரை என்போம் )தரை மணல் .அவரே பேசினார் .நீங்கள் முஸ்லிமா என கேட்டார் .சிரித்துக்கொண்டே ஆம் என்றேன் .ஊர் எங்கே , நாகர்கோயில் எனக்கு .அவரது பேச்சு மொழியில் அவர் கன்னியாகுமரிகாரர் இல்லை என்பதை உணர்ந்து எந்த ஊர் என கேட்டேன் .திருச்சிங்க நம்மளுக்கு என்றார் .

  வழியில் எங்கும் நிற்கவோ யாரிடமும் பேசவோ இல்லை அதுவரை .இன்று இங்கு திருவாசகம் வாச்சிப்பார்கள் இருந்துவிட்டு போங்க என வேண்டிக்கொண்டார் .
 இயற்கை உந்தியது கழிவறையை கேட்டு சிறுநீர் கழிக்க சென்றேன் .அங்கேயுள்ள அடுமனையில் ஒரு பாட்டி அன்று வருபவர்களுக்கு காலை உணவாக கஞ்சி தயாரித்துகொண்டிருந்தார்கள்.தேங்காய் போட்டு சுடு கஞ்சி சுவையானது .என்னிடம் எய்யா கஞ்சில போட ரெண்டு தேங்கா தொலிச்சி தாய்யா என கேட்டார் .

 அங்குன இருக்கு பாரு குத்தி என மண்ணில் நாட்டி வைத்திருந்த ஈட்டி போலிருக்கும் தேங்காய் தொலிக்கும் கருவியை காண்பித்தார் .நான் முதல் தேங்காயை தொலிக்கும் போதே பாட்டி அறிந்துவிட்டாள் அதில் தேங்காய் தொலித்து எனக்கு முன் அனுபவம் இல்லை என . ஆரம்பித்ததும் எய்யா கை பாத்துய்யா,எய்யா தெரியானுனா உட்டுரு வேற யாரவது இப்பம் வருவாவ அவியல்ள்ட்ட சொல்லி தொலிச்சிகிடுதேன். இல்லை நான் தொலிப்பேன் என நான்கு தேங்காயை தொலித்துவிட்டேன்.

அப்போது அங்கு வந்தவர் அதன் பொறுப்பாளர் என அவர் அந்த பெரியவரிடம் கேட்ட கேள்விகளில் தெரிந்து கொண்டேன் .என்னை காட்டி அவர் யார் என்ன செய்கிறார் என பெரியவரிடம் கேட்டார் .கஞ்சிக்கு தேங்காய் தொலிக்கிறார் நடந்தே நாகேர்கோயிலில் இருந்து மணவாளகுறிச்சிக்கு போறாராம் என சொன்னது என் காதில் விழுந்தது .
 இப்பம் கஞ்சி வெந்துவிடும் குடித்துவிட்டு போ என கேட்டுகொண்டார் பாட்டி.இல்லை பாட்டி வேறொரு நாள் வருகிறேன் என்றேன் . அங்கிருந்து புறப்படும்போது அந்த பெரியவர் வருகை பதிவேட்டில் கையெழுத்து வாங்கிகொண்டார் .

 முன்பு ஒருமுறை திருவண்ணாமலை ரமண மகரிஷி ஆஸ்ரமம் சென்றபோது , யோகிராம் சூரத்குமார்  ஆஸ்ரமத்தில் மதிய உணவு சாப்பிட்டோம் .தினந்தோறும் பசியுடன் வரும் ஆயிரம்பேருக்கு மேல் அங்கு உணவு வழங்கப்படுகிறது அன்னதானம் தான் .
மீண்டும் பிராதன சாலையை வந்ததும் அரசன்விளை சந்திப்பு ஒரு சாலை இங்கிருந்தும் ராஜக்கமங்கலதிற்க்கும்,சரல் வழியாக குருந்தன்கோடுக்கும் செல்கிறது .சரல் செல்லும் சாலையில் ஒரு பெரிய ஆலமரம் எப்போதும் பார்கிறேன் இப்போதும் கண்டேன் .ஒகி சாய்க்கவில்லை .சரல் அருகில் சேனா பள்ளி உள்ளது .பள்ளி நாட்களில் சேனா பள்ளிக்கு திருநைனார்குறிச்சி வழியாக வாடகை மிதி வண்டியில் வருவோம் .மணிக்கூர் ஒரு ரூபாய் என நினைவு .சிறுவனாக இருந்தபோது பெருமாள்பிள்ளை சைக்கிள் கடையில் கால் வண்டியில் மணிக்கூர் முப்பது காசுக்கு சைக்கிள் ஓட்ட கற்றுகொண்டோம் .

 அரசன்விளை சாலையில் உள்ள கடைகளில் இருபதுக்கும் மேற்பட்ட வாழை குலைகளை தொங்க விட்டிருப்பார்கள் .பாளையங்கோட்டை ,ரசகதலி,எத்தன் ,செந்துளுவன் ,வெள்ளைதொளுவன்,பூங்கதலி,கற்பூரவல்லி ,பேயன் ,மட்டி,சிங்கன்,பச்சைபழம்................................ என .

அரசன் விளையை தாண்டி சாலையோரமாக விலையுயர்ந்த மது பாட்டில்களும் ,பீர் புட்டிகளும் கிடக்கிறது .கொஞ்சம் காலி நிலம் நீண்ட காலமாகவே இதில் எந்த பயிரும் இல்லை .எதிரில் உள்ள இடத்தில மருத்துவமனைகான இடம் என பலகை இருந்தது .ஒத்தையாக இருந்த கடையில் தேநீர் அருந்தலாம் என அமர்ந்தேன் .

ஒரு பெண்மணி கடையை நடத்துகிறார் .சட்டையில்லாமல் கையில் சிறு பொட்டலத்துடன் இருந்த பெரியவர் .எங்க இருந்து வாறீய என்றார் .நாரோல் மணவாளகுறிச்சிக்கு போறேன் .நடந்து போறீய ஏதும் வேண்டுதலா என அருகிலிருந்த நடு வயதுக்காரர் .வேண்டினால் ஒண்ணும் கிடைக்காது .செய்துதான் வேண்டியதை பெறவேண்டும் என்றேன் .

  சட்டை அணியா பெரியவர் உங்களுக்கு மனவளாகுறிச்சியா ,கன்னகுறிச்சியாக்கும் எனக்கு ,அங்க மூணு  சாயிப்புமாரு உண்டு இப்பம் மணவாளகுறிச்சில தாமசம் .நான் மணல் கம்பெனில வேலே செய்து ரிட்டைடு அங்க பண்டு கருமண்ணு செமந்து உள்ள போனேன் என்றார்  .சுல்தான் தெரியுமா என கேட்டேன்,ஆமா அவருக்க தம்பி யூசுப் ,அண்ணன் சேக்மீரான் எல்லாரும் அங்க தானே வேலே பாத்தாவே என்றார்  .

 நான் சுல்தானுக்க மொவன் என்றேன் .சாயிப்பு கம்பேனிக்க மின்ன கட போட்டிருந்தாரு ரிட்டேர்டு ஆனா பொறவு இப்பம் எப்படி இருக்காரு .இறந்துவிட்டார் இரண்டு மாதங்களுக்கு முன் என்றேன் .ஆறுதல் வார்த்தைகளுக்கு பின் . அம்மை இப்ப சொகமா இருக்கவாள ,நல்லா பாத்து கிடுங்கப்பா என்றார் .

