Saturday, 1 October 2016

ஈராக் போர்முனை அனுபவங்கள் 8

சுக்கிரியாவை தேடிய கமல் 
   நாங்கள் மொத்தம் நூறுபேரில் 75 பேர் திருமணமாகாதவர்கள் ,என்னை போல திருமண வயதை அடைந்தவர்கள் தான் அதிகம்பேர் அங்கிருந்தோம்.
  இங்கு வந்தவர்கள் ஒவ்வொருவருக்கும் ஒரு காரணம் இருந்தது .
  2011 செப்டம்பர் 11 ல் அமெரிக்காவின் இரட்டை கோபுரம் தரைமட்டமானதில், அமெரிக்க விசா கிடைக்கததால் உல்லாச கப்பலுக்கு தேர்வாகி இருந்த பலரும் இந்த வேலைக்கு வந்தனர் ,நீண்ட நாட்கள் வேலை கிடைக்காதவர்கள், தான் விரும்பிய வேலை கிடைக்காததால்,  ஏஜென்ட் அனுப்பிவைதவர்கள் என .
   அந்நியதேசத்தில் மொழி வாரியாக தான் இருகின்றனர். சாப்பிடும்போதும் தொலைக்காட்சி பார்க்கும்போதும் என பெங்காலிகள் ஒரு கூட்டம்,ஹிந்தியும்,மாரத்தியும் பேசுபவர்கள் ஒன்றாக ,கோவா அன்பர்கள் தனிகூட்டம் ,தமிழ் ,மலையாளம் கொஞ்சம் ஒத்துபோகிறது .தென் மாநிலத்தவர்கள் தான் அதிகாமாக வெளிநாடுகளில் வேலை செய்கின்றனர் என தோன்றுகிறது .வடமேற்கு ,வடகிழக்கு மாநிலத்தவர் எவரும் இல்லை .
   6 மாதங்களுக்கு பிறகு எங்களுக்கு என தனி தொலைக்காட்சி அறை ஒன்று தந்தார்கள் .ஹிந்தியும் ,ஆங்கில படமும் போடுவார்கள் .அப்போது தான் தமிழ் ,மலையாளிகள் ஒன்றிணைந்து எங்கள் மொழி படம் வேண்டும் என சொன்னார்கள் .பிரச்சனை பெரிதானபோது வாரத்தில் இரண்டு நாட்கள் ,தமிழும் ,மலையாள படமும் என முடிவானது .
   கிருஷ்ணன் தான் அதற்க்கு பெரிய முயற்சி எடுத்துகொண்டார் .சேட்டா எதேங்கிலும் ஒரு படம் இடனும் ,இல்லங்கி அவ மாரு வேற சினிமா இடும் .நம்மள திவசம் விடாம் பாடில்லா .
         ஆனால் நான் பார்த்ததில் பெரும்பாலனவர்கள் தமிழ்,மலையாள படங்களை  அதன் கதைக்காக பார்க்கின்றனர்.சங்கரின் பாய்ஸ் படம் கோவா அன்பர்கள் மத்தியில் பெரும் வரவேற்பை பெற்றிருந்தது .

  ஸ்டோர்ஸ் ல் கமலஹாசன் மட்டும் இரவு பணியில் இருப்பார் இரவு தட்டு முட்டு சாமான்கள் ஏதாவது அடுமனைக்கு தேவைபட்டால் கொடுக்க ,  நான் ஒருநாள் காலையில் 6 மணிக்கு வெளியே வந்தபோது அண்ணே இந்த சுக்கிரியா எங்கண்ணே இருக்கு எல்லா கண்டெய்னர்லயும்தேடி பாத்துட்டேன் என்றான் கமல் , உனட்ட கேட்டது யாரு கமல் .அந்த பெங்காலிதான் கேட்டான் என சொன்னான் .

