Thursday, 19 November 2026

கடலும் கதிரும் - விக்னேஷ் ஹரிஹரன்.

 

கப்பல் காரன் டைரி - நூல் வாங்க

விக்னேஷ் ஹரிஹரன் சன்னி ஜாய் நாட்குறிப்புகள் நூலுக்கு எழுதிய உரை 




கடல், கப்பல், வணிகம் போன்ற சொற்களைப் படித்தவுடன் நம் வாசிப்பின் படிநிலைக்கு ஏற்ப சாண்டில்யனோ, ஜோ டி குரூஸோ, சங்கப் பாடல்களோ நினைவு வருவது இயல்பு. பொதுவில் கடல் தமிழ்ப் புனைவின் செல்லம். காரணம், கடல் பற்றி நம்மிடம் இருக்கும் கற்பனைகளுக்கு இணையாக அனுபவங்கள் இல்லை. மிக நீண்ட கடற்கரையைக் கொண்ட மாநிலம் என்பதாலோ என்னவோ நாம் பெரும்பாலும் கடற்கரையிலேயே நின்றுவிட்டோம். 



தமிழில் நிலவும் ஏனைய துறைசார் தரமான புத்தகங்களுக்கான பற்றாக்குறைக்கு நிகராகவோ கூடுதலாகவோதான் கடல், கப்பல்துறை சார்ந்த புத்தகங்களுக்கான பற்றாக்குறையும் நிலவுகிறது. கடந்த ஒரு நூற்றாண்டில் அந்த துறையும் அது சார்ந்த வாழ்க்கையும் அடைந்திருக்கும் மாற்றங்கள் ஜோ டி குரூஸின் கட்டுரைகள் போன்ற மிகக் குறைவான அபுனைவுகளிலேயே பதிவு செய்யப்பட்டிருக்கிறது. குறிப்பாக கப்பல், மாலுமி வாழ்க்கை போன்றவை எனக்குத் தெரிந்து விரிவாகப் பதிவு செய்யப்படவில்லை. இணையத்தின் பரவலாக்கமும் பிளாக் எழுத்துக்களும் வரத் தொடங்கிய பிறகுதான் இந்தத் துறை மிக மெல்ல கவனம் பெறத் தொடங்கியது. இந்த அடிப்படையிலேயே ஷாகுல் ஹமீதின் கப்பல்காரன் நாட்குறிப்புகள் என்ற இணையப் பக்கம் முக்கியத்துவம் பெற்றது. தன் கடலோடி வாழ்வில் பல கப்பல்களில் இயந்திரக் கைவினைஞராகப் பணியாற்றிய ஷாகுல் ஹமீத் தன் அனுபவங்களைத் தொடர்ந்து பதிவேற்றத் தொடங்கியபோது அந்த வலைப்பக்கம் பரவலான கவனம் பெற்றது. 



கப்பல்காரன் நாட்குறிப்புகளின் ஒரு பகுதியான “சன்னி ஜாய் நாட்குறிப்புகள்” கொரோனா பெருந்தொற்றுக் காலத்திற்குப் பிறகான அவரது முதல் கப்பல் பணி அனுபவங்கள். கப்பல்காரன் நாட்குறிப்புகளில் மிகப் பரவலாக வாசிக்கப்பட்ட பகுதிகளுள் ஒன்று சன்னி ஜாய் நாட்குறிப்புகள். தன்னளவிலேயே கடும் பணியும், ஆபத்துகளும், அசாத்தியமான அனுபவங்களும் நிறைந்த கப்பல் வாழ்வில் நோய் தொற்றுக் காலப் பதட்டம், அது உருவாக்கிய பொருளாதார நெருக்கடி, அவை கப்பல்துறையையும் அது சார்ந்த மனிதர்களையும் பாதித்த விதம், போன்ற விஷயங்கள் உருவாக்கிய தாக்கத்தைப் பதிவு செய்கிறது சன்னி ஜாய் நாட்குறிப்புகள்.