  நான் செல்லும் வழியில் என்னுடன் அவரும் நடந்தார் வீட்டுக்காரி இறந்த பொறவு பத்து வருசமா நான் இங்க தான் இருக்கேன் மொவன் இங்க வீடு போட்டிருக்கான் .போலிசுல இருக்கான்  ராத்திரி வேலைக்கு போனான் இனிதான் வருவான் என என்னுடன் பேசிக்கொண்டே வந்தவர் .இதுதான் மொவனுக்கு வீடு போயிட்டுவா தம்பி என வாயிலை திறந்து உள் நுழைந்தார் தாத்தா என ஒரு குழந்தை கூப்பிட்டது .

 அடுத்து மாறச்சன் ஆஸ்பத்திரி .இன்னும் அதே பழைய ஒட்டு கட்டிடம் .மிக பழைய எம் பி பி எஸ் மருத்துவர் .முப்பது ஆண்டுகளுக்கு முன்பு சுற்றியுள்ள பகுதிகளில் தற்கொலை முயற்சி செய்து உயிருக்கு போராடுபவர்களை,மற்ற மருத்துவர்கள் கைவிடப்பட்ட நிலையில்  டாக்டர் மாறச்சன் மட்டுமே சிகைட்சையளிபார் .இது போலீஸ் கேஸ் என பலரும் அப்போது தயங்குவார்கள் சிகிச்சைதர .என் உறவினர் ஒருவர் வயிறை தானே பிளேடால் கீறியபோது  உடனே வெள்ளிச்சந்தை மாறச்சனிடம் கொண்டுபோங்கள் என்றார்கள்.
 இருபத்தியேழு தையல்கள் இது நடந்து 29 ஆண்டுகள் ஆகிறது .இப்போதும் நலமாக இருக்கிறார் .

அருகில் ஒரு வீட்டின் முன் கண்ணீர் அஞ்சலி ஒரு பெண் நேற்று இறந்துவிட்டார் என இருந்தது .பிறப்பு 1976 என் வயதுதான் இறப்புக்கான வயது இது இல்லையே என்றது மனம் .  வெளிச்சந்தைக்கு சற்று முன் பன்றி இறைச்சியும் ,அருகிலேயே  மாட்டிறைச்சியும் விற்கிறார்கள் .

  வெள்ளிக்கிழமைகளில் இங்கு சந்தைகூடும்  அதனால் இவ்வூர் இப்பெயர் பெற்றது .இங்கிருந்து மணவிளை செல்லும் சாலையில் அருணாச்சலா மகளிர் பொறியியல் கல்லூரி உள்ளது .ஸ்ரீ ராம தியேட்டர் இங்கிருக்கிறது அதை தாண்டி ஒரு  கல்யாணமண்டபம் ஒரு குளம் அதில் அதில் அல்லியும் ,தாமரையும் கிடந்தது  .குளக்கரைக்கு எதிர்புறம் சாலையை ஒட்டி மலகுவியல் நாற்றம் மூக்கை பிடித்து கொண்டே நடந்தேன். வீடுகளில் கழிப்பறை இருந்தாலும் இன்னும் பலருக்கு குண்டியில் புல் உரசினால் தான் மத்தது வெளிய வரும் போல .
தூய்மை இந்தியா பேசுபவர்கள் காலையில் இங்கு நின்றால்தான் அது சாத்தியமாகும் போல .குளம் தாண்டி கடலைகடை காரர் வீடு .அவர் ஆசான் வேறு முறிவுகளுக்கு கட்டு போடுவார் .அவர் மகன் ஜெயராம்ராஜ் என நண்பர் தற்போது சென்னையில் உயர்நீதிமன்ற வழக்கறிஞர்.

  வழியில் இந்து கோயில்களும் ஆலமரங்களும் பனைமரங்களும் நிறைந்த சாலை வெள்ளமடி வரை .மணவை அன்பர் ஒருவர் இருசக்கர வாகனத்தில் சென்றுக்கொண்டிருந்தவர் என்னை அடையாளம் கண்டு கையசைத்தார் .ஆம் ஊர் நெருங்கிவிட்டது .வெள்ளமடி சந்திப்பிலிருந்து ராஜாக்கமங்கலம் வழியாக நாகர்கோயில் செல்லும் சாலை ,ஈசன்தங்கு சாலை ,குளச்சல் சாலைகள் சந்திக்கின்றன .வெள்ளமடியில் சன் குழும பொறியியல் கல்லூரி உள்ளது .கேரள மாணவர்கள் அதிகம் பயில்கின்றனர் .

 பத்துக்கும் மேற்பட்ட இருசக்கர வாகனத்தில் கல்லூரி மாணவர்கள் தோற்றத்தில் ஜோடியாக வந்தவர்கள் பைக்கை நிறுத்திவிட்டு நின்றிருந்தனர்.திருவனத்தபுரம் சொந்த ஊர் கன்னியாகுமரி சென்றுவிட்டு வருவதாக சொன்னார்கள் .

 டேக் ப்ளோர் கோ .கயிற்று கம்பனி என்பார்கள் .மிதியடிகள் இன்னும் பல கயிறு பொருட்கள் உற்பத்தி நிறுவனம் .எனக்கு பதினைந்து வயதிருக்கும் போது ஆயுத பூஜை நாட்களில் இங்கு நடக்கும் பாட்டு கச்சேரி நிகழ்ச்சிகளை பார்க்க இரவுகளில் வந்துள்ளேன் .
இதன் அருகிலும் ஆலமரம் நிற்கிறது .அடுத்து கட்டைக்காடு அரசு பள்ளி அருகில் வரும்போது மணவையின் சுக்கூர் அண்ணன் தனது இருசக்கர வாகனத்தில் என்னை ஏறுமாறு சொன்னார் .இல்லை நடையாக்கும் என்றேன்  .இங்க தாமசத்துக்கு வந்தாச்சா என கேட்டார் .இல்லை என்றேன் அப்போ நாரோல் ல இருந்த நடையா என்றார் .பதிலாக சிரித்தேன் .

  அடுத்து அம்மாண்டிவிளை விளைகள் நிறைந்த ஊர் ஆதலால் இவ்வூர் இப்பெயர் பெற்றது என படித்திருக்கிறேன் .இந்த சந்திப்பில்லிருந்து இயக்குனர் பாரதிராஜா தமிழகதிற்கு அறிமுகபடுத்திய முட்டம் கடற்கரைக்கு செல்லலாம் .அங்கு கலங்கரை விளக்கமும் ,தற்போது ஜே பி ஆர் மீன்பிடி துறைமுகமும் உள்ளது .மிக அழகிய  கடற்கரைகளில் ஒன்று.பார்க்கவேண்டிய இடம் இது .ஆழி சூழ் உலகு நாவலை எழுதிய ஜோ டி குருஸ் இவ்வூரை சார்ந்தவர் .அலைகள் ஓய்வதில்லை படத்தில் பாரதி ராஜ காட்டிய முட்டம் ரயில் நிலையத்தை தேடி யாரும் இங்கு அலைய வேண்டாம் .
சாத்தன் விளைக்கு அருகில் மிமிக்ரி கலைஞர்,எனது நண்பர் என்னை கண்டார் ஓரிரு வார்த்தைகள் பேசினோம்.முன்பு மேடை நிகழ்சிகளை நடத்தியுள்ளார் .அம்மாண்டிவிளையில் புரோட்டா கடை நடத்துகிறார் .