  இங்கு வேலை செய்த தமிழர்கள் பலருக்கு ஹிந்தி  தெரியாது ,அதில்  கமலும் ஒருவன்   ஒருநாள்  அவனை கலாய்க்க அவனிடம் சுக்கிரியா வேண்டுமென கேட்டுள்ளனர் ,பாவம் இரவு முழுவதும் தேடி இருக்கிறான் நாற்பது அடி நீளமுள்ள நாற்பது கண்டெய்னர்களில் சுக்கிரியா அவனுக்கு கிடைக்கவேயில்லை .

   
  கமலும் ,முருகனும் கேம்ப் பாயாக இருந்து நல்லா வேலை செய்கிறார்கள் என்பதால் ஸ்டோர்ஸ் க்கு பதவி உயர்வுபெற்றார்கள் .டெர்ரி ஆண்டெர்சன் தான் அவர்களை அனுப்பி வைத்தார் .
  டெர்ரி ஆண்டெர்சன்  எங்கள் ப்ராஜெக்ட் மானேஜர் .அவருடைய காரை ஒருநாள் முருகன் ,கமலிடம் கழுவிவிட சொன்னார் அவர்கள் கேம்ப் பாயாக இருந்தபோது .வண்டியை கழுவி முடித்ததும் அவர்கள் சாவியை கொண்டு கொடுத்தனர் .ஆண்டர்சன் என்னை அழைத்து .ஷாகுல் என்னுடைய காரை எடுத்துவா என சொன்னார் .தூரத்தில் நின்ற பஜெரோ காரை நகர்த்தியதும் முருகன் பாய் வண்டிய நூறுல ஓட்டிகாட்டு என்றான் .வேகம் நூறை தொட்டதும் வண்டியை லேசாக திருப்பினேன் வண்டி அபாயகரமாக திரும்பியதில் இருவரும் அலறிவிட்டனர் போதும் நூறில் சென்றது என்றான்.

   முருகன் 24  வயதை பூர்தியடையாதவன் .தமிழை தவிர வேறு மொழி தெரியாது , ஆனால் திறமைசாலி எளிதில் எதையும் புரிந்து கொள்வான்.கற்றுகொள்ளும் ஆர்வம் உள்ளவன் .எங்களுடன் இருந்த நீல் தான் அவர்கள் இருவருக்கும்  ஒரு ஆசிரியராக இருந்து வண்டி ஓட்ட கற்று கொடுத்தான் .
    வீடு கட்டி முடித்தவுடன் திருமணம் என்றான் அதுபோலவே ஒரு வருடத்திற்குள் புதிய வீட்டில் குடியேறும் நாளன்று அவனது திருமணம் நடந்தது முதல் ஆண்டு அவன் தங்கைக்கு திருமணம் பெரும் பொருள் அவனே கொடுத்திருந்தான் .
    ஒருநாள்  உணவு நேரத்தில் எதார்த்தமாக உணவு கூடத்தின் வெளியே சென்றேன் .அது மதிய உணவு நேரம் .வீரர்கள் சாப்பிட்டுவிட்டு தொட்டியில் போடும் தட்டுகளை உடனுக்குடன் மாற்ற வேண்டும் இல்லையெனில் உணவு நேரத்தின்போது அங்கிருக்கும் பத்து தொட்டிகளும் நிறைந்துவிடும் .அவர்கள் எச்சில் தட்டுகளை போட இடம் இல்லாமலாகிவிடும் .எனவே உடனுக்குடன் அப்புறபடுத்த பணியாளர்கள் இருப்பர் .
  நான் அன்று அங்கு சென்றபோது நமது தமிழ் அன்பர்கள் தட்டுகளை போடும் வீரர்களிடம் சார் ஒன் டாலர் ப்ளீஸ் என கேட்டதும் கோபமடைந்தேன் .எம்பா இப்படி பிச்சை கேட்டு மானத்தை வாங்குறீங்க,     இங்க தான் நல்ல சம்பளம் தாரங்களே ? பாய் நாங்க குவைத்திலே இப்படி பத்தாயிரம் ரூபாய் சம்பாதிச்சோம்  என்றனர் .
   இனிமேல்  இப்படி பிச்சை எடுத்து மானத்தை வாங்காதீர்கள் என்றேன் .
      