கப்பல் வாழ்வின் நுட்பமான விவரணைகள், தகவல்களின் வழியே நாம் இதுவரை அறியாத யதார்த்த கப்பல் வாழ்வின் அனுபவங்கள் இந்த நூலில் பதிவு செய்யப்படுகின்றன. அவற்றின் புதுமைக்கும் சிறப்புக்குமான முக்கியக் காரணம், அவை ஒரு கப்பல் நிர்வாகியின் அனுபவங்களாக இல்லாமல் சராசரி கப்பல் ஊழியரின் அனுபவங்களாக இருப்பதே. அதன் விளைவாக இந்த அனுபவங்களில் உருவாகும் நுட்பம் தனித்துவமானது.




மேலும் இந்த அனுபவங்கள் எந்த பாவனைகளும் இல்லாத கள்ளமற்ற குரலில் எழுதப்பட்டிருக்கின்றன. கொரோனா பாதித்துவிட்டதாக பயப்படும் ஃபிலிபைன்ஸ் நாட்டுக்காரனான கப்பாவுக்குக் கபசுரக் குடிநீர் கொடுக்க விரையும் ஷாகுல் ஹமீதில் வெளிப்படும் அதே கள்ளமற்ற தன்மைதான் சீனப் பெண்களின் சமூக நிலையை இந்தியப் பெண்களுடன் ஒப்பிட்டுப் பேசும் இடத்திலும் வெளிப்படுகிறது. தன் யதார்த்த குரலையும் கள்ளமற்ற தன்மையையும் இந்த நாட்குறிப்புகளில் அப்படியே பதிவு செய்திருக்கிறார் ஷாகுல் ஹமீத். வாசகர்களை அசத்தும் நோக்கமின்றி அவர்களையும் தன் சக பயணிகளாகவே கருதி அண்மையிலிருந்து உரையாடுகிறார். 



கப்பாவுக்குக் கொரோனா, சீனப் பெண்ணின் இந்தியா பற்றிய மனப்பதிவு, சீனத் துறைமுக அனுபவங்கள், போன்ற இடங்கள் இந்த நாட்குறிப்புகளில் முக்கியமானவை. இத்தகைய நூதன அனுபவங்களுக்கு நிகராகவே கப்பல் பணியின் அன்றாடச் சிக்கல்களும், சந்தோஷங்களும், யந்திர அறையின் வெப்பமும், கப்பலின் அதிகார அடுக்கும், பன்மைத்துவமும், நட்பும், கப்பல் பணியில் எப்போதும் சமீபித்து இருக்கும் மரணத்தின் சாத்தியங்களும் பதிவு செய்யப்படுகின்றன.



ஆனால் இவை அத்தனைக்குப் பிறகும் ஷாகுல் ஒரு கதிரெழுகையை ரசிக்கத் தவறுவதில்லை. அதுவே இந்த “சன்னி ஜாய்” நாட்குறிப்புகளின் முதன்மைச் சிறப்பு. அதுவே நான் அறிந்த ஷாகுல் அண்ணாவின் குணம்.

விக்னேஷ் ஹரிஹரன்,

இலக்கிய விமர்சகர், கட்டுரையாளர்.




Wednesday, 18 November 2026

சமர்ப்பணம்


 யாவரும் பதிப்பகம் வெளியீடாக வரவிருக்கும் கப்பல் காரன் டைரி (சன்னிஜாய் நாட்குறிப்புகள்) நூலை எனது மூத்த சகோதரர் மாஹீன் அவர்களுக்கு சமர்ப்பணம் செய்துள்ளேன்.

18-nov-2026




மணவாளக்குறிச்சி கிராமத்தில் பாபுஜி பள்ளியில் பன்னிரெண்டாம் வகுப்பு படிக்கும்போது தான் தெரிந்தது நல்ல மதிப்பெண் பெற்றால் இஞ்சினியரிங் படிக்க முடியுமென. அரசு தேர்வில் பள்ளியில் முதல் மாணவாக தேறி மெரிட்டில் அரசு கல்லூரியில் இடம் கிடைக்க நான்காண்டு பொறியியல் படிப்பை முடித்தபின் வேலை தேடி மும்பைக்கு சென்று பட்டினியும், பசியுமாக நல்ல வேலை கிடைக்காமல் இருந்த நாட்களில் நண்பர்கள் மூலமாக கப்பல் பணிக்கான தேர்வு குறித்து அறிந்து பார்பர் ஷிப் கப்பல் நிறுவனத்தில் தேர்வாகி கொச்சி ஷிப் யார்டில் ஆறு மாத பயிற்சியை முடித்துவர அந்நிறுவனம் சொல்லியது. கட்டணம் அறுபத்திஐயாயிரம் ரூபாய்.