சாத்தன்விளை கோயில் தாண்டி பெரிய இறக்கம் .இங்கிருந்து வாகனங்களில் சென்றால் மிக வேகமாக வயிறு குலுங்க செல்லும் .இந்த குத்தற ஏத்ததுல சைக்கிளிலில் கீழே இறங்காமல் போயிருக்கிறேன் .

மணி ஒன்பதே கால் .சுனிதா போனில் அழைத்தாள் என்னா சாரே போய் சேர்ந்தாச்சா என்றாள் இல்லை இப்பந்தான் மணவாளகுறிச்சி பாலம் என்றேன் .இன்னும் போய் சேரல்லையா .நீங்க ஒரு சரியான லூசு,நடக்காரம் இவுரு .வயறு கொத்துபா ஓதுமே இப்போ என்றாள்.ஆமா அஜி அக்காட்ட கேட்டேன் காப்பிக்கு என்னதுன்னு ,ஓறட்டியும் இறைச்சியும் நீ சீக்கிறம் வான்னு சொன்னா அங்க போய்தான் காப்பி குடிக்கணும் என்றேன்  .

   மணல்வாழும் குறிச்சி ,இங்குள்ள மணலில் யுரேனியம் ,தோரியம் ,கார்டனைட்,மோனோசைட்,ரூட்டைல் என தனிமங்கள் நிறைய கிடைக்கிறது .இந்திய மணல் அபூர்வ ஆலை இங்குள்ளது மத்திய அரசு நிறுவனம் .தோரியம் இந்தியாவில் அதிகமாக கிடைக்கும் கடற்கரை இது .

  நான் சிறுவனாக இருக்கும் போது நிறைய மணல் மேடுகளாக இருந்தது அனைத்தையும் எடுத்துவிட்டார்கள் இப்போது .1800 களில் ஜெர்மனியில் இந்திய கயிறுகளில் சில தனிமங்கள் ஒட்டி இருந்ததை கண்டு அது எங்கிருந்து வந்தது என ஒருவர் விசாரித்து மணவாளகுறிச்சிக்கு வந்துள்ளார்.இங்கு அவர் எதிர்பார்த்ததைவிட நிறைய தனிமங்கள் இருந்ததால் அது எப்படி வந்தது என ஆராய்ந்ததில்   வேளிமலையில் உருவாகி கடியபட்டிணம் கடலில் கலக்கும் வள்ளியாறு  கொஞ்சம் கொஞ்சமாக கொண்டு சேர்த்தது என கண்டுகொண்டார் .இந்தியாவில் சிறந்த கிராமம் என இருமுறை மத்திய அரசு விருது பெற்ற கிராமம் இது .

    மணவை சந்திப்பில் நண்பர் சிங்குடன் பத்துநிமட உரையாடல் .பின்னர் எனது தெருவான காந்தரிவிளையில் எனது சகோதரி வீட்டிற்கு சென்றேன் .சாலமி (என் சகோதரி என்னை அப்டித்தான் அழைப்பாள்) நீ நடந்தா வாற அங்கேருந்து என்றாள் .

  மிக மெதுவாக நடக்க வேண்டும் ஆர்வ கோளாறில் ஒரே நாளில் அதிக தூரம் மிக வேகமாக நடந்தால் மறுநாள் படுத்துவிட வேண்டியாதுதான் உடலை அதிகம் வருத்த கூடாது என 2009 ஆண்டு நாகர்கோயில் –கன்னியாகுமரி நடக்கும்போது நண்பர் முத்துகுமார் சொன்னார்.

  பதினோரு மணிக்கு முன் பேருந்தில் ஏறி ஒரு மணிக்குள் வீடு வந்து சேர்ந்தேன் .
கடந்த ஜனவரி 21 ம் தியதி தான் நாகர்கோவில்-மணவாளகுறிச்சி நடை சென்ற அனுபவம் இது .
03 april 2018

ஷாகுல் ஹமீது .

Monday, 25 December 2017

திற்பரப்பு அருவி


  கிறிஸ்துமஸ் தினமான இன்று காலை மகன்களுடன் குமரி குற்றாலமான திற்பரப்பு அருவிக்கு காலைகுளியலுக்கு சென்றோம் .

காலை தொழுகைக்கு வடசேரி பள்ளிவாசலுக்கு கால்நடையாக சென்று திரும்பி வர மணி ஆறரை ஆகிவிட்டது .நேற்றிரவே சாலிமும்,சல்மானும்  குளியல் ஆடைகளை எடுத்து வைத்துவிட்டே படுக்கைக்கு சென்றனர் .
Add caption


  திற்பரப்பு ,திற்பரப்பு என சொன்னதுமே சல்மான் எழுந்துவிட்டான் ,சாலிம் துயில் கலைய தாமதமாகிவிட்டது .ஏழு நாற்பதுக்கு எனது சுசுகியில் புறப்பட்டோம் .


  ஒரு மணிநேர பயணம் .நாகர்கோயில் திற்பரப்பு முப்பதைந்து கிலோமீட்டர் .விடுமுறைதினம்  ஆதலால் சாலையில் அதிக நெருக்கம் இல்லை .தக்கலையிலிருந்து பத்மனபாபுரம் அரண்மனை ,சித்திரங்கோடு குலசேகரம் வழியாக அடர் காட்டுக்குள் பயணிப்பது போல  உணர்வு .காலை குளிரை சல்மானால் தாங்கஇயலவில்லை .ஒகி  புயலில் சாய்ந்த மரங்கள் வழிநெடுகிலும் கிடக்கறது .

  திற்பரப்பு அருவியில் மிகையாக தண்ணீர் கொட்டுகிறது,பாதுகாப்பு கம்பிகளுக்கு சற்று வெளியே தண்ணீர்  .அருவியை சுற்றிலும் நீர் திவலைகள் ஐந்தடி மேல் எதுவும் தெரியவில்லை .அதிக திரள் இல்லை உற்சாக குளியல் ஒரு மணிநேரம்.விசையுடன் கொட்டும் தண்ணீருக்கடியில் ஒரு நிமிடத்திற்கு மேல் நிற்க்கவியலவில்லை நல்ல இயற்கை மசாஜ். சாலிமும் ,சல்மானும் அங்கிருந்து நீச்சல்குளத்தில் விடையாட சென்றனர் .
கையில் டீபுடன்  சாலிம்



  பத்தரை மணிக்கு அருவியிலிருந்து வெளியேறுகையில் நல்ல திரள் ,மேலும் மக்களும் ,வாகனங்களும் வந்துகொண்டே இருந்தனர் .

   இங்குள்ள  சிறுவர் பூங்காவில் சல்மான் சிறிதுநேரம் விளையாடினான் .உணவருந்தும் இடமும்,
ஆண் ,பெண் ஆடை மாற்ற இடமும் இங்கு உள்ளது .


   ஆடைமாற்றியதுமே  சல்மான் வாப்பா ,பசிக்குது ,பசிக்குது என்றான் .வெளியில் வந்து பிராதன சாலையில் இருந்த உணவகத்தில் நிறுத்தினேன் சாலிம் வாப்பா இது சுத்தமாக இல்லை நான் சாப்பிட வரவில்லை என்றான் .