   ஒரு நாள் காலை உணவின் போது வேறு கம்பனியில் வேலை செய்யும் தர்மராஜு தட்டில் ஆரஞ்சு பழத்துடன் வந்தார் .அவர் எங்கள் உணவு கூடத்தில் சாப்பிட அனுமதிக்கபட்டிருந்தார் .
   என்னா அண்ணே டெய்லி ஆரஞ்சு தின்னுதிய போல  என கோபால்  ஆமா நல்லதுன்னு சொன்னாங்க .ஆமான்னே இடி அமின்ட்ட இப்படிதான் அது மத்ததுக்கு நல்லதாக்கும் சொல்லி அவன் டெய்லி நாற்பது ஆரஞ்சு தின்னனாம் தெரியுமா .
   தர்மராஜிவின் நிறுவனம் வேறு அவர்களின் குடியுருப்பும் தனியாக இருந்தது. சில மலையாளிகளும் உண்டு அவர்கள் சில நேரங்களில் தென்ந்திய உணவை  சுவையுடன் சமைப்பார்கள் .முதலில் நாங்கள் ஒன்றிரண்டு பேர் அவர்களிடம் போய் சாப்பிடுவோம் ,பின்பு தினமும் பத்து,பதினைந்து பேராகிவிட்டது .பருப்பு ,சாம்பார் பொடி,அப்பளம் போன்றவை அவர்களுக்கு குவைத்திலிருந்து வரும் ,பாலை கொடுத்தால் தயிர் ,மோராக செய்து தருவார்கள் .
  உணவின் சுவைகாரணமாக  நாங்கள்  பொருட்களை கொடுப்போம் .மீன் ,இறால் ,கோழி என  நாங்கள் சாப்பிட ஆசைபடுவதை ,கொல்லைப்பக்கம் வழியாக தான் .ஏனென்றால் நாங்கள் தான் அதிகம் அங்கு சாப்பிடுவோம் .
  மலையாளிகள் குடிக்காமல் இருப்பது கொஞ்சம் கஷ்டம் போல டப்பாகளில் அடைத்த அன்னாசிப்பழம் ,அல்லது வேறு எதையாவது கேட்பார்கள்  ,அதில் ஈஸ்ட் சேர்த்து ஏழு,அல்லது எட்டு நாள்களில் அதை கள் போன்ற போதை வஸ்துவாக மாற்றி குடிப்பார்கள் .
    எங்களது கழிப்பறைகளில் தண்ணீர் இருக்காது ,குளியலறை அருகில் தான் இருந்தது நம்மவர்களுக்கு தண்ணீர் வேண்டுமே காலி பாட்டில்களில் குளியலறையிலிருந்து தண்ணீர் நிரப்பி செல்வோம் .
  தண்ணீரை வீணாக்குவதை பார்த்தால் நான் கண்டிப்பேன் குளியலறையில் முக சவரம் செய்பவர்கள் பலர் குழாயை திறந்தே வைத்திருப்பார் .நான் மூட சொல்லி வீணாக்காதே என்பேன் .
   ஒருநாள் போர்க் லிப்ட் வாகனத்தில் அமர்ந்திருந்தேன் கோபால் தண்ணீர் பாட்டிலுடன் சென்று கொண்டிருந்தான் .அவன் கழிப்பறை செல்கிறான் என யூகித்தேன் .
  கோபால் வா என்றேன் .
 கொஞ்சம் தண்ணிதாப்பா ,மூடியை திறந்தபோது குளிர்சாதன பெட்டியிலிருந்து அப்போது தான் எடுத்திருக்கிறான் என கைகளில் பட்ட குளிர்ச்சி உணர்த்தியது ,புதிய பாட்டில் அது  நான் அதன் மூடியை  உடைத்த வாறே கேட்டேன்  கோபால் எங்க போறா என்றேன் .
  டாய்லேட் போறேன் ,
  அதுக்கு பிரிட்ஜ் ல இருந்து மினரல் வாட்டர் தான் வேணுமா உனக்கு குண்டி கழுவ ,எவ்ளோ காலி பாட்டில் இருக்கு அதுல தண்ணி கொண்டு போலாம் இல்ல என கேட்டேன் .
  அவன் தஞ்சை விவசாயி .உங்கூர்லதானே தண்ணி இல்லாம விவசாயி தற்கொலை செஞ்சான் என கோபத்துடன் கேட்டேன் .