   வாப்பாவிடம் “வேலைக்கு போய் நானே வீட்டை திருப்புவேன்” என உறுதியளித்து வீட்டை அடமானம் வைத்து பயிற்சியை முடித்தபின். பயிற்சி இஞ்சினியாராக 1997ஆம் ஆண்டு பணியில் இணைந்தார் எனது மூத்த சகோதரர் மாஹீன். பத்துமாதம் முதல் கப்பலில் பயிற்சியை முடித்து வந்தவர் “இனி நம்ம குடும்பத்துல இருந்து யாரும் கப்பலுக்கு போவாண்டாம்” என்றார். 

 அதுவே என் மனதிலும் ஆழமாக பதிந்திருந்தது. கப்பல் வேலை வேண்டாம் என. 1997ஆம் ஆண்டு நானும் வேலை தேடி மும்பை சென்றேன். நிறைய கஷ்டங்களை அனுபவித்தபின் நண்பன் ஜெயசிங் சொன்னான். சிலபயிற்சிகள் முடித்து கப்பலுக்கான ஆவணங்களை எடுத்து விட்டால் உன்னாலும் கப்பல் பணியில் இணைய முடியும் என.

 2000மவது ஆண்டு சென்னையில் பயிற்சியை முடித்து ஆவணங்களுக்கு (CDC) விண்ணபித்தேன் பத்து மாதங்களுக்குப்பின் என் விண்ணப்பம் நிராகரிக்கபட்ட  தகவல் கிடைத்தது. மீண்டும் விண்ணபித்து பெற்றேன். வேலை கிடைக்காமல் முகவர் ஒருவர் என்னிடம் வாங்கிய பணத்துடன் காணாமல் போக. நான் ஈராக் போர்முனைக்கு பணிக்கு சென்றேன். 

 இறுதியாக 2005 மே மாதம் துபாய் நிறுவன கப்பலில் பணியில் இணைந்தேன்.எட்டுமாதம் பணி செய்து திரும்பி வந்ததும் மூன்றாம் இஞ்சினியராக இருந்த எனது அண்ணன் அவரது நிறுவனத்துக்கு அழைத்து சென்றார். இருபது ஆண்டுகளாக ஒரே நிரறுவனத்தில் பணிசெய்கிறேன். என் மூத்தவர் முப்பது ஆண்டுகளாக அதே நிறுவனத்தில் இருக்கிறார்.

   நான் கப்பல் பணியில் இணைந்ததே அவரால் தான். கப்பலில் முதன்மை இஞ்சினியராக(CHIEF ENGINEER) பணிபுரியும் எனது மூத்த சகோதரர் மாஹீனுக்கு இந்த நூல் சமர்ப்பணம்.

நாஞ்சில் ஹமீது,

  At sea,

16 may 2026.



Tuesday, 17 November 2026

நூல் வெளியீடு , கப்பல் காரன் டைரி (சன்னி ஜாய் நாட்குறிப்புகள்)

 


நண்பர்களே எனது முதல் நூல் ஈராக் போர்முனை அனுபங்கள்.

இரண்டாவது நூல் கப்பல் காரன் டைரி (சன்னி ஜாய் நாட்குறிப்புகள்)

யாவரும் பதிப்பகம் வெளியிடுகிறது.



வரும் சனிக்கிழமை மதுரை புத்தக கண்காட்சியில் யாவரும் பதிப்பக அரங்கு 129, 130இல் மாலை நான்கு மணிக்கு அரங்குக்கு வெளியே வெளியீடு நடைபெறும். வாய்ப்புள்ள நண்பர்கள் அனைவரையும் அழைக்கிறேன்.