இங்கு இப்படிதான் இருக்கும் ஓடல்  இங்கே கிடையாது என்றேன் .இரண்டு கிலோமீட்டர் தாண்டி ஹோட்டல் கங்கா பலகையை கண்டு நிறுத்தினேன் .

தோசையும் ,பரோட்டாவும் இருந்தது ,வெகுநாட்களாகிவிட்டது  பரோட்டா சாப்பிடுவதில்லை .தோசை என்றேன்  (கல் தோசை )அறுபது வயதை தாண்டிய ஒரு அம்மாவும் அவரது மகளும் அந்த சிறிய உணவகத்தை நடத்துகின்றனர் .

அந்த அம்மையார் கறிவிடட்டா மக்களே என்றார் என் மகன்கள் புரியாமல் விழித்தனர் .வாப்பா இது என்ன கறி  தீயல் மக்களே சாப்புடு என்றேன் .சாம்பார் இல்லையா முடிஞ்சது மக்களே என்றார் .சம்பந்தி விடட்டா என கேட்டு சட்னி கொடுத்தார் .

   பாட்டி .புரோட்டா வேணுமா ,வேண்டாம் அம்மச்சி என்றேன் .வெள்ளம் வேணுமா ,பச்சவெள்ளமா ,சூடுவெள்ளமா சல்மான் மீண்டும் புரியாமல் விழிக்க அந்த அம்மையார் குடிக்க தண்ணி வேணுமா என கேட்டார் . சல்மான் டபுள் புல்சை வேண்டுமென்றான் அணைந்திருந்த விறகடுப்பை கொஞ்சம் காய்ந்த ஓலையால் பத்தவைத்து புல்சையும் ,சாலிம்க்கு ஆம்ப்லேட்டும் போட்டு தந்தனர் .

   அன்பான உபசரிப்பு இருவரும் என்ன படிக்கிறார்கள் என கேட்டனர் .மூன்று பேருக்கும் பனிரெண்டு தோசை ,ஒரு டபுள் புல்சை ,டபுள் ஆம்ப்லேட் மொத்தம் எண்பத்திஎட்டு ரூபாய் .சமீபத்தில் இவ்வளவு மலிவாக எங்கும் சாப்பிட்டதே இல்லை .அம்மச்சி எத்ற வருசமாட்டு கடையை நடத்துதீயே என கேட்டேன் கொஞ்சம் அப்பறம் சொந்த கடை ,இது வாடகையாக்கும் .அது என்னாச்சி அம்மச்சி  அத மொவனுக்கு கொடுத்தாச்சி .மொத்தம் எல்லாம் இருவத்திமூணு வருசமாச்சி என்றார் .
  
  வில்லுக்குறி தாண்டி தோட்டியோடுக்கு முன் நொங்கு சர்பத் குடிக்க நிறுத்தினேன் .ஒரு கப் ஐம்பது ரூபாய் என்றார், அக்கா நாற்பது தானே என கேட்டேன் .இல்லை என்றார் .பத்தடி தாண்டி வேறுகடையில் நாற்பதுக்கு கிடைத்தது .கடையருகில் நின்ற பனைமரத்தை படம் பிடித்தேன் ,பாதர் காட்சனுக்கு காண்பிக்கலாம் மகிழ்வார் என்றேன் .சல்மான் வாப்பா இதுதான் நொங்கு மரமா என கேட்டான் .
ஸாலிம் 
  
 
ஓஹி சாயத்துவிட்டாள்
இந்த விடுமுறைக்கு கன்னியாகுமரி செல்ல திட்டமிடுபவர்களுக்கு உகந்த பருவநிலை இது .குமரியில் அதிகாலை சூரிய உதயமும் பார்த்துவிட்டு காலையுணவிற்க்குபின் சுசீந்தரம் கோயில் .அங்கிருந்து நாகர்கோயில் நாகராஜா கோயில் பார்க்கலாம்.

பின்னர் தக்கலை பீர்முஹம்மது அப்பா தர்கா ,பத்மனபாபுரம் அரண்மனை யும் (நானூறு வருடம் பழமையானது , திங்கள்கிழமை விடுமுமுறை )அங்கிருந்து ஆசியாவின் மிக உயர்ந்த மாத்தூர் தொட்டி பாலமும்  பார்த்துவிட்டு இறுதியாக திற்பரப்பு அருவியில் நீராடி ஒரே நாளில் உடலும் 
,மனமும் தூயமைபெற்று மகிழ்வுடன் திரும்பலாம் .
  
இந்த விடுமுறைக்கு கன்னியாகுமரி மற்றும் நாகர்கோயில் வருபவர்கள் தங்களுடைய தங்கும் இடங்களை உறுதிசெய்துவிட்டு  வாருங்கள் .ஜனவரி இரண்டாம் தியதிவரையில் எந்த விடுதியிலும் அறைகள் காலி இல்லை என்பது என்னுடைய போனஸ் தகவல்.
  மாமன் ,மச்சான் முன்னாள் காதலி ,பங்காளி போன்ற உறவினர்கள் இருப்பவர்கள் தங்குமிட கவலையின்றி இப்போதே புறப்படுங்கள் கன்னியாகுமரியை நோக்கி .விடுமுறை நாட்களை உற்சாகமானதாகுங்கள் .
  மேலும் வட்டகோட்டை,சொத்தவிளை கடற்கரை ,முட்டம் கடற்கரை,புலியுர்குருச்சி தேவசகாயம் பிள்ளை சர்ச் திருவட்டாறு ஆதிகேசவன் கோயில் ,சிதறால் மலை கோயில் பேச்சிபாறை ,பெருஞ்சாணி ,மாம்பழத்துறை அணைகள் என மேலும் பார்பதற்கு இடங்கள் உள்ளன 
தீயல் பற்றி அதிகமான கேள்விகள் வந்தால் அது  குறித்து 
விபரமாக பதிவிடுகிறேன் .

ஷாகுல் ஹமீது ,

25-12-2017

Friday, 22 December 2017

சுரேசுக்கு இன்று முதல் விருது


          
    எனது நண்பன் சுரேசுக்கு தான் எழுதிய முதல் நாவல் ஒளிர்நிழல் ,முதல் சிறுகதை தொகுப்பு நாயகிகள்,நாயகர்கள்  ஆகியவற்றுக்காக சிறந்த அறிமுக எழுத்தாளர் விருதை வாசகசாலை, தமிழ் இலக்கிய விருதுகள்  பெருமையுடன் வழங்குவதாக அறிவித்துள்ளது கண்டு எல்லையில்லா மகிழ்ச்சியடைந்தேன் .வாழ்த்துக்கள் சகோதரா .


  சுரேஷை நான் கொல்லிமலையில் ஜெயமோகன் அவர்கள் நடத்திய  புது வாசகர் சந்திப்பில் முதன்முறையாக சந்தித்தேன் .அது முதல் தொடர்கிறது அவருடன்  நட்பு .

  ஜெயமோகனின் தளத்தில் வரும் சுரேசின் கடிதங்களின் மொழி என்னை மெய்சிலிர்க்க வைக்கும் .பெருஞ்சுழி என அவரது இணைய பக்கத்தில் எழுதினார் .
   