  இங்க நூறு பேரு இருக்காங்க எல்லாரையும் உன்னால திருத்த முடியுமா எவ்ளோ பேரு மினரல் வாட்டர் தான் கொண்டு போறாங்க தெரியுமா ?பாய் .
  இங்க பாரு கோபாலு நீ என் பிரண்டு நீ முதல்ல திருந்து .
மதத்தவ எல்லாம்தானா திருந்துவான் .
  என்னிடம் முன்னரே சிலர் சொல்லியி வருத்தப்பட்டனர்  கழிப்பறைக்கு சிலர் பாட்டிலில் அடைத்த தண்ணீரை உபயோகிப்பதாக .
  இந்த முகாமில் எங்களுக்கு தண்ணீர் பிரச்சனையே இல்லை .ஒரு டாங்கர் லாரியும் தண்ணீர் தீர ,தீர டைகிரிஸ் ஆற்றிலிருந்து கொண்டு வருவார் அதன் ஓட்டுனர் எகிப்து நாட்டை சேர்ந்தவர் .அரண்மனை வளாகத்துக்குள் தான் தண்ணீர் நிரப்பும் இடமும் .
   எகிப்தின் ஓட்டுனர் தான் வெள்ளிகிழமைகளில் இமாமாக ஜும்மாவை அங்கிருந்த பள்ளிவாசலில் நடத்துவார் .நல்ல உயரமும் ,பெரிய தொப்பையும் உடைய உடல்வாகு .
  ஒருநாள் வயிற்று வலியுடன் அவதிப்பட்ட அவர் எங்கள் குழுவில் இருந்த ஆண் நர்ஸிடம் மருந்து கேட்டுள்ளார் .நீ நிறைய சாப்பிடுகிறாய் ,தின்னுத குற வயிற்று வலி சரியாவும் என்றாராம் எகிப்தின் ஓட்டுனர் என்னிடம் சொல்லி அவரை திட்டி கொண்டிருந்தார் .
காலை 9 மணிக்கு பகல் பணி துவங்கும் எட்டரைக்கு போய் சாப்பிட்டு 9 மணிக்கு எல்லாம் எங்கள் மானேஜர் நடத்தும் பத்து நிமிட கூட்டத்திற்கு பின் தான்  வேலை துவங்கும் .அது ஒரு நல்ல உத்தி .வெப்பம் அதிகமான நாட்களில் தண்ணீர் அதிகம் குடியுங்கள் எனவும் ,குளிரான நாட்களில் அதற்குரிய உடைஅணியவும் ,தேநீர் குடிக்கவும் ஆலோசனை சொல்வார்.அன்று செய்ய போகும் வேலைகளை தெளிவாக காலையிலேயே விவாதிப்போம் .
   கடின பணி என்றால் உதவி கேட்கலாம் .முடியாததை சொல்லிவிட்டால் மாற்றுவழி குறித்தும் விவாதிப்போம் .வேலை சீக்கிரம் முடிந்துவிட்டால் உடன் பணி செய்பவருக்கு உதவி செய்வோம் .அப்படியும் அன்றைய பணி முடிந்துவிட்டால்.மானேஜரிடம் சொல்லிவிட்டு  ஓய்வு எடுக்க சென்று விடலாம் .
     எனக்கு எப்போதும் சீக்கிரமாகவே வேலை முடிந்துவிடும் .நண்பன் லோகேஷ் தான் எனக்கான உணவையும் கொண்டுவருவான் .இரவுணவு உணவு கூடத்தில் நாங்கள் சாப்பிடுவதில்லை .நீராடி ,ஆடை மாற்றி தங்கும் கூடாரத்தின் வேலையே ஒரு மேஜையை போட்டு ,அதன் நடுவில் சிறிய விளக்கை வைப்போம் ,கேண்டில் லைட் டின்னர் போல .பின்னர் பொறுமையாக உணவை பிரித்து ,தட்டுகளில் வைத்து பேசிக்கொண்டே சாப்பிடுவோம் .கார்த்திக்கிற்கு இரவு பணி ஆதலால் சில நேரம் வந்துவிட்டு சீக்கிரமே சென்று விடுவான் .நாங்கள் வேறு யாரையும் சேர்ப்பதில்லை .யாரும் எங்களுடன் வர விரும்பவும் இல்லை.
       லோகேஷ் கடமை தவறாதவன் .எப்போதும் தான் செய்வதை சிறப்பாக செய்ய வேண்டும் என நினைப்பான் .எவ்வளவு கடினமான பணி என்றாலும் .நண்பர்கள் நாங்கள் கடமை தவறும்போது திட்டுவான் .