எழுத்தாளர் dr சுனீல் கிருஷ்ணன் முதல் பிரதியை வெளியிடுவார். முப்பது ஆண்டுகளாக கப்பலில் பணிபுரியும் முதன்மை இன்ஜினியர் மாஹீன் முதல் பிரதியை பெற்றுக்கொள்கிறார்.

 முதன்மை இன்ஜினியர் மாஹீன் எனது மூத்த சகோதரர் அவருக்கு இந்நூலை சமர்ப்பணம் செய்துள்ளேன்.

நாஞ்சில் ஹமீது.

17 Nov 2026


Tuesday, 20 October 2026

ஈராக் போர்முனை அனுபவங்கள் . கா சிவா

 

ஈராக் போர்முனை அனுபவங்கள் : நாஞ்சில் ஹமீது

ஈராக் நாட்டின்மீது எனக்கு தனிப்பிரியம் உண்டு. என் தந்தை அவர் பணியாற்றிய இந்திய ரயில்வே துறை மூலமாக ஐந்தாண்டுகள் ஈராக்கில் பணியாற்றினார். அங்கு ரயில்பாதை அமைப்பதற்கு இந்திய ரயில்வே ஒப்பந்தம் மேற்கொண்டிருக்கக்கூடும்.  ஈராக்கில் பணியாற்றியபோது அவர் பெற்ற ஊதியத்தைக் கொண்டே எங்கள் ஊரான சிவலாங்குடியில் எங்களுக்கென ஒரு வீடு கட்டப்பட்டது. மேலும் அங்கிருந்து அவர் திரும்பியபோது சதாம் உசேன் படம் பதியப்பட்ட சிவப்பு டிசர்ட் ஒன்றை வாங்கி வந்தார். ஓராண்டு அதை போட்டுக்கொண்டு திரிந்தேன். அந்த வீடு தற்போது இல்லையாயினும் அப்போது ஈராக்கின் மேல் ஏற்பட்ட பிரியம் இன்றும் நீடிக்கிறது. 

   எனவே “ஈராக் போர்முனை அனுபவங்கள்” நூலை ஆர்வத்துடன் வாசிக்கத் தொடங்கினேன். எவ்வித தயக்கமுமின்றி மடைதிறந்தது போன்று பேசக்கூடிய ஷாகுல் ஹமீதுடன் பழகியவன் என்பதால் வாசிப்பதெல்லாம் அவரே நேரில் சொல்வது போன்றே தோன்றியது. கிடைத்த நேரங்களில் வாசித்து இரண்டு நாளில் வாசித்து முடித்தேன். 

       ஆசிரியர் ஜெயமோகன், ஷௌகத். தி. ஜானகிராமன் – சிட்டி ஆகியோருடைய  பயண நூல்களை வாசித்திருக்கிறேன். அந்நூல்கள் திட்டமிட்டு பயணம் செய்த அனுபவங்களை அங்கே கண்டவற்றின் முந்தைய இன்றைய நிலைகளை விவரிப்பதாக இருக்கும். அவை அநேகமாக பயணம் நிகழ்ந்த உடனேயே எழுதப்பட்டவை. இந்நூல் பணி நிமித்தமாக சென்றவர் அந்த சூழலையும் அங்கு ஏற்பட்ட அனுபவங்களையும் பனிரெண்டு ஆண்டுகளுக்குப் பின் தன் நினைவிலிருந்து மீட்டு எழுதியது. இத்தனை ஆண்டுகளுக்குப் பின்னும் நினைவில் நீடிப்பவற்றை மட்டுமே எழுதியிருக்கிறார் என எடுத்துக் கொள்கிறேன். இதுவே இந்நூலை சிறப்பு மிக்கதாக மாற்றுகிறது. 