அப்போதே என்னையறிந்தவர்களிடம் நான் சொல்லிகொண்டிருந்தேன் .தமிழின் மிக முக்கியமான படைப்பாளி உருவாகிறார் என .
  அதை அவரது முதல் நாவல் ஒளிர்நிழல் உண்மையாக்கியது .

   கடந்த வாரம் நடந்த விஷ்ணுபுரம் இலக்கிய விழாவில் ஒரு அமர்வில் வாசகர்களை சந்திக்கும் நல்வாய்ப்பை பெற்றார் .அது அவரது முதல் மேடை .என்னால் அதில் கலந்து கொள்ள இயலாமல் போயிற்று .
  
   இந்த வாரம் அவரது முதல் படைப்புக்கான விருதை பெறுகிறார் .நண்பன் சுரேசுக்கு எனது வாழ்த்துகளும் அன்பும் .உனக்கு நண்பன் என்பதில் பெருமைகொள்கிறேன் .
ஷாகுல் ஹமீது ,
23-12-2017

  

Thursday, 9 November 2017

காலே-கொழும்பு


               அதிகாலை     (டிசம்பர் 15- 2016 )  இரண்டு மணிக்கே தொலைபேசி சிணுங்கியது .ஆம் ஆறரை மாதங்கள் கப்பலில் வேலை செய்துவிட்டு ஊருக்கு செல்கிறேன்.கப்பல் சவூதி அரேபியாவிலிருந்து ஜப்பானை நோக்கி செல்கிறது .எனது ஊரான கன்னியாகுமரியை கடந்து இலங்கையின் காலே அருகில் வரும்போது கப்பலின் வேகத்தை குறைத்து அருகணைந்த படகில்  என்னையும் ,சமையல்காரர் ஆன்றனியையும்,இறக்கிவிட்டார்கள் .
  இவ்வாறு ஓடிக்கொண்டிருக்கும் கப்பலில் இருந்து இறங்குவது இதுவே எனக்கு முதல் முறை .கப்பலின் வேகத்தை குறைக்க 3 ம் நிலை பொறியாளர் தர்மா இயந்திர அறைக்கு செல்லும் போது  போனில் அழைத்து சொன்னார் .ஷாகுல் புறப்பட தயாராகு என.ஊருக்கு செல்வதற்கு முன்  கடைசி சில இரவுகள் தூக்கமின்றியும் பின் நள்ளிரவில் துயில் கலைவதும்  ,நீராடுவதும் கப்பல் பணியாளர்களுக்கு பழகியே ஆக வேண்டிய கட்டாயம்.
    மூன்றரை மணிக்கு நாங்கள் செல்ல வேண்டிய படகு எங்கள் கப்பலுடன் அருகணைந்தது அது  20மீ  நீளம் கொண்ட மிக சிறிய படகு  நான் பணிபுரிந்தது  240 மீ நீளமும் 36மீ அகலமும் 44576 மெட்ரிக் டன் எடையும் கொண்ட பிரமாண்டமான பெரிய கப்பல்  .  கப்பலும் படகும் மிக குறைந்த வேகத்தில் சென்று கொண்டிருந்தது.படகிலிருந்து எனக்கும்,ஆன்றனிக்கும் மாற்று பணியாளர்கள் மேலேறி வரவும் நாங்கள் கீழே இறங்கவும் தடிமனான கயிற்றில் மரகட்டையும் ,ரப்பராலான படிகளால் கட்டியிணைக்கப்பட்ட ஏணியை படகுவரை தொங்க விடப்பட்டுருந்தது ,போசனும் அவரது உதவியாளர்களும் படகிலிருந்து பயணபைகளை கிரேன் மூலமாக மேலேற்றி கொண்டிருந்தனர் .லேசான அலை இருந்ததால் கிரேனை இயக்குவது சற்று கடினம்தான் .
  அலையின் வேகத்துக்கு தகுந்தவாறு அருகணைந்த படகு ஆடி கொண்டும் ,மேலும்,கீழுமாக அலைகழித்துக்கொண்டிருந்தது.ஏணிக்கு இணையான உயரத்தில் படகு அலையில் மேலே வரும்போது தேர்ந்த சர்கஸ்காரனை போல ஏணியை பிடித்து மேலேறி வந்தார் பைக்கியார ராஜன் .
 என்னுடன் முன்பே வேலைசெய்தவர் கேரளாவின் பைக்கியாரா ராஜன்.     பிராமாதமாக சமைப்பார் .நண்பா ஷாகுல் நீ போகிறாயா? என கட்டியணைத்து விடைகொடுத்தார் .தொலைபேசி அட்டையும் ,இணைய அட்டையும் கொடுத்துள்ளேன் வாங்கிகொள் என்றேன் பைக்கியார ராஜனிடம். .
     சோமாலிய கடல் பகுதியில் நாங்கள் சென்றதால் கப்பலில் ஆயுதம் தாங்கிய பாதுகாப்பு வீரர்கள் எங்களுடன் பயணித்தனர் .இலங்கையை சேர்ந்த இருவர் ,போலந்து நாட்டை சேர்ந்த ஒருவர் .அவர்களும் ஆயுதங்களுடன் எங்களுடன் இறங்கினர்.ஜப்பானிலிருந்து சவூதி செல்லும் போது இதே காலேவில் கடந்த மாதம் 23 ம் தியதி அவர்கள் கப்பலில் ஏறிகொண்டார்கள்.
   நானும் ,ஆன்றனியும் ,பாதுகாப்பு வீரர்களும் ஏணியின் வழியாக படகில் பாதுகாப்பாக இறங்கினோம் .பயணப்பைகளும் பாதுகாப்பு வீரர்களின் ஆயுதங்களும் படகில் வந்ததை உறுதிசெய்துவிட்டு சைகை காட்டியதும் கப்பலும் ,படகும் பிரிந்து தாங்கள் செல்ல வேண்டிய பாதைகளில் பயணிக்க தொடங்கியது.கையசைத்து விடை பெற்றோம். சிறிதாகிக்கொண்டே சென்ற கப்பல் கண்களில் இருந்து மறைந்தது . இப்போது ஊருக்கு செல்வது உறுதியாயிற்று.

   முழுநிலவுக்கு  மறுநாள் என்பதால்  பிரகாசமாக ஜொலித்துக்கொண்டிருந்தது நிலா. பயணிகள் படகு அது நாங்கள் யாரும் உள் சென்று இருக்கைகளில் அமராமல்  படகின் பின் பகுதியில் முழுநிலவை ரசித்தவாறு அமர்ந்திருந்தோம் .
 இலங்கை அன்பர்கள் அந்த அதிகாலை நேரத்திலும் தங்கள் கைபேசியில் மூழ்கியிருந்தனர் .கரையை நெருங்கும்போது நிறைய மீன்பிடி படகுகள் கடலுக்குள் சென்றுகொண்டிருந்தது .
 ஒரு மணி நேர பயணத்திற்கு பின் காலே துறைமுகத்தை  வைகரையில் அடைந்தோம் .பகலில் வந்திருந்தால் கரைபகுதியின் அழகை  ரசித்திருக்கலாம் என்றார் என்னுடன் வந்த இலங்கை நண்பர் .
 பாதுகாப்பு வீரர்கள் துப்பாக்கிகள் அடங்கிய பெட்டிகளுடன் வேறு வாகனத்திலும் ,நாங்கள் வேறு வாகனத்திலும் ஏறிகொண்டோம்.முதலில் நான் கண்ட பெயர்ப்பலகை துறைமுக வளகாத்திற்குள்ளிருந்த வைத்தியசாலை.அந்நிய தேசத்தில் தமிழ் பெயர்பலகைகளை காணும்போதும் மனம் உற்சாகமடைந்துவிடுகிறது .
பாதுகாப்பு  வீரர்கள் 