 லோகேஷ்க்கு  திருச்சி பாலகரையில் வீடு .ஒருவருட சமையல்கலையில் பட்டய படிப்பு படித்தவன் .
 ஷாகுல் ஹமீது
02-10-2016

1 comment:

  1. நல்ல அழகான பதிவு. திருமணவயதில் உள்ள வீட்டைவிட்டு பிரிந்து அன்னிய தேசத்தில் பணிபுரியும் இளைஞர்கள் மத்தியில் நடப்பனவற்றைஅப்படியே காட்சிப்படுத்தி இருந்தீர்கள். பாஷை புரியாமல் தேடிக்கொண்டிருந்த நண்பர், சொந்த பாஷையில் தொலைக்காட்சி பார்க்க எடுத்த ப்ரயத்தனங்கள்,நண்பர்களுக்குள் நடக்கும் இயல்பான உரையாடல்கள் என அழகாய் இருந்தது. நீங்கள் 100 இல் ஓட்டிக்காட்டிய காரும் குடிநீர் வேணாவதில் உங்களுக்கிருந்த தார்மீக கோபமும், அன்னிய தேசத்திலும் dignified ஆக பணிபுரியவேண்டுமென்ற உங்கள் நியாயமான விருப்பமும், பிச்சை எடுப்பது போல டாலர் கேட்டவர்களை கண்டித்ததும் மிக நன்றாக இருந்தது கூடவே உங்களின் குணத்தையும் ஓரளவிற்கு ஊகிக்கமுடிந்தது. அந்த பணி துவங்கும் முன்னாலான 10 நிமிட கூட்டம் மிக அருமையான நிர்வாகவியல் உத்தி சாகுல். this is the best part of your writing.
    தீரத்தீர திகிரிஸ் ஆற்றிலிருந்து கொண்டுவரப்படும் தண்ணீரும், அந்த லாரி ஓட்டுனரும் அவரின் வயிற்றுவலியும் உங்களின் அருமையான அந்த canlde light இரவு உணமுமாக பல்வேறு காட்சிக்கலவைகளுடனிருந்தது இந்த பதிவு. குண்டு வெடிப்பும் மனநிலை பிறழ்வும், வருத்தங்களுமான கடந்த பதிவுகளின் தாக்கத்திலிருந்து மீண்டு வர செய்யவே இதை எழுதினீர்கள் என்றுகூட சொல்லி விடலாம்.
    வாழ்த்துக்களுடன்
    லோகமாதேவி

    ReplyDelete