    மும்பையில் வேலை தேடி அலைவதையும் உடன் இருந்த நண்பர்களையும் பற்றி முதல் இரு அத்தியாயங்களில் எழுதியுள்ளார். நேர்முகத் தேர்வில் கேட்கப்படும் கேள்விகள் பற்றிய விவரனை இவரது இலகுவான மொழிக்கு உதாரணம். குவைத்தில் உள்ள அமெரிக்க இராணுவத்திற்கு உணவு தயாரித்து வழங்கும் பணிகளுக்கு ஆட்களை தேர்வு செய்கிறார்கள். உணவகப் பணிக்கான உதவியாளராக பணி புரிய முடிவு செய்து  நேர்முகத் தேர்வில் கலந்து கொண்டு தேர்வும் பெற்று விடுகிறார். இவரோடு இவரது சில நண்பர்களும் தேர்வாகிறார்கள் என்பது இவருக்கு மகிழ்ச்சியை அளிக்கிறது. குவைத்தில் பணிக்கான தேவை குறைந்ததும் ஈராக்கிற்கு செல்ல சம்மதிப்பவர்களைத் தவிர பிறரை ஊர்களுக்கு அனுப்ப முடிவு செய்கிறார்கள். ஷாகுல் ஈராக் செல்ல முடிவெடுக்கிறார்.  ஈராக் செல்லும் பயணம் திகில் நிறைந்ததாக உள்ளது. அந்தத் திகிலினை வாசிப்பவர்களையும் உணர வைக்கும் வகையில் ஷாகுல் எழுதியுள்ளார்.

    இதுவரை காணாத நிலப்பரப்பு , நான் உணராத அந்த போர்ச்சூழல், இக்கட்டான சூழலில் வெளிப்படும் மனிதர்களின் குணங்கள் என   நூலின் ஒவ்வொரு அத்தியாயத்திலும் ஆச்சர்யப்படுத்தும்படி ஏதோவொரு விசயம்   இருக்கிறது.

   ஒவ்வொரு அத்தியாயமும் ஒரு சிறுகதை போலவே உள்ளது. பொருத்தமான தலைப்புகளிட்டு ஒரு விசயத்தைத் தொடங்கி படிப்படியாக விவரித்து ஒரு உச்ச தருணத்தோடு முடிப்பதால் அவ்வாறு தோன்றுகிறது. மேலும் ஒவ்வொரு அத்தியாயத்தின் கடைசிப் பத்தி அந்த அத்தியாயத்திற்கான திரண்ட கருத்து போல ஆசிரியரால் கூறப்படுகிறது. நூலின் சிறப்பம்சம் என இதையே கருதுகிறேன். அதுவொரு தத்துவம் போலவும் மூத்தவரின் அனுபவ மொழி போலவும் மிளிர்கிறது. பயணம் சென்றபோதே எழுதியிருந்தால் இது இடம் பெற்றிருக்காது. இத்தனை ஆண்டுகளுக்குப் பிறகு அதனை அசைபோட்டுப் பார்க்கும்போது இவருக்குள் திரண்டெழுந்த கருத்துகள் இவை. இவை நூலின் மதிப்பை அதிகரிக்கிறது.  

   உதாரணமாக  அமெரிக்க இரானுவ வீரர்களிடம் “ஒன் டாலர் ப்ளீஸ்” எனக் கேட்கும் தமிழர்களைப் பற்றிய “திரைகடலோடித் திரவியம் தேடிய தமிழர்களில் சிலர்…” என்ற அத்தியாத்தின்  கடைசிப் பத்தி 

//உள்ளூரில் இருப்பதைப் போலத்தான் அயல்மண்ணிலும் இருக்கும் தமிழர்கள். பொறுப்பானவர்களும், பொறுப்பற்றவர்களுமான கலவை. ஆனால் ஒருவனுக்கு பொறுப்பில்லாமல் தான் செய்யும் மோசமான செயல் மொத்த குழுவிற்கும் அவமதிப்பைத் தரும் என்ற எண்ணமே இல்லாமலிருப்பதைத்தான் ஏற்றுக்கொள்ளவே முடியவில்லை. பீகாரியை ‘பான்பராக் வாயன்’ என்று நக்கல் செய்து மகிழும் நம்மை அந்த முகாமில் என்ன சொல்லியிருப்பார்கள்? ஒரு டாலர் பிச்சைக்காரன் என்றுதானே. தனிமனிதனின் சுய ஒழுக்கமே சமூக ஒழுக்கமாக மாறுகிறது என்பதை உணர்ந்துகொள்ள முடிந்த நிகழ்வுகள் இவையெல்லாம்//