குடியுரிமை ,சுங்க சோதனைகளை முடித்து  வெளியே வரும்போது  எதிரில் இருந்த அரசமரமும் அங்கிருந்த புத்தர் சிலையும் அந்த அதிகாலை நிலவு வெளிச்சத்தில் ஜொலித்துகொண்டிருந்ததை கண்டு மெய் மறந்தேன்.அந்த அரச மரம் இந்தியாவிலிருந்து சென்றதாக இருக்கும் அசோக சக்ரவர்த்தியின்  மகள் சங்கமித்திரை பண்டைய காலத்தில் புத்தரின் செய்தியை கொண்டு அனுராதபுரம் சென்றபோது அரசமரக்கிளை ஒன்றையும் கொண்டு சென்றாளாம் அதன் வழிதோன்றல்கள் தான்  இன்று இலங்கையிலும்,ஆஸ்திரேலியாவிலும் இருக்கிறது . இலங்கையில் எல்லா அரசமரத்தடியிலும் புத்தர் சிலை வைக்கப்பட்டு மிக சுத்தமாக பராமரிக்கிறார்கள் .
   .

   அருகிலேயே எங்கள் நிறுவன அலுவலகம், அங்கே எங்கள் பயண பைகளை வேறு காரில் ஏற்றினர் .நன்றாக விடிந்துவிட்டிருந்தது.அங்கிருந்து கொழும்புவுக்கு 116.5 கிலோமீட்டர் தூரம் இரண்டு மணிநேரம் ஆகும் என்றார் ஓட்டுனர் .காரில் தமிழ் மற்றும் ஹிந்தி பாடல்கள் ஒலித்தன .ஓட்டுனரிடம் தமிழ் தெரியுமா என்றேன் கொஞ்சமாக புரியும் என்றார் .தமிழ் படங்களை விரும்பி பார்பததாகவும் ,விஜய் ,தனுசை  பிடிக்கும் ,தனுசை ரொம்பவே பிடிக்கும் என்றார் .தனுசையா என மீண்டும் ஒருமுறை கேட்டு உறுதி செய்து கொண்டேன் . ..
  



காலே –கொழும்பு கார் பயணம் மேற்கு கன்னியாகுமரி மாவட்டம்,கேரளாவில் பயணிப்பது போலவே இருந்தது .சாலைகளில் தமிழ் பெயர்பலகைகள் அதை இன்னும் உறுதி செய்தது .

   கொழும்புவை நெருங்கும்போது காலை நேர பரபரப்பும் ,வாகன நெரிசலும் துவங்கியிருந்தது .இருசக்கர வாகன ஓட்டிகளும் ,பின் இருக்கையில் அமர்ந்து பயணம் செய்யும் பெண்களும் தலைகவசம் அணிந்தே செல்கின்றனர் .சாலையோரத்து வணிக வளாகங்களும் ,கடைகளும் இன்னும் திறக்கவே இல்லை .நிறைய கடைகளுக்கு கண்ணாடி கதவுகளே இருந்தது.          காரோட்டியிடம் கேட்டேன் திருட்டு போவது இல்லையா என .மிக குறைவுதான் அதையும் கண் காணிப்பு கேமரா காட்டி கொடுத்துவிடும் விரைவில் பிடித்துவிடுவர் .அதை கேட்டு எனக்கு ஆச்சரியமாக இருந்தது .



  
எட்டரைக்கெல்லாம் எட்வர்ட் ஒழுங்கை(Edward lane ) யிலிருக்கும் விடுதியை அடைந்தோம் .உயர்தர நட்சத்திர விடுதி அது .கண்ணாடி அணிந்த இளம்பெண் ஆயுபவன்  என சிறிய பற்கள் தெரிய வரவேற்று கடவுசீட்டை வாங்கி எங்களது அறை சாவிகளை தந்துவிட்டு .பயண பைகள் அறைக்கு வந்துவிடும் நீங்கள் செல்லுங்கள் என்றாள். தமிழ் தெரியுமா என ஆங்கிலத்தில் கேட்டேன் சுமாராக பேசுவேன் நன்றாக புரிந்துகொள்வேன் என்றாள் .
  அங்கிருந்து தொலைபேசியில் என்னுடன் பலமுறை பணிபுரிந்த காப்டன் பெர்னாண்டோவை அழைத்தேன் .ஷாகுல்  நீ வருவதை முன்பே அறிவிப்பதில்லையா என கேட்டார் .மின்னஞ்சல் செய்திருந்தேன் என்றேன் .இதுபோன்ற விசயங்களை போனில் தெரிவிக்க வேண்டுமென்றார்.உன்னை நான் சந்திக்க இயலாது நான் இப்போது அனுராதபுரத்திலிருக்கிறேன்.நேற்று தான் வந்தேன் .உன்னை சந்திக்க முடியாததில் வருத்தம் என்றார் .தொலைபேசியில் தொடர்பில் இருக்குமாறு கேட்டுகொண்டார்.

  எங்களது பைகள் வந்ததும் ஆன்றனி அறைக்கு வந்தார் காலையுணவுக்கு செல்லலாம் என்றார் .உணவு கூடத்திற்கு சென்றோம் .அறை எண்ணை கேட்டுவிட்டு  எங்களை உள்ளே அனுமதித்தனர் .



  

பபே சிஸ்டம் வேண்டியதை சாப்பிடலாம் ஆப்ப சட்டியை பார்த்து கிடைக்குமா என்றேன் .பத்து நிமிடத்திற்குள் சூடாக தந்தனர் . கொஞ்ச நேரம் தூங்கிவிட்டு வெளியே செல்லலாம் என அறைக்கு வந்து படுத்தேன் .உடனேயே ஆன்றனி வந்து கதவை தட்டினார் .காலணியும் சில பொருட்களும் வாங்க வேண்டும் வெளியே செல்லலாம் நீயும் வா என்றார் .கடந்த ஆறரை மாதத்தில் எங்கும் வெளியில் செல்லவில்லை எந்த பொருளும் வாங்கியிருக்கவில்லை .
  காலணி கடை அருகிலேயே இருந்தது .ஆனால் அவர்கள் அமெரிக்க பணத்தை வாங்குவதில்லை எங்களிடம் இலங்கை பணம் இல்லை சாலையில் கொஞ்சம் நடந்தோம் .சம்பத் வங்கியை கண்டு நுழைந்தோம் பணம் மாற்ற வேண்டுமென சொன்னோம் .கடவு சீட்டை கேட்டார் வங்கியிலிருந்த பெண்மணி .
  மீண்டும் அறைக்கு வந்து கடவு சீட்டுடன் சென்றோம் நல்ல வெயில் கடல்  அருகில் இருப்பதால் காற்றில் ஈரப்பபதம் காரணமாக உடல் வியர்வையில் நனைந்தது .
  நாங்கள் சென்ற கடையில் உள்ள காலணிகள் ஆன்றனிக்கு பிடிக்கவில்லை நானே பார்த்து வாங்கி கொள்கிறேன் என்றார் .நான் அறைக்கு வந்து படுத்தேன் தூங்கி எழுந்து உணவருந்தி நீர்கொழும்பு போவதாக திட்டம் .

 படுத்த சிறிது நேரத்தில் மீண்டும் ஆன்றனி வா மதிய உணவுக்கு செல்வோம் என்றார்.நான் அப்போது பசியில்லாமலே சென்றேன் .அவருக்கு மாலை நான்கு மணிக்கு செல்ல வேண்டும் இரவு எட்டு மணிக்கு விமானம் .


        Fish combo  எனும் உணவுக்கு ஆர்டர் தந்துவிட்டு கொஞ்சம் பச்சை காய்கள் சாப்பிட்டேன் .கணவாய் ,நண்டு ,இறால் ,லாப்ஸ்டர் பொரித்த மீன் என ஒரு தட்டு நிறைய வந்தது .எனக்கு அது மிக அதிகம் .இவ்வளவு இருக்கும் என எதிர் பார்க்கவில்லை ,கொஞ்சம் வெள்ளை சாதம் வேண்டுமென கேட்டேன் .நல்ல சுத்தமாகவும், சுவையுடன் இருந்தது .
    

     இரண்டு மணிக்கு தூங்கி நான்குக்கு எழுந்து நீராடி அருகிலிருந்த பிம்பிலபட்டி  புகைரத நிலையம் (அங்கு அப்படிதான் எழுதியிருந்தது )சென்றேன்.கடற்கரையை ஒட்டியிருந்தது ரயில் பாதை.நல்ல கூட்டம் பணி முடிந்து ஆண்களும் அழகு பெண்களும் வீடு திரும்பும் நேரம் .

  முதலில் வந்த ரயில் கொழும்பு வரை மட்டுமே என்றனர் .இரண்டாவது வந்த ரயிலில் ஏறிக்கொண்டேன் .ஒன்றேகால் மணி நேரம் என்றனர் அப்போதே மணி ஐந்தேகால் ஆகியிருந்தது .
  ரயில் பெட்டிகள் சென்னை ஐ.சி.எப் தயாரிக்கப்பட்டது .அங்குள்ள பெயர் பலகைகள் இதுவரை நான் பார்த்திராதது .மலசழ கூடம் என  கழிப்பறையில் எழுதியிருந்ததை கண்டேன் .

  கொள்ளிபட்டி ,கோமாட,மருதான,கந்தான,ஜா-எல எனும் நிலையங்களை கடந்தபின் நீர்கொழும்புவில் இறங்கும்போது இருட்டிவிட்டிருந்தது .
    வெளியில் வந்து ஆட்டோ பிடித்து கடற்கரைக்கு சென்றேன் .ஆட்டோ ஓட்டுனர் கணேசன் தமிழில் பேசினார் .

   கடற்கரை மிக குறைவான கூட்டமே இருந்தது.பெரும்பாலனவர்கள் இருப்பிடம் திரும்பி கொண்டிருந்தனர் .கடற்கரையில் ஒரு நீண்ட நடை சென்றேன் .

  வெளிச்சம் குறைவான இடத்தில் இருந்த மீன்பிடி படகில் காதல் ஜோடி ஒன்று ஓருடலாக இருந்தனர் .அவர்களை தொந்தரவு செய்யாமல் விலகியே நடந்தேன் .
  
அங்கிருந்த ஒரு கோயில் மிக அழகிய  வண்ணவிளக்குகளால் அலங்கரித்திருந்தது  என்னை கவர்ந்தது .பௌத்த ஆலயமாக இருக்கலாம் கடலை பார்த்தவாறு சிறிது நேரம் அமர்ந்திருந்தேன் .ஆட்டோ இறக்கி விட்ட இடத்திற்கே மீண்டும் வந்து பிரதான சாலையை அடைந்தபோது கேரளாவின் கோவளம் கடற்கரை சாலையில் இருப்பதுபோல உணர்வு .
  வரும்போது ஆட்டோவிற்கு நூற்றிஐம்பது கொடுத்தேன் .இப்போது முந்நூற்றி  ஐம்பது கேட்டான் .வரும்போது நூற்றிஐம்பது  தான் கொடுத்தேன் என கூறினேன் இருநூறு க்கு ஒத்து கொண்டு வந்தார் அவரும் தமிழர் .
  மணி ஒன்பதை தாண்டியிருந்ததால் கொழும்பு  கடைசி ரயிலும் சென்றிருந்தது .பேருந்து நிலையம் சென்றேன் .தனியார் வேன்கள்  இயக்க படுகிறது கொழும்புக்கு  இருபது இருக்கை கொண்ட டோயோட்டோ வேன்.
  நல்ல தரமான சாலை ஒன்றரை மணி நேரத்தில் கொழும்பு .கொழும்பு பேருந்து நிலையத்தை சுற்றி வந்தேன் .ஒரு கறுப்பு டீயும் குடித்தேன் .

  பேருந்து நிலையத்தில் இருந்து வெளியே வந்தேன் சற்று தூரத்தில் கொழும்பு புகைரத நிலையதிற்கு வெளியில் வீடில்லாத பெரும்பாலானோர் தங்கள் படுக்கையை (படுக்கை என்பது ஒரு துண்டு துணிதான் )விரித்து துயில தொடங்கியிருந்தனர் .மழை காலத்தில் இவர்கள் எங்கு படுப்பார்களோ ?

 
     

  

  அங்கிருத்த ஒரு சலூனில் முடி வெட்டி ,முக சவரம் செய்துகொண்டேன் .இலங்கை பணத்திற்கு முந்நூறு கொடுத்த நினைவு .
  அங்கிருந்து பேருந்தில் எனது விடுதியறையை அடைந்தேன் .மதியம் நல்ல மீன் உணவு சாப்பிட்டதில் இரவுணவு தேவைபடவில்லை .
  குளித்து முடித்தபோது வரவேற்பறையில் இருந்து போனில் அழைத்தார்கள் காலை உங்களை அழைத்துசெல்லும் கார் நான்கரை மணிக்கு வருமென .

    குளித்து கொண்டிருக்கும்போது எழுத்தாளர் ஜெயமோகனின் நண்பர் ஈரோடு கிருஷ்ணன் அவர்களின் நினைவு வந்து .அவர் பெரும்பாலும் பயணங்களில் புதிய ஊரில் இரவில் நீண்ட நடை செல்வார் .
  மணியை பார்த்தேன் பனிரெண்டு ஐ நெருங்கியிருந்தது .கீழே வந்து பிராதன சாலையில் ஒரு கருப்பு டீ குடித்துவிட்டு நடக்க ஆரம்பித்தேன் .கொஞ்ச தூரம் வந்தபின் பிராதன சாலையிலிருந்து விலகி கடற்கரையும் ,ரயில் பாதையும் அதை ஒட்டிய சாலையில் தந்தந்தனியே நடக்க ஆரம்பித்தேன் .அந்நிய தேசத்தில் இருக்கிறோம் என்ற உணர்வே இல்லை .சாலையில் ஆள் நடமாட்டமே இல்லை  ஒரு இருசக்கர வாகனமும் ,ஒரு ஜீப்மும் மட்டுமே சென்றது .