சதாம் கைது செய்யப்பட்டதைக் கூறும் அத்தியாயம் //வீரம் என்பது காப்பதற்குப் பயன்பட்டால்தான் மதிப்பு. பிறரை அழிக்கப் பயன்பட்டால் வீரம் பொருளிழந்து போகிறது. சதாமின் இறுதி வீரமும் அவர் பிற இனமக்களுக்குச் செய்த அழிவால் பொருளிழந்து போனது// என முடிகிறது. எத்தனை உள்ளார்ந்த கருத்து.  எப்போதும் புன்னகையுடன் வெள்ளந்தியாக பேசிக்கொண்டிருக்கும் ஷாகுல் இவ்வாறெல்லாம் கருதுகிறாரே என ஆச்சர்யம் தோன்றியது.

   பலவித பண்பாடுகளில் வளர்ந்தவர்கள் ஒன்றுகூடி வாழ்வது சற்று சிரமம்தான். ஆனால் போர் போன்ற ஒரு நெருக்கடி நிலையில் உயிர் வாழ்ந்தால் போதும் என்ற நிலையில் அத்தனை பண்பாடுகளுக்கும் அடிப்படையான மனதநேயம் அனைவரையும் ஒன்றிணைக்கும். இணைந்து போராடுவதற்கான மனவுறுதியையும் நம்பிக்கையையும் அளிக்கும் என்பதை பல அத்தியாயங்களில் விவரித்துள்ளார். 

      அவளாகவே வந்து பழகி, பின் ஏனென்று தெரிவிக்காமல் பிரிந்து சென்ற  பாயல் என்ற தோழியும், ஊரில் மனைவி இருப்பதால் வேறு பெண்ணுடன் நடனமாடுவதையும் தவிர்த்த ஒடிஸ் என்ற நண்பனும் மறக்கவியலாத மனிதர்களாகிவிட்டார்கள். ஒடிஸை சான்றாண்மை கொண்டவன் என ஷாகுல் விவரிப்பதன் காரணத்தை நூலைப் படித்து அறிந்து கொள்ள வேண்டும் எனக் கோருகிறேன்.  

     சேர்ந்து உண்பதைப் பற்றியும் அடுத்தவர்களுக்கு உணவளிப்பதைப் பற்றியும் அடுத்தவேளை உணவு நிச்சயம் இல்லாத நிலையில் உண்பதே கடைசி உணவாக இருக்கக்கூடும் எனக் கருதி உண்பதைப் பற்றியும் உள்ள அத்தியாயங்கள் மனதை நெகிழ வைக்கின்றன.

   ஈராக்கில் பணிபுரிந்த அத்தனை நாட்களுமே இவர்கள் பணி புரிந்த இடத்தின்மேல் குண்டு விழுமோ என்ற பயத்துடனேயே இருந்துள்ளார்கள். மனம் அந்தப் பயத்திற்கு ஆட்பட்டிருந்த நிலையிலும் சுற்றி நடந்தவற்றை இந்த அளவு கூர்ந்து நோக்கியுள்ளாரே என வியப்பு ஏற்படுகிறது. அல்லது அந்த பயத்தினால்தான் இந்தளவு கூருணர்வுடன் இருந்துள்ளார் என்றும் தோன்றுகிறது. 

  இந்தக் கூருணர்வை தக்க வைத்துக் கொண்டு பயண அனுபவங்களோடு புனைவுகளையும் நாஞ்சில் ஹமீது எழுத வேண்டும் வாழ்த்துகிறேன்.

யாவரும் பதிப்பகம், இணையத்தில் வாங்க

கா. சிவா
கரவுப்பழி, அமிழ்தலும் மிதத்தலும் முதலிய நூல்களின் ஆசிரியர்.


Discover more from

Subscribe to get the latest posts sent to your email.

உரையாடலுக்கு

 

 

திரட்டு

சேகரம்

Latest Posts

Go toTop