   பயமின்றி நள்ளிரவில் உள்ளுரிலேயே தனியாக நடப்பது சாத்தியமில்லை .மிக பாதுகாப்பான ஊர் இது என நினைத்துகொண்டேன் .மெக்ஸிகோவின் வெராகூருஸ் லிம் நள்ளிரவில் தனியாக நடை சென்ருக்கிறேன் .
  மீண்டும் பிராதன சாலைக்கு வந்து விடுதிக்கு செல்லும் பாதையில் நடந்தேன் .பூட்டியிருந்த நிறைய வணிக வளாகங்கள் கண்ணாடி மட்டுமே இருந்தது .உள்ளே உள்ள பொருட்களை பார்க்கவும் முடிந்தது எனக்கு வியப்பாய் இருந்து .
  
இரவில் கண்ணாடி கதவால் மட்டுமே பூட்டிய கடை 
  முதலில் தேநீர் குடித்த அதே கடையில் மீண்டும் ஒரு கறுப்பு டீ குடித்துவிட்டு .அறைக்கு சென்று வரவேற்பறையில் காலை மூன்றரைக்கு என்னை எழுப்ப சொல்லிவிட்டு உடல் கழுவி படுக்கையில் ஒரு மணி .
 காலை எழுந்து நான் நீராடி முடித்தபின் தான் வரவேற்பறையிலிருந்து அழைத்தார்கள் .கார் வந்ததும் அழைக்க சொன்னேன் கார் முன்னரே வந்துவிட்டது என்றனர் .
   
       ஓட்டுனர் சபீக் இரவிலேயே வந்து விடுதிக்கு முன்பு வண்டியை நிறுத்திவிட்டு  அதிலேயே தூங்கியுள்ளார் .காலையில் எக்காரணத்தை கொண்டும் தாமதமாக கூடாது என்பதற்காக .

     ஒரு மணி நேரத்தில் சென்றுவிடலாம் என்றார் .சீனா இப்போது இங்கு தரமான சாலைகளை போட்டு தந்துள்ளனர் .முன் இருக்கையில் அமர்ந்ததும் சீட் பெல்டை அணிந்து கொள்ள சொன்னார் .வாகன ஓட்டிகள் அனைவரும் சாலை விதிகளை தவறாமல் கடைபிடிப்பதை கேட்டேன் சபீக்கிடம் .ஆம் இங்கு வாகன போக்குவரத்து சட்டங்கள் சற்று கடுமையாக இருக்கிறது என்றார் .குடித்துவிட்டு ஓட்டினால் என்ன தண்டனை என கேட்டேன் .கேள்வியே இல்லை உரிமம் ரத்து செய்யப்படும் .

   உரிமம் ரத்தா அப்படியெனில் யாரும் நினைத்துகூட  பார்க்கமாட்டார்கள் என நினைத்துகொண்டேன் .அதிகாலை சாலையில் வாகனங்கள் இல்லை .எங்கள் முன் ஒரு போலிஸ் ரோந்து வாகனம் மிக மெதுவாக சென்றுகொண்டிருந்தது .அதை நாங்கள் முந்தி சென்றோம் .நெடுஞ்சாலை முடிவில் உள்ள சுங்க சாவடியில் நாங்கள் நின்றபோது போலிஸ் ஒருவர் வந்து வண்டியை ஓரமாக நிறுத்தசொன்னார் .
 எதோ இரவு நேர சோதனை என நினைத்து கொண்டேன் .நான் இறங்கவேண்டுமா என சபீக்கிடம் கேட்டேன் வேண்டாம் என்றார்.
  ஐந்து நிமிடந்தில் வந்து விட்டார் .எங்கள் வண்டியில் பின்னால் இருந்த ஒரு சிகப்பு விளக்கு எரியவில்லை அதற்காக ஆயிரம் ரூபாய் அபதாரம் அன்று மாலைக்குள் அதை சரி செய்திருக்க வேண்டுமென கட்டளை .நாங்கள் முந்தி வந்த போலிஸ் வாகனம் தான் அது .சுங்க சாவடி வரை எங்களை பின் தொடர்ந்து வந்திருக்கிறார் குறைந்தது ஆறேழு கிலோமீட்டர்கள்.
  
    விமான நிலையத்தை சீக்கிரமாகவே வந்துவிட்டோம் .சபீக் பயண பைகளை இறக்கிவிட்டு சவாரி முடிந்ததற்கான படிவத்தில் கையொப்பம் பெற்று சென்றார் .


   ஸ்ரீ லங்கன் ஏர் லைன்ஸ் விமானம் ஏழே  முக்காலுக்கு .முன்பே இணையத்தில் இருக்கை பதிவு செய்திருந்தேன் .அதனால் அவசரமின்றி பொறுமையாக சென்றேன் .ஐம்பது நிமிட பயணம் மட்டுமே கொழும்புவிலிருந்து திருவனந்தபுரத்திற்கு .இதுதான் என் வாழ்வில் மிக குறைந்த நேர விமான பயணம் எந்த கடினமும் இல்லை .ஏறும் போதே அடுத்த ஒருமணி நேரத்தில் இறங்கிவிடுவோம் என்பதால் கூடுதல் உற்சாகம் .சௌதியிலிருந்து விடுமுறைக்காக ஊருக்கும் செல்லும் குமரி மண்ணின் மைந்தர்கள் விமான நிலையத்தில் நண்பர்கள் ஆகியிருப்பார்கள் போல கேலியும் கிண்டலுமாக பேசி கொண்டு அந்த காலை எட்டுமணிக்கே விமான பணிப்பெண்னிடம் ஆளுக்கு இரண்டு பீர் வாங்கி குடித்தனர் .

ஸ்ரீலங்கன் ஏர் லயன்சின் விமான பணிப்பெண்கள் மிக அழகாக சேலை கட்டியுருந்தனர் .ஆரல்வாய்மொழியில் காற்றாடிகள் சுழல்வதை விமானத்தில் இருந்து பார்க்கும்போது வீட்டிற்கு அருகில் பறந்துகொண்டிருக்கிறேன் எனும் உற்சாகம் . மகன்களுக்கு அரையாண்டு தேர்வு அதனால் சுனிதாவும் குழந்தைகளும் விமான நிலையம் வரவில்லை .

    நண்பர் நாகராஜனை அழைத்தேன்.பணிகளுக்கிடையில் விமான நிலையம் வந்திருந்தார் .என்னுடன் பயணித்த ஸ்ரீநிவாஸ் தந்தை மலையாளி ,தாய் இலங்கை .தந்தை பஹ்ரைன் நாட்டில் வேலைசெய்தபோது திருமணம் செய்து கொண்டாராம் .தந்தைக்கு உடல் நலமில்லாமல் இருப்பதால் பெற்றோருக்கு தெரியாமல் ஊர் வருகிறான்.அவர் கருநாகப்பள்ளி செல்ல வேண்டும் அவனை தம்பானூர் பேருந்து நிலையத்தில் இறக்கிவிட்டு விட்டு ஊர் போய் சேர்ந்தோம் .எப்போதும் என்னை அழைத்து செல்ல வரும் பாஸ்கரன் அண்ணனின் வாடகைக் காரில் .